ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᒪᐃ 8, 2020
ᓯᕗᓕᖅᑎᒥᑦ ᑐᓴᒐᒃᓴᖅ:
ᐅᓐᓄᒃᓴᒃᑯᑦ. ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᖃᕐᓂᕐᒥᒃ ᐱᑕᖃᕐᓂᖓᓂᒃ ᓇᓗᓇᐃᓪᓚᕆᒃᓯᒪᔪᖃᙱᓚᖅ ᓄᓇᕗᒻᒥ.
ᐅᓪᓗᒥ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᔪᑦ 805-ᖑᓕᖅᑐᑦ. 291 ᒫᓐᓇ ᖃᐅᔨᓴᖅᑕᐅᔪᑦ, 514−ᓗ ᐃᓄᐃᑦ ᖃᐅᔨᓴᖅᑕᐅᔪᓐᓃᖅᖢᑎᒃ.
ᖃᐅᔨᒪᔪᒃᓴᐅᑎᓪᓗᓯ, ᐃᓱᓕᑦᑎᕙᓪᓕᐊᓕᕋᑦᑕ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐱᓇᓱᐊᕈᓯᕆᔭᐅᔪᒥᒃ. ᓇᖕᒥᓂᖅ−ᑲᒪᒋᔭᖃᑦᑎᐊᕐᓂᖅ, ᖃᐅᔨᒋᐊᕐᕕᖃᖅᐸᖕᓂᖅ ᖃᐅᔨᑎᑦᑎᕙᖕᓂᕐᓗ ᒫᓐᓇ ᐱᒻᒪᕆᐊᓘᕗᑦ, ᖃᖓᐅᓚᐅᕐᓂᖓᓂᓪᓗ ᐱᒻᒪᕆᐅᓂᖅᓴᐅᓕᖅᖢᑎᒃ.
ᐃᕝᕕᓪᓘᓐᓃᑦ ᖃᐅᔨᒪᔭᕐᓂᒡᓘᓐᓃᑦ ᐊᒃᓱᕈᕐᓇᖅᑐᒦᑦᑐᖃᖅᐸᑦ, ᐊᐱᕆᓗᑎᑦ ᐃᑲᔪᖅᑕᐅᔪᒪᓗᑎᑦ. ᐃᓕᔅᓯᓐᓄᑦ ᖃᐅᔨᒋᐊᖃᑦᑕᐅᑎᕙᒡᓗᓯ ᐊᔪᕐᓇᙱᑦᑕᕌᖓᑦ, ᐊᒻᒪᓗ ᐳᐃᒍᖅᑕᐃᓕᒋᔅᓯ, ᐃᓄᑑᖅᑰᔨᒋᒐᓗᐊᕈᔅᓯ, ᐃᓄᑑᙱᑦᑎᐊᖅᐳᓯ.
ᒫᓐᓇ ᑎᒥᒃᑯᑦ ᐅᖓᓯᒌᖕᓂᖅᓴᐅᔪᒎᒐᓗᐊᖅ, ᑭᓯᐊᓂᓕ ᓱᓕ ᑲᑎᙵᕗᒍᑦ, ᐅᖓᓯᒌᖦᖤᕋᓗᐊᕋᑦᑕ. ᐊᑕᖃᑦᑕᐅᑏᓐᓇᐅᔭᖅᐳᒍᑦ ᑕᒪᑦᑕᓗ ᐊᓐᓂᕐᓇᖅᑐᐃᓐᓇᐅᓪᓗᑕ.
ᒪᕐᕉᓵᖅᑑᖕᓂ ᐅᓪᓘᖕᓂ, ᑐᓴᖅᓯᒪᕗᖓ ᓄᓇᓕᖕᓂ ᐱᒋᐊᖅᑎᑕᐅᓯᒪᑦᑎᐊᖅᑐᐊᓗᖕᓂᒃ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ. ᐱᕕᒃᓴᖃᕐᓂᓐᓂ ᐃᓚᖏᓐᓂᒃ ᐅᖃᐅᓯᖄᕐᔪᒍᒪᕗᖓ.
ᖁᕐᓗᖅᑐᕐᒥ, ᕼᐋᒻᒪᓚᒋᔭᐅᔪᖅ ᐋᖅᑭᒃᓱᐃᓯᒪᕗᖅ ᓴᓇᓂᕐᒧᑦ ᐱᓕᕆᖃᑎᒌᓂᒃ, ᐱᙳᕐᓇᕐᓂᕐᒧᑦ ᐅᓐᓄᒋᔭᐅᔪᓂᒃ, ᐊᖏᕐᕋᖅᓯᒪᓪᓗᑎᒡᓗ ᓇᓚᐅᑦᑖᖃᑎᒌᖕᓂᕐᒥᒃ, ᐊᓯᒃᑲᓐᓂᖏᓐᓂᒡᓗ!
ᐊᕐᕕᐊᕐᒥ ᐱᙳᐊᓂᒃ ᑐᓂᐅᖅᑲᐃᔪᖃᖅᓯᒪᕗᖅ ᐃᑲᔪᕈᒪᓪᓗᒋᑦ ᓄᑕᖅᑲᑦ ᐱᔭᒃᓴᖃᕈᓐᓇᕐᓂᕐᒧᑦ ᐊᖏᕐᕋᖅᓯᒪᔾᒧᑎᒋᓂᐊᖅᑕᖏᓐᓂᒃ ᖃᓄᐃᙱᔾᔪᑎᒋᓂᐊᖅᑕᖏᓐᓂᒡᓗ ᑕᒪᓐᓇᐅᑎᓪᓗᒍ ᓄᕙᒡᔪᐊᕐᓇᖅ-19.
ᐃᖃᓗᒃᑑᑦᑎᐊᒥᓗ, ᕼᐋᒻᓚᒋᔭᐅᔪᖅ ᑲᔪᓯᑎᑦᑎᕗᖅ ᐃᓕᖅᑯᓯᑐᖃᒃᑰᖓᔪᒥᒃ, TikTok−ᑯᒃ ᓵᓚᑲᕋᓱᖕᓂᕐᒥᒃ ᒪᒃᑯᒃᑐᖁᑎᒥᓄᑦ. ᐊᕐᓇᐃᑦᑕᐅᖅ ᐃᖃᓗᒃᑑᑦᑎᐊᒥᐅᑕᐃᑦ ᐃᒃᐱᖕᓇᖅᑐᒻᒪᕆᐊᓗᖕᒥᒃ ᖃᐅᒪᓂᕐᒧᑦ ᓇᒡᓕᒍᓱᖕᓂᕐᒧᓪᓗ ᑕᕐᕆᔭᒐᒃᓴᒥᒃ ᓴᓇᓯᒪᒋᕗᑦ, ᖁᓪᓕᕐᒥᒃ ᐃᑯᒻᒪᖕᓂᕐᒥᒃ. ᑖᓐᓇ ᓱᓕ ᑕᑯᓚᐅᙱᑦᑐᕝᑯᕕᐅᒃ, ᖃᐅᔨᒋᐊᕈᒃ YouTube−ᒥ.
ᐊᒥᓱᒻᒪᕆᐅᕗᑦ ᓄᓇᓖᑦ ᐃᓄᐃᓪᓗ ᐱᓇᔪᖕᓂᖃᑦᑎᐊᖅᑐᑦ ᐊᓯᒥᓂᒡᓗ ᐃᓱᒪᒋᔭᖃᑦᑎᐊᖅᑐᑦ ᑕᒪᓐᓇ ᓇᒧᕈᓘᔮᕈᓐᓇᖅᑐᖅ ᐋᓐᓂᐊᕐᓇᖅ ᐊᑐᖅᑎᓪᓗ. ᐱᓕᕆᐊᖑᔪᓐᓇᖅᑐᒥᒃ ᐃᓱᒋᓯᒪᔭᕐᓂᒡᓘᓐᓃᑦ ᐅᕙᓐᓄᑦ ᖃᐅᔨᑎᑦᑎᔪᒪᒍᕕᑦ, ᐊᑏ ᐅᕙᓐᓄᑦ ᖃᐅᔨᑎᔾᔪᒃ!
ᑕᑯᓂᖅ ᐊᑐᖅᑕᐅᓯᒪᔪᓂᒃ ᓄᓇᓕᖕᒥᐅᑦ ᐆᒪᕆᒃᓴᑦᑎᐊᕈᓐᓇᕐᓂᖏᓐᓄᑦ ᐃᓱᒪᒋᔭᖃᑦᑎᐊᕈᓐᓇᕐᓂᖏᓐᓄᓪᓗ ᐱᒋᐊᖅᑎᓯᒪᔭᖏᑦ ᐱᐅᔪᒻᒪᕆᐅᓯᒪᕗᑦ, ᐅᕙᓐᓂᒡᓗ ᐱᐅᔪᒃᑯᑦ ᐃᑲᔪᕐᓂᖃᖅᓯᒪᓪᓗᑎᒃ ᑕᒪᒃᑯᓇᓂ, ᐃᓛᓐᓂᒃᑯᓪᓗ ᐊᔪᕐᓇᓕᖅᐸᒃᑐᓂ ᐅᓪᓗᓂ.
ᐊᒻᒪ ᑭᖑᓪᓕᖅᐹᒥᒃ, ᐊᓈᓇᐅᑉ ᐅᓪᓗᖓ ᐊᒡᒋᓕᕐᒥᖕᒪᑦ ᓴᓇᑦᑕᐃᓕᒥ. ᓄᓇᕗᒻᒥᐅᑦ ᐊᓈᓇᖏᑦ ᐅᓪᓗᖃᑦᑎᐊᓪᓚᕆᖁᕙᒃᑲ, ᑕᐃᒪᓗᑐᖅ ᐃᓚᒌᑦ ᖁᕕᐊᓱᖃᑎᒌᒍᓐᓇᓂᐊᖅᐳᑦ, ᐅᖓᓯᒌᒋᐊᖃᕋᓗᐊᖅᑎᓪᓗᓯᓘᓐᓃᑦ.
ᐱᓇᓱᐊᕈᓯᐅᑉ ᓄᙳᐊᓂᒃ ᐊᑐᑦᑎᐊᕐᓂᐊᖅᐳᓯ, ᐊᒃᓱᕉᑎᒌᓐᓇᖅᑕᓯᓗ ᐃᓕᔅᓯᓐᓂᒃ ᐊᓯᔅᓯᓐᓂᒡᓗ ᖁᐊᖅᓵᕐᓇᖅᑎᑦᑎᑦᑕᐃᓕᒪᓂᕐᒧᑦ ᐊᑐᐃᓐᓇᕐᓗᓯᐅᒃ.
ᒥᓂᔅᑕ ᐋᓐᓂᐊᖃᖕᓇᙱᑦᑐᓕᕆᔨᒃᑯᓐ ᓄᑖᙳᕆᐊᖅᑎᑕᖏᑦ:
ᐅᖃᐅᓯᐅᓚᐅᖅᐳᖅ ᑕᒪᑐᒪ ᐊᕐᕌᒎᑉ ᐱᒋᐊᕐᓂᖓᓂ ᐅᑯᓇᙵᑦ, ᓄᓇᕐᔪᐊᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑐᔾᔨᖃᑎᒌᓂᑦ, ᑕᒪᓐᓇ 2020 ᑕᒪᕐᒥᑦᑎᐊᖅ ᐃᓕᓴᕆᔭᐅᖁᓪᓗᒍ ᐊᕐᕌᒍᒋᔭᐅᓂᐊᕐᓂᖓᓄᑦ ᐃᓗᐊᖅᓴᐃᔨᓄᑦ ᐃᕐᓂᓱᒃᓰᔨᓄᓪᓗ. ᑖᓐᓇ ᐱᕕᒃᓴᑦᑎᐊᕙᐅᓚᐅᖅᐳᖅ ᖁᕕᑯᐊᓱᒍᑎᖃᕐᕕᒋᓂᐊᖅᖢᒍ ᐱᒻᒪᕆᐊᓗᖕᒥᒃ ᐱᓕᕆᐊᖃᖅᐸᖕᓂᖏᓐᓂᒃ ᐃᓗᐊᖅᓴᓴᐃᔩᑦ ᐃᕐᓂᓱᑦᓰᔩᓪᓗ ᑲᔪᓯᑎᑦᑎᓂᐊᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᕆᕙᒃᑕᖏᓐᓂᒃ ᓄᓇᕐᔪᐊᓕᒫᒥ.
ᖃᔅᓯᑲᓪᓚᐃᑦ ᐊᓂᒍᖅᓯᒪᓕᖅᑎᓪᓗᒋᑦ, ᑕᒪᑐᒪᓂ ᓄᓇᕐᔪᐊᓕᒫᒥ ᐋᓐᓂᐊᕐᓇᖅᑐᖅᑕᖃᖅᑎᓪᓗᒍ, ᐅᖃᐅᓯᖃᑐᐃᓇᙱᓚᒍᑦ ᐱᒻᒪᕆᐊᓗᖕᒥᒃ ᐱᓕᕆᐊᖃᖅᐸᖕᓂᖏᓐᓂᒃ ᐅᕙᑦᑎᓐᓂᒃ ᖃᓄᐃᙱᑦᑎᐊᖅᑎᑦᑎᔪᒪᓪᓗᑎᒃ, ᑕᐃᒪᓕ ᐊᑐᓕᖅᐳᒍᑦ ᑕᒪᑐᒥᖓᒻᒪᕆᒃ. ᐃᓗᐊᖅᓴᐃᔩᑦ ᐃᕐᓂᓱᒃᓰᔩᓪᓗ ᑲᔪᓰᓐᓇᖅᐳᑦ ᐱᒻᒪᕆᐊᓗᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᕆᕙᒃᑕᒥᓂᒃ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᑦᑎᓐᓂ, ᓄᓇᑦᑎᓐᓂ ᑲᓇᑕᒥ, ᓄᓇᕐᔪᐊᓕᒫᒥᓗ.
ᒪᐃ 11−ᒥᑦ 17−ᒧᑦ ᐃᓕᓴᕆᔭᐅᓯᒪᕗᖅ ᑲᓇᓕᒫᒥ ᐃᓗᐊᖅᓴᐃᔨᓄᑦ ᐱᓇᓱᐊᕈᓯᒋᔭᐅᓂᖓᓂᒃ. ᐃᓗᐊᖅᓴᐃᔨᒋᔭᕗᑦ ᑕᖃᓴᕋᐃᙱᖦᖢᑎᒃ ᐱᓕᕆᐊᖃᖅᑎᓪᓗᒋᑦ ᖃᐅᔨᒪᑦᑎᐊᕈᒪᓪᓗᑎᒃ ᓄᓇᕗᒻᒥᐅᑦ ᐊᑐᕈᓐᓇᕋᓗᐊᕐᒪᖔᑕ ᑲᒪᒋᔭᐅᓂᕐᒥᒃ ᐱᔭᕆᐊᖃᖅᑕᒥᓂᒃ, ᐃᓱᒪᕗᖓ ᒫᓐᓇ ᐱᕕᒃᓴᖃᕐᓂᑦᑎᓐᓂ ᑖᒃᑯᓂᖓ ᑕᑯᑎᑦᑎᓗᑕ ᐊᒃᓱᒻᒪᕆᐊᓗᒃ , ᐱᓕᕆᓂᕆᖃᑦᑕᖅᑕᖏᓐᓄᑦ ᐃᑲᔪᓂᕆᖃᑦᑕᖏᓐᓄᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᑦᑎᓐᓂᒃ. ᓄᓇᕗᑦ 300 ᐅᖓᑖᓃᑦᑐᓂᒃ ᐃᓗᐊᖅᓴᐃᔨᖃᖅᐳᖅ, ᑕᒪᒃᑯᐊᓗ ᐱᒻᒪᕆᐊᓘᓪᓗᑎᒃ ᐱᕙᓪᓕᐊᓂᕆᔭᐅᔪᓄᑦ ᑲᔪᓯᓂᕆᔭᐅᔪᓄᓪᓗ ᐱᓕᕆᐊᒃᓴᓄᑦ, ᑕᒪᒃᑯᐊ ᓄᓇᕗᒻᒥᐅᓂᒃ ᖃᓄᐃᙱᑦᑎᐊᖅᑎᑦᑎᕙᖕᓂᖏᓐᓄᑦ. ᑕᒪᒃᑯᓇᓂ ᐅᓪᓗᓂ ᓇᓗᓈᕿᓐᓇᖅᑐᓂ, ᓄᓇᕐᔪᐊᕐᒥᐅᑦ ᐅᓇᑖᕆᔭᖃᕐᓂᖏᓐᓂ ᓄᕙᒡᔪᐊᕐᓇᖅ-19−ᒥᒃ, ᐃᓗᐊᖅᓴᐃᔨᕗᑦ ᑕᒪᔾᔭ ᐱᓕᕆᖅᑳᓯᒋᐊᒻᒪᕆᒃᐸᒃᐳᑦ, ᐱᑎᑦᑎᕙᒃᖢᑎᒃ ᑲᒪᒋᔭᖃᕐᓂᕐᒥᒃ ᑕᒪᒃᑯᓂᖓ ᑲᒪᒋᔭᐅᔭᕆᐊᖃᓛᖑᔪᓂᒃ. ᑕᒪᓐᓇ ᓇᒧᙵᕈᓘᔭᖅᓯᒪᔪᖅ ᑲᓂᒪᓐᓇᖅ ᑕᑯᑎᑦᑎᓯᒪᕗᖅ ᐃᓗᐊᖅᓴᐃᔨᑦᑕ ᐱᔪᒪᓪᓚᕆᒃᓯᒪᓂᖏᓐᓂᒃ ᓇᖕᒥᓂᖅ ᐋᓐᓂᐊᖅᑲᖅᑕᐃᓕᒪᓂᑎᒃ ᖁᐊᖅᓵᕐᓇᖅᑐᒦᑦᑕᐃᓕᒪᓂᑎᒡᓗ ᐃᓱᒪᒋᓇᒋᑦ, ᓴᐳᔾᔨᓯᒪᔪᒪᓪᓗᑎᒃ ᑲᒪᒋᔭᖃᕈᒪᓪᓗᑎᒡᓗ ᐃᓄᖕᓂᒃ ᐊᕙᑎᖏᓐᓃᑦᑐᓂᒃ.
ᑕᒪᓐᓇ ᑲᓇᑕᓕᒫᒥ ᐃᓗᐊᖅᓴᐃᔨᓄᑦ ᐱᓇᓱᐊᕈᓯᕆᔭᐅᔪᖅ, ᐃᒪᓐᓇᒻᒪᕆᒡᓘᓐᓃᑦ, ᑕᒪᓐᓇ ᐊᕐᕌᒍᓕᒫᖅ ᐊᕐᕌᒍᒋᔭᐅᔪᖅ ᐃᓗᐊᖅᓴᐃᔨᓄᑦ ᐃᕐᓂᓱᒃᓯᔨᓄᓪᓗ, ᐅᕙᑦᑎᓐᓂᒃ ᐱᕕᒃᓴᖃᖅᑎᑦᑎᕗᑦ ᐅᔾᔨᕐᓇᖅᓯᑎᑦᑎᓪᓚᕆᖕᓂᕐᒥᒃ ᑕᒪᒃᑯᓂᖓ ᐊᑐᖅᑕᐅᓪᓚᕆᒋᐊᖃᖅᐸᒃᑐᐊᓗᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᓂᒃ. ᑭᓯᐊᓂᓗᑦᑕᐅᖅ, ᖁᔭᓕᓂᕆᔭᕗᑦ ᐱᔨᑦᑎᕋᕐᓂᕆᕙᒃᑕᓯᓐᓄᑦ ᐊᑕᐅᑐᐊᑯᓗᖕᒧᑦ ᐱᓇᓱᐊᕈᓯᕐᒨᖓᙱᓚᖅ, ᐊᕐᕌᒍᑐᐊᒧᓪᓘᓐᓃᑦ ᐊᑕᐅᓯᑐᐊᒧᑦ. ᓄᓇᕗᒻᒥᐅᓕᒫᑦ ᐅᕙᓐᓄᑦ ᐃᓚᓕᐅᑎᖁᕙᒃᑲ ᑕᑯᒃᓴᐅᑎᑦᑎᓗᑕ ᑲᔪᓰᓐᓇᖅᑐᒥᒃ ᖁᔭᓖᓐᓇᐅᔭᕐᓂᑦᑎᓐᓂᒃ ᐱᓕᕆᐊᖃᕈᒪᐃᓐᓇᐅᔭᖅᐸᖕᓂᔅᓯᓐᓄᑦᑕᒪᑐᒧᖓ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒧᑦ.
ᖁᔭᓐᓇᒦᒃ.
ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᒃᓴᖅ, ᓇᖕᒥᓂᕐᓗ ᖃᐅᔨᓴᕐᓂᕐᒧᑦ ᐊᑐᖅᑕᐅᔪᓐᓇᖅᑐᖅ
ᑭᓇᑐᐃᓐᓇᑦᑎᐊᖅ ᐃᓱᒪᒋᔭᖃᖅᑐᖅ ᐊᐴᑎᓯᒪᓯᒪᓂᕐᒥᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ ᐅᖃᐅᔾᔭᐅᕗᑦ ᐅᖄᓚᖁᔭᐅᓪᓗᑎᒃ ᓄᕙᒡᔪᐊᕐᓇᕐᒧᑦ−ᐅᖄᕝᕕᐅᔪᓐᓇᖅᑐᒥᒃ ᐅᕗᖓ, 1-888-975-8601−ᒧᑦ 10−ᓗ ᐅᓪᓛᒥᑦ 6−ᓗ ᐅᓐᓄᒃᓴᒧᑦ ᐊᑯᓐᓂᖏᓐᓂ, ᖃᐅᔨᑎᓪᓗᒋᓪᓗ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᖕᒥᓂᒃ ᖃᐅᔨᑎᑲᐅᑎᒋᓗᒋᓪᓗ, ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᓂᓗ ᐊᖏᕐᕋᖅᓯᒪᓗᓂᓗ 14−ᓄᑦ ᐅᓪᓗᓄᑦ.
ᑭᓇᑐᐃᓐᓇᑦᑎᐊᖅ ᐊᑐᕈᓐᓇᖅᑐᖅ ᖃᕆᑕᐅᔭᒃᑰᕈᓐᓇᐅᑎᒥᒃ ᐱᓕᕆᐊᖃᕈᓐᓇᕆᕗᖅᑕᐅᖅ ᓇᖕᒥᓂᖅ ᐃᑭᐊᖅᑭᕕᒃᑯᑦ ᓇᖕᒥᓂᖅ−ᖃᐅᔨᓴᕈᓐᓇᕐᓂᕐᒥᒃ ᐅᕙᓂ, nu.thrive.health
ᐅᓄᕐᓂᖏᑦ
|
ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐊᓂᑦᑕᐃᓕᔭᕆᐊᖃᖅᑐᓄᑦ ᐃᓂᖏᑦ) |
|
|
ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ |
ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᒪᐃ 7-ᒥᑦ ᐱᒋᐊᖅᖢᓂ |
|
ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᓯᒪᔪᓄᑦ |
210 |
|
ᑭᒃᑯᑐᐃᓐᓇᑦ |
141 |
|
ᑲᑎᖦᖢᒋᑦ |
351 |
ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:
|
ᐊᐅᓪᓚᕐᕕᒃᓴᖓᑕ ᐅᓪᓗᐊ |
ᖃᔅᓯᐅᓂᖏᑦ ᓄᑕᕐᓂᐊᖅᑐᑦ ᐅᐸᒃᑕᐅᑦᑕᐃᓕᒪᔪᓂᖔᕐᓗᑎᒃ |
|
ᒪᐃ 8 |
15 |
|
ᒪᐃ 9 |
21 |
|
ᒪᐃ 10 |
4 |
|
ᒪᐃ 11 |
66 |
|
ᒪᐃ 12 |
19 |
ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ
ᐱᒋᐊᕐᖢᓂ ᒪᐃ 7−ᒥ, 922−ᓂᒃ ᑐᒃᓯᕋᖅᓯᒪᔪᖃᖅᐳᖅ, 708−ᖑᓂᖏᑦ ᐱᔭᕆᐊᖃᒻᒪᕆᒃᑐᓂᒃ ᐃᖅᑲᓇᐃᔭᖅᑎᒃ ᑐᒃᓯᕋᕈᑕᐅᓪᓗᑎᒃ.
|
ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ |
# |
% |
|
ᐊᖏᖅᑕᐅᓯᒪᔪᑦ (ᐃᓚᖃᖅᐳᖅ ᐱᒻᒪᕆᐊᓗᖕᓂᑦ ᐱᒻᒪᕆᐅᓗᐊᙱᑦᑐᓂᒡᓗ) |
773 |
83,8 % |
|
ᐊᖏᕐᑕᐅᙱᑦᑐᑦ |
109 |
11,8 % |
|
ᐅᑕᖅᑭᔪᑦ |
40 |
4,3 % |
|
ᑲᑎᖦᖢᒋᑦ |
922 |
100 % |
ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:
ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ. ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.
- ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
- ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
- ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᕆᔭᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.
ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.
ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ. ᑕᒪᕐᒥᑦᑎᐊᖅ ᑕᑯᔭᔅᓴᓕᐊᖑᓯᒪᔪᑦ ᐃᓂᔅᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.
MHA−ᑯᑦ ᐅᖄᓚᐅᑎᒃᑯᖔᖅ ᖃᐅᔨᓴᖅᑕᐅᖃᑦᑕᕐᓂᐊᓕᖅᑐᑦ ᐃᑲᔪᖅᑕᐅᖃᕐᓗᑎᓪᓗ ᐃᓚᖏᓐᓄᑦ ᐃᓄᓕᕆᔭᐅᖃᑦᑕᖅᑐᓄᑦ. ᑕᑯᔭᔅᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᔅᓯᕆᐊᓖᑦ ᐊᒻᒪ ᐱᓕᕆᖃᖅᑕᕐᓂᕆᕙᑦᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ. ᐊᖏᕐᕋᕆᔭᐅᔪᓂ ᐅᐸᒃᓯᕙᖕᓃᑦ ᐃᓗᐊᖅᓴᐃᔭᖅᑐᕐᓗᓂ ᐱᓕᕆᐊᖑᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ ᑕᐃᒪᐃᓕᐅᕆᐊᖃᖅᐸᑕ.
ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:
ᑐᐊᕕᕐᓇᖅᑐᑐᐊᑦ ᑭᒍᑎᓕᕆᔨᒧᑦ ᐱᓕᕆᐊᖑᖃᑦᑕᕐᓂᐊᖅᐳᑦ ᓄᓇᕗᒻᒥ ᓄᓇᓕᓕᒫᓂᑦ ᐊᓯᐊᓂᒃ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᖃᐅᔨᒪᓕᕈᒪᓂᕐᒧᑦ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.
ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.
ᐳᓛᕆᐊᖅᑐᖃᖃᑦᑕᕈᓐᓇᔾᔮᙱᑦᑐᖅ ᐊᕗᖓᑲᓪᓚ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᐅᓂ ᓄᓇᕗᒻᒥ − ᑎᒥᒥᒍᑦ ᐃᓕᖅᑯᓯᖅᓱᙱᑦᑐᓄᑦ ᐃᓂᒋᔭᐅᔪᓂ ᐃᓐᓇᐃᓪᓗ ᐊᖏᕐᕋᕆᔭᖏᓐᓂ.
ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ
ᐱᔪᓐᓇᐅᑎᖃᖅᑐᓄᑦ ᐸᐃᕆᕝᕕᖕᓄᑦ
- ᒫᑦᓯ 17−ᒥᑦ ᐊᐃᕆᓕ 21, 2020−ᒧᑦ, ᓄᓇᕗᑦ ᒐᕙᒪᖓᒃᑯᖏᑦ ᐱᑎᑦᑎᓚᐅᖅᐳᑦ ᓚᐃᓴᓕᖕᓂᒃ ᐸᐃᕆᕝᕕᖕᓂᒃ $885,000−ᓂᒃ ᐊᑭᓕᐅᑕᐅᓇᔭᖅᑐᓂᒃ ᐊᖓᔪᖅᑳᑦ ᐊᑭᓕᕋᔭᖅᑕᖏᓐᓂᒃ. ᑕᒪᓐᓇ ]ᖕᓇᐅᔭᖃᖅᑎᑦᑎᓂᖅ ᐊᔪᖅᑎᑦᑎᙱᓚᖅ ᐃᓂᒋᔭᐅᔪᓂᒃ ᐊᑭᓖᙱᓐᓇᖃᑦᑕᕈᓐᓇᕐᓂᕐᒥᒃ ᐃᖅᑲᓇᐃᔭᖅᑎᓂᒃ, ᓅᑉᐸᓪᓕᐊᓂᖏᓐᓂ ᑮᓇᐅᔭᑎᒍᑦ ᐃᑲᔪᖅᑐᖅᑕᐅᓂᕐᒧᑦ ᐱᓕᕆᐊᖑᕙᒃᑐᓄᑦ ᒪᓂᒪᑎᑕᐅᔪᓄᑦ ᑲᓇᑕᐅᑉ ᒐᕙᒪᖓᓂᑦ, ᓲᕐᓗ ᐅᑯᐊ, ᑲᓇᑕᒥ ᑐᐊᕕᕐᓇᖅᑐᖅᑕᖃᖅᑎᓪᓗᒍ ᑭᐅᓯᓂᕐᒧᑦ ᐱᕚᓪᓕᕈᑕᐅᕙᒃᑐᑦ ᐊᒻᒪᓗ ᑲᓇᑕᒥᐅᓄᑦ ᐊᑭᓕᖅᓱᖅᑕᐅᕙᖕᓂᕐᒧᑦ ᐃᑲᔫᓯᐊᕐᓂᕐᒧᑦ ᐱᓕᕆᐊᖑᔪᒥ.
- ᑖᓐᓇ ᑲᓇᑕᒥᐅᓄᑦ ᐊᑭᓕᖅᓱᖅᑕᐅᕙᔭᖕᓂᕐᒧᑦ ᐃᑲᔫᓯᐊᕐᓂᕐᒧᑦ ᐱᓕᕆᐊᖑᔪᖅ 75% −ᖓᓂᒃ ᐃᖅᑲᓇᐃᔭᖅᑎᐅᑉ ᐊᑭᓕᖅᓱᖅᑕᐅᕙᖕᓂᖓᑕ ᐱᑎᑦᑎᕗᖅ, ᒫᓐᓇᓗ ᐅᖓᕙᕆᐊᖅᑎᑕᐅᓯᒪᓕᖅᖢᓂ ᔫᓂ ᐅᖓᑖᓄᑦ.
- ᐃᓕᓐᓂᐊᕐᓂᓕᕆᔨᒃᑯᑦ ᐱᑎᑦᑎᕗᑦ ᓚᐃᓴᓕᖕᓂᒃ ᐸᐃᕆᕕᖕᓂᒃ ᐃᒪᓐᓇᓂᒃ
- $4.2−ᓂᒃ ᐊᕐᕌᒍᑖᒫᑦ ᐊᐅᓚᓂᕐᒧᑦ ᑲᒪᒋᔭᖃᖅᐸᖕᓂᕐᒧᓪᓗ ᑮᓇᐅᔭᖁᑎᒋᔭᐅᔪᓂᒃ. ᑕᒪᓐᓇ ᑮᓇᐅᔭᖃᖅᑎᑦᑎᓂᖅ ᑲᔪᓰᓐᓇᕐᓂᐊᖅᐳᖅ ᑕᒪᒃᑯᐊ ᐃᓂᒋᔭᐅᕙᒃᑐᑦ ᒪᑐᔭᐅᓯᒪᑎᓪᓗᒋᑦ ᑕᐃᒪᐃᔾᔪᑎᖃᖅᖢᑎᒃ ᓄᕙᒡᔪᐊᕐᓇᖅ-19 ᓇᒧᙵᕈᓘᔭᖅᑐᒧᑦ.
- ᐃᓕᓐᓂᐊᕐᓂᓕᕆᔩᑦ ᐱᑎᑦᑎᖃᑦᑕᐃᓐᓇᖅᐳᑦ ᓚᐃᓴᖃᖅᑎᑦᑎᓂᕐᒥᒃ ᐸᐃᕆᕝᕕᖕᓄᑦ, ᐊᔪᕈᓐᓃᖅᓴᖅᑎᑦᑎᓂᕐᒧᑦ ᐃᖅᑲᓇᐃᔭᖅᑎᓂᒃ, ᓴᖅᑭᑎᑦᑎᓂᕐᒧᓪᓗ ᑐᓂᐅᖅᑲᐃᓂᕐᒧᓪᓗ ᐃᓕᓐᓂᐊᕐᓂᒧᑦ ᐊᑐᖅᑕᐅᖃᑦᑕᕐᓂᐊᖅᑐᓂᒃ
- ᓄᓇᕗᑦ ᒐᕙᒪᖓ ᐱᓕᕆᖃᑎᖃᐃᓐᓇᖅᐳᖅ ᑲᓇᑕᐅᑉ ᒐᕙᒪᖓᓂᒃ, ᓄᓇᕗ ᑐᙵᕕᒃᑯᓐᓂᒃ, ᐊᕕᒃᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐊᓯᖏᓐᓂᒡᓗ ᐱᖃᖃᑕᐅᔪᓂᒃ ᐃᑲᔪᖅᑐᐃᔪᒪᓪᓗᑎᒃ ᐸᐃᕆᕝᕕᖕᓂᒃ ᓄᕙᒡᔪᐊᕐᓇᖅ-19 ᓇᒧᙵᕈᓗᔭᖅᓯᒪᓂᖓᓂ.
ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐸᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.