ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᖓ ᓴᖅᑭᑎᑦᑎᕗᑦ ᓄᓇᕗᒻᒥ ᑭᒃᑯᑐᐃᓐᓇᓄᑦ ᓴᓇᐅᒐᓂᑦ ᐱᓕᕆᐊᖑᕙᓪᓕᐊᔪᒥᑦ

ᔪᓚᐃ 31, 2020

ᐃᖃᓗᐃᑦ, ᓄᓇᕗᑦ (ᔪᓚᐃ 31, 2020) –ᓄᓇᕗᑦ ᒐᕙᒪᖓᑦ ᐅᓪᓗᒥ ᓴᖅᑭᑦᑎᖅᑲᐅᕗᑦ ᓄᓇᕗᒻᒥ ᑭᒃᑯᑐᐃᓐᓇᓄᑦ ᓴᓇᐅᒐᓄᑦ ᐱᓕᕆᐊᖑᕙᓪᓕᐊᔪᒥᑦ ᐃᑲᔪᖅᑐᐃᓪᓗᑎᒃ ᓄᓇᓕᖕᓂ ᓴᓇᙳᐊᖅᑎᓂᑦ ᓄᕙᒡᔪᐊᕐᓇᖅ-19 ᐊᑐᖅᑎᓪᓗᒍ, ᖁᕕᐊᓲᑎᖃᖅᖢᑎᒃ ᓄᓇᕗᒻᒥ ᓴᓇᐅᒐᓕᐅᖅᑎᓂᑦ. 

“ᑖᓐᓇ ᖁᕕᐊᓇᑦᑎᐊᖅᑐᖅ ᐱᓕᕆᐊᖑᕙᓪᓕᐊᔪᖅ ᐊᑐᐃᓐᓇᐅᑎᑦᑎᓂᐊᖅᐳᖅ ᐱᔭᐅᔭᕆᐊᖃᓪᓚᕆᒃᑐᒥᒃ ᓴᓇᙳᐊᖅᑎᓄᑦ ᓄᓇᓕᖕᓂ ᐱᓕᕆᐊᕆᕙᒃᑕᖏᑦ ᐊᒃᑐᖅᑕᐅᓯᒪᑎᓪᓗᒋᑦ ᓄᕙᒡᔪᐊᕐᓇᖅ−19-ᒧᑦ," ᒥᓂᔅᑕ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᑕᐃᕕᑦ ᐊᕿᐊᕈᖅ ᐅᖃᖅᑐᖅ. “ᐱᕕᖃᕐᓂᐊᕆᕗᑦ ᓴᓇᐅᒐᖏᓐᓂᒃ, ᐊᓂᒍᐃᔪᓐᓇᕐᓂᖏᓐᓂᒃ ᐊᒻᒪ ᐊᔪᙱᑦᑎᐊᕐᓂᖏᓐᓂᒃ ᑕᑯᒃᓴᐅᑎᑦᑎᔪᓐᓇᕐᓗᑎᒃ ᓴᓇᙳᐊᖅᑏᑦ, ᓄᑖᓂᒃ ᐃᓕᓐᓂᐊᖅᑎᑦᑎᓗᑎᒃ ᓄᓇᑦᑎᓐᓂ.”

ᓄᓇᕗᒻᒥ ᓴᓇᙳᐊᖅᑏᑦ ᐱᓇᔪᖁᔭᐅᕗᑦ $5,000 ᐊᒻᒪ $50,000 ᐊᑯᓐᓂᖓᓂ ᐱᔭᐅᔪᓐᓇᖅᑐᓂᑦ ᐊᑭᓕᐅᑎᒃᓴᓂᒃ ᑎᑎᕋᐅᔭᖅᑕᒥᓂᒃ ᓴᖅᑭᑎᑦᑎᓂᐊᕐᓗᓂ ᐃᓕᐅᖅᑲᐃᓂᐊᕐᓗᓂᓗ. ᓴᓇᙳᐊᖅᑏᑦ ᐱᔾᔪᑕᐅᔪᒥᒃ ᐱᓕᕆᓪᓗᐊᖅᐳᑦ ᐆᒥᖓ ᐃᓅᖃᑎᒌᑦᑎᐊᕐᓂᖅ - ᐊᓯᑦᑎᓐᓂᒃ ᐃᒃᐱᒍᓱᑦᑎᐊᕐᓂᖅ,  ᐃᓅᖃᑎᒌᑦᑎᐊᕐᓂᖅ ᐊᒻᒪ ᑲᒪᑦᑎᐊᖃᑦᑕᕐᓂᖅ ᐃᓄᖕᓂᑦ.

ᓄᓇᕗᑦ ᒐᕙᒪᒃᑯᑦ ᓂᕈᐊᖅᑕᐅᔪᓂᑦ ᓴᓇᙳᐊᖅᑎᓂᒃ ᐊᑭᓖᓂᐊᖅᐳᑦ ᐱᕕᒃᓴᖃᕐᓂᖏᓐᓄᑦ, ᐊᑐᕐᓂᐊᖅᑕᖏᓐᓂᒃ ᐱᖁᑎᖏᓐᓂᒡᓗ ᐊᑭᓖᓗᑎᒃ, ᐊᒻᒪ ᐃᓕᓐᓂᐊᖅᑎᑦᑎᓂᕐᒧᑦ ᐊᑭᓕᐅᑎᒃᓴᖅᑖᖅᑎᑦᑎᓗᑎᒃ ᓴᓇᙳᐊᖅᑎᑦ ᒪᒃᑯᖕᓂᖅᓴᓂᒃ ᐃᓕᓐᓂᐊᖅᑎᑦᑎᔪᒪᒍᑎᒃ ᐅᕝᕙᓘᓐᓃᑦ ᓴᓇᙳᐊᖅᑎᓂᒃ ᐃᓕᓐᓂᐊᒃᑲᓐᓂᕆᐊᓕᖕᓂᑦ ᐱᓕᕆᓕᖅᐸᑕ.  ᓴᓇᙳᐊᖅᑏᑦ ᐱᓯᒪᐃᓐᓇᕐᓂᐊᖅᑐᑦ ᐃᓱᒪᒃᓴᖅᓯᐅᕈᓐᓇᕐᓂᕐᒥᒃ ᐱᓕᕆᐊᖏᓐᓄᑦ.

ᐱᔪᒥᒍᓱᒃᑐᑦ ᓄᓇᕗᒻᒥ ᓴᓇᙳᐊᖅᑏᑦ ᐱᓇᔫᑎᒥᒃ ᖃᕆᓴᐅᔭᒃᑯᑦ ᐱᔪᓐᓇᖅᑐᑦ ᑐᑭᓯᒋᐊᒃᑲᓐᓂᕈᒪᒍᑎᒡᓗ ᐅᕙᓂ: https://gov.nu.ca/iu/inungnit_hanauganut. ᒪᕐᕉᖕᓂᒃ ᑮᓇᐅᔭᖃᖅᑎᑦᑎᓂᐊᖅᑐᑦ ᑖᔅᓱᒧᖓ ᐱᓕᕆᐊᖑᑎᑕᐅᔪᒧᑦ. ᓯᕗᓪᓕᖅ ᐋᒌᓯ 17, 2020-ᒥ ᐃᓱᓕᕝᕕᒃᓴᖃᕐᓗᓂ ᑭᖑᓪᓕᕐᓗ ᓯᑎᐱᕆ 1, 2020-ᒥ ᐃᓱᓕᕝᕕᒃᓴᖃᕐᓗᓂ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓂᑯᓚᔅ ᐸᓚᒃᕗᐊᑦ                                                                 
ᑐᓴᒐᒃᓴᓕᕆᔨ ᖃᕆᑕᐅᔭᒃᑯᓪᓗ ᑎᑎᖅᑐᒐᖅᑎᓕᕆᔨ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
867-975-7826
NBlachford@gov.nu.ca