ᐅᖃᓚᐅᑎᓯᐅᑏᑦ

You are here

ᐃᓄᓕᒫᑦ ᑲᑎᒪᑎᑕᐅᓂᐊᖅᑐᑦ ᖃᒪᓂ'ᑐᐊᖅᒥ ᐃᒥᐊᓗᓕᕆᓂᕐᒧᑦ ᓂᕈᐊᕐᓗᑎᒃ

ᐄᐳᕈ 07, 2021

ᒐᕙᒪᒃᑯᓐᓂᑦ ᐃᓄᓐᓄᑦ ᑐᓴᕋᑦᓴᖅ

ᐃᓄᓕᒫᑦ ᑲᑎᒪᑎᑕᐅᓂᐊᖅᑐᑦ ᖃᒪᓂ'ᑐᐊᖅᒥ ᐃᒥᐊᓗᓕᕆᓂᕐᒧᑦ ᓂᕈᐊᕐᓗᑎᒃ

ᑭᐅᔾᔪᑎᖃᕐᓂᕐᒧᑦ ᑐᑦᓯᕋᐅᑎᒥ, ᒐᕙᒪᒃᑯᑦ ᓄᓇᕗᒻᒥ ᓂᕈᐊᕐᓂᖃᖅᑎᑦᓯᓂᐊᖅᑐᑦ ᐊᐱᕆᓗᑎᒃ ᖃᒪᓂ'ᑐᐊᖅᒥᐅᓂᑦ ᐊᓯᔾᔩᒍᒪᒻᒪᖔᑕ ᓄᓇᓕᖓᓐᓂᑦ ᐃᒥᐊᓗᓕᕆᔾᔪᓯᖏᓐᓂᑦ ᑭᓪᓕᖃᖅᑎᑕᐅᙱᓐᓂᕐᒧᑦ ᑲᑎᒪᔨᐅᔪᓄᑦ ᐱᓕᕆᔾᔪᓯᕐᒧᑦ.
ᓂᕈᐊᓛᖅᑐᑦ ᓇᒡᒐᔾᔭᐅᒥ, ᐄᐳᓗ 26, 2021. ᓂᕈᐊᖅᐸᒌᓛᖅᑐᑦ ᓇᒡᒐᔾᔭᐅᒥ. ᐄᐳᓗ 19, 2021. ᓂᕈᐊᖅᑐᓕᕆᔨᒃᑯᑦ ᓄᓇᕗᒻᒥ ᐊᐅᓚᑦᓯᓛᖅᑐᑦ ᓂᕈᐊᕐᓂᕐᒥᑦ.

60 ᐳᓴᓐᑎᒥ ᓂᕈᐊᖅᑏᑦ ᓂᕈᐊᖅᐸᑕ “ᐄ,” ᒐᕙᒪᒃᑯᑦ ᐊᓯᔾᔨᖅᑐᐃᕙᓪᓕᐊᓂᐊᖅᑐᑦ ᖃᒪᓂ'ᑐᐊᖅ ᖃᓄᐃᓕᖓᓂᖓᓂᑦ ᐃᒥᐊᓗᓕᕆᓂᕐᒧᑦ ᐱᖁᔭᖓᓐᓂᑦ ᑲᑎᒪᔨᐅᔪᓄᑦ ᐱᓕᕆᔾᔪᓯᕐᒧᑦ. ᑭᒃᑯᑐᐃᓐᓇᐃᑦ ᐊᖏᖅᑕᐅᔭᕆᐊᖃᕐᓂᐊᖅᑐᑦ ᓂᕈᐊᖅᑕᐅᓯᒪᔪᓄᑦ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓄᑦ ᓇᑦᓯᐅᔾᔨᖏᓐᓂᖏᓐᓂᑦ ᐃᒥᐊᓗᒻᒥ ᓄᓇᓕᓐᓄᑦ. ᐃᒥᐊᓗᓕᕆᔨᒃᑯᑦ ᑲᑎᒪᔨᖏᑦ ᓂᕈᐊᕈᓐᓇᕐᒥᔪᑦ ᓴᖅᑭᔮᖅᑎᑦᓯᓂᕐᒧᑦ ᐅᔾᔨᕈᓱᑦᑎᑦᓯᓂᕐᒥᑦ ᐃᒥᐊᓗᒻᒥ.

ᐃᑲᔪᕐᓂᕐᒧᑦ ᐃᓄᖏᓐᓂᑦ ᑐᑭᓯᑎᑦᓯᒋᐊᑲᓐᓂᕐᓂᕐᒧᑦ ᐱᔾᔪᑕᐅᔪᒥ, ᒐᕙᒪᒃᑯᑦ ᓄᓇᕗᒻᒥ ᐃᓄᓕᒫᓂ ᑲᑎᑎᑦᓯᓂᐊᖅᑐᑦ ᒪᕐᕈᐊᑎᓪᓗᑎᒃ ᐊᐃᑉᐱᒻᒥ, ᐄᐳᓗ 13, 2021. ᑲᑎᒪᑎᑦᑎᓛᖅᑐᑦ 12-ᒥ ᐅᓐᓄᓴᒃᑯᑦ ᐊᒻᒪᓗ 7-ᒥ ᐅᓐᓄᒃᑯᑦ ᐱᙳᐊᕐᕕᒻᒥ.

ᑭᒡᒐᖅᑐᐃᔩᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ, ᑮᓇᐅᔭᓕᕆᔨᒃᑯᓐᓂᑦ, ᓂᕈᐊᖅᑐᓕᕆᔨᒃᑯᓐᓂᓪᓗ ᓄᓇᕗᒻᒥ ᑭᐅᔪᓐᓇᕐᓂᐊᖅᑐᑦ ᐊᐱᖅᑯᑕᐅᔪᓂᑦ. ᐃᑉᐱᒋᑦᓯᐊᕐᓗᒍ ᓄᕙᕐᔪᐊᕐᓇᖅ-19 ᑭᓪᓕᖃᑦᑎᑕᐅᓂᐅᔪᑦ, 100 ᐃᓄᐃᑦ ᐅᐸᒍᓐᓇᕐᓂᐊᖅᑐᑦ ᐊᑐᓂ ᑲᑎᒪᓂᕐᒧᑦ. ᑕᒧᓗᒐᒃᓴᖅᑕᖃᓛᖅᑐᖅ.

ᑐᑭᓯᒋᐊᒃᑲᓐᓂᕈᒪᒍᑦᓯ ᑲᑎᒪᑎᑦᑎᓂᐅᓛᖅᑐᓂᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᓯ ᐅᕗᖓ financeinfo@gov.nu.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐅᐃᑦᓰᓐ ᑦᓵᓐ
ᐊᐅᓚᑦᑎᔨ, ᑐᓴᕋᑦᓴᓕᕆᔨᒃᑯᓐᓄᑦ
ᑮᓇᐅᔭᓕᕆᔨᒃᑯᓐᓄᑦ
867-975-6818
FinanceComs@gov.nu.ca