ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᑐᙵᓱᒃᑎᑦᑎᕗᑦ ᑮᓇᐅᔭᓕᐅᕋᓱᐊᕈᑎᒃᓴᓂ 2021−ᒥ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᓐᓂᑦ

ᐄᐳᕈ 20, 2021

ᐱᕙᓪᓕᐊᔪᑦ ᓴᖅᑭᑕᑦ

ᓄᓇᕗᑦ ᒐᕙᒪᒃᑯᖏᑦ ᑐᙵᓱᒃᑎᑦᑎᕗᑦ ᑮᓇᐅᔭᓕᐅᕋᓱᐊᕈᑎᒃᓴᓂ 2021−ᒥ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᓐᓂᑦ

ᐃᖃᓗᐃᑦ, ᓄᓇᕗᑦ (ᐊᐃᕆᓕ 20, 2021) – ᓄᓇᕗᑦ ᒐᕙᒪᒃᑯᖏᑦ ᑐᙵᓱᒃᑎᑦᑎᓚᐅᕐᐳᑦ ᐊᒥᓱᒐᓚᖕᓂᑦ ᑮᓇᐅᔭᓕᐅᕋᓱᐊᕈᑎᒃᓴᓪᓗᐊᑕᖕᓂᑦ ᓄᓇᕗᒻᒧᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓯᕗᓪᓕᖅᐹᒥ ᑮᓇᐅᔭᖅᑐᕈᑎᒃᓴᓄᑦ ᐸᖕᓇᐅᑖᓂ ᐊᕐᕌᒍ ᒪᕐᕉᒃ ᐅᖓᑖᓄᑦ, ᐅᑎᕐᑎᑦᑎᓂᖕᒧᑦ ᐸᖕᓇᐅᑎ ᐃᖅᑲᓇᐃᔮᓄᑦ, ᐱᕈᖅᐸᓪᓕᐊᓂᖅ, ᒪᑭᒪᔪᓐᓇᕐᓂᖕᓗ, ᓴᖅᑭᑕᐅᔪᖅ ᐃᑉᐸᒃᓴᖅ ᒥᓂᔅᑕᐅᑉ ᑐᒡᓕᐊᓄᑦ, ᒃᕆᔅᑎᐊ ᕝᕇᓚᓐ.

“ᓇᓗᓇᖅᐸᒃᑲᓗᐊᕐᖢᓂ ᓴᖅᑭᑕᖅ ᓄᓇᕐᔪᐊᒥᑦ ᖃᓂᒪᓂᖕᒧᑦ, ᑲᔪᖏᖅᓯᒪᕗᒍ ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᐃᓐᓇᕐᓂᖏ ᐱᓕᕆᐊᖃᖃᑎᒋᓪᓗᑎᒍ ᓯᕗᓪᓕᐅᔾᔭᒃᓴᓂ ᐱᕈᖅᓴᒐᒃᓴᑦᑎᓐᓂᑦ ᐃᒡᓗᓕᕆᓂᖕᓂᑦ, ᐋᓐᓂᐊᖅᑕᐃᓕᒪᓂᖕᓂᑦ, ᒪᑭᒪᐅᑎᓄᓪᓗ ᓄᓇᕗᒻᒥᐅᓄᑦ," ᐅᖃᓚᐅᕐᑐᖅ ᒥᓂᔅᑕ ᕼᐃᒃᔅ. “ᑕᒪᓐᓇ ᓄᓇᕐᔪᐊᒥᑦ ᖃᓂᒪᓂᖅ ᐊᒥᓱᐊᓗᖕᓂᑦ ᐃᓅᓯᑦᑎᓐᓄᑦ ᐊᓯᔾᔩᓯᒪᖕᒪᑦ, ᑭᓯᐊᓕ, ᐊᓕᐊᓇᐃᒍᓱᒃᐳᒍᑦ ᐊᒥᓱᑦ ᐱᒋᐊᖅᑕᐅᓯᒪᔪᑦ ᐱᒋᐊᓚᐅᕐᑕᕗ ᓱᓕ ᐃᖏᕐᕋᑦᑎᐊᕐᒪᑕ ᐃᑲᔪᖅᑐᕐᑕᐅᓪᓗᑎᒃᓗ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᓐᓄᑦ."

2021−ᒥ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᑦ ᓴᖅᑭᑦᑎᓚᐅᕐᐳᖅ ᐊᒥᓱᓂ ᐊᖏᕈᑕᐅᓯᒪᔪᓂ ᑐᕌᖓᓗᐊᕐᑐᑦ ᓄᓇᕗᒻᒧᑦ, ᐅᑯᐊᖑᓪᓗᑎᒃ:

  • $5 ᒥᓕᐊᓐᓂ ᑕᒪᑐᒪᓂ ᐊᕐᕌᒍᒥ ᐋᓐᓂᐊᖅᑕᐃᓕᒪᓂᖕᒧᑦ ᑮᓇᐅᔭᑦ ᑲᓇᑕᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓅᑉᐸᒃᑕᖏᑎᒍᑦ;
  • $27 ᒥᓕᐊᓐ ᐊᕐᕌᒎᒃ ᒪᕐᕉᒃ ᐅᖓᑖᓄᑦ ᐋᓐᓂᐊᖅᑕᐃᓕᒪᓂᖕᒧᑦ ᓅᑕᐅᔪᑦ ᓄᓇᕗᒻᒥᑦ ᐋᓐᓂᐊᖅᑐᓕᕆᓂᖕᒧᑦ ᑮᓇᐅᔭᓕᐅᕈᑕᐅᓯᒪᔪᓂᑦ;
  • $25 ᒥᓕᐊᓐ ᑕᒪᑐᒪᓂ ᐊᕐᕌᒍᒥ ᓇᐃᑦᑐᒧ ᐃᓘᓕᕆᓂᖕᒧᑦ ᒪᑭᒪᐅᑎᓄᓪᓗ ᐱᔭᕆᐊᓕᖕᓄᑦ;
  • $15 ᒥᓕᐊᓐ ᐊᕐᕌᒍᑦ ᐱᖓᓱᑦ ᐅᖓᑖᓄ HMS Erebus ᐊᒻᒪᓗ Terror ᐃᑦᑕᕐᓂᓴᓕᕆᓂᖕᒧᑦ ᐱᓕᕆᐊᒧᑦ;
  • ᐅᐃᒍᒋᐊᕐᓗᒍ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ;
  • ᑮᓇᐅᔭᑦ ᐊᔪᕐᓇᕋᔭᙱᒻᒪᖔ ᐸᖕᓇᐅᑎᓕᐅᕐᓂᐊᕐᓗᓂ ᐃᓚᕐᒨᖅᑐᓂ ᐆᒻᒪᖅᑯᑎᓕᕆᓂᖕᓄ ᑲᓱᕐᓯᒪᐅᕐᑐᓄᓪᓗ ᐱᓕᕆᐊᓄᑦ, ᓲᕐᓗ ᑭᕙᓪᓕᖕᒥᑦ ᐃᒪᕐᒧᒃ ᐱᓕᕆᐊᖑᔪᖅ; ᐊᒻᒪᓗ
  • ᐊᓯᔾᔨᖅᑕᐅᓪᓗᑎᒃ ᐅᑭᐅᖅᑕᖅᑐᒥᐅᑕᐅᓂᖕᒧᑦ ᐲᔭᐅᔾᔪᑕᐅᓲᖅ ᐊᐅᓪᓚᓂᖕᒧᑦ ᐱᓇᓱᐊᕐᕕᐅᓲᖑᓂᖓ.

ᐱᒻᒪᕆᐅᓛᕐᓕ, ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᒃᓴᖏᑦ ᓴᓂᕐᕙᐃᓯᓯᒪᒋᕗᑦ ᑮᓇᐅᔭᑲᓪᓚᖕᓂᑦ ᐱᓕᕆᐊᒃᓴᓄᑦ ᐱᔨᑦᑎᕋᐅᑎᓄᓪᓗ ᐃᓄᖕᓄᑦ ᐋᓐᓂᐊᓯᐅᑎᓕᕆᔪᓄᑦ, ᐃᓱᓕᒪᓕᓂᖕᓄᑦ, ᒪᑭᒪᐅᑎᒧᑦ ᑮᓇᐅᔭᓂᑦ, ᐃᓕᓐᓂᐊᕆᐅᓕᓵᕐᑐᓄᓪᓗ ᐸᐃᕆᕕᖕᓄᓪᓗ. ᓄᓇᕗᑦ ᒐᕙᒪᒃᑯᖏᑦ, ᐱᓕᕆᖃᑎᖏᓪᓗ ᓄᓇᕗᑦ ᑐᙵᕕᒃᑐᓐᓂ ᑲᓇᑕᐅᑉ ᒐᕙᒪᒃᑯᖏᓐᓂᓪᓗ, ᐱᓕᕆᖃᑎᒌᖏᓐᓇᕐᓂᐊᕐᐳᑦ ᑕᒪᐃᓐᓂ ᑐᕌᒐᕆᔭᐅᔪᓂᑦ ᑲᒪᒋᔭᒃᓴᓂᓪᓗ ᐱᓕᕆᐊᖑᑎᓪᓗᒋᑦ, ᐱᔨᑦᑎᕋᕐᑎᓪᓗᒋᑦ ᐃᑲᔪᖅᑐᐃᓪᓗᑎᒃᓗ ᐃᓄᖕᓂᑦ ᓄᓇᓕᑦᑎᓐᓂᓪᓗ. ###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐅᐃᓯᓐ ᓵᓐ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca