ᓄᓇᕗᓕᒫᒥ ᓄᕙᔾᔪᐊᕐᓇᖅ 19 ᐱᔾᔪᑎᒋᓪᓗᒍ ᐃᓱᓕᑦᑕᕐᕕᖃᕐᓂᐊᓕᖅᑐᑦ
ᐱᕙᓪᓕᐊᔪᑦ ᑐᓴᕋᑦᓴᑦ
ᓄᓇᕗᓕᒫᒥ ᓄᕙᔾᔪᐊᕐᓇᖅ 19 ᐱᔾᔪᑎᒋᓪᓗᒍ ᐃᓱᓕᑦᑕᕐᕕᖃᕐᓂᐊᓕᖅᑐᑦ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 16, 2020) − ᐱᒋᐊᕐᓗᓂ ᐱᖓᑦᓯᕐᒥ, ᓄᕕᐱᕆ 18, ᓄᓇᕗᒻᒥ ᐊᓯᐊᒎᕐᕕᖃᙱᑦᑐᒥᒃ, ᓄᓇᕗᓕᒫᒥ ᐃᓱᓕᑦᑕᕐᕕᖃᕐᓂᐊᓕᖅᑐᖅ ᒪᕐᕉᓐᓂᒃ ᐱᓇᓱᐊᕈᓰᓐᓂᒃ, ᐊᑦᓱᕉᑎᖃᖅᑎᓪᓗᑕ ᓯᐊᕐᒪᐸᓪᓕᐊᖁᓇᒍ ᓄᕙᔾᔪᐊᕐᓇᖅ 19. ᐱᒻᒪᕆᐅᙱᑦᑐᓂᒃ ᐱᔨᑦᓯᕋᐅᑎᓕᒫᑦ, ᓇᒻᒥᓂᖃᖅᑎᐅᔪᑦ ᑲᑐᔾᔨᖃᑎᒌᓪᓗ ᑎᒥᐅᔪᑦ ᒪᑐᓯᒪᒋᐊᖃᕐᓂᐊᖅᑐᑦ ᑕᐃᒪᐃᒍᓐᓇᕋᐃᒍᑎᓪᓗ, ᐃᖅᑲᓇᐃᔭᖔᖃᑦᑕᕐᓗᑎᒃ ᐊᖏᕐᕋᒥᓐᓂ. ᒫᓐᓇᐅᑦᓴᐅᑎᒋ, ᒪᑐᐊᑦ ᐊᑐᖅᑕᐅᖁᔭᐅᓪᓚᕆᑦᑐᑦ ᑭᒃᑯᑐᐃᓐᓇᕐᓄᑦ ᐅᐸᑦᑕᐅᕙᑦᑐᓂ, ᐃᓅᖃᑎᒌᓪᓗ ᐅᖓᓯᒌᑦᑕᐃᓕᒍᓐᓇᙱᑉᐸᑕ. ᒪᑐᐊᑦ ᐊᓯᐊᒎᕐᕕᖃᙱᑦᑐᒥᒃ ᐊᑐᖅᑕᐅᖏᓐᓇᕆᐊᓖᑦ ᑭᕙᓪᓕᓕᒫᒥ ᓴᓂᑭᓗᐊᕐᒥᓗ.
“ᖃᐅᔨᕙᓪᓕᐊᑎᓪᓗᑕ ᓄᕙᔾᔪᐊᕐᓇᖅᑖᖅᐸᓪᓕᐊᔪᓂᒃ ᓄᓇᓕᑦᑎᓐᓂ, ᐱᒻᒪᕆᐅᕗᖅ ᓯᐊᕐᒪᑦᑕᐃᓕᑎᑦᓯᒋᐊᖃᕐᓂᕗᑦ ᓄᕙᔾᔪᐊᕐᓇᖅ 19-ᒥᒃ ᓄᓇᕗᒻᒥ,” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ. “ᐃᓱᓕᑦᑕᕐᕕᖃᖅᑎᑕᐅᑎᓪᓗᒋᑦ ᓯᐊᕐᒪᕐᕕᐅᑐᐃᓐᓇᕆᐊᖃᕐᓂᖏᑦ ᓄᕙᔾᔪᐊᕐᓇᕐᒥᒃ ᓴᐳᒻᒥᔭᐅᑦᓯᐊᕈᑎᒋᒍᓐᓇᕐᓂᖅᐹᕗᑦ ᓄᓇᕗᒻᒥ. ᖃᐅᔨᓴᒃᑲᓐᓂᓛᖅᑕᕗᑦ ᐊᑑᑎᖃᕐᒪᖔᑕ ᒪᓕᑦᑕᐅᒋᐊᖃᕈᑕᐅᔪᑦ ᑎᓯᐱᕆ 2-ᒥ, ᓇᓗᓇᐃᖅᓯᓛᕐᓗᑕ ᑲᔪᓯᑎᑕᐅᒋᐊᖃᕐᒪᖔᖅ ᓂᕆᐅᓐᓂᖃᑦᓯᐊᕐᓂᕗᑦ ᒪᓕᑦᑐᒋᑦ.”
ᓄᓇᕗᑦ ᒐᕙᒪᒃᑯᖏᑦ ᓴᙱᔪᒥᒃ ᐅᖃᐅᔾᔨᒋᐊᖅᑐᑦ ᐱᒻᒪᕆᐅᙱᑦᑐᓂᒃ ᐱᔾᔪᑎᖃᕐᓗᑎᒃ ᐊᐅᓪᓚᑲᑕᖁᔨᒐᑎᒃ. ᐃᓕᓐᓂᐊᕐᕕᓕᒫᑦ ᒪᑐᔭᐅᓂᐊᖅᑐᑦ ᐊᖏᕐᕋᒥᓐᓂᖔᖅ ᐃᓕᓐᓂᐊᖃᑦᑕᓕᕐᓗᑎᒃ. ᐸᐃᕆᕖᑦ ᒪᑐᔭᐅᓂᐊᖅᑐᑦ ᑭᓯᐊᓂ ᐱᒻᒪᕆᐅᔪᓂᒃ ᐃᖅᑲᓇᐃᔭᖅᑎᓄᑦ. ᓯᓚᒥ ᑲᑎᖃᑦᑕᕐᓃᑦ ᑕᓪᓕᒪᐃᑦ ᐅᖓᑖᓄᑦ ᑕᐃᒪᐃᒋᐊᖃᕈᓐᓃᖅᑐᑦ ᐃᓪᓗᐃᓪᓗ ᐃᓗᐊᓂ ᐃᓱᓕᑦᑕᕐᕕᖃᕐᓗᑎᒃ ᑕᓪᓕᒪᓂᒃ ᖄᒃᑲᓐᓂᖓᒍᑦ ᐃᓪᓗᒥᐅᖃᑎᒌᑦ.
ᐱᙳᐊᕐᕕᓕᒫᑦ ᒪᑐᔭᐅᓂᐊᓕᖅᑐᑦ. ᐱᙳᐊᖃᑦᑕᕐᓂᓕᒫᑦ ᖃᓄᐃᓕᐅᕈᑕᐅᖃᑦᑕᖅᑐᓪᓗ ᓄᖅᑲᖅᑎᑕᐅᔪᑦ. ᓂᕆᕕᓕᒫᑦ ᐊᓂᑦᓯᕕᐅᑐᐃᓐᓇᕈᓐᓇᕐᓂᐊᓕᖅᑐᑦ, ᐃᒥᕋᓚᕝᕕᓕᒫᓪᓗ ᒪᑐᔭᐅᓂᐊᖅᑐᑦ. ᑎᒥᒧᑦ ᐱᔨᑦᓯᕋᐅᑎᐅᔪᑦ, ᓲᕐᓗ ᓄᔭᓕᕆᔩᑦ ᑎᒥᒧᓪᓗ ᖃᓱᓴᐃᔩᑦ ᒪᑐᒋᐊᖃᓕᖅᑐᑦ. ᓄᓇᓕᓐᓂ ᐋᓐᓂᐊᕐᕕᓕᒫᑦ ᐊᒻᒪᓗ ᕿᑭᖅᑕᓂ ᐋᓐᓂᐊᕐᕕᐊᓗᒃ ᒪᑐᔭᐅᓂᐊᓕᖅᑐᑦ ᑭᓯᐊᓂ ᑐᐊᕕᕐᓇᖅᑐᓕᕆᒍᓐᓇᕐᓗᑎᒃ. ᐱᑕᖃᕆᐊᖃᓪᓚᕆᑦᑐᑦ ᓄᓇᕗᑦ ᒐᕙᒪᒃᑯᖏᓐᓂ ᐱᔨᑦᓯᕋᐅᑏᑦ ᓱᓕ ᒪᑐᐃᖓᓂᐊᖅᑐᑦ ᐃᖅᑲᓇᐃᔭᖅᑏᑦ ᐊᖏᕐᕋᒥᓐᓂ ᐃᖅᑲᓇᐃᔭᖔᖃᑦᑕᓕᕐᓗᑎᒃ, ᑕᐃᒪᐃᒍᓐᓇᕋᐃᒍᑎᒃ.
“ᓄᓇᕗᒻᒥᐅᑦ, ᐱᕕᖃᓕᖅᑐᒍᑦ ᐱᒋᐊᓕᖅᑭᓪᓗᑕ ᓯᐊᕐᒪᑦᑕᐃᓕᑎᑦᓯᓂᕐᒧᑦ ᓄᕙᔾᔪᐊᕐᓇᖅ 19-ᒥᒃ. ᐱᓕᕆᖃᑎᒌᑦᑐᐃᓐᓇᐅᒋᐊᖃᖅᑐᒍᑦ ᓴᐳᒻᒥᖃᑎᒌᓪᓗᑕ,” ᐅᖃᖅᓯᒪᔪᖅ ᓯᕗᓕᖅᑎ ᔫ ᓴᕕᑲᑖᖅ. “ᐱᒻᒪᕆᐅᓂᖅᐹᖑᓕᖅᑯᖅ ᖃᓄᓕᒫᖅ ᐃᑲᔪᖃᑎᒌᒋᐊᖃᕐᓂᕗᑦ ᓄᓇᓕᑦᑎᓐᓂ. ᖃᐅᔨᒪᒐᓗᐊᖅᑐᖓ ᑕᒪᓐᓇ ᐊᔪᕐᓇᖅᑑᓂᐊᕐᖓᑦ, ᑭᓯᐊᓂ ᑲᒪᒋᒍᓐᓇᕐᓂᐊᖅᑕᕗᑦ. ᐃᑲᔪᖃᑕᐅᔪᐃᓐᓇᐅᒍᑦᑕ, ᐊᑲᐅᓈᕐᓂᖅᓴᒦᓛᖅᑐᒍᑦ ᑎᓯᐱᕆᐅᑉ ᐱᒋᐊᙵᕐᓂᖓᓂ. ᐅᓗᕆᐊᓇᖅᑐᒦᑎᑦᑕᐃᓕᒋᑦᓯ. ᐊᖏᕐᕋᖅᓯᒪᑐᐃᓐᓇᕐᓗᓯ ᐅᓗᕆᐊᓇᖅᑐᒦᑦᑕᐃᓕᓗᓯᓗ.”
ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.
ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐃᑲᔫᑎᑦᓴᐃᓪᓗ ᒥᑦᓵᓄᑦ ᓄᕙᔾᔪᐊᕐᓇᖅ 19 ᓄᓇᕗᒻᒥ, ᐅᕗᖓᕐᓗᑎᑦ: https://www.gov.nu.ca/health/information/covid-19-novel-coronavirus
ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 1:00 ᐅᓐᓄᓴ ᐅᓪᓗᒥ, ᓄᕕᐱᕆ 16.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᖃᑖᕐᒧᑦ
867-975-5059
@email
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email