ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᑐᓴᖅᑎᑦᑎᕗᑦ ᐅᖅᓱᐃᑦ ᐊᑭᑭᒡᓕᒋᐊᖕᓂᖏᓐᓂᑦ

ᔭᓐᓄᐊᓕ 10, 2020

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᓇᕗᑦ ᒐᕙᒪᒃᑯᖏᑦ ᑐᓴᖅᑎᑦᑎᕗᑦ ᐅᖅᓱᐃᑦ ᐊᑭᑭᒡᓕᒋᐊᖕᓂᖏᓐᓂᑦ

ᐃᖃᓗᐃᑦ, ᓄᓇᕗᑦ (ᔮᓄᐊᕆ 10, 2020) – ᓄᓇᕗᑦ ᒐᕙᒪᒃᑯᖏᑦ ᐊᑭᑭᒡᓕᒋᐊᖅᓯᓕᖕᒪᑕ ᓂᐅᕕᐊᒃᓴᐅᔪᓂᑦ ᐅᖅᓱᐃᑦ ᐊᑭᖏᓐᓂᑦ ᐃᒐᓯᐅᑎᓂᑦ ᒑᓴᓖᓂᒡᓗ ᓄᓇᕗᓕᒫᒥᑦ, ᐱᒋᐊᕐᓗᓂ ᔮᓄᐊᕆ 12, 2020.

ᓂᐅᕕᖃᑦᑕᖅᑐᑦ ᓄᓇᕗᓕᒫᖅ ᓄᓇᓕᖏᓐᓂ ᑕᑯᓂᐊᖅᑐᑦ ᓂᐅᕐᕈᑎᖃᖅᑎᑦ ᐊᑭᖏᓐᓂᒃ ᐅᖅᓱᐊᓗᑐᐃᓐᓇᓕᒫᓄᑦ ᐅᖅᓱᕐᓄᓪᓗ ᒥᒃᖠᒋᐊᕐᓗᑎᒃ 4 ᓴᕕᕋᔭᑦ ᓖᑕᑎᒍᑦ, ᑖᒃᓰᔭᖅᑕᐅᓚᐅᙱᑎᓪᓗᒋᑦ. ᐃᖃᓗᖕᓂᑦ, ᐊᑭᖓ ᓂᐅᕕᐊᒃᓴᖃᖅᐸᒃᑐᓄᑦ ᐊᑭᑭᒡᓕᒋᐊᖕᓂᐊᖅᑐᑦ 5 ᓴᓐᔅᒥᑦ ᖃᓪᓗᑎᒧᑦ, ᑖᒃᓯᓕᕐᑕᐅᓚᐅᖅᑳᕋᓂ, ᓄᓇᓯᐅᑎᓄᑦ ᐃᒐᓯᐅᑦᐊᒻᒪᓗ ᖔᓴᓖᒧᑦ, ᐃᒪᓐᓇᓪᓗᐊᖅ ᐊᑭᑭᒡᓕᒋᐊᕐᓕᒫᕐᓗᓂ 9 ᓴᓐᔅᒥᑦ ᖃᓪᓗᑎᒧᑦ. ᐃᓚᒃᑲᓐᓂᖓ ᐊᑭᖓᓄᑦ ᒥᒃᖠᒋᐊᕈᑎ ᐃᖃᓗᖕᓂ ᐱᑎᑕᐅᓇᓱᒃᑐᖅ ᒥᒃᖠᒋᐊᖅᑎᓪᓗᒍ ᑐᓗᕈᑕᐅᖃᑦᑕᖅᑐᖅ ᓂᐅᕕᖃᑦᑕᖅᑐᑦ ᐊᑭᓕᖃᑦᑕᖅᑕᖏᓐᓂ ᐃᖃᓗᖕᓂ ᐊᔾᔨᒋᙱᓪᓗᓂᐅᒃ ᐊᓯᖏᑕ ᓄᓇᓖᑦ, ᐊᑭᖏᑦ ᐊᑦᑎᖕᓂᖅᓴᒦᑦᑐᑦ.

“ᓄᓇᕗᑦ ᒐᕙᒪᒃᑯᖏᑦ ᐊᖏᕐᓯᒪᔪᑦ ᓄᓇᕗᒻᒥᐅᓂᑦ ᐱᖃᖅᑎᑦᑎᓂᐊᕐᓗᑎᒃ ᐱᐅᓛᑦᑎᐊᓂᑦ ᐅᖅᓱᐊᓗᖕᓂᑦ ᓈᒻᒪᒃᑐᓂᑦ ᐅᑭᐅᖅᑕᖅᑐᖁᑎᑦᑎᓐᓄᑦ, ᐊᑭᑦᑎᐊᕙᐅᓛᑎᒍᑦ,” ᐅᖃᖅᑐᖅ ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ ᖁᐊᓴ ᑯᓱᒐᖅ. “ᖁᔭᓐᓇᒦᒻᒪᕆᐊᒃᓗ ᐅᖅᓱᐊᓗᓕᕆᔨᖁᑎᕗᑦ ᐊᑐᓕᖅᑎᑦᑎᓵᓕᓂᖏᓐᓂᑦ ᓂᐅᕕᖕᓂᖕᒧᑦ ᐊᑐᐊᒐᓂᑦ, ᑐᓂᓯᔪᓐᓇᕐᓯᒐᑦᑕ ᐊᑭᑭᒡᓕᒋᐊᕐᓯᒪᔪᓂᑦ ᓄᓇᕗᒻᒥᐅᓄᑦ.”

ᑖᒃᑯᐊ ᐊᑭᑭᒡᓕᒋᐊᕈᑎᑦ ᐊᔾᔨᖃᖅᑐᑦ ᑕᒪᐃᓐᓄᑦ ᐊᖏᖅᑕᐅᙱᑦᑐᓄᑦ ᐅᖅᓱᐊᓗᖕᓂ ᑮᓇᐅᔭᓕᐅᕋᓱᒃᑎᑦ ᐊᑭᖏᓐᓂ 2019−ᒥ. ᐅᖅᓱᐊᓗᓕᕆᔨᒃᑯᑦ ᓂᐅᕕᐊᒃᓴᖃᕈᓐᓇᓚᐅᖕᒪᑕ ᐊᑲᐅᓈᕈᑎᔪᓂᑦ ᐅᖅᓱᐊᓗᐃᑦ ᐊᑭᖏᓐᓂᑦ ᓄᓇᕐᔪᐊᑉ ᓂᐅᕕᐊᒃᓴᖏᓐᓂᑦ ᐱᔪᓐᓇᓚᐅᖅᖢᑎᒃ 2019−ᒧᑦ ᐃᒐᓯᐅᑎᓂᑦ ᒑᓴᓖᓂᒡᓗ ᐊᑐᕆᐊᓖᑦ ᐊᑭᖃᖅᖢᑎᒃ 11−ᓴᓂᑦ 15−ᓴᓄᑦ ᐊᑭᑭᓐᓂᕐᓴᐅᓪᓗᓂ 2018−ᒥᓂᓂᑦ.

ᓄᓇᕗᒻᒥ ᐊᑭᑭᓐᓂᖅᐹᖑᖃᑕᐅᕗᑦ ᑲᓇᑕᒥ ᐅᖅᓱᐊᓗᒃᑖᕋᓱᐊᕐᓂᕐᓄᑦ ᐅᖅᓱᐊᓗᒃᑖᖕᓂᖕᓄᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᒪᔅᑖᕙ ᐃᐅᕆᒃ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᑦ
867-975-5406
meric@gov.nu.ca

 

ᐱᓕᕆᐊᖑᓯᒪᔪᑦ