ᐊᐅᓛᑦᑎᐊᖃᑦᑕᕆᑦᑎ ᓄᓇᒃᑯᑦ!
ᑭᖑᓪᓕᖅᐹᒥᒃ ᓄᑖᙳᕆᐊᖅᑎᑕᐅᓚᐅᖅᑐᖅ ᕿᑎᖅᑰᑦ, ᐊᐃᕐᕆᓕ 18, 2019
ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ
ᐊᐅᓛᑦᑎᐊᖃᑦᑕᕆᑦᑎ ᓄᓇᒃᑯᑦ!
ᐊᐅᓪᓛᖅᓯᒪᓚᐅᑲᒍᒪᓂᐊᖅᐱᑦ? ᓄᓇᕗᑦ ᒐᕙᒪᒃᑯᖏᑦ ᐃᖅᑲᐃᓯᕗᑦ ᓄᓇᕗᒻᒥᐅᓕᒫᓂᑦ ᐊᑦᑕᕐᓇᖅᑕᐃᓕᒪᓗᑎᒃ ᐅᔾᔨᖅᓱᑦᑎᐊᖁᔨᓪᓗᑎᒃ ᐃᒫ:
- ᐊᐅᓪᓚᕐᓂᐊᖅᑎᓪᓗᓯ ᐊᑐᒐᒃᓴᐅᔪᓂᒃ ᑐᐊᕕᕐᓇᖅᑐᖃᓕᕐᓂᖅᐸᑦ ᑐᓴᐅᒪᔾᔪᑎᓂᒃ ᓇᒃᓴᖃᑦᑕᖁᔭᐅᕗᓯ ᐅᕝᕙᓘᓐᓃᑦ ᑕᒻᒪᕇᒃᑯᑎᓂᒃ. ᐊᐃᒃᖠᖃᑦᑕᕆᔅᓯ ᐊᑎᓕᐅᕐᓗᓯ ᐊᑭᖃᙱᑦᑐᒥᑦ ᐅᕙᓃᑉᐳᖔᕈᑎᒥᑦ ᕼᐋᒻᓚᒃᑯᑦ ᑎᑎᕋᕐᕕᐊᓂ, ᐆᒪᔪᖕᓂᐊᖅᑎᒃᑯᑦ ᑎᑎᕋᕐᕕᐊᓂᑦ ᐊᖑᓇᓱᒃᑐᓕᕆᔨᒃᑯᓐᓂᓪᓘᓐᓃᑦ.
- ᑕᒻᒪᕇᒃᑯᑎᒡᒋᖅᐸᒡᓗᓯ ᓄᓇᙳᐊᓂᒡᓗ ᑭᖑᕝᕕᐅᑎᔭᒃᓴᓂᒃ ᓴᕕᒐᐅᔭᕐᒨᖅᑐᖅ ᑕᒻᒪᕇᒃᑯᑎᑦ ᐊᔪᖅᓯᑳᓪᓚᖕᓂᖅᐸᑦ. ᐊᔪᙱᒃᑲᓗᐊᕐᒪᖔᔅᓯᐅᒃ ᖃᓄᖅ ᐊᐅᓚᑕᐅᒋᐊᖃᕐᒪᖔᑕ ᖃᐅᔨᒪᑦᑎᐊᕆᐊᖅᐸᒡᓗᒋᑦ.
- ᐊᐃᑉᐸᖃᖃᑦᑕᕐᓗᑎᒃ ᐊᐅᓪᓚᓕᕌᖓᕕᑦ ᐃᓄᒋᐊᒃᐸᒡᓗᓯᓘᓐᓃᑦ.
- ᐅᖃᐅᑎᕙᒡᓗᒋᑦ ᐃᓚᑎᑦ ᐱᖃᓐᓇᕆᔭᑎᓪᓗ ᓇᒧᙵᐅᖕᒪᖔᖅᐱᑦ ᖃᖓᓗ ᓯᕗᒧᓛᕐᒪᖔᖅᐱᑦ ᐅᐸᒍᒪᔭᕐᓄᑦ.
- ᐱᕙᒌᔭᖅᐸᒡᓗᓯ ᐃᑲᕐᕋᓄᑦ 72-ᓄᑦ ᐊᐅᓪᓚᕐᓂᐊᖅᑎᓪᓗᓯ. ᐅᖅᓱᒡᒋᒃᑲᓐᓂᖅᐸᒡᓗᓯ, ᑕᖁᐊᖃᑦᑎᐊᖅᐸᒡᓗᓯ, ᐊᓐᓄᕌᒡᒋᒃᑲᓐᓂᖅᐸᒡᓗᓯ ᐊᐅᓪᓛᖅᑐᖅᓯᐅᑎᓂᒡᓗ ᓇᒃᓴᑦᑎᐊᖅᐸᒡᓗᓯ, ᐅᓪᓗᐃᓐᓇᖅ ᐊᐅᓪᓚᖅᓯᒪᓂᐊᕋᓗᐊᕌᖓᔅᓯ.
ᐱᖏᖕᓇᖅᑐᓕᕆᔨᒃᑯᑦ ᐸᖅᓴᐃᔨᒃᑯᓪᓗ ᐅᖃᓗᒡᕕᒋᒋᐊᖃᕈᔅᓯᐅᒃ ᐊᐅᓪᓚᖅᓯᒪᔪᒥᒃ ᐅᑎᙱᔅᓲᔭᖅᑐᖃᓕᖅᐸᑦ, ᑐᐊᕕᕐᓇᖅᑐᒃᑯᑦ ᐅᖃᓗᒡᕕᒃᓴᖅ ᐅᖃᓗᒡᕕᒋᕙᒡᓗᒍ ᐅᕗᖓ 1-800-693-1666.
ᐊᓯᐅᒍᕕᑦ, ᐊᔪᓕᕈᕕᓪᓘᓐᓃᑦ ᑐᐊᕕᕐᓇᖅᑐᒃᑰᓯᑳᓪᓚᒃᑯᕕᓪᓘᓐᓃᑦ ᐊᐅᓪᓚᖅᓯᒪᑎᓪᓗᑎᑦ, ᐳᐃᒍᖅᑕᐃᓕᒋᑦ ᐅᑯᓂᖓ:
- ᐊᐅᓪᓚᖅᓯᒪᖃᑎᒋᔭᐃᓪᓗ ᐃᕝᕕᓪᓗ ᐱᓱᓯᒋᐊᖅᑕᐃᓕᒋᔅᓯ. ᐃᖏᕋᐃᓐᓇᕋᓱᙱᓪᓗᓯ.
- ᓇᕿᓪᓗᒍ "Help"-ᓚᓯᒪᔪᖅ ᒫᓃᑉᐳᖔᕈᑎᒥᒃ ᐊᔪᓕᕈᕕᑦ ᐊᓯᐅᒍᕕᓪᓘᓐᓃᑦ.
- ᓇᕿᓪᓗᒍ "911" ᒫᓃᑉᐳᖔᕈᑎᒥᒃ ᑐᐊᕕᕐᓇᖅᑐᖃᖅᐸᑦ.
ᐊᐅᓪᓚᓕᒪᔫᒐᓗᐊᑦᑕᐅᖅ ᐃᓛᓐᓂᒃᑯᑦ ᐃᑲᔪᖅᑕᐅᔭᕆᐊᖃᓚᐅᓲᖑᖕᒪᑕ. ᐸᕐᓇᒃᓯᒪᐃᓐᓇᖅᐸᒡᓗᓯ ᐊᖏᕐᕋᒧᑦ ᐅᑎᑦᑎᐊᕈᓐᓇᕐᓂᐊᕋᔅᓯ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᓈᔅᕋ ᐃᓴᒃ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᓄᓇᓕᖕᓂᑦ ᒐᕙᒪᒃᑯᓪᓗ ᐱᔨᑦᑎᕋᖅᑎᒃᑯᑦ
ᓄᓇᕗᑦ ᒐᕙᒪᒃᑯᖏᑦ
867-975-5342
@email