ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᓈᒻᒪᒃᓯᔪᑦ ᓱᕐᕋᒃᓯᒪᓐᓇᖅᑐᖅ ᒪᓕᒐᙳᖅᑎᑕᐅᓂᒃᓴᖓᓂᑦ

ᐊᒃᑐᐸ 12, 2018


ᐱᕙᓪᓕᐊᔪᖅ ᓴᖅᑭᑕᑦ

ᓄᓇᕗᑦ ᒐᕙᒪᒃᑯᖏᑦ ᓈᒻᒪᒃᓯᔪᑦ ᓱᕐᕋᒃᓯᒪᓐᓇᖅᑐᖅ ᒪᓕᒐᙳᖅᑎᑕᐅᓂᒃᓴᖓᓂᑦ

ᐃᖃᓗᐃᑦ, ᓄᓇᕗᑦ (ᐅᑐᐱᕆ 12, 2018) − ᓄᓇᕗᑦ ᒐᕙᒪᒃᑯᖏᑦ ᐅᓪᓗᒥ ᓇᓗᓇᐃᔭᐃᖅᑲᐅᕗᑦ ᐊᓯᔾᔨᖕᓂᐅᓂᐊᖅᑐᒻᒪᕆᖕᓂᑦ ᐊᒃᑐᐃᓂᐅᓇᔭᖅᑐᓂᒡᓗ ᓴᖅᑭᓐᓂᐊᖅᑑᑉ ᓱᕐᕋᖕᓇᖅᑐᑦ ᒪᓕᒐᙳᖅᑎᑕᐅᓂᖓᓂ, ᑖᒃᑯᐊ ᓄᓇᕗᒻᒥᐅᑦ ᐅᔾᔨᕈᑎᑦᑎᐊᖁᓪᓗᒋᑦ ᖃᓄᐃᔾᔪᑕᐅᕙᒃᑐᓕᒫᓂᑦ ᐅᑐᐱᕆ 17 ᓯᕗᓂᐊᓂᑦ.

ᐊᕐᕌᒍᒧᑦ−ᐊᑕᐅᓯᖕᒧᑦ ᑭᑭᑦᑎᓯᒪᙱᑦᑐᒥᑦ ᐊᖏᕈᑎᒥᑦ ᐊᑎᓕᐅᓚᐅᖅᑐᑦ ᑖᒃᑯᐊ ᓄᓇᕗᒻᒥᑦ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᑳᓇᐱ ᖑᓗᑦᑯᓪᓗ, ᓂᐅᕕᐊᒃᓴᖃᕈᓐᓇᕐᓂᐊᕐᓗᓂ ᓱᕐᕋᖕᓇᖅᑐᓂᑦ ᓄᓇᕗᒻᒥᐅᓄᑦ. ᑳᓇᐱ ᐊᖏᖅᓯᒪᔪᑦ 500 ᑭᓗᖑᕌᒻᓂᑦ ᓱᕐᕋᖕᓇᖅᑐᓂᑦ ᐊᑐᐃᓐᓇᐅᑎᑦᑎᔪᒪᓪᓗᑎᒃ ᓂᐅᕕᐊᒃᓴᒃᓴᒧᑦ ᓄᓇᕗᒻᒧᑦ ᐊᕐᕌᒎᓂᐊᖅᑐᖅ. ᖃᕆᓴᐅᔭᒃᑯᑦ ᑎᑭᓴᐃᔪᓐᓇᕐᓂᐊᖅᑐᑦ ᐅᕗᖓ www.tweed.com, ᐅᑐᐱᕆ 17−ᖑᓕᖅᐸᑦ.

"ᓄᓇᕗᒻᒥᐅᑦ ᓱᕐᕋᖕᓇᖅᑐᖅᑐᕈᒪᖃᑦᑕᖅᑐᑦ ᐱᔪᓐᓇᖃᑦᑕᖕᓂᐊᖅᑐᑦ ᒪᓕᒐᑎᒍᑦ, ᐊᐅᓚᑕᐅᓂᒃᑯᑦ ᓱᕐᕋᖕᓇᖅᑐᑦ, ᑖᒃᑯᐊᓗ ᓄᓇᕗᒻᒥᑦ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᑖᒃᑯᐊᓗ ᑳᓇᐱᒃᑯᑦ ᐊᖏᖅᓯᒪᔫᒃ ᐊᑐᐃᓐᓇᖃᖅᑎᑦᑎᓂᖕᓂᑦ ᑲᒪᑦᑎᐊᖕᓂᒃᑯᑦ ᖃᕆᑕᐅᔭᒃᑯᑦ ᓂᐅᕕᐊᓂᑦ," ᐅᖃᖅᑐᕕᓂᖅ ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥᑦ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᔪᐊᔾ ᕼᐃᒃᔅ.

ᐱᒋᐊᕐᓗᓂ ᐅᑐᐱᕆ 17−ᒥ, ᓄᓇᕗᒻᒥᐅᑦ 19-ᓂᒃ ᐅᖓᑖᓂᓪᓗ ᐅᑭᐅᓖᑦ ᒪᓕᒐᖅᑎᒍᑦ ᓱᕐᕋᖕᓇᖅᑐᓂᑦ ᓂᐅᕕᕈᓐᓇᖅᓯᓂᐊᓕᖅᑐᑦ ᐱᔪᓐᓇᖅᓯᓗᑎᒡᓗ. 30 ᒍᕌᒻᔅ−ᓂᒃ ᐃᓄᒃ ᐱᓯᒪᔪᓐᓇᖅᑐᖅ ᐊᒻᒪ 150 ᒍᕌᒻᔅ−ᓂᒃ ᐊᖏᕐᕋᒥᓃᑎᑦᑎᔪᓐᓇᕐᓗᑎᒃ. ᐱᑎᑦᑎᓂᖅ ᓱᕐᕋᖕᓇᖅᑐᒥᒃ ᐊᕐᕌᒍᑭᓗᐊᖅᑐᓄᑦ, ᐃᓚᒋᔭᐅᓪᓗᑎᒃ ᓇᖕᒥᓂᖅ ᕿᑐᕐᙵᑎᑦ, ᑲᓇᑕᓕᒫᒥ ᐱᕋᔭᖕᓂᐅᕗᖅ. ᐊᖁᓪᓗᓂ ᓱᕐᕋᒃᓯᒪᓗᓂ ᒪᓕᒐᖕᒥᑦ ᓯᖁᒥᑦᑎᓂᐅᕗᖅ.

ᒪᓕᒐᑦ ᑕᕝᕚᑭᑐᖕᓂᖕᒧᑦ ᓱᕐᕋᖕᓇᖅᑐᖕᓂᖕᒧᓪᓗ ᐃᓄᒋᐊᒃᑯᕕᖕᓂᑦ ᐊᓯᔾᔨᖅᑐᑦ. ᑭᒡᓕᒋᔭᐅᕙᒃᑐᑦ ᐃᖅᑲᓇᐃᔭᕐᕕᖕᓂᑦ ᐃᓄᒋᐊᖕᓄᓪᓗ ᐅᐸᒃᑕᐅᕙᒃᑐᑦ ᐱᖁᑎᓕᕆᓲᑦ ᐱᔨᑦᑎᕋᕐᕕᐅᕙᒃᑐᓪᓗ ᐃᓚᒋᐊᖅᓯᒪᓕᖅᑐᑦ 3 ᒦᑕᒥᑦ 9 ᒦᑕᒧᑦ.

ᐊᒻᒪᓗᑦᑕᐅᖅ, ᑕᕝᕚᑭᒥᑦ ᓱᐴᖅᑐᕈᓐᓇᙱᓚᑎᑦ ᓯᒡᒐᓕᐊᙳᔮᖅᑐᓂᒡᓘᓐᓃᑦ ᓱᕐᕋᖕᓇᖅᑐᕆᐊᖃᖏᑦᑐᓪᓘᓐᓃᑦ 9 ᒦᑕ ᐱᖁᑎᒋᔭᓂᑦ: ᐃᓕᓐᓂᐊᕐᕕᖕᓂᑦ; ᐋᓐᓂᐊᕕᐅᑉ ᓯᓚᑖᓂᑦ, ᐋᓐᓂᐊᕕᖕᒥᑦ, ᐅᖁᒪᐃᓐᓂᖕᓂᐊᕐᕕᖕᒥᓪᓘᓐᓃᑦ; ᐸᐃᕆᕝᕖᑦ ᓯᓚᑖᓂ; ᓄᑕᖅᑲᑦ ᐱᙳᐊᕐᕕᖏᓐᓂᑦ; ᓯᐊᕐᕆᔮᕐᕕᖕᓂᑦ, ᕿᑎᒡᕕᖕᓂᓪᓗ; ᑎᑕᒡᕕᐅᔪᓂᒡᓘᓐᓃᑦ, ᓂᕆᕕᒡᔪᐊᖅᑐᓂ, ᐊᓯᖏᓐᓂᓪᓘᓐᓃᑦ ᐃᓄᓕᒫᓄᑦ ᖃᓄᐃᓕᐅᕐᕕᐅᔪᓂᑦ.

ᓱᕐᕋᖕᓇᖅᑐᖅᐸᖕᓂᖅ ᐊᑦᑕᖕᓇᕈᑎᖃᖅᐳᖅ ᑎᒥᒧᑦ ᐊᑐᖅᑎᒧᑦ, ᐃᓚᖏᓐᓄᑦ, ᐱᖃᓐᓇᕆᔭᖏᓐᓄᑦ ᓄᓇᓕᖕᓄᓪᓗ. ᓄᓇᕗᒻᒥᐅᑦ ᐅᖃᓕᒫᕈᓐᓇᖅᑐᑦ ᑎᒥᒧᑦ ᖃᓄᐃᔾᔪᑕᐅᕙᒃᑐᓂᑦ ᓱᕐᕋᖕᓇᖅᑐᒧᑦ ᐋᓐᓂᐊᖃᖕᓇᙱᑦᑐᓕᕆᔨᒃᑯᑦ ᓱᕐᕋᖕᓇᖅᑐᓂᑦ ᖃᐅᔨᒋᐊᕐᕕᐊᓂᑦ ᐅᕙᓂ.

"ᐊᑑᑎᖃᒻᒪᕆᒃᐳᖅ ᑖᒃᑯᐊ ᓄᓇᕗᒻᒥᐅᑦ ᑐᑭᓯᒋᐊᕈᓐᓇᕐᓗᑎᒃ ᐱᔨᑦᑎᖅᑕᐅᓗᑎᒡᓗ ᑐᓴᐅᒪᑦᑎᐊᖁᓪᓗᒋᑦ ᑎᒥᒥᓄᑦ ᖃᓄᐃᙱᑦᑎᐊᖕᓂᖏᓐᓄᓪᓗ." ᐅᖃᖅᑐᕕᓂᖅ ᒥᓂᔅᑕ ᐋᓐᓂᐊᖃᖕᓇᙱᑦᑐᓕᕆᔨᒃᑯᓐᓄᑦ, ᔪᐊᔾ ᕼᐃᒃᔅ. "ᑭᒃᑯᓕᒫᑦ ᖃᐅᔨᒪᓇᓱᖁᕙᒃᑲ ᓱᓕᔪᓂᑦ ᑎᒥᒧᓪᓗ ᐊᑦᑕᖕᓇᕈᑎᓂᑦ ᐊᑐᖕᓂᖕᒧᑦ ᓱᕐᕋᖕᓇᖅᑐᒥᑦ ᐃᓱᒪᒃᓴᖅᓯᐅᓚᐅᖅᑳᖕᓇᒃ."

ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕗᙵᐅᓗᑎᑦ: www.NULC.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓃᔅ ᒍᕌᓐᒪᐃᓴᓐ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca