ᓄᓇᕗᒻᒥ ᐊᕙᑎᒥᒃ ᐃᒃᐱᒍᓱᑦᑎᐊᕐᓂᕐᒧᑦ ᐱᓇᓱᐊᕈᓯᖅ

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ

ᓄᓇᕗᒻᒥ ᐊᕙᑎᒥᒃ ᐃᒃᐱᒍᓱᑦᑎᐊᕐᓂᕐᒧᑦ ᐱᓇᓱᐊᕈᓯᖅ

ᐊᕙᑎᓕᕆᔨᒃᑯᑦ ᑐᙵᓱᒃᑎᑎᕗᑦ ᓄᓇᕗᒥᐅᓕᒫᓂᒃ ᖁᕕᐊᓲᑎᖃᖃᑕᐅᖁᓪᓗᒋᑦ ᐊᕙᑎᓕᕆᓂᕐᒧᑦ ᐱᓇᓱᐊᕈᓯᕐᒥᒃ ᔫᓂ 5 ᐊᒻᒪ 9 ᐊᑯᓐᓂᐊᓂ.

ᓄᓇᕗᒻᒥ ᐊᕙᑎᓕᕆᓂᕐᒧᑦ ᐱᓇᓱᐊᕈᓯᖓ ᐱᒋᐊᕐᕕᐅᓂᐊᕐᒥᔪᖅ ᐊᕙᑎᕗᑦ ᐱᓇᓱᐊᕈᓯᖃᖅᑎᑕᐅᑎᓪᓗᒍ ᑲᓇᑕᒥ, ᐊᕐᕌᒍᑕᒫᑦ ᐱᓕᕆᐊᖑᓲᖅ ᑎᓕᐅᕆᔾᔪᑕᐅᓪᓗᓂ ᑲᓇᑕᒥᐅᓂᒃ ᐱᓕᕆᖁᓪᓗᒋᑦ ᐃᑲᔪᖁᓪᓗᒋᓪᓗ ᐱᑦᑎᐊᓕᓂᕐᒥᒃ, ᓴᐳᔾᔨᓂᕐᒥᒃ ᐊᒻᒪ ᐋᖅᑭᒃᓯᑦᑎᐊᕐᓂᕐᒥᒃ ᐊᕙᑎᑦᑎᓐᓂ. ᐱᓇᓱᐊᕈᓯᕐᒥᑦ ᐱᒋᐊᓛᖅᑐᖅ ᓴᓗᒪᔪᒥᑦ ᐊᓂᕐᓂᖃᕐᓇᐅᑉ ᐅᓪᓗᖓᓂᑦ ᔫᓂ 2−ᒥᑦ, ᓄᓇᕐᔪᐊᒥᑦ ᐊᕙᑎᓕᕆᓂᕐᒧᑦ ᐅᓪᓗᖓᓂᑦ ᔫᓂ 5−ᒥᑦ, ᐃᒪᕐᒥᐅᑕᓕᕆᔨᒃᑯᓪᓗ ᐅᓪᓗᖓᓂᑦ ᔫᓂ 8−ᒥᑦ.

ᐃᓚᖏᑦ ᐊᑐᖅᑕᐅᔪᓐᓇᖅᑐᑦ ᐃᑲᔪᕐᓂᐊᕐᓗᓂ ᐊᑕᖐᔪᒥᒃ ᖃᓄᐃᙱᑦᑎᐊᖅᑐᒥᒃ ᐊᕙᑎᑦᑎᓐᓂᒃ ᐅᑯᓂᖓ ᐃᓚᖃᖅᐳᑦ:

• ᓄᓇᒦᑎᓪᓗᑕ ᕿᒪᒃᓯᑦᑕᐃᓕᓗᑎᑦ ᐊᒻᒪ ᓄᓇᕗᑦ ᐃᒪᕗᓪᓗ ᓴᓗᒪᑏᓐᓇᕋᓱᒡᓗᒍ ᐊᒻᒪ ᐊᑕᖏᑦᑎᐊᕐᓗᒍ.
• ᓂᕈᐊᕆᓗᒍ ᓇᒧᙵᐅᔪᓐᓇᕐᓂᕆᔭᓯ (ᐅᖓᓯᒃᑐᒧᑦ ᐱᓱᖕᓂᖅ, ᑐᒃᑲᕆᐊᓕᒃᑰᕐᓂᖅ ᐱᓱᔪᖕᓂᕐᓘᓐᓃᑦ) ᒥᒃᖠᒋᐊᖅᑎᓪᓗᒍ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᑦᑕ ᐃᓯᐊᕿᓂᖏᑦ ᐊᓂᖅᓵᖅᑐᒐᐅᓪᓗ ᓱᕈᖅᐸᓪᓕᐊᓂᖓ.
• ᓂᐅᕕᖃᑦᑕᖅᑐᑦ ᖃᐅᔨᒪᑦᑎᐊᕐᓗᑎᑦ ᐱᐅᓂᖅᓴᓂᑦ ᓂᕈᐊᖃᑦᑕᕐᓗᑎᑦ ᐊᑐᓕᕌᖓᕕᑦ ᓂᐅᕕᓕᕌᖓᕕᓪᓘᓐᓃᑦ.
• ᐆᒻᒪᖅᑯᑎᓂᒃ ᐊᑐᖅᑎᑦᑎᑦᑎᐊᖅᐸᒡᓗᓯ ᐅᔾᔨᖅᓱᑦᑎᐊᕐᓗᑎᓪᓗ ᐆᒻᒪᖅᑯᑎᒥᒃ ᐊᑐᖅᑎᓪᓗᑎᑦ.

ᖁᕕᐊᓲᑎᒋᓗᒍ ᐊᕙᑎᓕᕆᓂᕐᒧᑦ ᐱᓇᓱᐊᕈᓯᖅ, ᓄᓇᕗᒻᒥᐅᑦ ᐃᓚᐅᖁᕙᕗᑦ ᐃᓄᖕᓄᑦ ᑐᓴᐅᒪᔾᔪᑎᓄᑦ ᓵᓚᒃᓴᕋᓱᖃᑕᐅᔪᓂᒃ:

• ᓯᓚᒦᖦᖢᓂ ᐊᓕᐊᓇᐃᒋᕕᐅᒃ?  ᓇᒃᓯᐅᔾᔨᕕᑎᒍᑦ ᐊᔾᔨᙳᐊᓂᒃ ᑕᕐᕆᔮᒃᓴᓂᒡᓘᓐᓃᑦ ᑕᑯᒃᓴᐅᑎᑦᑎᔪᓂᒃ ᓄᓇᒥᙶᖅᑐᓂᒃ ᓄᓇᒥᒃ, ᐱᕈᖅᑐᓂᒃ, ᐆᒪᔪᓂᒃ, ᐊᒻᒪ ᓄᒃᑕᖅᑐᓂᒃ. ᐊᔾᔨᓕᐅᖅᑕᓯ ᐊᐅᓚᔫᓕᐊᖑᓯᒪᔪᓪᓘᓐᓃᑦ ᖃᕆᑕᐅᔭᒃᑯᑦ ᒥᓇᕐᓗᒋᑦ ᐊᑐᕐᓗᒍ #EnvironmentWeekNU.
• ᐊᖑᓇᓱᖕᓂᖅ ᐱᒻᒪᕆᐅᓪᓗᓂ ᐃᓚᒋᔭᐅᖕᒪᑦ ᐃᓄᐃᑦ ᐃᓕᖅᑯᓯᖏᓐᓄᑦ; ᑕᑯᔪᒪᑦᑎᐊᖅᐸᕗᑦ ᑐᓴᖅᐸᒃᖢᑕᓗ ᐊᖑᓇᓱᖕᓂᕐᒧᑦ ᐅᓂᒃᑳᔅᓯᓐᓂᑦ. ᒥᓇᕐᓗᒍ ᐊᖑᓇᓱᖕᓂᕐᒧᑦ ᐊᔾᔨᓕᐅᖅᓯᒪᔭᑎᑦ ᐃᓚᖃᕐᓗᓂ ᐅᓂᒃᑳᖅᓯᒪᔪᒥᒃ ᖃᕆᑕᐅᔭᒃᑯᑦ ᐊᑐᕐᓗᒍ #EnvironmentWeekNU ᓇᒃᓯᐅᑎᓗᒍᓘᓐᓃᑦ ᐅᑯᓄᖓ eaguilar2@gov.nu.ca.
• ᓴᓂᕐᓂᑦ ᑕᑯᕙᓪᓕᐊᑐᐃᓐᓇᖅᐱᓯ ᖃᓂᒋᔮᔅᓯᓐᓂ? ᑐᓴᖅᑎᑕᐅᔪᒪᕗᒍᑦ ᖃᓄᖅ ᐃᑲᔪᓚᐅᕐᒪᖔᖅᐱᑦ ᓴᓗᒪᑎᑦᑎᓂᕐᒥᒃ ᐊᕙᑎᒥᒃ ᖃᓂᒋᔭᔅᓯᓐᓂ. ᐊᔾᔨᓕᐅᕆᓗᑎᑦ ᓯᕗᕐᖓᓂᑦ ᑭᖑᓂᐊᒍᓪᓗ ᖃᕆᑕᐅᔭᒧᐊᕐᓗᒍᓗ ᐊᑐᕐᓗᒍ #EnvironmentWeekNU.
• ᐱᓕᕆᖃᑕᐅᔪᒪᖃᑦᑕᖅᐱᑦ ᐊᕙᑎᒥᑦ? ᖃᐃᖁᔨᔪᒍᑦ ᒪᒃᑯᑦᑐᓂᑦ ᑕᒪᐃᓐᓂᒃ ᐃᓕᓐᓂᐊᕐᕕᖕᒥ ᖁᕝᕙᓯᖕᓂᓕᖕᓂᑦ ᑎᑎᕋᖁᔨᓪᓗᑕ ᐱᒻᒪᕆᐅᓂᖓᓂᑦ ᐊᕙᑎᓕᕆᓂᕐᒧᑦ ᐱᓇᓱᐊᕈᓯᖅ ᐊᒻᒪᓗ ᖃᓄᐃᒻᒪᑦ ᐊᑐᖅᑕᐅᒋᐊᖃᕐᒪᖔᑦ ᓄᑕᖅᑲᓄᑦ ᐃᓕᓐᓂᐊᕐᓗᑎᒃ ᐊᕙᑎᐅᑉ ᒥᒃᓵᓄᑦ ᐃᓱᒫᓘᑕᐅᔪᓂᑦ. ᓇᒃᓯᐅᑎᓗᒋᑦ ᑭᐅᔾᔪᑎᑎᑦ ᐆᒧᖓ eaguilar2@gov.nu.ca.

ᓵᓚᒃᓴᖃᑕᐅᓇᓱᒃᑐᑦ ᓵᓚᒃᓴᖃᑕᐅᓇᓱᓛᖅᑐᑦ ᐊᕙᑎᓕᕆᔨᒃᑯᑦ ᓵᓚᒃᓴᒐᒃᓴᖏᓐᓂᒃ. ᐊᔾᔨᓕᐅᖅᑕᐅᔪᓕᒫᑦ ᑭᐅᔾᔪᑎᓪᓗ ᓄᓇᕗᑦ ᒐᕙᒪᒃᑯᓐᓄᑦ ᓇᖕᒥᓂᕆᔭᐅᓕᕐᓂᐊᖅᐳᑦ.

ᓄᓇᕗᑦ ᒐᕙᒪᒃᑯᖏᑕ ᐃᑭᐊᖅᑭᕕᒃᑯᑦ ᓴᖅᑭᔮᖅᑎᑕᖏᑦ ᑕᑯᔪᓐᓇᖅᑕᑎᑦ ᐃᓚᐅᖃᑕᐅᔪᒪᒍᕕᑦ ᐊᔾᔨᓕᐅᖅᓯᑦᑎᐊᓛᖑᔪᑦ  ᓵᓚᒃᓴᖅᑎᑕᐅᓇᓱᐊᖅᑎᓪᓗᒋᑦ, ᓄᑖᑦᑎᐊᑦ ᑕᕐᕆᔮᒃᓴᓕᐊᖑᔪᑦ, ᐊᒻᒪᓗ ᖃᐅᔨᒃᑲᓐᓂᕐᓂᐊᕋᕕᑦ ᖃᓄᖅ ᐊᕙᑎᒥᒃ ᓱᕈᐃᙱᒃᑲᓐᓂᕈᓐᓇᕐᒪᖔᖅᐱᑦ ᓯᓚᖅᔪᐊᒥ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓖᑲᓐ ᑖᒪᔅ
ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨ, ᐃᓕᓐᓂᐊᕐᓂᓕᕆᔨᒃᑯᑦ ᐊᒻᒪ ᑐᓴᐅᒪᑎᑦᑎᓂᕐᒧᑦ
ᐊᕙᑎᓕᕆᔨᒃᑯᑦ
867-975-7761
LThomas@gov.nu.ca