ᐊᐱᖅᑯᑏᑦ ᑭᐅᔾᔪᓰᓪᓗ ᑐᕌᖓᔪᑦ ᐃᖃᓗᐃᑦ ᐊᑦᓯᕕᖓᑕ ᐃᑯᐊᓪᓚᓂᖓᓄᑦ

ᐃᖃᓗᒻᒥᐅᑦ ᐊᐱᖅᑯᑎᑦᓴᖃᑐᐃᓐᓇᕆᐊᓖᑦ ᐊᑦᓯᕕᐅᑉ ᐃᑯᐊᓪᓚᓂᖓᓄᑦ ᖃᓄᐃᓕᐅᕆᐊᖃᕐᓂᕐᒧᓪᓗ ᐳᔪᐊᓗᒃ ᓄᓇᓕᒻᒨᓕᖅᑲᑦ. ᑖᒃᑯᐊ ᐃᑲᔫᑎᑦᓴᐅᔪᑦ ᐊᐱᖅᑯᑏᑦ ᑭᐅᔾᔪᓰᓪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᙶᖅᓯᒪᔪᑦ:

ᐊᐱᖅᑯᑎ: ᑭᓇ ᐃᓱᒫᓗᒋᐊᖃᖅᑲ ᐳᔪᐊᓗᒻᒥᒃ ᐊᑦᓯᕕᒻᒥᙶᖅᑐᒥᒃ?

ᑭᐅᔾᔪᓯ: ᐃᑯᐊᓪᓚᔫᑉ ᐳᔪᐊᓗᐊ ᐃᓛᓐᓂᒃᑯᑦ ᓄᓇᓕᒻᒨᖅᐸᓪᓕᐊᑐᐃᓐᓇᕆᐊᓕᒃ. ᐳᔪᐊᓗᒃ ᐊᖏᓂᖓ ᐱᔾᔪᑎᒋᓪᓗᒍ, ᐃᓄᐃᑦ ᐃᓚᖏᑦ ᐊᑦᑕᕐᓇᖅᑐᒦᓐᓂᖅᓴᐅᑐᐃᓐᓇᕆᐊᓖᑦ ᐊᓯᓐᓂ ᐋᓐᓂᐊᖅᑐᓕᕆᓂᖅ ᐱᔾᔪᑎᒋᓪᓗᒍ ᐳᔪᐊᓗᒻᒥᒃ. ᑖᒃᑯᐊ ᐃᓄᐃᑦ ᐃᓚᒋᔭᐅᔪᑦ ᐆᒻᒪᑎᕐᓗᑦᑐᑦ ᐅᕝᕙᓘᓐᓃᑦ ᐳᕙᓪᓗᑦᑐᑦ, ᐱᐊᕋᐃᑦ, ᓱᕈᓯᒫᑦ ᐊᒻᒪ ᐃᓐᓇᑐᖃᐃᑦ.

ᐊᐱᖅᑯᑎ: ᖃᓄᐃᓕᐅᕈᓐᓇᕋᒪ ᐳᔪᐊᓗᒻᒦᙱᓐᓂᖅᓴᐅᓂᐊᕋᒪ?

ᑭᐅᔾᔪᓯ: ᐃᓄᐃᑦ ᐊᑦᑐᖅᑕᐅᑐᐃᓐᓇᕆᐊᓖᑦ ᐳᔪᐊᓗᒻᒦᙱᓐᓂᖅᓴᐅᒍᓐᓇᖅᑐᑦ ᐃᓯᖅᓯᒪᓂᖅᓴᐅᓗᑎᑦ, ᐃᒐᓛᖏᓐᓂᒃ ᐹᖏᓐᓂᓪᓗ ᒪᑐᓯᒪᑎᑦᓯᓗᑎᑦ, ᓯᓚᒥᙶᖅᑐᕐᓗ ᐊᓂᕐᓂᖃᕐᓇᖅᑐᑦ ᑲᖏᐅᔪᑦ ᖃᒥᑕᐅᓯᒪᓗᑎᑦ. ᐊᓃᕆᐊᖃᕈᕕᑦ, ᓱᓕᕆᓗᐊᑦᑕᐃᓕᓗᑎᑦ ᑕᖃᓇᖅᑐᓂᒃ.

ᐊᐱᖅᑯᑎ: ᐳᔪᐊᓗᒃ ᑭᓱᖃᕐᖓᑦ ᐊᑦᓯᕕᐅᑉ ᐃᑯᐊᓪᓚᓂᖓᓂᙶᖅᑐᖅ?

ᑭᐅᔾᔪᓯ: ᐳᔪᐊᓗᒃ ᐃᓚᖃᖅᑐᖅ ᑲᑎᓯᒪᔪᓂᑦ ᐃᓚᐅᕈᑎᑦᓴᒐᓚᓐᓂ ᐊᒻᒪ ᒥᑭᔫᑎᓂᒃ ᓱᕈᖃᖅᑐᓂᑦ. ᖃᓄᐃᑦᑑᓂᖏᑦ ᖃᓄᑎᒋᓪᓗ ᓱᕈᖃᖅᑐᓂᑦ ᐳᔪᕐᒥᑦ ᐊᔾᔨᒌᖃᑦᑕᖏᑦᑐᖅ ᐱᔾᔪᑕᐅᓪᓗᓂ ᑭᓱ ᐃᑯᐊᓪᓚᒻᒪᖔᖅ ᐃᑯᐊᓪᓚᔫᓪᓗ ᐆᓐᓇᕐᓂᖓᓂ.

ᐊᐱᖅᑯᑎ: ᐋᓐᓂᐊᕐᓂᕐᒧᑦ ᖃᓄᐃᑦᑐᓂ ᓇᓗᓇᐃᒃᑯᑕᕐᓂ ᑕᑯᒋᐊᖃᖅᑯᖓ?

ᑭᐅᔾᔪᓯ: ᖃᐅᔨᓴᕐᓗᑎᑦ ᐊᓂᖅᑎᕆᓂᕐᒥᑦ ᐳᕙᖅᐸᓗᑦᑐᒥᒃ, ᐊᓂᕐᓂᑭᓐᓂᕐᒥᑦ, ᐊᑦᓱᕈᕐᓂᕐᒥᑦ ᐃᓗᐃᑦᑐᒥᑦ ᐊᓂᖅᑎᕆᓂᕐᒥᑦ, ᖁᖅᑲᕐᓂᕐᒥᑦ, ᐅᐃᔾᔭᙳᓂᕐᒥᓪᓗ. ᐳᔪᐊᓗᒃ ᐊᑲᐅᒍᓐᓃᑎᑦᓯᑐᐃᓐᓇᕆᐊᖃᕐᒥᔪᖅ ᐃᕝᕕᑦ ᐃᔨᖏᓐᓂᒃ, ᓱᕐᓘᓐᓂᒃ ᐊᒻᒪ ᐃᒡᒋᐊᕐᒥᑦ.

ᐊᐱᖅᑯᑎ: ᖃᓄᐃᓕᐅᕆᐊᖃᖅᑯᖓ ᐋᓐᓂᐊᕐᓂᕐᒧᑦ ᓇᓗᓇᐃᒃᑯᑎᖃᓕᕈᒪ, ᓲᕐᓗ ᐊᑦᓱᕈᕈᒪ ᐊᓂᖅᓵᖅᑐᕋᓱᐊᕐᓗᖓ ᖁᖅᑲᕐᓗᖓᓘᓐᓃᑦ, ᐳᔪᐊᓗᒃ ᐱᔪᑎᒋᓪᓗᒍ?

ᑭᐅᔾᔪᓯ: ᐊᑲᐅᑦᓯᐊᙱᒃᑯᕕᑦ ᐋᓐᓂᐊᕐᓂᕐᒨᖓᔪᐃᓪᓗ ᑲᒪᒋᒍᓐᓇᖏᒃᑯᕕᒋᑦ, ᐋᓐᓂᐊᕕᓕᐊᕐᓗᑎᑦ.

ᐊᐱᖅᑯᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᑐᓯᓂᐊᖅᑳ ᐃᓕᓐᓂᐊᕐᕕᓂ, ᐊᓪᓚᕝᕕᓂ ᐊᓯᖏᓐᓂᓪᓗ ᐃᓪᓗᐊᓗᓐᓂ ᐳᔪᐊᓗᒃ ᐱᔾᔪᑎᒋᓪᓗᒍ?

ᑭᐅᔾᔪᓯ: ᐃᓪᓗᐊᓗᐃᑦ ᐃᖅᑲᓇᐃᔭᕐᕕᐅᔪᑦ ᐃᓕᓐᓂᐊᕐᕖᓪᓗ ᒪᑐᔭᐅᔾᔮᕙᓪᓚᐃᙱᑦᑐᑦ ᐳᔪᐊᓗᒃ ᐱᔾᔪᑕᐅᓗᓂ. ᐃᓪᓗᐊᓗᖃᖅᑎᐅᔪᑦ ᐸᕐᓇᓯᒪᖁᔭᐅᔪᑦ ᑲᒪᒋᔭᖃᕐᓂᕐᒥᑦ ᓯᓚᒥᙶᖅᑐᒥᑦ ᑲᖏᖏᓐᓂ ᐊᓂᕐᓂᒧᑦ ᐳᔪᐊᓗᒃ ᐃᓯᖅᐸᓪᓕᐊᓗᐊᓐᓂᐊᖏᒻᒪᑦ ᓇᒻᒥᓂᕐᓗ ᐃᓱᒪᓕᐅᕆᒐᔭᖅᑐᑦ ᒪᑐᓯᓂᕐᒥᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᒪᖃᓯᐅᔾᔨᓕᕋᔭᖅᑐᑦ ᑕᐃᒪᐃᒋᐊᖃᕐᓂᖏᑦ ᒪᓕᑐᐃᓐᓇᕐᓗᒍ, ᑕᐃᒪᐃᒋᐊᖃᖅᑲᑕ.

ᐊᐱᖅᑯᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᓯᖏᓐᓂᒃ ᐱᓕᕆᕝᕕᐅᔪᓂᒃ ᐱᓕᕆᖃᑎᖃᖅᑳᑦ?

ᑭᐅᔾᔪᓯ: ᐱᓕᕆᕝᕕᐅᔪᖅ ᐱᓕᕆᖃᑎᖃᑦᓯᐊᖅᑐᑦ ᐊᕙᑎᓕᕆᔨᒃᑯᓐᓂ, ᓄᓇᓕᓐᓂ ᒐᕙᒪᒃᑯᓐᓂᓪᓗ ᐱᔨᑦᓯᕋᖅᑎᒃᑯᓐᓂ ᐊᓯᖏᓐᓂᓪᓗ ᐱᓕᕆᕝᕕᐅᔪᓂᒃ ᖃᐅᔨᓴᕐᓂᕐᒧᑦ ᖃᓄᐃᓕᖓᓂᕆᔭᖓᓂ ᐊᒻᒪ ᐃᑲᔪᖅᓱᓂᕐᒥᑦ ᓄᓇᓕᐸᐅᔭᒃᑯᓐᓂ ᑲᒪᒋᔭᖃᑦᓯᐊᕐᓂᕐᒥᑦ ᖃᓄᐃᓕᖓᕈᑕᐅᔪᒥᒃ ᐊᑲᐅᓂᖅᐹᒃᑯᑦ.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᑦᓴᖅ:

ᕌᓐ ᐅᐊᓯᖕᒃ

ᑐᓴᐅᒪᔪᓕᕆᔨᒻᒪᕆᒃ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

867-975-5710

rwassink@gov.nu.ca

Document(s):