ᐅᖃᓚᐅᑎᓯᐅᑏᑦ

You are here

ᒥᓂᔅᑕ ᐊᒡᓘᒃᑲᖅ ᑐᓴᖅᑎᑦᑎᔪᖅ ᓄᑖᒥᑦ ᐃᒪᕐᒥᐅᑕᓕᕆᕝᕕᖕᒥ ᒥᑦᑎᒪᑕᓕᖕᒥ

ᔫᓂ 26, 2015

ᑐᓴᒐᒃᓴᕈᖅᑎᑕᐅᔪᖅ
ᓴᖅᑭᑕᐅᑲᐅᑎᒋᔭᕆᐊᓕᒃ

ᒥᓂᔅᑕ ᐊᒡᓘᒃᑲᖅ ᑐᓴᖅᑎᑦᑎᔪᖅ ᓄᑖᒥᑦ ᐃᒪᕐᒥᐅᑕᓕᕆᕝᕕᖕᒥ ᒥᑦᑎᒪᑕᓕᖕᒥ
ᐱᓕᕆᐊᒃᓴᖅ ᐊᔪᕐᓇᕈᓐᓃᖅᑎᑕᐅᔪᖅ ᖁᔭᓕᓗᒍ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᐸᕐᓇᐅᑎᖓ

ᔫᓂ 26, 2015 ᒥᑦᑎᒪᑕᓕᒃ, ᓄᓇᕗᑦ

ᓂᕈᐊᖅᑕᐅᓯᒪᔪᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐊᕙᑎᓕᕆᓂᕐᒧᑦ, ᒥᓂᔅᑕ ᑲᓇᑕᒥᐅᑦ ᐅᑭᐅᖅᑕᖅᑐᖁᑎᖓᓄᑦ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᑎᓂᖅ ᐱᓕᕆᕝᕕᖓᓂ, ᒥᓂᔅᑕ ᐅᑭᐅᖅᑕᖅᑐᓕᕆᓂᕐᒧᑦ ᑲᑎᒪᔨᓄᑦ ᐃᓚᒋᔭᐅᓪᓗᓂᓗ ᑲᓇᑕᐅᑉ ᑲᑎᒪᕕᖁᑎᖓᓂ ᓄᓇᕗᒻᒧᑦ ᐃᓚᒋᔭᐅᓵᖅᑐᖅ ᐅᓪᓗᒥ ᔫ ᐃᓄᒃᒧᑦ, ᓄᓇᕗᒻᒥ ᐃᓚᒋᔭᐅᔪᖅ ᒪᓕᒐᓕᐅᕐᕕᖕᒧᑦ ᑐᓄᓂᖅᒧᑦ ᑐᓴᖅᑎᑦᑎᓪᓗᑎᒃ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᑎᔾᔪᑎᖓᓂᑦ ᑎᑭᓪᓗᒍ $30 ᒥᓕᐊᓐ ᓴᖅᑭᑕᐅᖁᓪᓗᒍ ᓄᑖᖅ ᐃᒪᕐᒥᐅᑕᓕᕆᕝᕕᒃ ᒥᑭᑦᑑᑎᓄᓪᓗ ᐅᒥᐊᒃᑯᕕᒃ ᒥᑦᑎᒪᑕᓕᖕᒥ, ᓄᓇᕗᑦ.

ᑖᓐᓇ ᐊᖏᔪᖅ ᐊᐅᓚᔪᓐᓇᐅᑎᒃᓴᖅ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᐸᕐᓇᐅᑎᒥᙶᖅᑐᖅ ᐃᑲᔪᕐᓂᐊᕐᖢᓂᓗ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᑦ ᕿᑭᖅᑖᓗᖕᒥ, ᐊᒻᒪᓗᑦᑕᐅᖅ ᐃᑲᔪᕐᓗᓂ ᐊᖏᒃᓕᒋᐊᕐᑎᓪᓗᒍ ᓴᐳᒻᒦᓂᕐᒥ ᓂᕿᓂᑦ, ᐅᖅᓱᐊᓗᖕᒥᑦ ᐊᓯᖏᓐᓂᒃᓗ ᐱᖁᑎᓂᑦ ᓄᓇᓕᐅᔪᒧᑦ.

ᑖᓐᓇ ᐱᓕᕆᐊᒃᓴᖅ ᑐᕌᖓᑦᑎᐊᕐᓗᓂ ᐃᑲᔪᖅᓱᕐᓂᐊᖅᑐᖅ ᓄᓇᓕᖕᒥ ᓄᓇᓕᖕᓂᓗ ᐊᕕᒃᑐᖅᓯᒪᓂᐅᔪᓂᑦ ᒪᑭᒪᓇᓱᐊᕈᑎᓂᑦ ᐃᖅᑲᓇᐃᔮᒃᓴᓕᐅᕐᓯᒻᒫᑦ ᐱᕕᒃᓴᐅᔪᓂᒃᓗ ᓄᓇᕗᒻᒥᐅᓄᑦ. ᐱᓕᕆᐊᒃᓴᖅ ᐃᑲᔪᖅᓱᐃᓇᔭᕐᒥᔪᖅ ᐊᖑᓇᓱᒃᑐᓕᕆᔨᒃᑯᓐᓂᑦ, ᐱᑎᓪᓗᒋᓪᓗ ᓄᓇᓕᐅᔪᑦ ᐊᑦᑕᕐᓇᙱᓐᓂᖅᓴᒥᑦ ᐅᓯᖐᔭᓕᕌᖓᑕ ᐊᖑᑕᒥᖕᓂᑦ, ᐱᐅᓯᒋᐊᖅᑎᑦᑎᓇᔭᖅᑐᖅ ᐃᖅᑲᓇᐃᔭᖅᑎᒧᑦ ᐊᑦᑕᕐᓇᕐᑕᐃᓕᒪᓂᕐᒥᑦ ᒥᒃᖠᒋᐊᕐᑎᓪᓗᒍᓗ ᓱᕋᑐᐃᓐᓇᕆᐊᓕᖕᓄᑦ ᐱᖁᑎᓄᑦ. ᒥᑦᑎᒪᑕᓕᒃ ᖃᐅᔨᒪᔭᐅᔪᖅ ᖃᖅᑳᓗᖏᑦ ᑕᑯᒃᓴᐅᓂᖏᓐᓄᑦ ᓯᕐᒦᓪᓗ ᑕᑯᔪᒪᓕᖅᑎᑦᑎᓲᑦ ᐅᓄᖅᑐᓂᑦ ᐳᓛᖅᑎᓂᑦ ᐊᕐᕌᒍᑕᒫᑦ ᐊᓱᐃᓛᒃ ᐱᐅᓯᒋᐊᖅᓯᒪᔪᖅ ᐃᒪᕐᒥᐅᑕᓕᕆᕝᕕᒃ ᐃᑲᔪᕐᓂᐊᕐᒥᔪᖅ ᐱᕈᖅᐸᓪᓕᐊᓂᖓᓂᑦ ᐳᓚᕋᖅᑐᓕᕆᓂᖅ ᑕᐃᑲᓂ.

ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᐸᕐᓇᐅᑎ ᐊᖏᓛᖑᔪᖅ ᐊᑯᓂᐅᓛᖑᓪᓗᓂᓗ ᒐᕙᒪᑐᖃᒃᑯᓐᓄᑦ ᐊᐅᓚᔪᓐᓇᐅᑎᓄᑦ ᐸᕐᓇᐅᑎᐅᔪᖅ ᑲᓇᑕᐅᑉ ᐊᑐᖅᓯᒪᔭᖏᓐᓂᑦ. ᑖᓐᓇ ᐊᑐᖅᑕᐅᓚᐅᖅᓯᒪᙱᑦᑐᖅ ᐱᔭᐅᓇᓱᒃᑐᖅ ᐱᑎᑦᑎᔪᖅ $53 ᐱᓕᐊᓐ ᐃᑲᔪᖅᓱᕐᓗᒍ ᑲᓇᑕᒥ ᓄᓇᐃᑦ ᐊᕕᒃᑐᖅᓯᒪᓂᖏᑦ, ᓄᓇᕗᒻᒥ ᓄᓇᓕᖕᓂᓗ ᐊᐅᓚᔪᓐᓇᐅᑎᖏᑦ, ᐊᑯᓐᓂᖓᓂ 2014 ᐊᒻᒪ 2024.

ᑕᒡᕙᓂ ᐊᕐᕌᒍᑦ ᖁᓕᑦ ᐊᑐᖅᑎᓪᓗᒍ, ᓄᓇᕗᑦ ᐱᕚᓪᓕᕐᓂᐊᕐᑐᖅ ᑕᐃᑲᙵᑦ $419 ᒥᓕᐊᓐ ᑐᕌᖓᑎᑕᐅᔪᒧᑦ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᑎᔾᔪᑎᖓᓂᑦ, ᐃᓚᐅᓪᓗᓂ ᐅᖓᑖᓄᑦ $256 ᒥᓕᐊᓐ ᑕᐃᑰᓇ ᓄᑖᓂᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᑮᓇᐅᔭᖃᖅᑎᑦᑎᔾᔪᑎᖓᓂᑦ.

ᓱᓕᔪᑦ

  • ᑲᓇᑕᐅᑉ ᒐᕙᒪᖓᑕ ᓂᕈᐊᕐᖢᓂᐅᒃ ᑖᓐᓇ ᐱᓕᕆᐊᒃᓴᖅ ᑮᓇᐅᔭᖃᖅᑎᑕᐅᓂᕐᒧᑦ ᐃᓱᒪᒋᔭᐅᔪᒃᓴᓂᑦ ᑎᑭᓪᓗᒍ 75 ᐳᓴᓐᑎ ᐃᓚᐅᔪᓐᓇᐅᑎᓄᑦ ᐊᑭᓄᑦ, ᐊᖏᓛᖑᔪᓐᓇᕐᓗᒍ $30 ᒥᓕᐊᓐ ᑕᐃᑰᓇ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎᓂᑦ ᑲᓇᑕᒥ ᓄᓇᐃᑦ ᐊᕕᒃᑐᖅᓯᒪᓂᖏᑦ−ᓄᓇᕗᒻᒥ ᐊᐅᓚᔪᓐᓇᐅᑎᓄᑦ ᐃᓗᓕᖏᑦ−ᑲᓇᑕᒥ ᓄᓇᓕᖕᓂᓗ ᐊᕕᒃᑐᖅᓯᒪᓂᐅᔪᓂᑦ ᐱᓕᕆᐊᒃᓴᓂᑦ. ᑖᓐᓇ ᑮᓇᐅᔭᖃᖅᑎᑕᐅᔾᔪᑎ ᖃᓄᐃᓕᖓᓂᖓᓂᑦ ᐊᑐᖅᑐᖅ ᐱᓕᕆᐊᒃᓴᖅ ᐱᖃᖅᐸᑦ ᐃᓚᐅᑎᑕᐅᔪᓐᓇᖅᑐᒥᑦ ᒐᕙᒪᑐᖃᒃᑯᓐᓄᑦ ᐃᓚᐅᔪᓐᓇᐅᑎᓂᑦ ᐱᔭᕆᐊᓕᖕᓂᑦ ᒪᓕᑦᑎᐊᕐᓗᒍ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎᒥᑦ ᐊᑎᓕᐅᕐᑕᐅᓂᖓᓗ ᑐᓂᔭᐅᓂᐊᕐᓂᕐᒧᑦ ᐊᖏᕈᑎᒥᑦ. ᓄᓇᕗᒻᒥ ᒐᕙᒪᒃᑯᑦ ᑲᒪᒋᔭᖃᕐᓂᐊᖅᑐᑦ ᑕᒪᐃᓐᓂᒃ ᐊᒥᐊᒃᑯᓂᑦ ᐊᑭᓂᑦ ᐱᓕᕆᐊᒃᓴᒧᑦ. ᑲᑎᖦᖢᒋᑦ ᓇᓚᐅᑦᑖᖅᑕᐅᓯᒪᔪᑦ ᐊᑭᖏᑦ ᐱᓕᕆᐊᒃᓴᒧᑦ $40 ᒥᓕᐊᓐ−ᖑᔪᑦ.
  • $53 ᐱᓕᐊᓐ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᐸᕐᓇᐅᑎ ᐱᑎᑦᑎᓲᖅ ᐊᐅᓚᙱᑦᑐᒥᑦ ᑮᓇᐅᔭᖃᖅᑎᑕᐅᓂᕐᒥᑦ ᐊᕐᕌᒍᓄᑦ ᖁᓕᓄᑦ ᐊᑯᓂᐅᑎᒋᔪᒥᑦ, ᐃᓚᐅᑎᑦᑎᓪᓗᓂᓗ:
    • ᓄᓇᓕᖕᒥ ᐱᐅᓯᒋᐊᕐᓂᕐᒧᑦ ᑮᓇᐅᔭᖃᖅᑎᑕᐅᓂᖅ, ᐃᓗᓕᖃᖅᖢᓂ ᐅᖅᓱᐊᓗᖕᒧᑦ ᑖᒃᓰᔭᖅᑎᑦᑎᓂᖅ ᑮᓇᐅᔭᑦ ᐊᒻᒪ ᐅᓄᖅᓯᒋᐊᕐᑕᐅᔪᓄᑦ ᐱᖁᑎᓄᑦ ᐱᔨᑦᑎᕋᐅᑎᓄᓪᓗ ᑖᒃᓰᔭᕈᑎᓄᑦ ᐅᑎᕐᕕᐅᔪᓐᓇᕐᓂᕐᒥᑦ Hᐋᒻᒪᓚᐅᔪᓄᑦ, ᐱᑎᑦᑎᓂᐊᕐᖢᓂ ᐅᖓᑖᓄᑦ $32 ᐱᓕᐊᓐ Hᐋᒻᒪᓚᐅᔪᑦ ᐱᓕᕆᐊᒃᓴᖏᓐᓄᑦ ᓲᕐᓗ ᐊᖅᑯᑎᓄᑦ, ᑭᒃᑯᑐᐃᓐᓇᕐᓂᕐ ᐃᑭᒪᕝᕕᐅᕙᒃᑐᓂᑦ ᐱᙳᐊᕐᑐᓕᕆᓂᕐᒧᓪᓗ ᐅᐸᒐᐅᔪᓄᑦ, ᐊᓯᖏᓐᓄᓪᓗ ᓄᓇᓕᖕᒥ ᐊᐅᓚᔪᓐᓇᐅᑎᓄᑦ.
    • $14-ᐱᓕᐊᓐ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎᑦ, ᐃᓗᓕᖃᖅᑐᑦ:
      • $4-ᐱᓕᐊᓐ ᑲᓇᑕᒥ ᐊᐅᓚᔪᓐᓇᐅᑎᓄᑦ ᐃᓗᓕᓕᖕᓂᑦ ᐃᑲᔪᖅᓱᕐᓂᐊᕐᓗᑎᒃ ᐱᓕᕆᐊᒃᓴᓂᑦ ᑲᓇᑕᒥ ᐱᔭᕆᐊᖃᕐᑕᖏᓐᓂᑦ; ᐊᒻᒪᓗ
      • $10-ᐱᓕᐊᓐ ᑲᓇᑕᒥ ᓄᓇᐃᑦ ᐊᕕᒃᑐᖅᓯᒪᓂᖏᑦ−ᓄᓇᕗᒻᒥ ᐊᐅᓚᔪᓐᓇᐅᑎᓄᑦ ᐃᓗᓕᖃᖅᑐᓂᑦ ᐱᓕᕆᐊᒃᓴᓄᑦ ᑲᓇᑕᒥ, ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓄᑦ ᓄᓇᓕᖕᒥᓗ ᐱᔭᕆᐊᖃᖅᑐᓄᑦ. ᑖᔅᓱᒪ ᖃᔅᓯᐅᓂᖓ, $1 ᐱᓕᐊᓐ ᐱᓕᕆᐊᒃᓴᓄᑦ ᓄᓇᓕᖕᓂ ᐅᓄᙱᓐᓂᖅᓴᐅᔪᓂᑦ 100,000 ᐃᓄᖃᖅᑐᓂᑦ ᒥᑭᑦᑐᓄᑦ ᓄᓇᓕᖕᓄᑦ ᑮᓇᐅᔭᖃᖅᑎᑕᐅᔾᔪᑎᑎᒍᑦ.
    • ᐃᓚᖃᕐᖢᓂ $1.25 ᐱᓕᐊᓐ ᑮᓇᐅᔭᖃᖅᑎᑕᐅᔾᔪᑎᓂᑦ ᑭᒃᑯᑐᐃᓐᓇᕐᓄᑦ−ᓇᖕᒥᓂᖅᓱᖅᑐᓄᑦ ᐱᓕᕆᖃᑎᒌᓄᑦ (P3) ᑲᓇᑕᒥ ᑮᓇᐅᔭᑦ ᐱᓕᕆᐊᖑᔪᑦ ᑭᒃᑯᑐᐃᓐᓇᕐᓄᑦ−ᓇᖕᒥᓂᖅᓱᖅᑐᓄᑦ ᐱᓕᕆᖃᑎᒌᓄᑦ ᑲᓇᑕᒥ.

ᐅᖃᐅᓯᐅᓯᒪᔪᑦ

"ᐊᓯᖏᑦ ᒐᕙᒪᐅᔪᑦ ᑭᖑᓂᑦᑎᓐᓂ ᕿᑐᕐᖏᐅᖅᓯᒪᙱᑦᑐᑦ ᐱᕐᔪᐊᕐᓯᒪᑎᓪᓗᑕ ᓄᓇᕗᒻᒥ. ᑕᐃᒪᙵᓂᑦ ᐋᖅᑭᓚᐅᕋᑦᑎᒍᑦ ᒐᕙᒪᕗᑦ ᐊᖏᒃᓕᒋᐊᖅᑎᑦᑎᓯᒪᔪᒍᑦ ᓄᒃᑎᖅᑕᐅᔪᓄᑦ ᖁᕝᕙᓯᖕᓂᖅᐹᓄᓪᓗ ᕿᑐᕐᖏᐅᖅᓯᒪᓪᓗᑕ ᓄᓇᕗᓕᒫᒥ. ᐅᓪᓗᒥ, ᖁᕕᐊᓱᕐᔪᐊᕐᐳᖓ ᑐᓴᖅᑎᑦᑎᔭᕆᐊᒃᓴᖅ ᐱᒻᒪᕆᐅᒃᑲᓐᓂᖅᑐᒥᑦ ᕿᑐᕐᖏᐅᕈᑎᒥᑦ ᑐᕌᖓᑦᑎᐊᕐᓗᓂ ᐃᑲᔪᖅᓱᕐᓂᐊᖅᑐᖅ ᒪᑭᒪᓇᓱᐊᕐᓂᕐᒧᑦ ᐱᕈᕐᓂᕐᒥᑦ ᓄᓇᕗᒻᒥ. ᐱᒃᑯᓕᔪᒍᑦ ᐱᕚᓪᓕᖅᑎᑦᑎᔭᕆᐊᒃᓴᖅ ᒥᑦᑎᒪᑕᓕᖕᒥ ᐃᒪᕐᒥᐅᑕᓄᑦ ᐊᐅᓚᔪᓐᓇᐅᑎᒧᑦ ᐱᓕᕆᐊᒃᓴᒥᑦ ᐱᑎᑦᑎᑐᐃᓐᓇᔾᔮᖏᑦᑐᒥᑦ ᐱᒻᒪᕆᐅᔪᒥᒃ ᒪᑭᒪᐅᑎᒃᓴᓄᑦ ᐱᕚᓪᓕᕐᓂᕐᓂᑦ ᐃᓂᖓᓄᑦ ᑭᓯᐊᓂᑦᑕᐅᖅ ᐃᑲᔪᖅᓱᑦᑎᐊᕐᓗᒍ ᐱᐅᔪᖅ ᐊᑭᓕᖅᓱᖅᑕᐅᑦᑎᐊᕐᓇᖅᑐᑦ ᐃᖅᑲᓇᐃᔮᑦ ᓄᓇᕗᒻᒥ."

ᓂᕈᐊᖅᑕᐅᓯᒪᔪᖅ ᓕᐅᓇ ᐊᒡᓘᒃᑲᖅ
ᒥᓂᔅᑕ ᐊᕙᑎᓕᕆᓂᕐᒧᑦ
ᒥᓂᔅᑕ ᑲᓇᑕᒥᐅᑦ ᐅᑭᐅᖅᑕᖅᑐᖁᑎᖓᓄᑦ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᑦ ᐱᓕᕆᕝᕕᖓᓂ
ᒥᓂᔅᑕ ᐅᑭᐅᖅᑕᖅᑐᓕᕆᓂᕐᒧᑦ ᑲᑎᒪᔨᖏᓐᓄᑦ
ᐃᓚᒋᔭᐅᔪᖅ ᑲᓇᑕᐅᑉ ᑲᑎᒪᕕᖁᑎᖓᓂ

"ᑕᐃᒪᙵᑦ ᐋᖅᑭᓕᖅᑎᓪᓗᒍ ᓄᓇᕗᒻᒥ ᒐᕙᒪᖓᑕ ᐱᓇᓱᐊᒐᒃᓴᖓ, ᐊᒃᓱᕈᑦᑎᐊᕐᖢᑕ ᐃᖅᑲᓇᐃᔭᖃᑎᖃᖅᓯᒪᔪᒍᑦ ᑲᓇᑕᒥᑦ ᑐᑭᒧᐊᕈᑎᒃᓴᓄᑦ ᐊᐅᓚᔪᓐᓇᐅᑎᓄᑦ ᕿᑐᕐᖏᐅᕐᓂᕐᓂᑦ ᐃᑲᔪᖅᓱᐃᔪᓂᑦ ᒪᑭᒪᓇᓱᐊᕈᑎᖏᑕ ᐊᑐᕐᓂᖏᓐᓂᑦ ᓄᓇᓕᑦᑎᓐᓂᑦ ᐅᓪᓗᒥ ᓯᕗᓂᑦᑎᓐᓂᓗ. ᐱᔪᒪᓕᖅᑎᑕᐅᔪᒍᑦ ᑖᔅᓱᒧᖓ ᑐᓴᖅᑎᑕᐅᔾᔪᑎᒧᑦ ᑲᔪᓯᓗᑕᓗ ᐃᖅᑲᓇᐃᔭᖃᑎᖃᕐᓂᕐᒥᑦ ᑲᓇᑕᒥ ᑲᓇᑕᐅᓪᓗ ᒪᓕᒐᓕᐅᖅᑎᖁᑎᖏᓐᓂᑦ, ᐊᐅᓚᔪᓐᓇᐅᑎᒃᓴᓄᑦ ᐱᓕᕆᐊᒃᓴᒃᑲᓐᓂᕐᓄᑦ ᓄᓇᕗᓕᒫᒥ."

ᓂᕈᐊᖅᑕᐅᓯᒪᔪᖅ ᐲᑕ ᑕᑉᑑᓇ
ᓯᕗᓕᖅᑎ ᓄᓇᕗᒻᒧᑦ

"ᑖᓐᓇ ᐊᓪᓗᕆᐊᕐᓂᐅᕗᖅ ᑐᕌᒐᕆᑦᑎᐊᖅᑕᖓᓄᑦ ᓄᓇᕗᒻᒧᑦ. ᒫᓐᓇᐅᔪᖅ ᐱᖃᑐᐃᓐᓇᖅᑐᒍᑦ ᐊᑕᐅᓯᕐᒥᑦ ᒥᑭᑦᑐᒥᑦ ᐅᒥᐊᒃᑯᕕᖕᒥᑦ ᓄᓇᕗᒻᒥ ᑕᑭᓛᖑᔪᒥᑦ ᓯᒡᔭᖃᖅᑐᒥᑦ ᖃᓄᑐᐃᓐᓇᖅ ᓄᓇᓕᐅᔪᓂᑦ ᑲᓇᑕᒥ. ᐱᔭᕇᓱᖓᖅᐸᑦ, ᑖᓐᓇ ᒥᑭᑦᑐᖅ ᐅᒥᐊᒃᑯᕕᒃᓴᖅ ᐱᑎᑦᑎᓂᐊᖅᑐᖅ ᓴᐳᒻᒦᓂᕐᒥᑦ ᐅᒥᐊᕐᔪᐊᕋᓛᓂᑦ ᒥᑦᑎᒪᑕᓕᖕᒥ ᐅᓄᖅᑐᓂᒃᓗ ᒪᑭᒪᐅᑎᔾᔪᑎᒃᓴᓄᑦ ᐱᕚᓪᓕᕈᑎᓄᑦ. ᓂᕆᐅᒃᐳᒍᑦ ᑲᔪᓯᓂᐊᕐᓂᕐᒥᑦ ᐃᖅᑲᓇᐃᔮᒥᑦ ᑲᓇᑕᐅᑉ ᒐᕙᒪᖓᓂᑦ ᓴᓇᓂᕐᒧᑦ ᐃᒪᕐᒥᐅᑕᓕᕆᕝᕕᖕᓂᑦ ᐊᓯᖏᓐᓂᑦ ᓄᓇᓕᖕᓂᑦ."

ᓂᖁᐊᖅᑕᐅᓯᒪᔪᖅ ᒫᓂᑲ ᐃᐅᓪ
ᓄᓇᕘᑉ ᒥᓂᔅᑕᖓ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᑦ ᐃᖏᕐᕋᔪᓕᕆᓂᕐᒥᓪᓗ

ᐊᒃᑐᐊᓂᖃᖅᑐᑦ ᑲᑎᓯᒪᔾᔪᑎᑦ

ᖃᐅᔨᒃᑲᓐᓂᕈᒪᓗᓂ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎᓂᑦ − ᑲᓇᑕᒥ ᓄᓇᐃᑦ ᐊᕕᒃᑐᖅᓯᒪᓂᖏᑦ−ᓄᓇᕗᒻᒥ ᐊᐅᓚᔪᓐᓇᐅᑎᓄᑦ ᐃᓗᓕᖏᓐᓂᑦ − ᑲᓇᑕᒥ ᓄᓇᓕᖕᓂᓗ ᐊᕕᒃᑐᖅᓯᒪᓂᐅᔪᓂᑦ ᐱᓕᕆᐊᒃᓴᓂᑦ, ᑕᑯᒋᐊᕐᓗᒍ http://www.infrastructure.gc.ca/plan/nrp-pnr-prog-eng.html.

ᓇᓗᓇᐃᔭᖁᑎᒃᑲᓐᓂᕐᓄᑦ ᓄᑖᓄᑦ ᑲᓇᑕᒥ ᐱᕈᖅᑎᑦᑎᓇᓱᐊᕐᓂᕐᒧᑦ ᐸᕐᓇᐅᑎᓄᑦ, ᑕᑯᒋᐊᕐᓗᒍ.

ᖃᐅᔨᒃᑲᓐᓂᕈᒪᓗᓂ ᑲᓇᑕᒥ ᒐᕙᒪᖓᑕ ᑕᐅᑐᓪᓗᐊᑕᖅᑕᖏᓐᓂᑦ ᐃᖅᑲᓇᐃᔮᓄᑦ ᒪᑭᒪᐅᑎᒃᓴᓄᓪᓗ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᖓ ᐅᕗᖓ http://www.budget.gc.ca/2015/home-accueil-eng.html.

- 30 -

ᖃᐅᔨᒋᐊᕐᕕᒃᓴᑦ

ᐱᓐᓴᓐ ᕌᐹᑦ
ᐱᕙᓪᓕᐊᔪᓄᑦ ᑎᑎᕋᖅᑎ
ᑎᑎᕋᕐᕕᖓ ᒥᓂᔅᑕᐅᑉ ᐊᐅᓚᔪᓐᓇᐅᑎᓕᕆᓂᕐᒧᑦ, ᓄᓇᓕᖕᓄᑦ ᒐᕙᒪᓕᕆᓂᕐᒧᓪᓗ ᒥᓂᔅᑕᓗ ᒪᑭᒪᐃᓐᓇᕈᑎᒃᓴᓄᑦ ᐱᕙᓪᓕᐊᑎᑦᑎᓂᕐᒥ ᐱᓕᕆᕝᕕᖓ ᑲᓇᑕᒧᑦ ᓄᓇᓕᖕᓂᓗ ᐊᕕᒃᑐᖅᓯᒪᓂᐅᔪᓄᑦ ᑯᐹᖕᒥ
613-943-1838

ᒫᑎᐅ ᐃᓛᓯᕗᐃᑦ
ᐊᐅᓚᑦᑎᔨ, ᑐᓴᐅᒪᔪᓕᕆᓂᖅ
ᒪᑭᒪᐅᑎᒃᓴᓄᑦ ᐱᕙᓪᓕᐊᑎᑦᑎᓂᕐᒥ ᐃᖏᕐᕋᔪᓕᕆᓂᕐᒥᓪᓗ
867-975-7818
MIllaszewicz@GOV.NU.CA

ᑲᓇᑕᒥ ᐊᐅᓚᔪᓐᓇᐅᑎᓕᕆᓂᖅ
613-960-9251
ᐊᑭᖃᙱᑦᑐᖅ: 1-877-250-7154
media@infc.gc.ca
ᒪᓕᒃᓗᑎᒍᑦ ᑐᐃᑐᒃᑯᑦ ᐅᕗᖓ https://twitter.com/infc_eng