ᑎᕆᒐᓐᓂᐊᕐᒧᑦ ᑮᔭᐅᔪᖃᕐᓂᖅ ᐅᖅᓱᖅᑑᕐᒥᑦ

ᐋᓐᓂᐊᖃᕐᓇᙱᑦᑐᓕᕆᓂᒧᑦ ᑭᒃᑯᑐᐃᓐᓇᕐᓄᑦ ᓇᓗᓇᐃᔭᐅᑦ

ᑎᕆᒐᓐᓂᐊᕐᒧᑦ ᑮᔭᐅᔪᖃᕐᓂᖅ ᐅᖅᓱᖅᑑᕐᒥᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᐅᔨᑎᑦᑎᔪᒪᕗᑦ ᐅᖅᓱᖅᑑᕐᒥᐅᓂᒃ ᓄᓇᓕᖕᓂᕐᒥᐅᑕᖅ ᑎᕆᒐᓂᐊᒧᑦ ᑮᔭᐅᓚᐅᕐᓂᖓᓂᑦ. ᐱᖦᖤᙱᓴᖅᑐᖃᑐᐃᓐᓇᕆᐊᖃᕐᓂᖓᓄᑦ ᓴᓂᕋᔭᖕᒥᐅᓕᒫᑦ ᐅᖃᐅᑎᔪᒪᕙᕗᑦ ᐅᔾᔨᖅᓱᖃᑦᑕᖁᓗᒋᑦ ᑎᕆᒐᓂᐊᕐᓂᒃ ᖃᓂᒋᔮᓂ.

ᑮᔭᐅᓐᓂᕈᕕᑦ ᑕᓪᓕᒃᑕᐅᓐᓂᕈᕕᓪᓘᓐᓃᑦ ᑎᕆᒐᓂᐊᒧᑦ ᕿᒻᒥᕐᒧᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᖃᓄᐃᓕᐅᖅᑕᐅᓂᕆᔭᐃᓪᓗ ᐅᖃᐅᓯᕆᑲᐅᑎᒋᓗᒍ. ᐱᖦᖤᖏᓴᕐᓂᕈᓂᑦ ᑲᒪᒋᔭᐅᑲᐅᑎᒋᔭᕆᐊᖃᖅᐳᖅ.
ᑎᕆᒐᓐᓂᐊᖅ ᐋᓐᓂᐊᖃᕋᓗᐊᖅᐸᑦ ᓄᔪᐊᙱᑦᑑᔪᓐᓇᖅᐳᖅ. ᓄᑕᖅᑲᑦ ᐱᙳᐊᖃᑎᖃᕆᐊᖃᙱᑦᑐᑦ ᑎᕆᒐᓐᓂᐊᓂᒃ ᐊᓯᖏᓐᓂᒡᓘᓐᓃᑦ ᐆᒪᔪᓂᒃ. ᕿᒻᒦᑦ ᓯᓚᒥᐅᑕᑦ ᐃᐱᖅᓯᒪᑏᓐᓇᕐᓗᒋᑦ, ᖃᐅᔨᓴᖅᐸᒡᓗᒋᓪᓗ ᐱᐅᓯᖏᑦ ᐊᓯᔾᔨᙱᒃᑲᓗᐊᕐᒪᖔᑕ ᐊᒻᒪ ᐱᖦᖤᙱᓴᓕᙱᒃᑲᓗᐊᕐᒪᖔᑕ.

ᑎᕆᒐᓂᐊᑦ ᐊᒻᒪ ᐊᒪᕈᐃᑦ ᐱᖦᖤᙱᓴᓲᖑᕗᑦ ᓄᓇᕗᒻᒥ, ᓯᐊᒻᒪᒃᑎᕈᓐᓇᖅᖢᑎᒡᓗ ᕿᒻᒥᓄᑦ ᑮᔭᐅᓐᓂᕌᖓᑕ ᐱᖦᖤᙱᓴᖅᑐᒧᑦ ᑎᕆᒐᓂᐊᒧᑦ ᐅᕝᕙᓘᓐᓃᑦ ᐊᒪᖅᑯᒧᑦ. ᐃᓄᐃᑦ ᐱᖦᖤᙱᓴᖅᑐᒧᑦ ᑮᔭᐅᓐᓂᖅᐸᑕ, ᑕᓪᓕᒃᑕᐅᓐᓂᖅᐸᑕ ᐅᕝᕙᓘᓐᓃᑦ ᐊᓗᐱᖅᑕᐅᓐᓂᖅᐸᑕ ᐊᐃᑦᑐᕐᓗᒡᕕᐅᔪᓐᓇᖅᑐᑦ. ᐃᓄᖕᒥᑦ ᐱᖦᖤᙱᓴᖅᑐᖃᓕᕈᓐᓇᖅᐳᖅ ᐱᖦᖤᙱᓴᖅᑐᕕᓂᕐᒥᒃ ᓂᕐᔪᑎᒥᒃ ᓂᕿᓕᕆᒍᓂ/ᐊᒥᓕᕆᒍᓂ.

ᐆᒪᔪᒥᒃ ᑕᑯᒍᕕᑦ ᐃᓕᖅᑯᓯᖅᓱᙱᑦᑐᒥᒃ, ᐱᓱᒡᒐᖅᑐᒥᒃ, ᖃᓂᒃᑯᑦ ᖃᐳᐊᒃᑐᒥᒃ, ᐊᓂᖅᓵᖅᑐᒡᒐᖅᑐᒥᒃ ᐅᕝᕙᓘᓐᓃᑦ ᓂᐱᒋᙱᑕᒥᓂᒃ ᓂᓪᓕᐊᔪᒥᒃ, ᑕᐃᒪ ᐱᖦᖤᙱᓴᑐᐃᓐᓇᕆᐊᖃᖅᐳᖅ. ᓂᕐᔪᑎ ᐅᐸᒃᑕᐃᓕᓗᒍᑦ ᐅᖄᓚᓗᑎᓗ ᐆᒪᔪᕐᓂᐊᖅᑎᒧᑦ ᐅᕗᖓ 867-360-7605 ᐅᕝᕙᓗ ᐊᕙᑎᑦᑎᓐᓂᒃ ᖃᓄᐃᖏᑦᑎᐊᕋᓱᐊᖅᑐᓕᕆᔨᒧᑦ ᐅᕗᖓ 867-983-4236, ᐃᕐᖐᓐᓇᖅ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
@email
867-975-5762