ᐅᖃᓚᐅᑎᓯᐅᑏᑦ

You are here

Hᐋᐴᑉ ᒐᕙᒪᒃᑯᖏᑦ ᐃᑲᔪᖅᓱᐃᔪᑦ ᓄᓇᐅᑉ ᐃᓗᐊᓃᑦᑐᓂᒃ ᖃᐅᔨᓴᖅᑕᐅᖃᑕᕐᓂᖏᓐᓂᒃ ᐅᑭᐅᖅᑕᖅᑐᒥ

ᓄᕕᐱᕆ 14, 2014

ᑐᓴᒐᒃᓴᐃᑦ ᓴᕿᑎᑕᐅᓂᖏᑦ

ᓴᕿᑎᑕᐅᑲᐅᑎᒋᔭᕆᐊᓖᑦ

 

 Hᐋᐴᑉ ᒐᕙᒪᒃᑯᖏᑦ ᐃᑲᔪᖅᓱᐃᔪᑦ ᓄᓇᐅᑉ ᐃᓗᐊᓃᑦᑐᓂᒃ ᖃᐅᔨᓴᖅᑕᐅᖃᑕᕐᓂᖏᓐᓂᒃ ᐅᑭᐅᖅᑕᖅᑐᒥ

ᐱᓕᕆᐊᖑᓂᖏᑦ ᓯᕗᕙᕆᐊᕈᑕᐅᓂᐊᖅᑐᑦ ᓄᓇᐅᑉ ᐃᓗᐊᓃᑦᑐᓂᒃ ᐅᔭᕋᖕᓂᒡᓗ ᖃᐅᔨᒪᔭᐅᑎᑦᑎᓂᖅᓴᐅᓂᖅ ᓄᓇᕗᒻᒥ, ᓄᓇᑦᓯᐊᕐᒥᒡᓗ

 

ᓄᕕᐱᕆ 14, 2014 – ᐃᖃᓗᐃᑦ, ᓄᓇᕗᑦ - ᐱᓕᕆᕕᖓᑦ ᒥᓂᔅᑕᐅᑉ ᐊᕙᑎᓕᕆᓂᕐᒧᑦ, ᒥᓂᔅᑕᐅᑉ ᑲᓇᑕᒥᐅᑕᐃᑦ ᐅᑭᐅᖅᑕᖅᑐᓂᖓᓂ ᑮᓇᐅᔭᓕᐅᕐᕕᒃᓴᓄᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᕕᖓᓄᑦ  (ᑳᓐᓄᐊᒃᑯᑦ) ᐊᒻᒪᓗ ᒥᓂᔅᑕᖓᑦ ᐅᑭᐅᖅᑕᖅᑐᒥᐅᑕᓕᕆᓂᕐᒧᑦ ᑲᑎᒪᔨᕐᔪᐊᕐᓄᑦ

 

ᒥᓂᔅᑕ ᐊᒡᓘᒃᑲᖅ ᐅᓪᓗᒥ ᑐᓴᖅᑎᑦᑎᖃᐅᔪᖅ ᐃᑲᔪᕈᑎᒃᓴᓂ ᐱᓕᕆᐊᓄᑦ ᓄᓇᕗᒻᒥ ᐊᒻᒪ ᓄᓇᑦᓯᐊᕐᒥ ᐱᐅᓯᕚᓪᓕᕈᑕᐅᓂᐊᖅᑐᓂᒃ ᓄᓇᒥᐅᑕᓂᒃ ᖃᐅᔨᒪᓂᖅ, ᐃᑲᔪᑕᐅᓗᑎᒡᓗ ᐱᖁᑎᕐᔪᐊᖃᕈᓐᓇᕐᓂᕐᒧᑦ ᐊᒻᒪᓗ ᐱᒻᒪᕆᐅᔪᓂᒃ ᓄᓇᐅᒥᑕᓕᕆᓂᕐᒥᒃ ᐱᕙᓪᓕᐊᔪᓕᕆᓂᕐᒧᑦ, ᐅᔭᕋᖕᓂᐊᕐᕕᖕᓂ ᐱᓕᕆᐊᖃᖅᑐᓄᑦ ᐊᒻᒪᓗ ᐃᓕᖅᑯᓯᑐᖃᕆᔭᐅᔪᓄᑦ ᐱᓕᕆᐊᖃᖅᐸᒃᑐᓄᑦ ᐃᑲᔪᑕᐅᓂᐊᖅᑐᓂᒃ. ᑲᓇᑕᐅᑉ ᒐᕙᒪᒃᑯᖏᑦ ᐊᑭᓖᓯᒪᓕᖅᑐᑦ $6.7 ᒥᓕᔭᓐᓂᒃ ᑕᒪᒃᑯᓄᖓ ᖃᐅᔨᓴᒐᒃᓴᐅᓂᖏᓐᓄᑦ ᐱᓕᕆᐊᒃᓴᓄᑦ. ᐃᓚᖃᕐᓗᑎᒃ ᑕᐲᕇᓐᓇᖅᐸᒃᑕᖏᓐᓂᒃ, ᑕᒃᑯᐊ ᓴᕿᑦᑎᔾᔪᑕᐅᓚᐅᖅᑐᑦ ᑲᑎᓪᓗᒋᒃ ᐊᑭᓕᐅᑎᒃᓴᓂᒃ $12.4 ᒥᓕᔭᓐᓂᒃ ᓄᓇᓕᕆᓂᕐᒥᒃ ᖃᐅᔨᓴᕈᑎᓄᑦ ᐃᑲᔪᕐᓂᖃᕐᓂᐊᖅᑐᓂᒃ ᓴᕿᑦᑎᓂᕐᒥᒃ ᐃᖃᓇᐃᔮᒃᓴᓂᒃ ᐊᒻᒪᓗ ᐊᔪᖅᓴᕈᓐᓃᖅᐹᓪᓕᕈᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥᐅᑕᓄᑦ.

 

ᓄᓇᑦᓯᐊᕐᒥ ᓄᓇᓕᕆᔩᑦ ᐱᓕᕆᕝᕕᖓᑦ ᐊᒻᒪᓗ ᑲᓇᑕᒥ-ᓄᓇᕗᒻᒥ ᓄᓇᓕᕆᔩᑦ ᐱᓕᕆᕝᕕᖓᑦ ᓯᕗᓕᐅᖅᑎᐅᓂᐊᖅᑐᑦ ᐱᓕᕆᐊᒃᓴᖏᓐᓂᒃ ᐊᑐᓂ ᐊᕕᒃᑐᖅᓯᒪᓂᖏᓐᓂ. ᐊᑐᓂ ᐱᓕᕆᐊᖑᓂᐊᖅᑐᑦ ᐱᒻᒪᕆᐅᔪᓂᒃ ᖃᐅᔨᕙᓪᓕᕈᑕᐅᓂᐊᖅᑐᑦ ᐊᒻᒪᓗ ᖃᐅᔨᓴᕈᑕᐅᓗᑎᒃ, ᓴᕿᑕᐅᔪᑦ ᐊᑐᐃᓐᓇᐅᔪᓐᓇᕐᓂᐊᕐᒪᑕ ᒐᕙᒪᒃᑯᓐᓄᑦ, ᐃᓕᓐᓂᐊᕐᕕᒡᔪᐊᕐᓄᑦ, ᐅᔭᕋᖕᓂᐊᒐᒃᓴᖅᓯᐅᑎᐅᔪᓄᑦ ᓄᓇᒥᒃ ᐊᒻᒪᓗ ᑲᒻᐸᓂᐅᔪᓂᒃ ᐱᓕᕆᕕᓕᖕᓂᒃ. ᑕᒪᒃᑯᐊᑦᑕᐅᖅ ᐱᓕᕆᐊᒃᓴᐃᑦ ᐱᐅᓯᕚᓪᓕᕈᑕᐅᓂᐊᕐᒥᔪᑦ ᖃᐅᔨᒪᓂᕐᒥ ᓄᓇᓕᕆᓂᕐᒥᒃ ᓄᓇᒥᐅᑕᓕᕆᓂᕐᒥᒡᓗ ᐊᔪᕐᓇᕈᓃᕈᑕᐅᔪᓐᓇᖅᑐᓂᒃ ᓄᓇᕗᒻᒥ ᓄᓇᑦᓯᐊᕐᒥᓪᓗ.

 

ᓇᐃᓈᖅᑕᐅᓯᒪᔪᑦ ᓱᓕᔪᑦ

 

  • ᑲᓇᑕᐅᑉ ᐅᑭᐅᖅᑕᖅᑑᓂᖓᓂ ᐊᕕᒃᑐᖅᓯᒪᔪᑦ ᐱᑕᖃᑦᑎᐊᖅᐳᑦ ᐱᔪᒪᔭᐅᖏᓐᓇᖅᑐᓂᒃ ᐊᒻᒪᓗ ᑐᖓᕕᐅᕙᒃᑐᓄᒃ ᐃᓚᒃᓴᔭᓂᒃ ᓴᕕᖃᖅᑐᓂᒃ ᓲᕐᓗ ᐊᐃᔪᓐᒥᒃ ᓯᑎᔪᒥᒃ, ᔪᕇᓂᔭᒻᒥᒃ ᓄᖑᔪᐃᑦᑐᓕᖕᒥᒃ, ᒍᓗᓂᒃ, ᐊᓕᒎᔭᕐᓂᒃ  ᓯᑎᓂᖅᐹᓂᒃ, ᐊᒻᒪᓗ ᓇᓂᔭᐅᒐᔪᖏᑦᑐᓂᒃ ᓄᓇᓂᒃ ᐊᒪᓗ ᐱᑕᖃᐃᓐᓇᖅᑐᓂᒃ ᐅᖅᓱᐊᓗᒃᓴᔭᕐᓂᒃ ᒐᓴᓖᒃᓴᔭᕐᓂᒡᓗ.
  • ᒪᓐᓇᐅᓕᖅᑐᖅ 5-ᖑᕗᑦ ᐊᐅᓚᑕᐅᔪᑦ ᐅᔭᕋᖕᓂᐊᕐᕕᑦ ᓄᓇᕗᒻᒥ ᓄᓇᑦᓯᐊᕐᒥᒡᓗ ᐃᖃᓇᐃᔮᖃᕈᑕᐅᓪᓗᑎᒃ ᖃᓂᒋᔭᖏᓐᓄᑦ 3,900-ᓂ
  • ᑕᐃᒪᖓᑦ 2009-ᒥ, ᑳᓐᓄᐊᒃᑯᑦ ᐊᑭᓕᖅᑐᐃᓯᒪᓕᖅᑐᑦ ᐅᖓᑕᓃᑦᑐᓂᒃ $22 ᒥᓕᔭᓐᓂᒃ ᓄᓇᓕᕆᓂᕐᒧᑦ ᖃᐅᔨᓴᕈᑎᒃᓴᓄᑦ ᖃᐅᔨᒪᔾᔪᑎᒃᓴᓕᐅᕐᓂᕐᒧᑦ ᐊᒻᒪᓗ ᖃᐅᔨᓴᖅᑕᐅᑎᑦᑎᓂᕐᒧᑦ ᐅᑭᐅᕐᑕᖅᑐᕐᒥ.
  • ᑳᓐᓄᐊᒃᑯᑦ ᐅᑭᐅᖅᑕᖅᑐᒥ ᐱᓕᕆᐊᒃᓴᓂᒃ ᐊᐅᓚᑦᑎᕕᐅᓂᕐᒧᑦ ᐱᓕᕆᕕᖓᑦ ᒫᓐᓇᐅᓕᖅᑐᖅ ᐱᓕᕆᖃᑎᖃᓕᖅᑐᖅ ᐅᖓᑕᓃᑦᑐᓂᒃ 30-ᓂᒃ ᐊᖏᔫᑎᓂᒃ ᓴᓈᖃᕐᕕᐅᔪᓂᒃ ᓯᕗᕙᕆᐊᖅᑕᐅᖁᓪᓗᒋᑦ ᐱᑕᖃᓕᕈᓐᓇᕐᓂᖏᑦ ᐱᒻᒪᕆᐅᔪᑦ ᓄᓇᒥᐅᑕᓂᒃ ᕿᓂᕈᑕᐅᔪᓐᓇᖅᑐᓂᒃ ᐅᕝᕙᓗᓐᓃᑦ ᐱᕙᓪᓕᕈᑎᒃᓴᓂᒃ ᐱᓕᕆᐊᒃᓴᓂᒃ ᓇᑐᐃᓐᓇᑦᑎᐊᖅ ᐅᑭᐅᖅᑕᖅᑑᓂᕐ, ᑮᓇᐅᔭᓂᒃ ᐊᑭᓕᐅᑕᐅᓯᒪᓕᖅᑐᑦ ᐅᖓᑖᓃᑦᑐᓂᒃ $26 Bᐃᓕᔭᓐᓂᒃ ᐊᑭᑐᔫᑎᓄᑦ ᐱᖁᑎᓕᐅᕈᑕᐅᓂᕐᒧᑦ ᐊᒻᒪ ᓱᓕ 12,000-ᖏᓃᑦᑐᓂᒃ ᐃᖃᓇᐃᔮᒃᓴᓂᒃ.

 

ᐅᖃᐅᓯᐅᓯᒪᔪᑦ

 

“ᒐᕙᒪᕗᑦ ᐊᔪᐃᓐᓈᕆᔭᖃᖅᑐᑦ ᐃᖅᑲᓇᐃᔮᒃᓴᓕᐅᕐᓂᕐᒥᒃ, ᐱᕈᖅᓴᐃᓂᕐᒥᒃ ᐊᑯᓂᐅᔪᒧᓪᓗ ᑮᓇᐅᔭᓕᐅᕈᓐᓇᕐᓂᕐᒥᒃ. ᑕᒪᒃᑯᐊ ᐱᓕᕆᐊᖑᓂᖏᑦ ᐊᔾᔨᒋᖏᑦᑑᑎᐅᔪᓂᒃ ᑮᓇᐅᔭᓕᐅᕈᑕᐅᔪᓐᓇᕐᓂᕐᒧᑦ ᐃᑲᔫᑎᖃᕐᓂᐊᖅᑐᑦ ᐊᒻᒪᓗ ᓴᕿᑎᑦᑎᓯᒪᓗᑎᒃ ᐱᕚᓪᓕᕈᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥᐅᑕᓄᑦ. ᑐᖓᕕᐅᔪᓐᓇᑦᑎᐊᖅᑐᑦ ᖃᐅᔨᒪᔾᔪᑎᒃᓴᐃᑦ ᐅᔭᕋᐅᔭᐃᑦ ᐃᓂᖏᓐᓂ ᐊᒻᒪᓗ ᐆᒻᒪᖅᑯᑎᒃᓴᓕᐅᕈᑕᐅᔪᓐᓇᖅᑐᓂᒃ ᐱᑕᖃᕐᓂᖏᑦ ᓄᓇᒥ ᖃᐅᔨᒪᔭᐅᑦᑎᐊᕆᐊᖃᕐᒪᑕ ᐱᔪᒥᓇᕈᑕᐅᓕᕈᓐᓇᕐᓂᕐᒧᑦ ᐱᓕᕆᔪᒪᒐᔭᕐᑐᓂᒃ ᓄᓇᒥᐅᑕᓕᕆᓂᕐᒥᒃ ᐱᕙᓪᓕᐊᑎᑎᔪᓐᓇᕐᓂᕐᒧᑦ ᐊᒻᒪᓗ ᐃᑲᔫᑕᐅᓂᕐᒧᑦ ᐊᔪᖏᑦᑎᐊᖅᑐᓂᒃ, ᑮᓇᐅᔭᓕᐅᕈᑎᒃᓴᐅᒃᑲᓐᓂᕈᓐᓇᖅᑐᓂᒡᓗ ᓴᖅᑭᑎᑦᑎᔪᓐᓇᕐᓂᕐᒧᑦ, ᑕᑯᖃᑦᑕᓕᖅᑕᑦᑎᓐᓂᒃ ᐅᑭᐅᖅᑕᖅᑐᖓᓂ ᑲᓇᑕᐅᑉ.”

 

ᓕᐊᓇ ᐊᒡᓘᒃᑲᖅ

ᒥᓂᔅᑕᖓᑦ ᐊᕙᑎᓕᕆᓂᕐᒧᑦ, ᒥᓂᔅᑕᖓᑦ ᑲᓇᑕᒥᐅᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᕕᒃᓴᐅᔪᓐᓇᖅᑐᓄᑦ ᐱᕙᓪᓕᐊᔪᓕᕆᓂᕐᒧᑦ ᑎᒥᖁᑎᖓᓄᑦ ᐊᒻᒪᓗ ᒥᓂᔅᑕᐅᓂᕐᒧᑦ ᐅᑭᐅᖅᑕᖅᑐᒥᐅᑕᓕᕆᓂᕐᒧᑦ ᑲᑎᒪᔨᕐᔪᐊᕐᓄᑦ

 

“ᓄᓇᒥᒃ ᓄᓇᙳᐊᓕᐅᕐᓂᖅ ᐃᑲᔪᕐᓂᖃᖅᐸᒃᐳᖅ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕆᔭᐅᕙᒃᑐᒥᒃ ᐅᑭᐅᑕᖅᑐᒥ. ᑕᒪᓐᓇ ᑐᖅᓴᖅᑕᐅᔪᒃᓴᖅ ᐃᑲᔪᕈᓐᓇᕋᔭᕆᕗᖅ ᑲᒪᒋᔭᖃᑦᑎᐊᕐᓂᕐᒥᒃ ᐊᑐᖅᑕᐅᔪᓐᓇᖅᑐᓂᒃ, ᓇᖕᒥᓂᕆᔭᐅᔪᓂᒃ ᐊᔪᕈᓐᓃᖅᑕᐅᕙᒃᑐᓄᓪᓗ ᐱᕙᓪᓕᐊᓂᕆᔭᐅᔪᒥᒃ ᓄᓇᕗᒻᒧᑦ ᐊᖏᒡᓕᒋᐊᖅᑎᑦᑎᓂᒃᑯᑦ ᓄᓇᒥᑦ ᐊᑐᖅᑕᐅᔪᓐᓇᖅᑐᓂᒃ  ᐆᒻᒪᖅᑯᒻᒧᓪᓗ ᐱᓕᕆᓂᕆᔭᐅᕙᒃᑐᓄᑦ.”

 

ᔪᐊᔾ ᑯᒃᓱᒃ

ᓄᓇᕗᑦᒥ ᒥᓂᔅᑕ ᐱᕙᓪᓕᐊᔪᓕᕆᓂᕐᒧ ᐊᒻᒪ ᐃᖏᕐᕋᔾᔪᑎᓕᕆᓂᕐᒧᑦ

 

“ᐅᓇ ᐱᓕᕆᓂᖅ ᒪᑯᓂᖓ ᐱᓕᕆᕝᕕᖕᓂ, ᒐᕙᒪᐅᔪᓂ ᐊᒻᒪ ᓄᓇᓕᖕᓂ ᐊᑐᒻᒪᕆᒃᑐᓂ ᑐᓴᕈᑎᐅᓂᐊᕐᑐᖅ ᐅᔭᕋᐅᔭᖃᑐᐃᓐᓇᕆᐊᖃᕐᓂᕐᒧ ᐊᒻᒪ ᓄᓇᐅᑉ ᐊᑖᓂ ᐊᐅᒍᓐᓇᖏᑦᑐᒥ ᒫᓂ ᓯᓚᐃᕝ ᓄᓇᖑᐊᑎᒍᑦ ᐳᕌᕕᓐᔅ (Slave Geological Province). ᓄᓇᐅᑉ ᐃᓗᐊᓃᑦᑐᓂ ᖃᐅᔨᓴᕐᓂᖅ ᐱᒻᒪᕆᐅᒋᔭᐅᓚᐅᕐᐳᖅ ᐃᓱᒪᓕᐊᖑᔪᓂ ᐅᔭᕋᖕᓂᐊᕐᕕᓕᕆᓂᒃᑯ ᐱᕙᓪᓕᐊᔪᓕᕆᓂᕐᒥ, ᓴᕿᑕᐅᓂᑯ ᓄᓇᑦᓯᐊᕐᒥ ᒐᕙᒪᑯᓐᓂ 2013-ᖑᑎᓪᓗᒍ. ᑕᒪᒃᑯᐊ ᐱᓕᕆᐊᒃᓴᐅᔪᒪᔪᑦ ᐃᑲᔪᖅᑕᐅᓐᓇᕐᓂᕐᓴᐅᓂᐊᕐᑐᑦ ᐱᓕᕆᐊᖃᕈᒪᔪᓂ ᐱᓕᕆᕝᕕᖕᓂᒡᓗ, ᐊᒻᒪᓗ ᐃᑲᔫᑎᐅᓗᓂ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯ ᐅᔭᕋᖕᓂᐊᕐᕕᓕᕆᓂᕐᒥ ᐊᑯᓂᕈᓗᒃ.”

 

ᑕᐃᕕᑦ ᕌᒻᓯ

ᒥᓂᔅᑕ ᓴᓇᕝᕕᓕᕆᓂᕐᒧᑦ, ᐳᓚᕋᖅᑐᓕᕆᓂᕐᒧ ᐊᒻᒪ ᐱᕙᓪᓕᐊᔾᓂᕐᒧ

ᓄᓇᑦᓯᐊᕐᒥ ᒐᕙᒪᒃᑯᑦ

 

 

 

ᐊᓯᒃᑲᓐᓂᖏᑦ ᑖᒃᑯᓄᖓ ᐃᓚᒋᔭᐅᖕᒥᔪᑦ

CanNor supports geoscience research in the North (ᓄᕕᐱᕆ 2010)

 

-30-

 

ᐅᖃᕐᕕᒃᓴᐃᑦ

 

ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ, ᐊᑏᑐᖅ ᐅᖃᕐᕕᐅᓂᐊᖅᐳᑦ:

 

ᐱᓕᕆᕕᖓᓂ ᓂᕈᐊᖅᑕᐅᓯᒪᔫᑉ ᓕᐅᓈ ᐊᒡᓘᒃᑲᖅ

ᔮᓇᑕᓐ ᓕᕖᐳᕆ

819-997-1441

 

 

ᑲᓇᑕᒥᐅᑦ ᐅᑭᐅᖅᑕᖅᑐᓂᖓᓂ ᑮᓇᔭᓕᐅᕐᕕᒃᓴᓕᐅᕈᓐᓇᖅᑐᓂᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᕕᖓᑦ

ᑯᕆᐊᒡ ᐅᐊᓪᔅ

ᑐᑭᓯᐅᒪᑎᑦᑎᓂᕐᒧᑦ ᐅᖃᐅᔾᔨᒋᐊᖅᑎᖓᑦ, ᓄᓇᕗᑦ ᐊᕕᒃᑐᖅᓯᒪᓂᖓᓂ

867-975-3722

 

ᑳᓐᓄᐊᒃᑯᑦ ᐱᓕᕆᐊᖃᖅᐳᑦ ᐃᑲᔪᖅᑎᐅᓂᖅ ᓴᕿᐅᒪᑎᑦᑎᕙᓪᓕᐊᔪᒪᓂᖅ ᐊᒥᓱᓂᒃ ᐊᔾᔨᒌᖏᑦᑑᑎᐅᔪᓂᒃ, ᑲᔪᓰᓐᓇᕈᓐᓇᕋᔭᖅᑐᓂᒃ ᐊᒻᒪᓗ ᐱᐅᔫᑎᓂᒃ ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᓇᓂᑐᐃᓐᓇᖅ ᑲᓇᑕᐅᑉ ᐱᖓᓱᓂᒃ ᐊᕕᒃᑐᖅᓯᒪᓂᖏᓐᓂᒃ, ᐊᒻᒪᓗ ᐊᑐᐃᓐᓇᐅᑎᑦᑎᖃᑦᑕᖅᓱᑎᒃ ᐅᑭᐅᖅᑕᖅᑐᒥᐅᑕᓄᑦ ᑎᓕᔭᐅᓯᒪᓂᕐᒥᓂᒃ ᒪᓕᒃᓱᑎᒃ ᑮᓇᐅᔭᒃᓴᖃᖅᑎᑦᑎᖃᑦᑕᕆᐊᖃᕐᓂᕐᒧᑦ ᐊᑐᒐᒃᓴᐅᓕᕐᓂᐊᖅᑐᓄᑦ, ᐅᑭᐅᖅᑕᖅᑐᒥ ᐱᓕᕆᐊᒃᓴᓂᒃ ᐊᐅᓚᑦᑎᕕᐅᓂᕐᒧᑦ ᐱᓕᕆᕕᖓᓐᓂᒃ ᐊᒻᒪᓗ ᐱᓕᕆᐊᖃᖃᑦᑕᕐᓂᕐᒧᑦ ᐊᑐᐊᒐᒃᓴᓕᕆᓂᕐᒥᒃ ᐊᒻᒪᓗ ᖃᐅᔨᓴᖃᑦᑕᕐᓂᕐᒥᒃ.

 

 

ᓄᓇᑦᓯᐊᕐᒥ ᓄᓇᓕᕆᔩᑦ ᐱᓕᕆᕕᖓᑦ

ᔮᓐ ᑭᐊᑦᓴᒻ

ᑲᑎᒪᔨ

867-765-6620

 

ᑲᓇᑕᒧᑦ-ᓄᓇᕗᒻᒧᓪᓗ ᓄᓇᓕᕆᔨᑦ ᐱᓕᕆᕕᖓᑦ

ᑏᕕᑦ ᒪᐃᑦ

ᐊᖓᔪᖄᖓᑦ ᓄᓇᓕᕆᔨᓄᑦ

867-975-4412

 

ᓄᓇᕗᑦ ᒐᕙᒪᖓ

ᒫᑎᐅ ᐃᓚᓯᕕᑦᔅ

ᐊᐅᓚᑦᑎᔨ, ᑐᓴᐅᒪᔾᔪᑎᓕᕆᓂᕐᒧᑦ

867-976-7818

 

ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ ᐱᔾᔪᑎᖃᖅᑐᓂᒃ ᑳᓐᓄᐊᒃᑯᓐᓂᒃ, ᑕᑯᒋᐊᕈᓐᓇᖅᑕᐃᑦ ᖃᕆᑕᐅᔭᒃᑯᑦ ᐅᓇ ᑕᑯᓂᐊᖅᑕᐅᕕᖓᑦ ᐅᕙᓂ cannor.gc.ca

ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ ᐱᔾᔪᑎᖃᖅᑐᓂᒃ ᑲᓇᑕᐅᑉ ᐅᑭᐅᖅᑕᖅᑑᓂᖓᓂ ᖃᓄᐃᓕᐅᕈᑎᒃᓴᓕᐊᖑᓯᒪᔪᓂᒃ, ᑕᑯᓂᐊᕈᓐᓇᖅᑕᐃᑦ ᖃᕆᑕᐅᔭᒃᑯᑦ ᐅᓇ ᑕᑯᓂᐊᖅᑐᐅᕕᖓᑦ ᐅᕙᓂ: northernstrategy.ca

 

 

 

ᖃᓄᖅ ᐱᒋᐊᖓᓚᐅᖅᓯᒪᖕᒪᖔᑦ

 

ᓄᓇᐃᑦ ᐃᓗᐊᓃᑦᑐᓂᒃ ᖃᐅᔨᓴᕐᓂᕐᒥᒃ ᐱᓕᕆᐊᒃᓴᐃᑦ ᐃᑲᔫᑕᐅᔪᑦ ᑮᓇᐅᔭᓕᐅᕈᑕᐅᔪᓐᓇᕐᓂᕐᒧᑦ ᐱᕙᓪᓕᐊᔾᔪᑎᒃᓴᓄᑦ ᓄᓇᕗᒻᒥ

 

ᑳᓐᓄᐊᒃᑯᑦ ᐊᑭᓖᓂᐊᓕᖅᑐᑦ $3.3 ᒥᓕᔭᓂᒃ 11-ᓄᑦ ᓄᓇᐅᑉ ᐃᓗᐊᓃᑦᑐᓂᒃ ᐱᓕᕆᐊᖃᕈᑎᒃᓴᓂᑦ ᓄᓇᕗᒻᒥ, ᒪᕐᕈᖕᓂᐊᖅᑑᖕᓂᒃ ᐊᕐᕋᒎᖕᓂ. ᐃᓚᒋᓗᒋᑦ ᑕᐃᒃᑯᐊ ᑕᐱᕆᕙᒃᑕᖏᑦ, ᑕᒪᒃᑯᐊ ᑮᓇᔭᐃᕈᑕᐅᔪᑦ ᖃᓂᒋᔭᖏᓃᑦᑐᑦ $7.1 ᒥᓕᔭᓐ ᐱᐅᓯᕚᓪᓕᕈᑕᐅᓂᐊᖅᑐᑦ ᓄᓇᐃᑦ ᐃᓗᐊᓃᑦᑐᓂᒃ ᖃᐅᔨᒪᓕᕈᓐᓇᕐᓂᖅ ᐊᕕᒃᑐᖅᓯᒪᓂᖏᓐᓂ ᐊᒻᒪᓗ ᐃᑲᔫᑕᐅᓂᐊᖅᑐᑦ ᐱᕙᓪᓕᐊᔾᔪᑎᒃᓴᓄᑦ ᐅᔭᕋᖕᓂᐊᕐᕕᓕᕆᓂᕐᒥᒃ ᐱᓕᕆᐊᖃᖅᐸᒃᑐᓄᑦ, ᐃᓕᖅᑯᓯᓕᕆᔨᐅᓂᕐᒥᒃ ᐱᓕᕆᐊᖃᖅᐸᒃᑐᓄᑦ ᐊᒻᒪᓗ ᓄᓇᓕᖕᓂ ᐱᖁᑎᕐᔪᐊᖅᑖᕆᔭᐅᔭᕆᐊᓕᖕᓄᑦ  . ᑕᐃᒃᑯᐊ ᐱᓕᕆᐊᒃᓴᐃᑦ ᐊᐅᓚᑕᐅᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖃᓇᐃᔭᕐᕕᖕᒧᑦ ᑮᓇᔭᓕᐅᕈᑎᒃᓴᓄᑦ ᐱᕙᓪᓕᐊᔪᓕᕆᓂᕐᒧᑦ ᐊᒻᒪᓗ ᐃᖏᕐᕋᔪᓕᕆᔨᒃᑯᓐᓄᑦ ᐃᓚᒋᓗᓂᒋᑦ ᑲᓇᑕᒧᑦ-ᓄᓇᕗᒻᒧᓪᓗ ᓄᓇᓕᕆᔨᑦ ᐱᓕᕆᕕᖓᓂᒃ.

 

ᑳᓐᓄᐊᒃᑯᓂᖔᖅᑐᑦ ᑮᓇᐅᔭᐃᑦ:  $3,347,560

ᓄᓇᕗᑦ ᒐᕙᒪᒃᑯᖏᓐᓂᖓᖅᑐᑦ ᐊᒻᒪ ᐱᓕᕆᖃᑎᖏᓐᓂ:  $3,752,000

ᑲᑎᓪᓗᒋᑦ:  $7,099,560

 

 

1) ᐱᓕᕆᐊᖑᓂᐊᕐᑐᑦ ᐅᔭᕋᓪᓛᖑᓃᓐᓈᓗᐃᑦ ᓄᓇᖑᐊᓕᐊᖑᓂᖏᑦ ᕿᑭᖅᑖᓘᑉ ᓂᒋᖅᐸᓯᐊᓂ

 

ᑕᐃᒃᑯᐊ ᑲᓇᑕᒧ-ᓄᓇᕗᒻᒧᓪᓗ ᓄᓇᓕᕆᔩᑦ ᐱᓕᕆᕕᖓᑦ ᑲᒪᔨᐅᓂᐊᖅᑐᑦ ᑐᕌᒐᕆᔭᐅᓂᐊᖅᑐᓂᒃ ᓄᓇᖑᐊᓕᐊᖑᓂᐊᖅᑐᓂᒃ ᐊᒻᒪᓗ ᐆᒃᑐᕋᒐᒃᓴᐅᕙᖕᓂᐊᖅᑐᓂᒃ ᓄᑖᓂᒃ ᖃᐅᔨᔭᐅᓵᖅᓯᒪᔪᒃ ᓄᓇᐅᑉ ᐃᓗᐊᓂᒃ ᐱᑕᖃᕐᓂᖏᓐᓂᒃ ᓴᕿᑎᑕᐅᓯᒪᔪᖃᖅᑐᓂᒃ; ᓇᓗᓇᐃᖅᑕᐅᓗᑎᒡᓗ ᑎᑎᕋᖅᑕᐅᓗᑎᒡᓗ ᓄᑖᑦ ᓄᓇᒥᐅᑕᕆᔭᐅᔪᓂᒃ ᐱᔪᒪᔭᐅᕙᖕᓂᖏᓐᓂᒃ ᐱᑕᖃᖅᑐᑦ ᑕᐅᕙᓂ ᐃᓱᐃᑦᑐᖅᒥᒃ ᐊᒻᒪᓗ ᕿᑭᖅᑖᓘᑉ ᓂᒋᐊᖅᐸᓯᓕᒫᑲᓵᖓᒍᑦ; ᐊᒻᒪᓗ ᖃᖓᑕᓲᒃᑯᕐᓗᑎᒃ ᓄᓇᐅᑉ ᐃᓗᐊᓂ ᓂᐱᓐᓇᑐᖃᖅᑎᒋᓂᖏᓐᓂᒃ ᐅᔭᕋᐃᑦ ᓴᓇᔭᐅᓗᑎᒃ ᑕᐅᕘᓇ ᐅᐊᖕᓇᖅᐸᓯᐊᒍᑦ ᓄᓇᓕᖓᑕ ᐃᖃᓗᐃᑦ ᓯᓚᑖᒍᑦ ᑕᓯᕐᔪᐊᑉ ᐊᒻᒪᓗ ᑲᖏᖅᑐᐊᓘᑉ ᐊᑯᓐᓂᖓᓂᒃ. ᑕᒪᓐᓇ ᖃᐅᔨᒪᔭᐅᓕᕈᓂ ᐱᐅᓯᕚᓪᓕᕈᑕᐅᓂᐊᕐᒪᑕ ᐊᒃᑐᖅᑕᐅᓚᐅᖏᓐᓂᖏᓐᓂ ᓱᓕ ᖃᐅᔨᒪᔭᐅᕙᒌᕈᑎᒃᓴᐅᓂᕐᒧᑦ ᓄᓇᒥᐅᑕᐃᑦ ᓄᓇᐅᑉ ᐃᓗᓂᐊ ᐃᕿᖓᓃᑦᑐᓂᒃ ᖃᐅᔨᒪᔭᐅᓂᐊᖅᑐᓂᒃ ᐊᒻᒪᓗ ᑐᑭᓯᓇᕈᑕᐅᓗᑎᒃ ᑕᒪᒃᑯᓂᖓ ᓄᑖᓂᒃ ᐅᔭᕋᖕᒥᐅᑕᖃᕐᓂᖏᓐᓂᒃ ᓴᕿᑎᑕᐅᓯᒪᔪᓂᒃ ,ᖃᐅᔨᒪᔾᔪᑎᒋᔭᐅᖃᑕᕐᓂᐊᕐᒪᑕ ᓄᓇᐃᑦ ᐊᑑᑎᒃᓴᖏᓐᓄᑦ ᐊᒪᓗ ᕿᓂᕐᕕᐅᓕᕈᓐᓇᕐᓂᖏᓐᓄᑦ ᐃᓱᒪᓕᐅᕈᑕᐅᔪᓐᓇᕐᓂᐊᖅᑐᓄᑦ.

 

2) ᐱᓕᕆᐊᖑᓂᐊᕐᑐᑦ ᐅᔭᕋᓪᓛᖑᓃᓐᓈᓗᐃᑦ ᓄᓇᖑᐊᓕᐊᖑᓂᖏᑦ ᐃᓗᒥ ᐅᐊᓕᓂᖅᐸᓯᖕᒥᐅᑕᓂ

 

ᑕᒪᓐᓇ ᐱᓕᕆᐊᖑᒋᐊᕐᓂᐊᖅᑐᖅ ᑕᐅᕙᓂ ᐃᓗᒥ ᐅᐊᓕᓂᖅᐸᓯᖕᒥᐅᓂ ᐅᑭᐅᖅᑕᖅᑐᒥ, ᑲᑎᖅᓱᕈᑕᐅᓂᐊᕐᒪᑕ ᓄᑖᓂᒃ ᓄᓇᐅᑉ ᐃᓗᐊᓃᑦᑐᓂᒃ ᖃᐅᔨᔭᐅᔪᒪᔪᓂᒃ ᐃᓚᖃᕐᓗᑎᒃ ᖃᐅᔨᔾᔪᑎᒃᓴᓂᒃ ᐃᓗᓕᖃᕐᓂᖏᓐᓂᒃ ᖃᓄᐃᓕᖓᓂᖏᓐᓂᒃ ᑐᑭᓯᒪᐅᔾᔪᑎᒃᓴᓂᒃ ᑕᐅᕙᓂ ᐃᒪᐅᑉ ᐃᓗᑐᓂᖓᓂ, ᖃᓄᐃᑦᑑᔪᒥᓇᕐᓂᖏᓐᓂᓗ ᐅᔭᕋᓪᓚᖑᓂᐊᓗᐃᑦ, ᐊᒻᒪᓗ ᖃᓄᐃᑦᑐᓂᒃ ᐅᔭᕋᖕᒥᐅᑕᖃᕐᒪᖔᑕ ᑕᐃᒃᑯᖓ. ᑕᒪᓐᓇ ᐱᐅᓯᕚᓪᓕᕈᑕᐅᓂᐊᖅᑐᖅ ᓄᓇᓂᒃ ᖃᐅᔨᓴᕐᓂᕐᒥᒃ ᖃᐅᔨᒪᔭᐅᔪᓐᓇᖅᑐᓂᒃ ᐃᑲᔫᑕᐅᔪᓐᓇᕐᓂᐊᖅᑐᓂᒃ ᐅᔭᕋᖕᓂᐊᕐᕕᓕᐅᕈᓐᓇᕐᓂᕐᒥᒃ ᑕᐅᕙᓂ ᐊᕕᒃᑐᖅᓯᒪᓂᖏᓐᓂ.

 

3) ᑕᓯᕐᒥᒃ ᓯᐅᕋᖏᑦ ᖃᓄᐃᑦᑑᓂᖏᓐᓂᒃ ᓱᓇᑕᖃᕐᒪᖔᑕᓗ ᖃᐅᔨᓴᕐᓂᖅ

 

ᓄᑖᒥ ᑕᓯᐅᑉ ᓯᐅᕋᖏᓐᓂ ᖃᓄᐃᑦᑑᓂᖏᓐᓂᒃ ᖃᐅᔨᓴᕐᓂᐊᕐᑐᑦ ᐃᖃᓗᐃᑦ ᐅᐊᖕᓇᖓᓂ ᕿᑭᖅᑖᓘᑉ ᓂᒋᖅᐸᓯᐊᓂ 2015-ᖑᓕᕐᐸᑦ. ᐊᕕᒃᑐᕐᓯᒪᓂᒃᑯ ᑕᓯᐅᑉ ᓯᐅᕋᖏᓐᓂ ᖃᐅᔨᓴᕐᓂᖅ ᕿᓚᒥᕈᓘᖃᑦᑕᖅᑐᑦ ᐊᒻᒪᓗ ᐊᑲᐅᓛᖑᓪᓗᓂ ᖃᐅᔨᒐᓱᖕᓂᕐᒥ ᓴᕕᕋᔭᒃᓴᐅᒐᔭᖅᑐᓂᑦ ᖃᐅᔨᓴᖅᑕᐅᓯᒪᖏᑦᑐᓂᑦ. ᖃᐅᔨᔭᐅᔪᑦ ᐃᑲᔪᕈᑎᐅᓂᐊᕐᑐᖅ ᖁᐊᕐᓵᕐᓇᕈᑎᖃᖏᓐᓂᕐᓴᐅᓕᕐᓗᓂ ᐊᒻᒪ ᐊᑭᒋᒐᔭᖅᑕᖓᓂ ᖃᐅᔨᓴᕐᓂᕐᒧ ᒥᑭᓐᓂᕐᓴᐅᓗᓂ.

 

4) ᖃᐅᔨᓴᖅᑕᐅᔪᒃᓴᐃᑦ ᓴᓐᓂᕈᑎᐅᑉ ᐃᒪᖓᓂ

 

ᑎᑎᕋᕐᕕᖕᒥᓪᓕ ᓄᓇᐃᑦ ᐃᓗᐊᓃᑦᑐᑦ ᖃᐅᔨᓴᖅᑕᐅᓂᐊᕐᒥᔪᑦ ᑕᐅᕙᓂ ᓴᓐᓂᕈᑎᐅᑉ ᐃᒪᖓᓂ, ᐃᓚᒋᔭᐅᓗᑎᒡᓗ ᐃᓗᕕᐊᓗᒃᑕᓕᖕᒥ ᐊᒻᒪᓗ ᐅᐊᖕᓇᖅᐸᓯᐊᓂᒃ ᕿᑭᖅᑖᓘᑉ, ᑐᑭᓯᓇᖅᓯᖁᓪᓗᒋᑦ ᐱᑕᖃᕐᓂᖏᑦ ᓇᓂ ᓯᐅᕋᐃᓐᓇᐅᓂᖏᑦ ᐊᒻᒪᓗ ᖃᓄᖅ ᐱᑐᖃᐅᑎᒋᓂᖏᓐᓂᒃ ᐅᖅᓱᐊᓗᒃᓴᖃᖅᐸᒃᑐᑦ ᐅᔭᕋᐅᓂᖏᑦ ᑐᑭᓯᔭᐅᑦᑎᐊᒃᑲᓐᓂᕈᒪᓂᖏᓐᓄᑦ ᐅᖅᓱᐊᓗᒃᓴᖃᕋᔭᕐᒪᖔ ᑕᐅᕙᓂ.

 

5) ᐅᔭᕋᑐᖃᐃᑦ ᕿᖅᓱᕐᓂᑯᑦ ᖃᑯᖅᑕᖑᐊᖅ ᓴᓪᓕᕐᒥᐅᑦ ᕿᑭᖅᑕᖓᓂ

 

ᖃᐅᔨᓴᖅᑕᐅᓂᐊᖅᑐᑦ ᓂᒋᐊᑕ ᐱᖓᖕᓇᖅᐸᓯᐊᓂ ᓴᓪᓕᐅᑉ ᕿᑭᖅᑕᖓᓂ ᐃᑲᔫᑕᐅᓂᕐᒧᑦ ᖃᐅᔨᔭᐅᔪᓐᓇᕐᓂᖏᑦ ᓇᓃᒻᒪᖓᑕ ᐊᕿᓐᓂᖃᖅᑐᑦ ᐅᔭᕋᐃᑦ ᖃᑯᖅᑕᖑᐊᑦ ᑕᐅᕙᓂ ᐊᑐᖅᑕᐅᔪᓐᓇᕋᔭᕐᒪᖔᑦ ᐅᔭᕋᖕᓂᐊᕐᕕᓕᕆᔨᓄᑦ ᓄᓇᕗᒻᒥ. ᑐᑭᓯᔭᐅᓂᖏᑦ ᑐᑭᓯᕙᓪᓕᕈᑕᐅᓂᐊᖅᑐᑦ ᖃᐅᔨᓴᖅᑕᐅᔪᓐᓇᕐᓂᖏᓐᓂᒃ ᖃᓄᑎᒋ ᑕᐃᒃᑯᓂᖓ ᐱᑕᖃᖅᑎᒋᖕᒪᖔᑕ, ᓇᓗᓇᐃᖅᑕᐅᓪᓗᑎᒡᓗ ᓇᑭᑦ ᐱᔭᒃᓴᐅᓕᕈᓐᓇᕋᔭᕐᒪᖔᑕ ᐊᒥᓱᓄᑦ ᐃᓂᒋᔭᐅᓂᖏᑦ.

 

6) ᓄᑖᓂᒃ ᓴᓇᖑᐊᒐᒃᓴᐃᑦ ᐅᒃᑯᓯᒃᓴᔭᐃᑦ ᐅᔭᕋᖏᑦ ᕿᑭᖅᑖᓘᖕᒥ

 

ᓄᑖᓂᒃ ᓴᓇᖑᐊᒐᒃᓴᓂᒃ ᐅᒃᑯᓯᒃᓴᓂᒃ ᐅᔭᕋᖃᕐᕖᑦ ᓇᓂᔭᐅᓚᐅᖅᑐᑦ ᓄᓇᓖᑦ ᐃᖃᓗᐃᑦ ᓯᓚᑖᒍᑦ ᑕᓯᕐᔪᐊᑉ ᐊᒻᒪᓗ ᑲᖏᖅᑐᐊᓘᑉ ᐊᑯᓐᓂᖓᓂᒃ, ᐊᒻᒪᓗ ᐊᖏᔪᐊᓗᐃᑦ ᓇᓂᔭᐅᓯᒪᔪ ᖃᐅᔨᓴᖅᑕᐅᒃᑲᓐᓂᕐᓕᖅᑐᑦ ᐅᐱᕐᖏᕕᖕᒥ, ᓄᓘᔮᖕᓂ ᑰᖓᓂ ᐊᒻᒪᓗ ᑕᐅᕙᓂ ᐃᓗᐃᓪᓕᕐᒥ/ᓄᕗᐊᕐᔪᒃᔪᐊᕌᓗᖕᒥ. ᑕᒪᓐᓇ ᐱᓕᕆᐊᖑᓂᖓ ᓇᓗᓇᐃᔭᖅᑕᐅᓂᐊᖅᑐᑦ ᓄᓇᖑᐊᑎᒍᑦ ᐊᒻᒪᓗ ᓄᓇᒥᐅᑕᖃᕐᓂᖏᓐᓂᒃ ᑖᒃᑯᓇᓂ ᐃᓂᖃᖅᑐᓂ ᖃᐅᔨᓴᖅᑕᐅᓂᐊᕐᒪᑕ ᓄᑖᓂᒃ ᓄᓇᓕᖕᓄᑦ ᐊᕕᒃᑐᖅᓯᒪᓂᖏᓐᓄᓪᓗᓐᓃᑦ ᓈᒪᓂᐊᖅᑐᓂᒃ ᐱᑕᖃᕐᒪᖔᑕ ᓴᓇᖑᐊᒐᒃᓴᐅᓲᑦ ᐅᔭᕋᐃᑦ ᐅᒃᑯᓯᒃᓴᐃᑦ ᓄᓇᒦ%ᑐᑦ. ᑕᒪᒃᑯᐊ ᐱᒻᒪᕆᐅᓕᕈᓐᓇᕐᒪᑕ ᐅᔭᕋᐃᑐᕐᕕᐅᔪᓐᓴᕐᓂᕐᖅ ᓄᓇᕗᒻᒥᐅᓄᑦ ᓴᓇᖑᐊᖅᑎᓄᑦ, ᐊᒻᒪᓗ ᐊᓯᖏᓐᓂᒃ ᓴᓇᐅᒐᓕᐅᖅᑎᐅᕙᒃᑐᓂᒃ.

 

 

7) ᖁᒻᒧᐊᒃᑎᑕᐅᓯᒪᔪᓂᒃ ᐊᑐᓕᕈᓐᓇᕐᓂᖅ ᕿᓂᕐᕈᑕᐅᔪᓐᓇᕐᓂᕐᒧᑦ ᐊᒻᒪᓗ ᐊᑭᑭᓕᕚᓪᓕᕈᑎᒃᓴᐅᔪᓐᓇᕐᓂᖏᑦ

 

ᑖᒃᑯᐊ ᐱᓕᕆᐊᖑᓂᖏᑦ ᓴᕿᐅᒪᑎᑦᑎᓂᐊᖅᑐᑦ ᐊᑭᑭᓐᓂᖅᓴᐅᔪᓐᓇᖅᑐᓂᒃ ᐊᑐᕈᓐᓇᕐᓂᖏᓐᓂᒃ, ᓄᑖᖑᓂᖅᓴᓂᒃ, ᐱᐅᓂᖅᓴᓂᒃ ᓯᕗᕙᖅᓯᒪᓂᖅᓴᐅᔪᓂᒡᓗ ᓴᓇᔭᐅᓯᒪᓂᖏᓐᓂᒃ ᖃᐅᔨᔪᓐᓇᖃᑕᖅᓱᑎᒃ ᓇᓃᑦᑐᓂᒃ ᑐᕌᒐᕆᔭᐅᓂᖏᓐᓂᒃ ᕿᓂᕐᕕᐅᔪᒪᓂᕐᒧᑦ ᐱᓕᕆᐊᓄᑦ ᓄᓇᕗᑦ ᐊᕕᒃᑐᖅᓯᒪᓂᖏᓂ. ᓴᕿᑎᑕᐅᓯᒪᓂᐊᖅᑐᑦ ᑖᒃᑯᐊ ᐱᓕᕆᐊᓂᖏᓐᓂᒃ ᐃᑲᔫᑕᐅᓂᐊᖅᑐᑦ ᓇᓂᓯᓇᓱᐊᖅᑎᓄᑦ ᑲᒻᐸᓂᐅᔪᓄᑦ ᐱᓕᕆᕕᖕᓄᑦ ᐊᑐᓕᕈᓐᓇᕐᓂᖅ ᐊᑭᑭᓐᓂᖅᓴᐅᔪᓐᓇᖅᑐᓂᒃ ᕿᓂᕐᕈᑎᐅᔪᓐᓇᖅᑐᓂᒃ ᐊᒻᒪᓗ ᐃᓱᒪᒋᔭᐅᓂᖅᓴᐅᓕᕈᓐᓇᕐᓂᖏᓐᓂᒃ ᑕᐃᒃᑯᐊᖏᓐᓇᐃᑦ ᐱᑕᖃᕈᒥᓇᕆᔭᐅᓂᖏᑦ ᓄᓇᐃᓪᓗᓐᓃᑦ ᐃᒪᖏᓪᓗᓐᓃᑦ.

 

8) ᓄᓇᖑᐊᓕᐊᖑᓂᖓ ᑕᕆᐅᑉ ᐃᖃᖓ ᓇᑎᖓ ᐃᖃᓗᐃᑦ ᓯᓚᑖᓂ ᑕᓯᐅᔭᕐᔪᐊᕐᒥ

 

ᑲᓇᑕᒧᑦ-ᓄᓇᕗᒻᒧᓪᓗ ᓄᓇᓕᕆᔩᑦ ᐱᓕᕆᕕᖓᓂᒃ, ᓄᓇᕗᑦ ᒐᕙᒪᒃᑯᖏᑦᑕ ᐅᒥᐊᕐᔪᐊᖁᑎᖓᑦ ᖃᐅᔨᓴᖅᑎᐅᓪᓗᓂ ᑕᐃᔭᐅᔪᒥ ᓄᓕᐊᔪᒃᒥᒃ ᐊᒻᒪᓗ ᓄᓇᐅᒥᑕᑐᖃᓕᕆᔨᒃᑯᑦ ᑲᓇᑕᒥ ᑲᑐᔾᔨᖃᑎᒌᖕᓂᐊᖅᑐᑦ ᓄᓇᖑᓕᐊᖑᕙᓪᓕᐊᓂᖓᓄᑦ ᑕᓯᐅᔭᕐᔪᐊᑉ ᐃᕿᖓᓂ ᓇᑎᖓ. ᐱᔾᔪᑎᖃᓗᐊᕐᓂᐊᖅᑐᑦ ᐱᑕᖃᓕᖁᔨᓂᖅ  ᓄᓇᐃᑦ ᐃᓗᐊᓃᑐᓂᒃ ᓄᑖᓂ ᖃᐅᔨᓴᕈᑎᒃᓴᓂ ᓄᓇᖑᐊᓂᒃ ᐃᑲᔪᕈᑕᐅᓂᐊᖅᑐᓂᒃ ᐅᓗᕆᐊᓇᕈᑕᐅᕙᖕᓂᖏᓐᓂᒃ ᓄᓇᓕᖕᓂ ᐱᖁᑎᕐᔪᐊᒃᓴᖏᓐᓄᑦ ᓴᓇᔭᐅᔪᓐᓇᕐᓂᐊᖅᑐᓄᑦ ᑕᐅᕙᓂ ᑕᓯᐅᔭᕐᔪᐊᕐᒥ, ᐊᒻᒪᓗ ᖃᓄᐃᓕᐅᕈᑎᒃᓴᓂᒃ ᖃᐅᔨᒪᓂᖅ ᐱᑕᖃᕆᐊᖃᕐᓂᐊᖅᑐᓂᒃ ᓴᓇᔭᐅᓂᐊᖅᑐᓄᑦ ᐊᒻᒪᓗ ᐋᕿᐅᒪᔾᔪᑕᐅᓂᐊᖅᑐᓄᑦ ᐱᖁᑎᕐᔪᐊᕆᔭᐅᔪᓄᑦ.

 

9) ᓄᓇᐅᑉ ᐃᓗᐊᒍᑦ ᖁᐊᖑᐃᓐᓇᕐᓂᕐᒥᒃ-ᐱᖁᑎᕐᔪᐊᓕᐅᖅᓯᒪᔪᓐᓇᕐᓂᕐᒧᑦ ᖃᐅᔨᓴᕈᑏᑦ

 

ᐊᒥᓱᒐᓴᖕᓂᒃ ᐊᔾᔨᒌᖏᑦᑑᑎᐅᔪᓂᒃ ᑲᒪᒋᔭᐅᖁᔨᓪᓗᑎᒃ ᐱᒋᐊᖅᑎᑦᑎᔪᒪᕗᑦ ᖃᐅᔨᓴᖅᑕᐅᓂᖏᑦ ᓄᓇᒥ ᐅᓗᕆᐊᓇᕈᑕᐅᕙᒃᑐᑦ ᐊᒻᒪᓗ ᓄᓇᐅᑉ ᐃᓗᐊᒍᑦ ᓄᓇ ᖁᐊᖑᐃᓐᓇᕐᓂᖓᓂᒃ ᐊᒃᑐᖅᑕᐅᕙᓪᓕᐊᓂᖏᓐᓂᒃ ᐆᓇᖅᓯᕙᓪᓕᐊᓂᖓᓄᑦ ᓯᓚ. ᖃᐅᔨᓴᖅᑕᐅᔪᑦ ᐃᖃᓗᐃᑦ ᒥᑦᑕᕐᕕᖓᓂᐅᓂᐊᕐᑐᖅ ᖃᐅᔨᔭᐅᔪᑦ ᖃᐅᔨᓴᖅᑕᐅᔪᓐᓇᖅᓯᓂᕐᒧᑦ ᒪᑭᑕᑦᑎᐊᕈᓇᕐᓂᐊᕐᒪᖔᑕ ᐊᖏᔫᑏᑦ ᓄᓇᖓᓐᓂ ᐱᖁᑎᕐᔪᐊᒃᓴᐃᑦ, ᓄᓇᐅᓪᓗ ᐃᓗᐊᒍᑦ ᖁᐊᖑᐃᓇᕐᓂᖅ ᖃᓄ ᖁᐊᕐᓵᕐᓇᕋᔭᕐᒪᖔᑦ ᐊᒪᓗ ᐅᓗᕆᐊᓇᕈᑕᐅᔪᓐᓇᕐᓂᖏᓐᓂᒃ ᐱᖁᑎᕐᔪᐊᕐᓄᑦ ᓇᓚᐅᑦᑖᖅᑕᐅᓯᒪᔪᓄᑦ ᓯᓚᐅᑉ ᖃᓄᐃᓕᕙᓪᓕᐊᓂᐊᕋᓱᒋᔭᐅᓂᖏᓐᓄᑦ.

 

 10) ᓄᓇᐅᑉ ᐃᓗᐊᓃᑐᑦ ᖃᐅᔨᓴᖅᑕᐅᓂᖏᑦ ᑕᐅᕙᓂ ᐱᖓᖕᓇᖅᐸᓯᐊᓂᒃ ᕼᐊᑦᓴᓐ ᐲᑉ ᑕᓯᐅᔭᕐᔪᐊᑉ

 

ᑐᕌᒐᖃᖅᐳᑦ ᑖᒃᑯᓂᖓ ᐱᓕᕆᐊᖃᕐᓂᕐᒥᒃ ᑲᑎᖅᓱᖅᑕᐅᓯᒪᔪᐃᓐᓇᐅᖁᓪᓗᒋᑦ ᐱᑕᖃᕐᓂᖏᑦ ᒪᓐᓇᐅᓕᖅᑐᖅ ᑕᒪᐃᓐᓂᒃ ᓯᐅᕋᐅᓂᖃᕐᓂᖏᓐᓂᒃ, ᐃᓗᓕᖃᕈᓐᓇᕐᓂᖏᓐᓂᒃ ᓄᓇᒥ ᐅᔭᕋᐃᑦ, ᓄᓇᐅᑉ ᖄᖓᓃᑦᑐᓂᒃ ᐊᒻᒪᓗ ᓄᓇᐃᑦ ᐃᓗᐊᒍᑦ ᖁᐊᖑᐃᓐᓇᕐᓂᕐᒥᒃ ᖃᐅᔨᔭᐅᔪᒪᓪᓗᑎᒃ ᑕᑭᓂᖃᕐᓂᐊᖅᑐᒥᒃ ᖃᓂᒋᔭᖏᓐᓂᒃ 50 ᑭᓛᒥᑕᐃᑦ ᓂᕈᑐᓂᖃᕐᓂᐊᖅᑐᒥᒃ ᑕᐅᕙᖓᑦ ᒫᓂᑑBᐊᒥᒃ ᑲᖏᖅᖠᓂᕐᒧᑦ, ᐊᖅᑯᑎᖃᕐᓗᓂ ᐱᖓᖕᓇᖅᐸᓯᐊᒍᑦ ᕼᐊᑦᓴᓐ ᐲᑉ ᑕᓯᐅᔭᕐᔪᐊᑉ ᓯᒡᔭᖅᐸᓯᐊᒍᑦ. ᑕᒪᓐᓇ ᖃᐅᔨᔭᐅᕙᓪᓕᐊᔪᖅ ᐃᑲᔫᑕᐅᓂᐊᖅᑐᖅ ᐃᓱᒪᓕᐅᕆᔪᓐᓇᕐᓂᕐᒥ ᐱᑕᖃᓕᕈᓐᓇᕐᓂᖏᓐᓄᑦ ᓯᕗᓂᒃᓴᒥ ᐊᖏᔪᒥᒃ ᐅᖓᓯᒃᑐᒧᑦ ᐊᖅᑯᑎᒃᓴᓂᒃ ᓴᓇᔭᐅᓯᒪᔪᓐᓇᕋᔭᖅᑐᒥᒃ ᑕᐅᕙᓂ ᐊᕕᒃᑐᖅᓯᒪᓂᖓᓂ.

 

 11) ᓄᓇᐃᑦ ᐃᓗᐊᓃᑦᑐᑦ ᖃᐅᔨᓴᖅᑕᐅᓂᖏᓐᓂᒃ ᑐᑭᓯᔭᐅᓯᒪᔪᑦ ᑐᓂᐅᖃᖅᑕᐅᔪᓐᓇᕐᓂᖏᑦ

 

ᑕᒪᒃᑯᐊ ᐱᓕᕆᐊᒃᓴᐅᓂᖏᑦ ᓄᑖᕈᕆᐊᕈᑕᐅᓂᐊᖅᑐᑦ ᓄᓇᕗᒻᒥ ᓄᓇᒥᐅᑕᖃᖅᑎᖏᓂᖏᓐᓂᒃ ᖃᐅᔨᒪᔭᐅᓕᐊᓂᒃᑐᓂᒃ ᒫᓐᓇᐅᔪᖅ, ᐃᓚᖃᕐᓂᐊᕐᒪᑕ ᐊᒨᖃᐃᕕᐅᕌᓂᒃᓯᒪᓕᖅᑐᓂᒃ ᐊᒻᒪᓗ ᑲᑎᖅᓱᖅᑕᐅᕙᓪᓕᐊᓂᖏᓐᓂᒃ ᓄᑖᑦ ᓄᓇᒥᐅᑕᖃᕐᓂᖏᑦ ᐅᔭᕋᖏᑦ,  ᐅᖓᑕᓃᑦᑐᓂᒃ 200-ᓂᒃ ᑕᒪᒃᑯᓂᖓ ᐊᖏᔫᑎᓂᒃ ᓴᓈᖃᖅᐳᒃᑐᑦ/ᐱᓕᕆᐊᖃᖅᐸᒃᑐᑦ ᖃᐅᔨᓴᖅᓯᒪᔭᕕᓂᖏᓐᓂᒃ ᐅᓂᒃᑳᓕᐊᖑᓯᒪᔪᓂᒃ, ᐊᑭᖃᕈᒥᓇᖅᑐᓂᒃ ᓇᓚᐅᑦᑖᖅᑕᐅᓯᒪᓕᖅᑐᓂᒃ ᖃᓂᖏᔭᖏᓐᓂᒃ $1 Bᐃᓕᔭᓐᓂᒃ. ᓄᑖᑦ ᓄᓇᕗᒻᒥ ᓄᓇᐃᑦ ᐃᓗᓃᐊᑦᑐᑦ ᖃᐅᔨᓴᖅᑕᐅᓂᖏᓐᓄᑦ ᖃᐅᔨᒪᔾᔪᑎᒃᓴᐃᑦ ᐊᑐᐃᓐᓇᐅᔪᒫᖅᑐᑦ ᖃᕆᑕᐅᔭᒃᑯᑦ ᐅᖓᓯᒃᑐᒥᒃ, ᐃᑲᔫᑕᐅᓂᐊᕐᒪᑕ ᐱᐅᓂᖅᓴᓂᒃ ᑐᑭᓯᒪᔭᐅᔪᓐᓇᕐᓂᖏᓐᓂᒃ ᓄᓇᒥᐅᑕᐃᑦ, ᐸᕐᓇᐅᑕᐅᓂᕐᒧᓪᓗ ᐊᑭᓕᖅᑐᐃᔪᒪᓂᕐᒧᓪᓗ ᐃᓱᒪᓕᐅᕈᑕᐅᕙᖕᓂᐊᖅᑐᓄᑦ.

 

ᑲᓐᓄᐊᒃᑯᓐᓂᒃ ᐊᑐᒐᒃᓴᐃᑦ

ᑮᓇᐅᔭᐃᑦ ᐊᑭᓕᖅᑕᐅᓯᒪᔪᑦ ᑖᒃᑯᓄᖓ ᐱᓕᕆᐊᒃᓴᓄᑦ ᐊᔪᕐᓇᕈᓐᓃᖅᑎᑕᐅᓚᐅᖅᑐᑦ ᑳᓐᓄᐊᒃᑯᑎᒍᑦ ᐅᑭᐅᖅᑕᖅᑐᒥ ᖃᓄᐃᓕᐅᕈᑎᒃᓴᐅᓂᕐᒧᑦ ᐊᑭᓕᖅᑐᐃᖃᑕᕐᓂᕐᒧᑦ ᐅᑭᐅᖅᑕᖅᑐᒥᐅᑕᓂᒃ ᑮᓇᐅᔭᓕᐅᕈᑎᒃᓴᐅᓕᕈᓐᓇᖅᑐᓄᑦ ᐱᕙᓪᓕᐊᔪᑎᒃᓴᓄᑦ (ᓴᐃᓇᑦᑯᑦ ᓇᐃᓈᖅᑕᐅᓪᓗᑎᒃ) ᐊᑐᒐᒃᓴᓕᐊᖏᓐᓂᒃ, ᑐᕌᖓᖕᒪᑕ ᐊᑯᓂᐅᓂᐊᖅᑐᒧᑦ ᑮᓇᔭᓕᐅᕐᕕᐅᓕᕈᓐᓇᖅᑐᓄᑦ, ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᐊᔾᔨᒌᖏᑦᑑᑎᐅᔪᓂᒃ ᐊᒻᒪᓗ ᐊᔪᕈᓐᓃᖅᓴᐃᑎᑦᑎᓂᕐᒧᑦ ᓇᓂᑐᐃᓐᓇᖅ ᐅᑭᐅᖅᑕᖅᑐᒥ. ᑕᐃᒃᑯᐊ ᓴᐃᓂᐊᑦᑯᑦ ᐃᓚᒋᔭᐅᕗᑦ ᐊᒥᓱᒐᓴᖕᓄᑦ ᑮᓇᐅᔭᓕᐅᕈᑎᒃᓴᓄᑦ ᐱᕙᓪᓕᐊᔪᓕᕆᓂᕐᒧᑦ ᐊᑐᒐᒃᓴᓄᑦ ᐃᓗᐊᓂᒃ ᑳᓐᓄᐊᒃᑯᑦ.

ᑳᓐᓄᐊᒃᑯᑦ ᐱᓕᕆᐊᖃᖅᐳᑦ ᐃᑲᔪᖅᑎᐅᓂᖅ ᓴᕿᐅᒪᑎᑦᑎᕙᓪᓕᐊᔪᒪᓂᖅ ᐊᒥᓱᓂᒃ ᐊᔾᔨᒌᖏᑦᑑᑎᐅᔪᓂᒃ, ᑲᔪᓰᓐᓇᕈᓐᓇᕋᔭᖅᑐᓂᒃ ᐊᒻᒪᓗ ᐱᐅᔫᑎᓂᒃ ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᓇᓂᑐᐃᓐᓇᖅ ᑲᓇᑕᐅᑉ ᐱᖓᓱᓂᒃ ᐊᕕᒃᑐᖅᓯᒪᓂᖏᓐᓂᒃ, ᐊᒻᒪᓗ ᐊᑐᐃᓐᓇᐅᑎᑦᑎᖃᑦᑕᖅᓱᑎᒃ ᐅᑭᐅᖅᑕᖅᑐᒥᐅᑕᓄᑦ ᑎᓕᔭᐅᓯᒪᓂᕐᒥᓂᒃ ᒪᓕᒃᓱᑎᒃ ᑮᓇᐅᔭᒃᓴᖃᖅᑎᑦᑎᖃᑦᑕᕆᐊᖃᕐᓂᕐᒧᑦ ᐊᑐᒐᒃᓴᐅᓕᕐᓂᐊᖅᑐᓄᑦ, ᐅᑭᐅᖅᑕᖅᑐᒥ ᐱᓕᕆᐊᒃᓴᓂᒃ ᐊᐅᓚᑦᑎᕕᐅᓂᕐᒧᑦ ᐱᓕᕆᕕᖓᓐᓂᒃ ᐊᒻᒪᓗ ᐱᓕᕆᐊᖃᖃᑦᑕᕐᓂᕐᒧᑦ ᐊᑐᐊᒐᒃᓴᓕᕆᓂᕐᒥᒃ ᐊᒻᒪᓗ ᖃᐅᔨᓴᖃᑦᑕᕐᓂᕐᒥᒃ.