ᐅᖃᓚᐅᑎᓯᐅᑏᑦ

You are here

ᑕᓗᕐᔪᐊᖅ ᒥᕝᕕᖕᒥ ᐅᑕᖅᑭᕕᖓ ᐅᒃᑯᐃᖅᐳᖅ

ᓯᑎᐱᕆ 12, 2018


ᐱᕙᓪᓕᐊᔪᑦ ᓴᖅᑭᑕᑦ

ᑕᓗᕐᔪᐊᖅ ᒥᕝᕕᖕᒥ ᐅᑕᖅᑭᕕᖓ ᐅᒃᑯᐃᖅᐳᖅ

ᑕᓗᕐᔪᐊᖅ, ᓄᓇᕗᑦ (ᓯᑎᐱᕆ 12, 2018) − ᓄᓇᕗᑦ ᒐᕙᒪᖓ ᐅᒃᑯᐃᖅᓯᕗᑦ ᓄᑖᖑᔪᒥᑦ ᒥᕝᕕᖕᒥ ᐅᑕᖅᑭᕕᖕᒥᑦ ᑕᓗᕐᔪᐊᕐᒥᑦ ᐅᓪᓗᒥᐅᔪᖅ. ᓄᓇᕗᒻᒧᑦ ᓯᕗᓕᖅᑎ ᔫ ᓴᕕᑲᑖᖅ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᒥᓂᔅᑕᖓᑦ ᑕᐃᕕᑎ ᐊᕿᐊᕈᖅ ᐊᒻᒪᓗ ᓇᑦᓯᓕᖕᒧᑦ ᒪᓕᒐᓕᐅᖅᑎ ᐃᒥᓕᐊᓄ ᕿᙳᖅ ᑕᓗᕐᔪᐊᕐᒦᓚᐅᖅᑐᑦ ᐅᒃᑯᐃᖅᓯᔭᖅᑐᖅᖢᑎᒃ.

"ᐅᒃᑯᐃᖅᓯᓂᖅ ᓄᑖᖑᔪᒥᑦ ᒥᕝᕕᖕᒥ ᐅᑕᖅᑭᕕᖕᒥᑦ ᑕᑯᒃᓴᐅᑎᑦᑎᕗᖅ ᓄᓇᕗᑦ ᒐᕙᒪᖓ ᑲᑎᙵᑎᑦᑎᔪᒪᓂᖓᓂ ᓄᓇᕗᒻᒥᐅᓂᒃ ᐅᐸᓗᖓᐃᔭᖅᓯᒪᔪᒃᑯᑦ ᐱᓕᕆᐊᖃᕐᓂᖅᑎᒍᑦ ᐃᖏᕐᕋᔪᓕᕆᓂᕐᒧᑦ," ᐅᖃᖅᐳᖅ ᒥᓂᔅᑕ ᐊᕿᐊᕈᖅ. "ᖃᖓᑕᓲᓕᕆᓂᖅ ᐱᒻᒪᕆᐅᕗᖅ ᓄᓇᓕᑦᑎᓐᓄᑦ ᐅᑭᐅᖅᑕᖅᑐᒥᑦ. ᐅᑕᖅᑭᕖᑦ ᐱᒻᒪᕆᐅᕗᑦ ᓄᓇᕗᒻᒥ ᑖᓐᓇᓗ ᐃᒡᓗᐊᓗᒃ ᐃᑲᔫᑎᑦᑎᐊᕐᓂᐊᖅᖢᓂᑦ ᑕᓗᕐᔪᐊᕐᒥᐅᓄᑦ."

ᖁᓕᕇᓕᒃ, $6.3 ᒥᓕᐊᓐᑐᖅᑐᖅ ᐅᑕᖅᑭᕕᒃ ᐊᖏᓂᖅᓴᐅᕗᖅ ᑭᖑᓪᓕᕐᒥᑦ ᐅᑕᖅᑭᕕᒋᓚᐅᖅᑕᖓᓂ 35 ᐊᕐᕌᒍᓂᒃ ᐊᑐᖅᑕᐅᓂᑯ. ᐃᓂᖃᕐᓂᖅᓴᐅᓕᖅᐳᑦ ᑭᒃᑯᑐᐃᓐᓇᑦ, ᖃᖓᑕᓲᓕᕆᔨᓂᒃ ᐃᖅᑲᓇᐃᔭᖅᑏᑦ ᐊᒻᒪ ᓈᓚᐅᓯᕆᔩᑦ, ᐊᑐᐃᓐᓇᐅᓂᖅᓴᐅᓕᖅᖢᓂᓗ ᑎᒥᒥᒍᑦ ᐊᔪᕈᑎᓕᖕᓄᑦ.

"ᓄᑖᖑᔪᖅ ᑕᓗᕐᔪᐊᕐᒥ ᐅᑕᖅᑭᕕᒃ ᐱᕕᖃᖅᑎᑦᑎᑦᑎᐊᕐᔫᒥᓕᖅᐳᖅ ᐊᐅᓪᓚᖅᑎᑦᑎᔪᒪᔪᓂᒃ, ᖃᖓᑕᓲᒃᑰᖅᑐᓂᒃ ᐊᒻᒪ ᐋᓐᓂᐊᕐᕕᓕᐊᖅᑐᓄᑦ, ᐊᒻᒪᓗ ᐃᑭᒪᕙᒃᑐᑦ ᐊᑦᑕᕐᓇᙱᓐᓂᖅᓴᒦᓕᖅᖢᑎᒃ," ᐅᖃᖅᐳᖅ ᒥᓂᔅᑕ ᐊᕿᐊᕈᖅ. "ᑖᓐᓇ ᐆᒃᑐᕋᐅᑎᐅᕗᖅ ᖃᓄᖅ ᓄᓇᕗᑦ ᐃᖏᕐᕋᔪᓕᕆᓂᐅᑉ ᐱᕈᖅᐸᓪᓕᐊᓂᖓᓂ ᐃᑲᔪᖅᓯᕐᓂᖓᓂᑦ."

ᖃᖓᑕᓲᑦ ᑎᑭᖃᑦᑕᓯᒋᐊᖅᑐᑦ ᓄᑖᖑᔪᒧᑦ ᐅᑕᖅᑭᕕᖕᒧᑦ. ᓄᓇᕗᑦ ᒐᕙᒪᖓ ᐃᒡᓗᐊᓘᑉ ᑕᐅᑦᑐᖓᓂ ᐊᑐᕈᒪᔪᑦ ᐊᓯᖏᓐᓄᑦ ᐅᑕᖅᑭᕕᖕᓄᑦ ᒥᑭᔪᓄᑦ ᓄᓇᓕᖕᓄᑦ ᓄᓇᕗᒻᒥ.

###

ᒫᑎᐅ ᐃᓛᓯᕗᐃᒃᔅ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
867-975-7818
millaszewicz@gov.nu.ca