ᐅᖃᓚᐅᑎᓯᐅᑏᑦ

You are here

ᐃᒥᐊᓗᖃᕈᓐᓇᐅᑎᒧᑦ ᐱᔪᓐᓇᐅᑎᒥᒃ ᓂᕈᐊᖅᑎᑦᑎᓛᖅᑐᑦ ᐃᖃᓗᖕᓂ

ᓯᑎᐱᕆ 22, 2022

ᑭᒃᑯᑐᐃᓐᓇᓄᑦ ᑐᓴᒐᒃᓴᖅ ᒐᕙᒪᒃᑯᓐᓂ
ᐃᒥᐊᓗᖃᕈᓐᓇᐅᑎᒧᑦ ᐱᔪᓐᓇᐅᑎᒥᒃ ᓂᕈᐊᖅᑎᑦᑎᓛᖅᑐᑦ ᐃᖃᓗᖕᓂ

ᓄᓇᓕᖕᓂ ᓂᕈᐊᖅᑎᑦᑎᓛᖅᑐᑦ ᐃᖃᓗᖕᓂ ᐅᑐᐱᕆᐅᓕᖅᐸᑦ ᓂᕈᐊᕐᓗᑎᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᖕᓇᖅᑐᓕᕆᓂᕐᒧᓪᓗ ᑲᑎᒪᔨᖏᑦ ᐃᓗᖁᑎᖓᑕ ᓯᓚᑖᓂ ᑐᓂᓯᖃᑦᑕᕈᓐᓇᕐᓂᐊᕐᒪᖔᑦ ᑐᓂᓯᖃᑦᑕᔾᔮᙱᒻᒪᖔᓪᓘᓐᓃᑦ ᐱᔪᓐᓇᐅᑎᓂᒃ ᓄᓇᓕᖕᓂ ᐃᒥᐊᓗᓕᐅᖅᑎᓄᑦ ᐱᐊᒥᒃ ᓂᐅᕐᕈᑎᖃᕐᓂᐊᕐᓗᑎᒃ ᓇᖕᒥᓂᕆᔭᒥᓂᒃ.

ᐃᒡᓗᖁᑎᖓᑕ ᓯᓚᑖᓂ ᐱᔪᓐᓇᐅᑎᖃᕈᓐᓇᖅᑎᑕᐅᕗᑦ ᐃᒥᐊᓗᓕᕆᓂᕐᒧᑦ ᐱᖁᔭᖅ ᒪᓕᒃᖢᒍ, ᑭᓯᐊᓂ, ᓄᓇᓕᖕᓂ ᓂᕈᐊᖅᑎᑦᑎᔭᕆᐊᖃᖅᐳᑦ ᓄᑖᒥᒃ ᐱᔪᓐᓇᐅᑎᒥᒃ ᓯᕗᓪᓕᖅᐹᑦᑎᐊᒥ ᑐᓂᓯᓂᐊᕈᑎᒃ ᓄᓇᓕᖕᓂ.

ᓂᕈᐊᖅᑎᑦᑎᓕᖅᐸᑕ ᐃᖃᓗᖕᒥᐅᓂᒃ ᓂᕈᐊᖁᔨᓂᐊᖅᐳᑦ ᐊᖏᕐᓗᑎᒃ ᐋᒃᑳᕐᓗᑎᒡᓘᓐᓃᑦ ᐅᑯᓄᖓ ᐊᐱᖅᑯᑎᓄᑦ: "ᓈᒻᒪᒃᓴᖅᐲᑦ ᐃᒡᓗᖁᑎᖓᑕ ᓯᓚᑖᓂ ᐱᔪᓐᓇᐅᑎᑖᖁᔨᓪᓗᑎᑦ ᐃᖃᓗᖕᓂ?"

ᐊᖏᖅᑕᐅᒃᐸᑦ, ᐃᖃᓗᖕᓂ ᐃᒥᐊᓗᓕᐅᖅᑎᑦ ᐱᓇᔪᒍᓐᓇᖅᑎᑕᐅᓕᕐᓂᐊᖅᐳᑦ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᖕᓇᖅᑐᓕᕆᓂᕐᒧᓪᓗ ᑲᑎᒪᔨᖏᓐᓄᑦ ᐃᒡᓗᖁᑎᖓᑕ ᓯᓚᑖᓂ ᐱᔪᓐᓇᐅᑎᒥᒃ ᓂᐅᕐᕈᑎᖃᕈᓐᓇᖅᓯᓗᑎᒃ 12x355ml ᐃᐳᐃᑦᑐᓂᒃ ᐅᕝᕙᓘᓐᓃᑦ ᐊᓕᒍᕐᓂᒃ ᐱᐊᓂᒃ ᐅᓪᓗᖅ ᐊᑕᐅᓯᖅ ᓂᐅᕕᕆᐊᖅᑐᓄᑦ ᐃᓂᖓᓂ.

ᐃᒥᐊᓗᓕᕆᓂᕐᒧᑦ ᐱᖁᔭᖅ ᒪᓕᒃᖢᒍ, 60 ᐳᓴᖏᑦ ᓂᕈᐊᖅᑏᑦ ᓂᕈᐊᕆᐊᖃᖅᐳᑦ "ᐊᖏᕐᓗᑎᒃ" ᐊᓯᔾᔩᖁᔨᒃᐸᑕ. ᓂᕈᐊᖅᑐᑦ "ᐋᒃᑳᖅᐸᑕ", ᓂᐅᕈᑕᐅᕙᒃᑐᑦ ᐱᔪᓐᓇᐅᑎᖏᑦ ᓱᖁᓯᔾᔮᙱᑦᑐᖅ.

ᐃᖃᓗᖕᓂ ᓂᕈᐊᖅᑎᑦᑎᓛᖅᑐᑦ ᐅᑐᐱᕆ 24, 2022-ᒥ, ᓂᕈᐊᖅᐸᒌᔭᓛᖅᖢᑎᒡᓗ ᐅᑐᐱᕆ 17, 2022-ᒥ.

ᑭᒡᒐᖅᑐᐃᔨᑦ ᑮᓇᐅᔭᓕᕆᔨᒃᑯᓐᓂᙶᖅᑐᑦ ᐊᒻᒪᓗ  ᓂᕈᐊᖅᑐᓕᕆᔨᒃᑯᑦ ᓄᓇᕗᒻᒥ ᑭᒃᑯᑐᐃᓐᓇᓂᒃ ᑲᑎᒪᑎᑦᑎᓛᖅᑐᑦ ᐅᑐᐱᕆ 12−ᒥ, 2022, ᑐᑭᓯᒋᐊᖅᑎᑦᑎᓗᑎᒃ ᓂᕈᐊᖅᑎᑦᑎᓂᐅᑉ ᒥᒃᓵᓄᑦ, ᓄᓇᕗᒻᒥ  ᐃᒥᐊᓗᓕᕆᓂᕐᒧᑦ ᒪᓕᒐᕐᓂᒃ ᓂᕈᐊᖅᐸᓪᓕᐊᓂᐊᖅᑐᓂᓪᓗ.

ᐅᑯᐊ ᖃᐅᔨᒪᔭᕆᐊᓕᑦ ᐅᓪᓗᐃᑦ:

ᑭᒃᑯᑐᐃᓐᓇᓂᒃ ᑐᑭᓯᒋᐊᖅᑎᑦᑎᓗᑎᒃ ᑲᑎᒪᓂᐊᖅᑐᑦ − ᐅᑐᐱᕆ 12, 2022.
ᓂᕈᐊᖅᐸᒌᕈᒪᔪᓄᑦ ᐅᓪᓗᖓ −− ᐅᑐᐱᕆ 17, 2022.
ᓂᕈᐊᕐᓇᐅᑉ ᐅᓪᓗᖓ − ᐅᑐᐱᕆ 24, 2022.

ᑐᑭᓯᒋᐊᒃᑲᓐᓂᕈᒪᒍᔅᓯ ᓂᕈᐊᖅᑎᑦᑎᓂᐊᖅᑐᑦ ᒥᒃᓵᓄᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᓯ ᐅᕗᖓ liquor@gov.nu.ca ᐅᖄᓚᓗᑎᓪᓘᓐᓃᑦ ᐅᕗᖓ 867-222-9705.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᐅᐃᑦᓰᓐ ᑦᓵᓐ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca