ᐊᐴᑎᓯᒪᑦᑕᐃᓕᓂᖅ ᐱᖦᖤᙱᓴᕐᓇᖅᑐᒧᑦ

ᒐᕙᒪᒃᑯᓐᓂᑦ ᐃᓄᖕᓄᑦ ᑐᓴᒐᒃᓴᖅ

ᐊᐴᑎᓯᒪᑦᑕᐃᓕᓂᖅ ᐱᖦᖤᙱᓴᕐᓇᖅᑐᒧᑦ

ᓄᓇᕗᒻᒥᐅᑦ ᖁᕕᐊᓱᒍᑎᖃᖅᐸᓪᓕᐊᔪᒪᓕᕐᒥᑎᓪᓗᒋᑦᓄᓇᒥᓯᐅᕐᓂᕐᒥᒃ ᐃᓚᒥᓂᒃ ᐱᖃᑎᖃᕐᓗᑎᒃ ᑕᒪᑐᒪᓂ ᐅᐱᕐᙶᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᑎᑦᑎᕗᑦ ᐊᑐᖅᑕᐅᓕᕈᓐᓇᖅᑐᓂᒃ ᖃᓄᖅ ᐊᐴᑎᑦᑕᐃᓕᒪᔪᖃᕈᓐᓇᕐᒪᖔᑦ ᐱᖦᖤᙱᓴᕐᓇᖅᑐᓄᑦ.

ᐱᖦᖤᙱᓴᕐᓇᖅ ᐊᑦᑕᕐᓇᖅᖢᓂ ᑭᓯᐊᓂ ᖃᓄᐃᑦᑐᓐᓃᕐᓇᖅᖢᓂ ᖁᐱᕐᕈᐊᕐᔫᕗᑦ ᐊᐃᑦᑐᕐᓘᑕᐅᔪᓐᓇᖅᖢᓂ ᓂᕐᔪᑎᓄᑦ ᐃᓄᖕᓄᓪᓗ. ᐊᒥᓱᑦ ᐆᒪᔪᑦ ᐱᖦᖤᙱᓴᕐᓇᖅᑐᒥᒃ ᐱᑕᖃᓲᑦ, ᐃᓚᒋᔭᐅᓪᓗᑎᑦ ᑎᕆᒐᓂᐊᑦ, ᐊᒪᕈᐃᑦ ᐊᒻᒪ ᕿᒻᒦᑦ. ᑖᓐᓇ ᐋᓐᓂᐊᖑᔪᖅ ᐊᐃᑦᑐᓪᓗᐃᓐᓇᖅᑐᖅ ᓯᐊᒻᒪᒃᐸᒃᑐᖅ ᓇᓪᓕᐊ ᐆᒪᔪᑦ ᑮᓯᔭᕌᖓᒥ, ᕿᓱᒃᓯᑉᐸᑦ, ᐊᓗᐱᖅᓯᒃᐸᓪᓗ ᐃᑭᒥᑦ. ᐊᑦᑕᕐᓇᓛᖑᔪᖅ ᓄᓇᕗᒻᒥ ᐃᓄᐃᑦ ᒪᓂᒪᓗᐊᕐᓂᖏᓐᓄᑦ ᐱᖦᖤᙱᓴᖅᐸᒃᑐᓄᑦ ᐃᒡᓗᒥᐅᖃᑎᒌᓂᒃ ᕿᒻᒥᕆᔭᐅᔪᒥᒃ.

ᐱᖦᖤᙱᓴᕐᓂᖅ ᐃᓅᓕᓴᐅᑎᖃᙱᑦᑐᖅ. ᐃᓄᖕᒥᒃ ᐱᖦᖤᙱᓴᖅᑐᒥᒃ ᖃᓄᐃᓕᓚᐅᔪᖃᓚᐅᖅᑎᓪᓗᒍ, ᑮᔭᐅᓐᓂᖅᐸᓪᓘᓐᓃᑦ ᐱᕕᒡᔪᐊᕈᑕᐅᔪᓐᓇᕐᒪᑦ. ᑲᐴᑎᒧᑦ ᑲᐱᔭᐅᔫᒐᓗᐊᑦ ᐃᓗᐊᖅᓴᐃᔨᒧᑦ ᑮᔭᐅᓵᖅᓯᒪᑎᓪᓗᒋᑦ ᐱᖦᖤᙱᓴᕐᓇᒧᑦ ᓄᖅᑲᕈᑕᐅᔪᓐᓇᖅᐳᖅ ᐊᓐᓇᒍᑎᒋᔪᓐᓇᕐᓗᒍᓗ.

ᑕᒪᑦᑕ ᓄᖅᑲᖅᑎᑦᑎᖃᑕᐅᔪᓐᓇᖅᐳᒍᑦ ᐱᖦᖤᖏᓴᕐᓂᕐᒥᒃ ᐃᒪᐃᓕᐅᕐᓗᑕ:

• ᐊᑦᑕᕐᓇᖅᑐᒧᐊᙱᓪᓗᑎᑦ; ᕿᒻᒥᓂᒃ ᑕᐸᓱᒃᐸᙱᓪᓗᑎᑦ.
• ᐃᐲᙶᖅᑐᑦ ᖃᒡᓕᑦᑕᐃᓕᓗᒋᑦ.
• ᓄᑕᖅᑲᑦ ᕿᒻᒦᑦ ᖃᓂᒋᔮᓃᑎᓪᓗᒋᑦ ᑲᒪᒋᑦᑎᐊᖅᐸᒡᓗᒋᑦ.
• ᑎᒍᐊᑦ ᑲᐱᔭᐅᑎᑉᐸᒡᓗᒍ ᓈᒻᒪᒃᓯᒑᖓᑦ.
• ᑎᒍᐊᖅᓯ ᐃᐱᖅᓯᒪᑎᑉᐸᒡᓗᒋᑦ ᐊᒃᖢᓇᐅᔭᕐᒧᑦ ᓄᖃᖅᓯᕋᓄᓪᓘᓃᑦ ᓯᓚᒦᓐᓂᖏᓐᓂᒃ.
• ᐋᓐᓂᐊᕕᖕᒧᑦ ᐃᕐᖐᓐᓇᖅ ᐅᖃᓗᒃᐸᒡᓗᓯ ᑮᔭᐅᓐᓂᕈᕕᑦ ᕿᓱᒃᑕᐅᓐᓂᕈᕕᓪᓘᓐᓃᑦ ᓂᕐᔪᑎᒧᑦ.

ᐃᓱᒫᓘᑎᖃᕈᔅᓯ ᓂᕐᔪᑎᒥᒃ ᐃᖅᓯᓇᖅᑐᒥᒃ ᐱᖦᖤᙱᓴᕋᓱᒋᓐᓈᓗᓯ, ᐆᒪᔪᕐᓂᐊᖅᑎᔅᓯᓐᓄ ᐅᖃᖅᐸᒡᓗᓯ. ᕿᒻᒥᕆᔭᐃᑦ ᑮᔭᐅᒃᐸᑦ ᓂᕐᔪᑎᒧᑦ, ᐅᖄᓚᕝᕕᒋᓗᒍ ᐊᕙᑎᒥᒃ ᐋᓐᓂᐊᖃᕐᓇᙱᑦᑐᓕᕆᔨᐅᔪᖅ ᐅᕝᕙᓘᓃᑦ ᒪᓕᒐᕋᓛᓕᕆᔨᐅᔪᖅ ᖃᓄᖅ ᐱᔭᕆᐊᖃᕐᒪᖔᖅᐱᑦ ᑐᑭᓯᕝᕕᒋᓇᓱᒡᓗᒍ.

ᐊᕕᒃᓯᒪᓂᕐᓂ ᐊᕙᑎᓕᕆᓂᕐᒧᑦ ᖃᓄᐃᙱᑎᑦᑎᓂᕐᒧᑦ ᑎᑎᕋᕐᕕᖕᓄᑦᖃᐅᔨᒋᐊᕐᕕᖃᕐᓂᕐᒧᑦ ᐅᖄᓚᐅᑎᖏᑦ:

• ᑭᕙᓪᓕᕐᒥ: 1-867-645-8071.
• ᕿᑎᕐᒥᐅᓂ: 1-867-983-4236.
• ᕿᑭᖅᑖᓗᒥᐅᓂ: 1-867-975-4800.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
@email