ᓄᕙᔾᔪᐊᕐᓇᖅ 19-ᓕᒻᒥᒃ ᓇᓗᓇᐃᖅᑕᐅᔪᖃᖅᑐᖅ ᐊᕐᕕᐊᓂ
ᐱᕙᓪᓕᐊᔪᑦ ᑐᓴᕋᑦᓴᑦ
ᓄᕙᔾᔪᐊᕐᓇᖅ 19-ᓕᒻᒥᒃ ᓇᓗᓇᐃᖅᑕᐅᔪᖃᖅᑐᖅ ᐊᕐᕕᐊᓂ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 13, 2020) - ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ, ᓇᓗᓇᐃᖅᓯᓯᒪᓕᖅᑐᖅ ᓄᕙᔾᔪᐊᕐᓇᖅ 19-ᓕᒻᒥᒃ, ᐊᕐᕕᐊᓂ.
“ᓇᓗᓇᐃᖅᓯᕕᐅᓯᒪᔪᖅ ᒫᓐᓇᐅᔪᖅ ᓄᓇᕗᑦ ᓯᓚᑖᓃᑦᑐᖅ, ᐊᓂᑦᑕᐃᓕᒋᐊᖃᖅᑎᑕᐅᔪᖅ ᖃᓄᐃᙱᑦᑐᓂᓗ. ᐱᒋᐊᖅᑎᑦᓯᓯᒪᓕᖅᑐᒍᑦ ᑲᑎᔭᒥᓂᖏᓐᓂᒃ ᖃᐅᔨᓴᖅᐸᓪᓕᐊᓂᕐᒥᒃ ᐊᕐᕕᐊᓂ ᑐᐊᕕᕐᓇᖅᑐᒃᑯᓪᓗ ᐃᑲᔪᕆᐊᖅᑎᕗᑦ ᐊᑐᐃᓐᓇᐅᔪᑦ ᐃᑲᔪᕆᐊᕆᐊᖃᕐᓂᖅᑲᑕ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐᓐ. “ᐅᔾᔨᖅᓱᑦᓯᐊᒃᑲᓐᓂᖁᔨᒧᑦ, ᐱᒋᐊᕐᓗᓂ ᓈᑦᓰᖑᔭ, ᓄᕕᐱᕆ 15, ᑎᑭᕝᕕᐅᒍᓐᓇᕐᓂᖏᑦ ᐊᐅᓪᓚᕐᕕᐅᒍᓐᓇᕐᓂᖏᑦ ᑭᕙᓪᓕᕐᒥ ᓄᓇᓕᓕᒫᓂᒃ ᐃᓱᓕᑦᑕᕐᕕᖃᖅᑎᑕᐅᓛᓕᖅᑐᖅ, ᑭᓯᐊᓂ ᑎᑭᑎᑕᐅᒍᓐᓇᕐᓗᑎᒃ ᐱᖁᑏᑦ ᑐᐊᕕᕐᓇᖅᑐᒃᑯᓪᓗ ᐊᐅᓪᓚᖃᑦᑕᕆᐊᓖᑦ.”
ᑭᕙᓪᓕᓕᒫᒥ, ᐱᒻᒪᕆᐅᔪᓂᒃ ᐱᔨᑦᓯᕋᐅᑎᓖᑦ ᒪᑐᐃᖓᔪᑑᒍᓐᓇᖅᑐᑦ ᓂᕿᑖᕐᕖᑦ ᓂᐅᕕᕐᕖᑦ ᐊᑐᓕᖅᑎᑦᓯᓗᑎᒃ ᐃᑲᕐᕋᖏᑦ ᓇᑲᑕᐅᒋᐊᖅᓯᒪᓗᑎᒃ. ᐃᓪᓗᐃᑦ ᐃᓗᐊᓐᓂ ᑲᑎᖃᑦᑕᕆᐊᖃᕈᓐᓃᖅᑐᑦ, ᓯᓚᒥᓗ ᑲᑎᖃᑦᑕᕐᓂᐅᔪᓕᒫᑦ ᐃᓱᓕᑦᑕᕐᕕᖃᕐᓂᐊᖅᑐᑦ ᑕᓪᓕᒪᓄᑦ ᑐᖔᓂᓘᓐᓃᑦ, ᐊᖏᕐᕋᖅᓯᒪᐃᓐᓇᕋᓱᐊᕐᓗᑎᒃ ᑕᐃᒪᐃᒍᓐᓇᕐᓂᓕᒫᖏᓐᓂ ᑲᑎᓯᓗᐊᑦᑕᐃᓕᖃᑦᑕᕐᓗᑎᓪᓗ ᐊᓯᒥᓂᒃ, ᐃᓚᒋᔭᐅᓪᓗᑎᒃ ᐃᓚᒥᓐᓂᒃ ᑲᑎᓯᑦᑕᐃᓕᓗᑎᒃ ᐊᖏᕐᕋᒥᐅᑕᖃᑎᒋᙱᑕᒥᓂᒃ.
“ᖃᐅᔨᕙᓪᓕᐊᑎᓪᓗᑕ ᐊᒥᓱᕐᖑᐸᓪᓕᐊᓂᖏᓐᓂᒃ ᓄᕙᔾᔪᕐᓇᖅᑐᓖᑦ ᑲᓇᑕᓕᒫᒥ, ᐱᒻᒪᕆᐅᕗᖅ ᒪᓖᓐᓇᕆᐊᖃᕐᓂᑎᓐᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓕᓐᓂᒃ, ᐅᔾᔨᖅᓱᑦᓯᐊᖃᑦᑕᕐᓗᑕ ᖃᐅᔨᓴᑦᓯᐊᕐᓗᑕᓗ ᖃᓄᐃᓕᐅᕈᑎᑦᑎᓐᓂᒃ,” ᐅᖃᖅᓯᒪᔪᖅ ᓯᕗᓕᖅᑎ ᔫ ᓴᕕᑲᑖᖅ. “ᑭᕙᓪᓕᕐᒥᐅᑕᓕᒫᓄᑦ, ᖃᐅᔨᒪᓂᐊᖅᑯᓯ ᐊᑕᐅᓯᐅᖃᑎᒌᒃᑲᑦᑕ, ᓴᙱᓂᕐᒥᒃ ᑐᓂᕙᑦᓯ ᒐᕙᒪᒋᔭᕗᓪᓗ ᐊᑐᐃᓐᓇᑦᓯᐊᖅᑐᑦ ᐃᑲᔪᕈᓐᓇᖅᑐᑎᒃ. ᖃᓄᐃᑦᑕᐃᓕᒋᑦᓯ ᐃᑉᐱᒍᓱᖃᑎᒌᑦᓯᐊᕐᓗᓯᓗ.”
ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.
ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 11:00 ᐅᓪᓛᓴ ᐅᓪᓗᒥ.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᖃᑖᕐᒧᑦ ᑐᓴᕋᑦᓴᓕᕆᓂᕐᒧᑦ
867-975-5059
@email
ᑯᕆᔅ ᐳᓕᐊ
ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email