ᐊᔪᓕᖅᑎᑦᑎᔾᔪᑕᐅᓯᒪᔪᑦ ᖃᓱᒋᐊᖅᑕᐅᒃᑲᓐᓂᖅᐳᑦ ᐊᕐᕕᐊᕐᒥ ᑎᑭᕋᕐᔪᐊᕐᒥᓗ

ᐅᖃᐅᓯᐅᔪᖅ

ᐊᔪᓕᖅᑎᑦᑎᔾᔪᑕᐅᓯᒪᔪᑦ ᖃᓱᒋᐊᖅᑕᐅᒃᑲᓐᓂᖅᐳᑦ ᐊᕐᕕᐊᕐᒥ ᑎᑭᕋᕐᔪᐊᕐᒥᓗ

ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ ᓘᒃᑖᖅ ᒪᐃᑯᓪ ᐹᑐᓴᓐ ᐅᓪᓗᒥ ᐆᒥᖓ ᐅᖃᐅᓯᕐᒥᒃ ᓴᖅᑭᑎᑦᑎᖅᑲᐅᕗᖅ:

“ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᑎᓪᓗᒋᒃ ᐱᑕᖃᓚᐅᙲᓐᓇᖅᖢᓂ ᐆᒪᔪᓂᒃ ᓄᕙᒡᔪᐊᕐᓇᖅ-19−ᓕᖕᓂᒃ ᐊᕐᕕᐊᕐᒥ ᑎᑭᕋᕐᔪᐊᕐᒥᓗ, ᐅᖃᐅᓯᖃᖅᐳᖓ ᑕᒪᒃᑯᐊ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᔭᕆᐊᓖᑦ ᖃᓱᒋᐊᖅᑎᑕᐅᔪᓐᓇᕐᓕᕐᓂᖏᓐᓂᒃ ᑕᒪᐃᖕᓂ ᑖᑦᑯᓇᖕᓂ ᓄᓇᓖᖕᓂ. ᖃᐅᒃᐸᑦ, ᓄᒃᑕᕐᓂᕐᒧᑦ ᐃᓱᓕᑦᑕᖅᑎᑕᐅᔪᑦ ᐊᑐᕈᓐᓃᖅᑎᑕᐅᓂᐊᓕᖅᐳᑦ, ᑭᓯᐊᓂᓗ ᓱᓕ ᐊᑐᓪᓚᕆᒋᐊᖃᙱᑦᑐᑦ ᓄᒃᑕᕐᓂᕆᔭᐅᓇᔭᖅᑐᑦ ᐊᑐᖁᔭᐅᙱᓚᑦ.

ᐊᒻᒪᓗᑦᑕᐅᖅ, ᒐᕙᒪᒃᑯᑦ ᑎᑎᕋᕐᕕᖏᑦ, ᑕᒪᕐᒥᑲᓴᒃ ᐃᓛᒃᑰᖅᑐᑦ ᓇᖕᒥᓂᕆᔭᐅᔪᑦ ᐃᓕᓐᓂᐊᕐᕖᓪᓗ ᒪᑐᐃᕈᓐᓇᓕᕐᒥᔪᑦ. ᐃᓯᖅᓯᒪᓗᓂ ᑲᑎᓐᓂᕆᔭᐅᕙᒃᑐᑦ ᐃᓱᓕᑦᑕᕐᓂᖏᑦ ᐅᓄᖅᓯᒋᐊᖅᑕᐅᓂᐊᖅᐳᑦ 10−ᓄᑦ ᐃᓄᖕᓄᑦ, ᑕᒪᓐᓇ ᖄᒃᑲᓐᓂᐊᒎᕐᓗᒍ ᐃᒡᓗᒥᐅᑕᐅᖃᑎᒌᓄᑦ, ᑕᒪᒃᑯᐊᓗ ᓯᓚᒥ ᑲᑎᓐᓂᕆᔭᐅᔪᑦ ᐃᓱᓕᑦᑕᖅᑎᑕᐅᓂᖏᑦ ᐅᓄᖅᓯᒋᐊᖅᑕᐅᓂᐊᖅᐳᑦ 50−ᓄᑦ ᐃᓄᖕᓄᑦ. ᑕᒪᓐᓇ ᑐᓴᕈᒥᓇᑦᑎᕋᓗᐊᖅᑎᓪᓗᒍ, ᑭᒃᑯᑐᐃᓐᓇᐃᑦ ᐃᖅᑲᐃᑎᑦᑐᒪᕙᒃᑲ ᔭᓄᐊᕆ ᐃᓱᓕᓐᓇᓱᖕᓂᖓᓂ ᐅᖃᕈᓐᓇᖅᓯᔪᖃᑕᐃᓐᓇᓛᖅᐳᖅ ᐅᖃᐅᓯᖃᓪᓚᕆᓕᕐᓗᓂ ᑕᒪᓐᓇ ᓇᒧᙵᖅᐸᓪᓕᐊᕈᓘᔭᕐᓂᖓ ᐃᓱᓕᓐᓂᖓᓂᒃ. ᑭᒃᑯᑐᐃᓐᓇᑦᑎᐊᑦ ᖃᓄᐃᙱᑦᑎᐊᖁᓪᓗᒋᑦ ᖁᐊᖅᓵᕐᓇᖅᑐᒦᖁᓇᒋᓪᓗ, ᐱᒻᒪᕆᐅᕗᖅ ᒪᓖᓐᓇᕈᑦᑕ ᑭᒃᑯᑐᐃᓐᓇᓂᒃ ᖃᓄᐃᙱᑎᑦᑎᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ ᐃᓕᐅᖅᑲᖅᑕᐅᓯᒪᔪᓂᒃ. ᑎᓕᐅᖅᐸᒃᑲ ᓄᓇᕗᒻᒥᐅᑦ ᐅᕗᙵᐅᖁᓪᓗᒋᑦ, www.gov.nu.ca ᐊᑕᒌᔪᓄᑦ ᐃᓗᓕᖏᓐᓄᑦ.

ᐱᒃᑯᒋᕗᖓᑦᑕᐅᖅ ᓄᓇᕗᒻᒥᐅᓂᒃ ᐃᖅᑲᐃᑎᑦᑎᔭᕆᐊᒃᓴᖅ ᑕᒪᒃᑯᐊ ᓄᓇᓕᖕᓂ ᑲᐱᔭᐅᖃᑦᑕᕐᓂᕐᒧᑦ ᐱᓕᕆᐊᖑᔪᑦ ᐅᓪᓗᒥ ᑲᔪᓯᑎᑕᐅᕗᑦ ᐃᒡᓗᓕᖕᒥ ᐅᖅᓱᖅᑑᕐᒥᓗ ᐱᒋᐊᕐᓂᐊᖅᖢᑎᒡᓗ ᐊᕐᕕᐊᕐᒥ ᐃᖃᓗᒃᑑᑦᑎᐊᒥᓗ ᔭᓄᐊᕆ 14 −ᖑᓕᖅᐸᑦ. ᑎᓕᐅᖅᐸᒃᑲ ᐊᔪᙱᑦᑐᓕᒫᑦ ᓄᓇᕗᒻᒥᐅᑦ 18−ᓂᒃ ᐅᖓᑖᓂᓗ ᐊᕐᕌᒍᓖᑦ ᑲᐱᔭᐅᖁᓪᓗᒋᑦ. ᑕᒪᓐᓇ ᐱᐅᓛᖑᕗᖅ ᒪᓂᒪᓪᓗᓂ ᓴᐳᔾᔨᓯᒪᔪᓐᓇᖅᖢᓂ ᓄᕙᒡᔪᐊᕐᓇᖅ-19−ᒥᑦ."

ᐃᓗᓕᒃᑲᓐᓂᖏᓐᓄᑦ ᒫᓐᓇ ᑭᒃᑯᑐᐃᓐᓇᓂᒃ ᖃᓄᐃᙱᑎᑦᑎᓂᕐᒧᑦ ᑎᓕᓯᔾᔪᑕᐅᓯᒪᔪᓄᑦ, ᐅᓇ ᑕᑯᔭᖅᑐᕐᓗᒍ: https://www.gov.nu.ca/health/information/nunavuts-path

ᐃᓗᓕᒃᑲᓐᓂᖏᓐᓄᑦ ᓄᓇᕗᒻᒥᐅᓄᑦ ᑲᐱᔭᐅᓂᕐᒧᑦ ᐱᓕᕆᐊᖑᔪᒧᑦ, ᐅᕗᙵᐅᓗᑎᑦ: https://www.gov.nu.ca/health/information/covid-19-vaccination

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
@email