ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅ 19-ᓕᒻᒥᒃ ᓄᓘᔮᑦ ᐅᔭᕋᕐᓂᐊᕐᕕᒻᒥ
ᐱᕙᓪᓕᐊᔪᑦ ᑐᓴᕋᑦᓴᑦ
ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅ 19-ᓕᒻᒥᒃ ᓄᓘᔮᑦ ᐅᔭᕋᕐᓂᐊᕐᕕᒻᒥ
ᐃᖃᓗᐃᑦ, ᓄᓇᕗᑦ (ᐊᒃᑐᐸ 21, 2020) – ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᓇᓗᓇᐃᖅᑕᐅᓯᒪᔪᖃᕐᓂᖓᓂᒃ ᓄᕙᔾᔪᐊᕐᓇᖅ 19-ᓕᒻᒥᒃ ᓄᓘᔮᓂ ᐅᔭᕋᕐᓂᐊᕐᕕᖓᓂ, ᐅᖓᓯᓐᓂᓕᒃ 176 ᑭᓚᒥᑕᑦ ᓂᒋᐊᑕ ᐱᖓᓐᓇᖓᓂ ᒥᑦᑎᒪᑕᓕᐅᑉ. ᑖᓐᓇ ᓇᓗᓇᐃᖅᑕᐅᓯᒪᔪᖅ ᖃᓄᐃᒍᑎᖃᙱᑦᑐᖅ ᐃᓄᑑᒋᐊᖃᖅᑎᑕᐅᓪᓗᓂᓗ.
ᑲᑎᔭᒥᓂᖏᓐᓂᒃ ᖃᐅᔨᓴᖅᐸᓪᓕᐊᓕᖅᑐᑦ ᐅᔭᕋᕐᓂᐊᕐᕕᒻᒥ ᐃᖅᑲᓇᐃᔭᖅᑎᖏᓐᓂᒃ ᒪᓕᑦᑐᐅᓪᓗᑎᒃ ᐅᔭᕋᕐᓂᐊᕐᕕᒻᒥ ᐊᑐᐊᒐᖏᑦ, ᓇᓗᓇᐃᖅᑕᐅᓯᒪᔪᓪᓗ ᑲᑎᔭᒥᓂᖏᑦ ᐃᓄᑑᒋᐊᖃᖅᑎᑕᐅᓕᖅᑐᑎᒃ. ᓇᓗᓇᐃᖅᑕᐅᓯᒪᔪᖃᙱᑦᑐᖅ ᐊᐃᑦᑐᕐᓗᐃᓐᓂᕐᒪᖔᑎᒃ ᓄᓘᔮᑦ ᐅᔭᕋᕐᓂᐊᕐᕕᖓᓂ. ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᖃᑎᒌᑦ ᐊᑐᐃᓐᓇᐅᔪᑦ ᐃᑲᔪᖅᓱᐃᒍᓐᓇᖅᑐᑎᒃ ᑭᐅᒍᓐᓇᖅᑐᓪᓗ, ᑕᐃᒪᐃᒋᐊᖃᑐᐊᕈᑎᒃ.
ᓄᓇᕗᒻᒥᐅᓂᒃ ᒫᓐᓇᐅᔪᖅ ᑕᐃᑲᓂ ᐃᖅᑲᓇᐃᔭᖅᑐᖃᙱᑦᑐᖅ ᓄᓘᔮᑦ ᐅᔭᕋᕐᓂᐊᕐᕕᒻᒥ,. ᐅᓗᕆᐊᓇᕈᑕᐅᓂᖓ ᓄᕙᔾᔪᐊᕐᓇᖅ 19 ᓯᐊᕐᒪᒍᓐᓇᕐᓂᖓᓄᑦ ᓄᓇᓕᑦᑎᓐᓄᑦ ᑖᒃᑯᓈᙵᑦ ᐊᑉᐸᓯᑦᑐᖅ.
ᒫᓐᓇᐅᔪᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓖᑦ ᓄᓇᕗᑦ ᒪᑐᐃᖅᐸᓪᓕᐊᓂᖓ ᐊᒻᒪᓗ ᐊᐅᓪᓚᖃᑦᑕᕐᕕᐅᒍᓐᓇᖅᑐᑦ ᑰᔾᔪᐊᕌᓗᒃ, ᒫᓂᑐᐸᒧᑦ ᓄᓇᑦᓯᐊᕐᒧᓪᓗ, ᐊᑦᑐᖅᑕᐅᓂᖃᔾᔮᙱᑦᑐᑦ.
ᖃᓄᐃᒍᑕᐅᒍᓐᓇᖅᑐᑦ ᓄᕙᔾᔪᐊᕐᓇᖅ 19-ᒧᑦ ᐃᓚᒋᔭᐅᓪᓗᑎᒃ ᐆᑎᕐᓇᕐᓂᖅ, ᖁᐃᖅᓱᖃᑦᑕᕐᓂᖅ ᐃᐱᓂᐊᖃᑦᑕᕐᓂᕐᓘᓐᓃᑦ. ᓴᐳᒻᒥᓯᒪᑦᓯᐊᕈᓐᓇᖅᑐᑦ ᐊᐃᑦᑐᕐᓗᐃᑦᑕᐃᓕᓂᕐᒧᑦ ᐊᐃᑦᑐᕐᓗᑦᑕᐅᒍᓐᓇᓂᕐᒧᓪᓘᓐᓃᑦ ᓄᕙᔾᔪᐊᕐᓇᕐᒥᒃ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖃᑦᑕᕐᓗᑎᒃ, ᐊᒡᒐᑎᑦ ᐅᐊᓴᖃᑦᑕᕐᓗᒋᑦ 20 ᓴᑲᓐᓯᓂᒃ, ᖁᐃᖅᓱᖃᑦᑕᕐᓗᑎᒃ ᑕᒋᐅᖃᑦᑕᕐᓗᑎᓪᓗ ᐊᐃᕐᒥᓄᑦ ᐊᖏᕐᕋᖅᓯᒪᖃᑦᑕᕐᓗᑎᓪᓗ ᑕᐃᒪᐃᒍᓐᓇᕐᓂᓕᒫᒥᓂ.
###
ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒋᐊᕐᕕᑦᓵᒃ:
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email