ᐅᖃᓚᐅᑎᓯᐅᑏᑦ

You are here

ᑎᒍᔭᐅᓯᒪᔪᓕᕆᓂᖕᒧᑦ ᐱᖁᔭᖅ ᐊᖏᖅᑕᐅᕗᖅ ᑯᐃᓐ ᑭᒡᒐᖅᑐᖅᑎᐊᓄᑦ

ᔫᓂ 14, 2019

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᑎᒍᔭᐅᓯᒪᔪᓕᕆᓂᖕᒧᑦ ᐱᖁᔭᖅ ᐊᖏᖅᑕᐅᕗᖅ ᑯᐃᓐ ᑭᒡᒐᖅᑐᖅᑎᐊᓄᑦ

ᐃᖃᓗᐃᑦ, ᓄᓇᕗᑦ (ᔫᓐ 14, 2019) – ᓄᓇᕘᑉ ᓄᑖᖅ ᑎᒍᔭᐅᓯᒪᔪᓕᕆᓂᖕᒧᑦ ᐱᖁᔭᖅ ᐊᖏᖅᑕᐅᕗᖅ ᑯᐃᓐ ᑭᒡᒐᖅᑐᖅᑎᐊᓄᑦ. ᑕᐃᒫᒃᓕ ᓄᓇᕘᑉ ᑎᒍᔭᐅᓯᒪᔪᓕᕆᔨᒃᑯᖏᑦ ᐃᓚᓕᐅᔾᔨᕗᑦ ᐃᓕᖅᑯᓯᕐᒨᖓᔾᔫᒥᔪᓂᒃ ᐱᓕᕆᐊᒃᓴᓂᑦ ᐋᖅᑭᒋᐊᕈᑎᒃᓴᓂᒡᓗ, ᓇᓂᔭᐅᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ.

“ᑕᒪᓐᓇ ᓴᓇᐅᒐᖅ−ᓄᓇᕗᒻᒥᑦ ᑎᒍᔭᐅᓯᒪᔪᓕᕆᓂᖕᒧᑦ ᐱᖁᔭᖅ ᓄᓇᕗᒻᒥᑦ ᑎᒍᔭᐅᓯᒪᔪᓕᕆᓂᒃᑯᖏᑦ ᓯᕗᓕᖅᑎᐅᓗᑎᒃ ᓴᐳᔾᔨᓂᖕᒥᑦ ᑎᒍᔭᐅᒪᔪᑦ ᐱᔪᓐᓇᐅᑎᖏᓐᓂᑦ ᓴᖅᑭᔮᖅᑎᑦᑎᓪᓗᓂᓗ ᐱᒻᒪᕆᐅᓂᖏᓐᓂᑦ ᐃᓄᐃᑦ ᐱᒻᒪᕆᐅᒋᔭᖏᓐᓂᑦ, ᐃᓕᖅᑯᓯᖏᓐᓂᑦ ᐅᖃᐅᓯᖏᓐᓂᒡᓗ. ᑕᒪᓐᓇ ᒪᓕᒐᖅ ᐃᓱᒪᒋᔭᖃᖅᑐᖅ ᐊᔾᔨᐅᙱᓐᓂᖓᓂᑦ ᐱᐅᓯᐅᕙᓚᐅᖅᓯᒪᔪᓂᑦ ᐃᓚᓕᐅᔾᔨᓪᓗᓂᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐱᓕᕆᐊᖃᕋᓱᒃᖢᑎᒃ ᓄᑖᖕᓂᑦ ᐱᕙᓪᓕᐊᔾᔪᑎᒃᓴᓂᑦ ᑎᒍᔭᐅᓯᒪᔪᓕᕆᓂᖕᓂᑦ,” ᐅᖃᖅᑐᕕᓂᖅ ᒥᓂᔅᑕᐅᑲᐃᓐᓇᖅᑐᖅ ᒪᓕᒐᓕᕆᔨᒃᑯᓐᓄᑦ ᒪᓕᒐᓕᕆᔨᕐᔪᐊᖅᓗ ᓄᓇᕗᒻᒧᑦ ᑕᐃᕕᑎ ᐊᕿᐊᕈᖅ.

ᐊᓯᔾᔨᖅᑕᐅᓪᓗᐊᑕᖅᑐᑦ ᓄᑖᑦ ᐱᖁᔭᑦ ᐃᓚᖃᖅᑐᑦ:

  • ᓵᑕᐅᔪᓐᓇᕐᓂᕐᓴᐅᓕᒃᑲᓐᓂᕐᓗᑎᒃ ᓴᖅᑭᔮᕐᔫᒥᓗᑎᒃ ᓴᖅᑭᑦᑎᓂᒃᑯᑦ ᐃᓛᒃᑰᖅᑐᒥᑦ ᖃᐅᔨᓴᖅᑎᒃᓴᓂᑦ ᑐᒡᓕᖏᓐᓂᒡᓗ ᖃᐅᔨᓴᖅᑎᒃᓴᓂᑦ ᑲᒪᒋᔭᖃᕋᔭᖅᑐᑦ ᕿᒥᕐᕈᓂᖕᓂᑦ ᑕᑯᔭᒃᓴᓂᒡᓗ ᑎᒍᔭᐅᒪᔪᓕᕆᓂᖕᒧᑦ ᐃᓱᒪᓕᐅᕈᑕᐅᕙᒃᑐᓂᑦ.
  • ᐊᑐᖅᑕᐅᔪᓐᓇᖅᑐᑦ ᐱᔾᔪᑎᖃᕐᓗᑎᒃ ᐊᑐᕐᓂᕐᒥᒃ ᓄᑭᒨᕆᐊᓕᖕᒥᒃ ᕿᓂᕐᕕᖃᕐᓂᕐᒥᒃ ᑎᒍᓯᓂᕐᒥᒡᓗ, ᐃᓱᓕᑦᑕᕐᕖᓪᓗ ᐃᓂᖅᑎᕆᓂᕐᒧᑦ ᐊᕕᒃᓯᒪᑎᑦᑎᓂᖕᓂᑦ.
  • ᐃᓗᓕᖏᑦ ᐱᔾᔪᑎᓖᑦ ᐃᓱᒪᒧᑦ ᖃᓄᐃᙱᑦᑎᐊᖕᓂᕆᔭᐅᔭᕆᐊᓖᑦ ᑎᒍᔭᐅᒪᔪᓂᑦ.
  • ᐊᑐᓕᖅᑎᑕᐅᓂᖏᑦ ᓄᓇᕐᔪᐊᒥᑦ ᑲᓇᑕᒥᓪᓗ ᑎᒍᔭᐅᒪᔪᓄᑦ ᐱᐅᓛᑎᒍᑦ ᐃᓕᖅᑯᓯᕆᔭᑎᒍᓪᓗ ᐋᖅᑭᒋᐊᕆᓂᖕᒧᑦ ᐃᓚᓕᐅᔾᔭᐅᓂᖕᒧᓪᓗ ᓄᓇᓕᖕᓄᑦ.
  • ᓴᖅᑭᑕᐅᓂᖏᑦ ᐅᓐᓂᕐᓗᖕᓂᖕᒧᑦ, ᐱᕕᖃᕈᑕᐅᔪᑦ ᕿᒥᕐᕈᓂᖕᓄᑦ ᑕᑯᓐᓇᖕᓂᖕᓄᓪᓗ ᐊᑐᕐᑕᐅᓂᖏᑦ ᐊᕕᒃᓯᒪᑎᑕᐅᓂᖕᒧᑦ, ᐅᖃᓕᒫᖅᑕᐅᓂᖓᓄᓪᓗ ᐊᕐᕌᒍᑕᒫᑦ ᐅᓂᒃᑳᓕᐊᖑᕙᒃᑐᓂᑦ.
  • ᐃᑲᔪᖅᑐᕐᓗᒋᑦ ᐃᓗᐊᓃᑦᑐᑦ ᐃᓕᖅᑯᓯᒨᖓᔪᓄᑦ ᑎᒍᔭᐅᒪᔪᓄᑦ ᐱᓕᕆᐊᓂᑦ ᓴᖅᑭᑦᑎᓂᒃᑯᑦ ᐃᓄᐃᑦ ᐱᒻᒪᕆᐅᒋᔭᖏᓐᓄᑦ ᑲᑎᒪᔨᕋᓛᓂᑦ.

ᑎᒍᔭᐅᒪᔪᓕᕆᓂᖕᓄᑦ ᐱᖁᔭᖅ ᐊᑐᓕᖅᑎᑕᐅᓂᐊᖅᑐᖅ ᑖᒃᑯᐊ ᖃᐅᔨᓴᖅᑏᑦ ᐃᖅᑲᓇᐃᔮᒃᓴᖏᑦ ᐃᓐᓄᒃᓯᒪᓕᖅᐸᑕ ᓴᖅᑭᑕᐅᓂᖏᓪᓗ ᐊᐅᓚᑦᑎᓂᖕᒧᑦ ᒪᓕᒐᒃᓴᑦ ᐱᐅᓰᓪᓗ ᑲᒪᒋᔭᓖᑦ ᐊᑐᓕᖅᑎᑕᐅᓂᖓᓂᑦ ᐱᖁᔭᖅ ᐱᐊᓂᒃᐸᑦ.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:

ᒪᑎᐅᓪᑕ ᒥᑕᑭᐅᕙᒻᐸ
ᐊᑐᐊᒐᓕᕆᓂᕐᒧᑦ ᑐᓴᒐᒃᓴᓕᕆᓂᕐᒧᓪᓗ
ᕿᒥᕐᕈᔨ ᒪᓕᒐᓕᕆᔨᒃᑯᑦ
ᓄᓇᕗᑦ ᒐᕙᒪᖓᑦ
867-975-6325
mmadekufamba@gov.nu.ca

 

ᖃᓄᐃᓕᐅᖅᑕᐅᔪᕕᓃᑦ ᐱᖁᔭᒃᓴᖅ 1-ᒧᑦ − ᑎᒍᔭᐅᓯᒪᔪᓕᕆᓂᕐᒧᑦ ᐱᖁᔭᖅ

ᒪᓕᒐᒃᓴᐅᑉ ᐱᔾᔪᑎᖓ:
ᑖᓐᓇ ᒪᓕᒐᖅ ᐃᓇᒌᔪᖅ ᓄᑕᐅᖏᓐᓂᖅᓴᒧᑦ ᒪᓕᒐᕐᒥᑦ ᐊᒻᒪᓗ ᐊᑐᐊᒐᓕᒫᖏᑦ, ᐱᖃᓯᐅᑎᖏᓪᓗᒋᑦ ᒫᓐᓇᐅᔪᖅ ᐊᔭᐅᖅᑕᐅᔪᖅ ᐊᔾᔨᐅᖏᑦᑐᒥ ᓄᓇᕗᒻᒥᑦ ᑎᒍᔭᐅᓯᒪᔪᓕᕆᓂᕐᒧᑦ ᒪᓕᒐᒃᓴᖅ. ᒪᓕᒐᒃᓴᖅ ᐃᓱᒪᒃᓴᖅᓯᐅᕐᓂᐅᕗᖅ ᕗᓇᕗᑦ ᐱᐅᓯᕆᔭᐅᕙᓚᐅᖅᑐᓂ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ, ᐅᖃᐅᓯᕆᔭᖃᕐᓗᑕᓗ ᒫᓐᓇᐅᔪᒥᑦ ᐱᕙᓪᓕᐊᔪᑦ ᑎᒍᔭᐅᓯᒪᔪᓕᕆᓂᕐᒥᑦ.

ᒪᓕᒐᓕᐅᕐᕕᐅᑉ ᑐᕌᒐᖓ:
ᑐᕌᕆᔭᐅᓪᓚᕆᒃᑐᖅ ᑖᔅᓱᒧᖓ ᐱᖁᔭᕐᒧᑦ ᐅᑯᐊᖑᕗᑦ;
1. ᐃᓄᐃᑦ ᐱᔪᓐᓇᐅᑏᑦ ᐊᒻᒪᓗ ᐃᓄᖕᓂᑦ ᐱᓯᒪᓂᖅ ᑎᒍᔭᐅᓯᒪᒧᓂ ᓄᓇᕗᒻᒥᐅᓂᑦ;
2. ᐊᑐᖅᑕᐅᓂᖓ ᓄᓇᕗᒻᒥᑦ−ᓴᕿᑕᐅᓯᒪᔪᖅ ᐱᒋᐊᖅᑎᑕᐅᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᓂ (IQ) ᐊᒻᒪᓗ ᑐᙵᕕᖃᖅᖢᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ;
3. ᐱᕙᓪᓕᓯᒪᔪᓂᒥᑦ ᓵᑕᐅᔪᓐᓇᕐᓂᖅ ᐱᒋᐊᕐᓂᖃᕐᓗᓂ ᐃᓛᒃᑰᖅᑐᑦ ᐃᖅᑲᖅᑐᖅᑕᐅᔪᓂᒃ ᑲᒪᔨᓂᑦ ᑲᒪᒋᔭᐅᓪᓚᕆᒃᑐᑦ ᐃᓚᖓᓂ; ᐊᒻᒪᓗ
4. ᓄᑖᙳᕆᐊᖅᑕᐅᓂ ᑲᔪᓯᑎᑦᑎᓂᕐᒧᑦ ᑎᒍᔭᐅᓯᒪᕖᑦ ᐊᒻᒪᓗ ᑲᓇᑕᒥᑦ ᑎᒍᔭᐅᓯᒪᕖᑦ ᐱᐅᓛᒃᑯᑦ ᐊᑐᖅᑕᐅᔪᓐᓇᖅᑐᓂ ᐊᒻᒪᓗ ᐊᑐᖅᑕᐅᕆᐊᖃᓕᖏᓐᓂᑦ ᐊᒻᒪᓗ ᐃᓚᓕᐅᑎᑦᑎᒃᑲᓐᓂᕐᓂᕐᓄᑦ.
ᐱᔾᔪᑎᒋᔭᐅᔪᖅ ᐱᖁᔭᒃᓴᒧᑦ ᑲᑎᒪᔩᑦ ᑲᒪᑎᖃᑎᒋᖃᑦᑕᕐᓂᒃᑯᑦ 2016 ᓄᖑᐊᓂ ᐊᒻᒪᓗ 2017−ᖑᓕᓵᖅᑎᓪᓗᒍ ᐱᖃᓯᐅᑎᓯᒪᔪᑦ ᑲᑎᒪᖃᑎᖃᕐᓂᖅ ᑎᒍᔭᐅᓯᒪᔪᓂ, ᒪᓕᒐᓕᐅᖅᑎᒃᑯᑦ, ᕼᐊᒻᒪᓚᒃᑯᑦ, ᐃᓄᐃᑦ ᑎᒥᐅᔪᖁᑎᖏᑦ, ᐃᓐᓴᐃᑦ ᐊᒻᒪᓗ ᓄᓇᓕᖕᓂᖔᖅᑐᑦ.
 

ᐊᓯᔾᔨᕈᑕᐅᓪᓗᐊᑕᖅᑐᑦ:
ᐃᓚᖏᑦ ᐊᓯᔾᔨᕈᑕᐅᓪᓗᐊᑕᖅᑐᑦ ᓄᑖᒥᑦ ᐱᖁᔭᕐᒥᑦ ᐱᖃᓯᐅᑎᓯᒪᔪᑦ ᐃᓚᒋᐊᖅᑕᐅᓯᒪᔪ ᐅᑯᐊᖑᕗᑦ:

  • ᑐᑭᓕᐅᖅᑕᐅᓯᒪᔪᑦ ᐱᔾᔪᑎᓕᖕᓂ ᑎᑎᕋᖅᑕᐅᓯᒪᔪᑦ ᑐᓴᖅᑎᑦᑎᔪᑏᑦ ᑎᒍᔭᐅᓯᒪᔪᓄᑦ, ᐱᖃᓯᐅᑎᓗᒋᑦ ᐅᖃᐅᓰᑦ ᐊᑐᖅᑕᐅᔭᕆᐊᓖᑦ ᐊᒻᒪᓗ ᑐᔪᕐᒥᕖᑦ ᐊᔪᕐᓇᖅᑐᖅᓯᐅᖅᐸᒃᑐᓄᑦ ᐅᖃᓕᒫᕐᓂᕐᒥᑦ ᑎᑎᕋᕐᓂᒃᑯᓪᓗ.
  • ᐱᔭᐅᔭᕆᐊᓖᑦ ᐃᓱᒪᒋᔭᐅᔭᕆᐊᓖᑦ ᑎᒍᔭᐅᓯᒪᔪᓄᑦ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐊᑲᐅᖏᓕᐅᕈᑕᐅᕙᒃᑐᑦ ᐋᓐᓂᐊᖅᑐᓕᕆᓂᕐᒧᑦ ᐃᓕᔭᐅᔭᕆᐊᖃᕐᓂᖏᓐᓄᑦ ᐊᑦᑕᕐᓇᖅᑐᒨᙱᑦᑐᖅ ᐊᒻᒪᓗ ᐱᔭᐅᔭᕆᐊᓖᑦ ᑎᒍᔭᐅᓯᒪᔪᓕᕆᔨᒃᑯᑦ ᑐᕌᒐᕝᕕᒃᓴᓕᐅᕈᓐᓇᕐᓂᕐᒧᑦ ᐃᓱᒪᓕᕆᔨᒃᑯᓐᓄᑦ.
  • ᓄᑖᙳᕆᐊᖅᑕᐅᓯᒪᔪᖅ ᑐᙵᕕᒋᔭᐅᔪᑦ ᐊᒻᒪᓗ ᐱᔾᔪᑎᒋᔭᐅᔪᑦ ᐃᓚᖓ ᐱᖁᔭᕐᒥᑦ.
  • ᒪᓕᒐᓕᐅᕐᓂᖅ ᐊᑐᕆᐊᓖᑦ ᒪᓕᒋᐊᓕᖕᓂᑦ ᐊᔭᐅᖅᑐᐃᓂᐊᕐᓗᓂ.
  • ᓴᕿᑕᐅᓚᐅᖅᑐᖅ ᓇᖕᒥᓂᖅ ᕿᒥᕐᕈᓂᕐᒧᑦ ᐃᖃᓇᐃᔮᒃᓴᑦ, ᖃᐅᔨᓇᓱᖕᓂᕐᒧᑦ ᐸᓯᓂᑦ ᐊᒻᒪᓗ ᖃᐅᔨᓇᓱᖕᓂᕐᒧᑦ ᐸᓖᓯ ᑐᖏᓂᐊᑕ ᑎᑎᕋᕐᕕᖕᓂᑦ, ᐊᑐᖅᑕᐅᕙᒃᑐᖅ ᖃᓂᑦᑐᒥᑦ ᓵᑕᐅᔪᓐᓇᕐᓂᕐᒥᑦ ᐊᒻᒪᓗ ᐊᔾᔨᒌᒍᓐᓇᕐᓂᕐᒥᑦ, ᓇᓗᓇᐃᔭᐃᔪᓐᓇᕐᓗᑎᒃ ᐊᑐᓕᖁᔭᐅᔪᓂ ᒪᓕᒃᑕᐅᔪᐃᓐᓇᐅᔪᓐᓇᕐᓗᑎᒃ ᓴᕿᑕᐅᔪᓂ ᒪᓕᒐᕐᓂᑦ, ᒐᕙᓂᑦ ᒪᓕᒃᑕᐅᔭᕆᐊᓖᑦ ᐊᒻᒪᓗ ᐊᑐᐊᒐᐃᓪᓗ.
  • ᐃᓚᖃᓯᐅᔾᔭᐅᓯᒪᔪᑦ ᑲᒪᑦᑎᐊᖏᓐᓂᕐᒧᑦ ᐃᓂᖅᑎᕆᓂᕐᒥᑦ ᒪᑎᒪᔾᔪᑕᐅᔪᑦ ᐱᖃᓯᐅᑎᓗᒋᑦ ᐃᒻᒪᒃᑰᖅᑐᓄᑦ ᖁᑦᑎᖕᓂᖅᓴᓄᑦ ᐅᓐᓂᕐᓗᖕᓂᖅ ᐊᒻᒪᓗ ᑭᒡᓕᖃᓂᖅ ᑖᒃᑯᓄᖓ ᐊᑐᖅᑕᐅᕙᒃᑐᓄᑦ ᑎᑎᕋᕝᕕᒻᒥᑦ ᐊᕕᑦᑎᑦᑎᓂᖅ.
  • ᒪᓕᒐᓕᐊᕆᓯᒪᔪᖅ ᐅᓐᓂᕐᓗᒃᑐᓄᑦ ᐱᓕᕆᕙᓪᓕᐊᓂᖏᓐᓄᑦ ᐊᒻᒪᓗ ᓴᐳᒻᒥᓂᖅ ᐊᑭᒋᐊᖏᑦᑐᓄᑦ.
  • ᐊᑐᕆᐊᓖᑦ ᓴᕿᑎᑦᑎᓂᕐᒧᑦ ᐊᕐᕌᒍᑕᒫᖅᓯᐅᑏ% ᐅᓂᑳᑦ.
  • ᓴᕿᑕᐅᔪᑦ ᐃᓄᐃᑦ ᖃᐅᔨᒪᔭᑐᖃᖏᑦ ᖃᐅᔨᒪᔾᔪᑎᐅᕗᖅ ᐃᓕᔭᐅᔭᓪᓕᐊᔭᕆᐊᓕᖕᓄᑦ ᐃᓄᐃᑦ ᖃᐅᔨᒪᔭᑐᖃᓄᑦ ᐊᑐᐊᒐᑎᒍᑦ, ᐱᓕᕆᐊᓄᑦ ᐊᒻᒪᓗ ᐱᔨᑦᑎᕋᐃᓂᕐᒧᑦ ᑎᒍᔭᐅᓯᒪᔪᓕᕆᓂᕐᒧᑦ.