ᓄᓇᓕᖕᓂᑦ ᒪᓕᒐᓕᕆᓂᖕᒧᓪᓗ ᐱᔨᑦᑎᕋᐅᑎᑦ ᐱᔭᕇᕈᓯᐊᒃᓴᑦ: ᐃᓄᐃᑦ ᑎᒍᔭᐅᒪᕕᖕᓂᑦ ᑲᒪᔩᑦ

ᑭᒃᑯᑐᐃᓐᓇᕐᓄᑦ ᑐᓴᒐᒃᓴᖅ

ᓄᓇᓕᖕᓂᑦ ᒪᓕᒐᓕᕆᓂᖕᒧᓪᓗ ᐱᔨᑦᑎᕋᐅᑎᑦ ᐱᔭᕇᕈᓯᐊᒃᓴᑦ: ᐃᓄᐃᑦ ᑎᒍᔭᐅᒪᕕᖕᓂᑦ ᑲᒪᔩᑦ

ᐃᓕᓐᓂᐊᕈᒪᕕᑦ ᐃᖅᑲᓇᐃᔮᖃᕐᓗᑎᓪᓗ ᒪᓕᒐᓕᕆᓂᖕᒧᑦ ᐱᔨᑦᑎᕋᕐᕕᖕᓂᑦ?

ᓄᓇᕗᑦ ᒐᕙᒪᒃᑯᖏᑦ ᕿᓂᖕᒪᑕ ᓄᓇᒻᒥᑦ ᐃᓄᐃᑦ ᐃᓚᐅᓂᐊᕐᓗᑎᒃ ᐊᕐᕌᒎᖕᓄ−ᒪᕐᕉᖕᓄ ᓄᓇᓕᖕᓂᑦ ᒪᓕᒐᓕᕆᓂᖕᒧᓪᓗ ᐱᔨᑦᑎᕋᐅᑎᑦ ᐱᔭᕇᕈᓯᐊᖅᓴᒥᑦ, ᐊᔪᕈᓐᓃᖅᐹᓪᓕᕐᓗᑎᒃ ᐃᓚᐅᓕᕐᓗᑎᒃᓗ ᐃᓄᐃᑦ ᐃᖅᑲᓇᐃᔭᖕᓂᖕᒥᑦ ᑎᒍᔭᐅᒪᕕᖕᓂᑦ ᑲᒪᔨᐅᓂᖕᒥᑦ.

ᑎᒍᔭᐅᒪᔪᓕᕆᓂᖅ ᓄᓇᕗᒻᒥᑦ ᑲᒪᒋᔭᖃᓲᑦ ᐃᓐᓇᖕᓄᑦ ᒪᒃᑯᒃᑐᓄᓪᓗ ᐃᑲᔪᖅᑕᐅᕕᖕᓂᑦ, ᐸᓯᔭᒃᓴᐅᓂᕋᖅᑕᕕᓃᑦ, ᑭᖓᓂᐊᒍᓪᓗ ᑲᒪᒋᔭᕆᐊᓕᖕᓂᑦ. ᐃᓚᖃᖅᑐᖅ ᐊᔾᔨᒌᙱᑦᑑᑎᓂᑦ ᐱᔨᑦᑎᕋᐅᑎᓂᑦ ᑎᒍᔭᐅᒪᔪᑦ ᑲᒪᒋᔭᐅᓂᖏᑦ, ᐋᓐᓂᐊᓯᐅᑎᓂᑦ, ᐃᓱᒪᓕᕆᓂᖕᓂᑦ ᐃᑲᔪᖕᓂᖕᒧᓪᓗ ᐱᔨᑦᑎᕋᐅᑎᓂᑦ, ᐃᑲᔪᖅᑐᐃᓪᓗᑎᒡᓗ ᓄᓇᓕᓐᓅᖅᐸᓪᓕᐊᓂᐊᖅᑎᓪᓗᒋᑦ.

ᐃᓕᓐᓂᐊᓯᒋᐊᓛᖅᑐᑦ ᒪᐃ 2020−ᒥᑦ ᐋᓪᖔᓐᑯᐃᓐ ᓯᓚᑦᑐᖅᓴᕐᕕᖕᒥᑦ ᐋᑐᕚᒥᑦ, ᐃᓚᖃᕐᓗᓂ 24 ᐃᓕᓴᐃᔨᓄᑦ−ᐊᐅᓚᑕᑦ ᖃᕆᑕᐅᔭᒃᑯᓪᓗ ᐃᓕᓐᓂᐊᒐᒃᓴᓂᑦ ᐋᓪᖔᓐᑯᐃᓐ ᓯᓚᑦᑐᖅᓴᕐᕕᐊᓂᑦ, ᑭᖑᓂᐊᒍᓪᓗ ᐃᖅᑲᓇᐃᔭᕐᕕᖕᒥᑦ−ᐱᓕᒻᒪᒃᓴᓕᕐᓗᓂ ᐃᓚᖏᓐᓂᑦ ᐊᒥᓱᑦ ᑎᒍᔭᐅᒪᕕᖕᓂᑦ ᓄᓇᕗᒻᒥᑦ.

ᑮᓇᐅᔭᑎᒍᑦ ᐃᑲᔫᓯᐊᕈᓐᓇᖅᑐᑦ ᐃᓕᓐᓂᐊᕐᑏᑦ ᖃᖓᑦᑕᐅᑎᓕᒫᖏᓪᓗ, ᐃᓕᓐᓂᐊᕆᐊᕈᑎᒃᓴᖏᑦ ᐃᓕᓐᓂᐊᕐᒐᒃᓴᓄᓪᓗ ᐊᑮᑦ ᐊᑭᓕᕐᑕᐅᓂᐊᕐᑐᑦ ᐃᓕᓐᓂᐊᕐᓂᖓᓂᑦ ᐋᓪᖔᓐᑯᐃᑦ ᓯᓚᑦᑐᖅᓴᕐᕕᐊᓂᑦ. ᐊᒥᓲᓛᖑᔪᓐᓇᖕᓂᐊᖅᑐᑦ 10 ᐃᓕᓐᓂᐊᕐᑎᑦ ᐃᓕᓐᓂᐊᒐᒃᓴᒧᑦ. ᐱᓇᔪᒃᑐᑦ ᐃᓕᓐᓂᐊᕇᕈᓯᐊᕐᓯᒪᔭᕆᐊᖃᖅᑐᑦ ᐅᕝᕙᓘᓐᓃᑦ ᐃᓐᓇᐅᓕᕐᑐᖅ ᐃᓕᓐᓂᐊᕐᑎᑦ (19−ᓂᑦ ᐅᑭᐅᖃᕐᓗᓂ ᐅᖓᑖᓄᓪᓘᓐᓃᑦ).

ᐃᖅᑲᓇᐃᔮᒃᓴᖅᓯᐅᕈᑎᒥᑦ, ᓇᐃᑦᑐᒥᑦ ᐅᓂᒃᑳᕐᓯᒪᓗᓂ ᐃᖅᑲᓇᐃᔭᕈᒪᓂᖕᓂᑦ ᑎᒍᔭᐅᒪᕕᖕᓂᑦ ᓈᒻᒪᒋᔭᐅᔪᒥᒡᓗ ᐱᕋᔭᖕᓂᑯᒋᔭᐅᔪᑦ ᑎᑎᕋᖅᑕᐅᓯᒪᓂᖏᑦ ᖃᐅᔨᓴᖅᑕᐅᔭᕆᐊᓖᑦ. ᐱᓇᔪᒍᒪᔪᑦ ᑐᑭᓯᒋᐊᒃᑲᓐᓂᕈᒪᔪᓪᓘᓐᓃᑦ, ᖃᐅᔨᒋᐊᕈᓐᓇᖅᑐᑦ ᔭᐃᐲ ᑎᕈᐃᒧᑦ, ᑐᑭᒧᐊᒃᑎᑦᑎᔨ ᑎᒍᔭᐅᒪᔪᓂᑦ, ᐅᕗᖓ @email ᐅᕝᕙᓘᓐᓃᑦ 867-975-6501.

ᑐᑭᓯᒋᐊᒃᑲᓐᓂᕈᒪᒍᕕᑦ ᑎᒍᔭᐅᒪᔪᓕᕆᓂᖕᒥᑦ ᓄᓇᕗᒻᒥᑦ, ᐅᖃᓕᒫᕐᓗᒍ ᐃᓚᓕᐅᑎᓯᒪᔪᑦ ᑐᑭᓯᒋᐊᕈᑎᒃᓴᖅ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑳᕐᓖ ᑭᓐᑖᓪ
ᐊᑐᐊᒐᓕᕆᓂᕐᒧᑦ ᑐᓴᒐᒃᓴᓕᕆᓂᕐᒧᓪᓗ ᕿᒥᕐᕈᔨ
ᒪᓕᒐᓕᕆᔨᒃᑯᑦ
867-975-6174
@email