Katujjiluta

Naunaijaqhimajavun tallimat amigarijaujun hivulliutijukhat pijaami nakuujunik pimmarigharutinik inuuhiinnun Nunavunmiunnun ukunani tikittukhani hitamani ukiuni iliurariami tunngavighat aallangajuni aallanguqtirutikhanik hivunikhani kingullikhaptingnun:

• Inirninguqtirniq ihumagittiaqtauluni Nunavunmi;
• Angiklihaqjuummirlugu iglukhaqarnikkut auladjutaa;
• Pipkainirnianik aanniaqtailinirnun mamiharnirnullu;
• Pilluaffaarumanirnik iliharnirnun; imaalu
• Angiklihaqtirnikkut nunallaaptikni piangaijautikhanik.

Ihumagijaujun kiudjutijakhavun atauttikkut piutiuqpiarhimajun, naliinnipidjutilgit ajurnaqtullu ihuarhaijaami.

Ilitarihimajugun hapkuat ihumagijaujun hulaqutihimmaaqpaktait Nunavunmiut amigaitpiaqtuni ukiuni. Hivulliit kavamagijaujun piniarhimavaktun hivumuudjutiniarhimaplugin tamainni hapkunani kavamakpullu hivumuutiniaqtaa hamna havaktauniq imaatun:

• Piluni akhuurluni ihuaqtuniklu hulidjutinik;
• Atuqpiarlugin uuktuqvikhat piliurnikkut aulahimmaaqtunik paannariingnirnik piniarhimadjutikhanun tadjami, takiluaqtumi hivitunirmilu;
• Ihivriurnirnik nutaanguqtirnirniklu tahamaniittunik parnaqutikhanik hivunikhaniklu pijaami turaangajunik havagutikhanik hivmuujaamilu qilamitqijaujumik hivulliutiujumajaptiknik;
• Akhuurlugin hulidjutit pidjutikhaqaqtun piqpiarnikkut inirutikhanik atauhiinaungittuni hivulilutiujumanirni; imaalu
• Pipkainikkut kavamatkunni havagvia ihuaqtumik-piliuqtauhimajuq, havaktikhaqaqtuq ikajuqtaujuqlu tunijaami hapkuninnga hivulliutiujumajaptiknik.

Hivumuuniq parnaqutikhananun inirutainnun tamainni hivulliutiujumajaptikni pidjutilik kiudjutiunikkut piqanginnirni uvani Nunavunmi Inuinnarni havaktikhani aulapkaidjutikhanilu. Pidjutilik piffaaqtirnikkut hakugikharnikkullu Inuinnauniptiknik. Hivulliutiniaqtavun:

• Inuit uqauhia pitquhialu hakugikhariami tunngavighavun mahulingairnirvullu;
• Iliharnirnik ajuirharnirniklu havaliami imigullu-pijaaliriami; imaalu
• Aallangajunik nappaqtirnikkut qanuriliurutikhanik angiklihariami ihuarutikhanik mikhilaaqtirnikkullu akiinnik auladjutikhanun ukununga naammaktunun nunallaanun uvanilu piangaijarnikkullu piliurnirnik.

Inirninguqtirniq ihumagittiaqtauluni Nunavunmi

Pidjutikharniaqtugun tunidjutikkut munaridjutikhanik inirningurliqtunun Nunavunmiunnun tamaatun ataattiavun angajuqqaavullu inuujaanginnik inuuhuirutimingnun munarittiarijaulutik, qanitqijaulutiklu ilagijamingnun nunaptikni.

Parnaqutini inirutikhat

• Pimmarigharniq ubluq tamaat inuuhiinni Nunavunmiunnun inirninguliqtunun
• Pimmarigharnirnik takijunik-hivituniqaqtunun munarinikkut igluqpainnun ikajuutiniklu ilikkuuqtaami inuuhirnirnik
• Ikitqijaujun Inuinnait Inirnikhat nuutiqhimajun nunallaamingnin
• Amigaiqjuummirlutik Inuinnait havakliqtun munaqtiuplutik Inirnikhanun
• Nakuutqijat ihumakkut aanniaqtailirnirnun, timikkut aanniaqtailinirnun, inuuhiriknirnullu taapkununga inirninguliqtunun
• Aulahimmaaqtunik paannariigutinik ukunani Inuit timiqutainni, nunallaani, ukunanilu manikhaliungittuni havagviinni pipkaijaami Nunavunmiunnik inirningurianginni ihumagittiaqtaulutik munarijaulutiklu

Hulidjutikhat hivumuujaami hapkununga iniqtaujumajunun
Taimailiurniaqtugun:

• Piliurluni angijumik Inirnikhanun angajukhiinnullu munarinikkut parnaqutikhamik atuqtipkailirnirmiklu hivunikhamik piqarluni amigaittunik uqautainnik Inirnikhanin, ilagiiktunin, nunallaanin, paannnarijaujunillu
• Amigarhuutigilugin nappaqtirniit avikturhimanirni takijumikhivituniqaqtuni munarinikkut igluqpakhat piqaqtun angummadjutikhanik ihariagijainnik Nunavunmiunnik pilgit ajurnavjaktunik munarijaunikkut ihagiagijaqaqtun
• Angikliharlugin imaalu/imaaluunniit nutaanguqtirlugin tahamaniittun munarinikkut igluqpait
• Tuniluni pitquhikkut-uqauhikkullu-ihuaqtuqukkut ajuirharnirnik havaktiinnun havaktun munarinikkut igluqpainni
• Pimmarigharlugin ikajurutin pimmarigharnikkut ubluq tamaat inuuhirnik munarinikkut igluqpainni
• Akhuurharlugin nunallaani-tunnganiqaqtun piniarhimadjutit tuninikkut Inirnikhanun/angajukhiinnun pinahuarutikhanik ikajurutikhaniklu ilikkuuqtaami ikajuqtaunikkulluunniit inuuhiridjutinun
• Pipkainikkut Inirnikhanik pinirnik amigaiqjuumirnirnun niqainnarnun

Hulidjutit atuqtaujariiliqtun:
Taimailiurniaqtugun:

• Iniqtiqlugin nutaanguqtirniit angmaqtiffaarlugulu una Iqalugni Inirnikhanun Najurvik (Iqaluit Elders Home) utiqtiffaariami Inirnikhanik;
• Nappaqtiqlugu upalungaijaqtaujuq takijumik-hivituniqaqtumik munarijauvik Kangiqlinirmi; imaalu
• Kajumikharlugu piliurniit pidjutikhaqakkut-nappaqtauhimajun iglukhat Inirnikhanun/angajukhiinnun.

Angiklihaqjuummirlugu iglukhaqarnikkut auladjutaa

Pidjutikharniaqtugun nutaani nappaqtirutikkut qanuriliurutikhani paannariigutikhaniklu angikliharjuummirnikkut pidjutikhait iglukhani qanuriliurutikhani hailihimajuni Nunavunmiunnun.

Parnaqutini inirutikhat

• Ikiklilaaqtirlugin aihivikhainnirniit
• Amigaiqtirjuummirlugin ilagiiktuni ningarnirmin qimaaviit, inulrammiit qimaaviit, ukuallu hivumuutikkut igluit
• Ikinikhaanun kikliqarniinni imaatun 1,000 iglukhat tamainni aallakkiingni ilajaujukhat piqarniinnun akituvallangittunun iglukhanun auladjutaanullu iglukhaqarnikkut qanuriliurutikhainnun
• Amigaiqjummirlutik Nunavunmiut akilqtuqhutik atuqtun iglunik niuviqtulluunnit nanminikhamingnik iglukhamingnik
• Amigaiqjuummiqtunik havaliqtunik Inuinnarnik nunallaani iglukhanik nappaqtirnirni ihuarhainirnilu
• Aulahimmaaqtunik paannariingnirnik ukunani Inuit timiqutainni, nanminirijaujuni havakviinni, ukunanilu aallakkiiktuni kavamagijaujuni angikliharniani iglukhaqarnikkut auladjutaani

Hulidjutikhat hivumuujaami hapkununga iniqtaujumajunun:
Taimailiurniaqtugun:

• Naunaijarlugin qanuriliurutikhat iglukhaqaqtirnikkut taapkununga igluqangittunun havaqatigilugin nunallaat paannarijaujullu uvani ilingaijarnikkut
• Pimmarigharlugu havaguti tuniurhainikkut inungnun igluqpakhanik Nunavunmiunnun
• Ihivriuqlugu pimmarigharlugulu tuninia Nunavut Kavamangani havaktiinnun iglukhainnik
• Hivulliuqtilugin hulijakhat akhuurhainikkut inuit nuutirnikkut Nunavut Kavamanganin havaktiinnun iglukhainnin inuit iglukhainninlu taapkununga akituvallangittunun akiliqtuipluni atuqtakhanun iglukhanulluunniit nanminirijakhainnun
• Pimmarighaqlugu pidjutikhaffaarlunilu igluni-nanminikhanun ikajuutikhani pinahuarutini
• Nutaanguqtirlugin ihuarhaiffaarlugilluunniit tahamaniittun igluqpait aturiami igluqpakhani aularaanginnarutaani
• Pilarluutiqaqtillugi havaktinniit Inuinnarnik havalirlutik iglukhani nappaqtinirni ihuarhainirniklu
• Hivulliutilugin havaktakhat kaantraatikkullu qanuriliurutikhat ilaupkaijun paannariiktunik, ikajuqpaktun nunalaani nanminirijaujunik havagvingnik, ilaupkaijuq nunallaani piangaijarnirnik, ihuarharlugillu qanuriliurutikhat kiunikkut nunallaani pittaarutainni ihariagijainnilu

Hulidjutit atuqtaujariiliqtun:
Taimailiurniaqtugun:

• Iliurarhimmaaluni piqarniinnik akituvallangittunik, amigaittuniinuqarnikkut iglukhanik piqarluni ikajurutaanik kavamatuqatkunni maniliqtuutikhakkut paannairiiktuni ikajuutikhakkut akiinnik pinikkut nunamik, pinnirharnikkut igluqpanik, nappaqtirnikkut igluqpanik; imaalu
• Angiklijuummiqtirlugin hananikkut ajuirharnirnik iliharnirnikklu ukunununga nunallaani iglunik nappaqtirnirnik ihuarhainirniklu.

Pipkainirnianik aanniaqtailinirnun mamiharnirnullu

Pidjutikharniaqtugun ajuirhainirnun nunallaminlu-hivulliuqtaujunun pinahuarutinun pipkaijaami amigaitqijaujunik nunallamin pitquhikkullu ihuaqtunik havagutikhat hailihimajun.

Parnaqutini inirutikhat

• Inuinnarnun-pidjutiqaqtunun ihumakkut aanniaqtainikkut pinahuarutinik havagutikhaniklu
• Amigaitqijaujunik Inuktut-uqaqtaaqtunik uqaudjiujunik
• Amigaitqijaujunik Inuinnarnik havakliqtunik tuninikkut munarhidjutikhanik, ihumakkut aanniaqtailidjutikhanik, ipirailairnikkullu pinahuarutinik havagutikhaniklu
• Nakuutqijaujunik aanniaqtailinikkut ihumakkullu aanniaqtailinikkut inirutikhanik hivunikhani
• Aularaanginnaqtunik paanniariigutinik ukunani Inuit timiqutainnik, maniliurniarhimangittuni havagviinni, aallanilu kavamagijaujuni pimmarigharnikkut aanniaqtailinikkut ihumakkullu aanniaqtailinikkut pinahuarutinik, havagutik inirutikhaniklu Nunavunmiunnun

Hulidjutikhat hivumuujaami hapkununga iniqtaujumajunun
Taimailiurniaqtugun:

• Ihivriuqluni atuqtipkailunilu aanniqtauhimaniikut-qaujihimanikkut havagutit aanniaqtailirnirni iliharnirnilu
• Akhuurhailuni ikajurlunilu pidjutikhanik naammangnirnun ihuuhiriknirnullu pidjutilgit Inuinnaunirni
• Angikliharlugin iliharnikkut ajuirharnikkullu pinahuarutit tunijun Nunavunmiunnun ukuninga ihariagijaujunik ajuirharhimajakhanik ajuittuni ajuirharhimajunilu havaktakhani aanniaqtailirnirni, ihumakkut aanniaqtailinirni, ukunanilu ipirailaiqhimajunilu mamiharutini
• Angikliharlugin uuktuqvikhat, ajuirharniit, ilitariqpiarutaillu Inuinnarnun tunijaami pitquhikkut-uqauhikkullu-pidjutiqaqtunik ihumakkut aanniaqtailinirnun ukunanilu inuuhirningnirmullu pinahuarutini havagutinilu
• Ilaupkarlugin ilitarilugillu amigaitqijaujun Inirnikhat aallallu nunallaamiutat imaatun uqaudjiulutik, nunallaani uqaudjiulutik Inuinnarnun, ukunanilu pinahuarutikhani haniqpani nunami
• Akhuurhailugin tunilugillu takijunik-hivituniaqtuqnik maniliqtuutikhanik angikliharlugillu nakuujun qanuriliurutikhat ukunani nunallaaminhivulliuqtaujunin pinahuarutinik havagutiniklu
• Havaqatigilugin nunallaat paannarijallu hivumukhijuummiqtirlugin ikaarniit talvani ihumakkut aanniaqtailinikkut havagutit hailihimajunik
• Pilluaffaarnirnik inminiirnikkut nutqaqtinnahuarnirnik ukunanilu kinguagun-nutqatinnahuarnirnik pinahuarutini paannarijaptikni, akhuurniqarluni taapkunani kiudjutini pilluarutini imaatun nutaranun nuliarnikkut pimmarlungniit, aanniaqtauhimanikkut, pikallaktarnikkut inuglugunikkullu
  • Aullaqtirjuummiqtirlugit aanniaqtailinikkut ihumakkullu aanniaqtailinikkut akhuurharutikkut pinahuarutit

Hulidjutit atuqtaujariiliqtun:
Taimailiurniaqtugun:

• Piliurnikkut takijumik-hivituniqaqtumik ihumakkut aanniaqtailinikkut ipirailairnikkullu parnaqutikhamik hiuvlliurutikhamik ikajurutikhamiklu ihuarhaqtauhimajunik atiqtupkailirutikkut uumani nutaami Ihumakkut Aanniaqtailinikkut Maligaqmi;
• Nappaqtirlugu upalungaijaqtauhimajuq anniqtauhimanikkut ipirailaiqhimanikkullu mamirharivikhaq Iqalungni havaqatigiplugu Nunavut Tunngavik Inc. (NTI) ukuallu kavamatuqatkunni maniliqtuutikkut paannarijait;
• Angiklihaqhimmaarlugu aturniit qaritaujakkuuqtuni uvani tiiviikkuuqtuni aanniaqtailinikkut munaridjutinik ukuallu tiiviikkuuqtuni ihumakkut aanniaqtailinikkut ikajurutit; ukuallu
• Atuqtipkailuni upalungaiqhimajun havakvingni inuuhiriknikkut pinahuarutit ikajuritkhallu ukununga Nunavut Kavamanga havaktiinnun.

Pilluaffaarumanirnik iliharnirnun

Pidjutikharniaqtugun ikajurutikhanik nutaqqat inulrammiillu ihariagijainnik hakugikharnikkut ingmingnun-ihumagidjutainnik, piliurnikkut nakuutqijaujunik pidjutiqatigiingnirnik, pinikkut iliharnirnik havalirnirniklu, piliurlunilu nakuuniqaqtunik hivunikhanik.

Parnaqutini inirutikhat

• •Hakugitqijaujunik nutaqqani tunngavighanik Inuinnaunikkut, mahulingainikkut, iliharnirnilu hivunikhani
• Qulvahitqijaujunik ilihariaqturnirnik iliharinirniklu iniqtirutinik
• Hakugitqijaujunik iliharnikkut inirutinik
• Pimmaritqijaujunik atadjutinik ukunani hailihimajunik havakhanik uvanilu iliharvigjuanina iliharutinik ajuirharnirniklu nunaptikni
• Qulvahitqijaujunik aktilaanginnk iliharvigjuanin iliharutinik havaakhanirniklu inirumik iliharutimingnik
• Aularaanginnaqtunik paanniariigutinik Inuit timiqutainnik, iliharnirni atanngujainni, aallanilu kavamagijaujuni akhuurhainikkut ikajurnikkullu ilihalihaaqtunik, iliharnikkut pinikkut, ukunanilu havaakhani pivallialiurnirni

Hulidjutikhat hivumuujaami hapkununga iniqtaujumajunun
Taimailiurniaqtugun:

• Pidjutikharniaqtugun nakuuqpiaqtuni, akituvallangittuni, qahaktuq, ilaupkaijuqlu nutarannuanun iliharniit nutaqqiqiviinilu pinahuarutin havagutillu ukunani kavamatuqatkunni maniliqtuutikkut paannnarijani
• Piliurluni nutaamik hivunikhamik piliurnikut aallanguqtirnikkullu Nunavutip nutarnnuanun nutaqqiniqkkullu havakviin, pilluarniqarluni Inuinnarni-pidjutikkut ilihaliharnirnun
• Tuniluni amigaitqijaujunik maniliqinikkut, titiraliqinikkut, ajuirharnikkut, Inuktullu iliharnikkut aturutikhanik ikajurnikkut iliharlirnirnun
• Aullaqtirluni ihuarhaqtauhimajumik pipkainirmik ubluq-tamaat kindergarten-ni pinahuarutinik
• Kajumikharlugu havangniit uvani K-12 Inuinnarnun uqauhikkut iliharutikhat ukuallu Nunavunmun-pidjutilgit ajuirharnikkut aturutikhat
• Atulirluni amigaiqjuummiqtunik inuuhikkut ajuiqhimajakhanik ukuninngalu havaakhakkut uqaudjinirnik uvunga K-12 iliharutinun pipkaijaami ilikkut-pijaalirutinik, inmingnik-ihumagittiarnirnik, ukuninngalu havalihaarnirni hivulliurutikhanik
• Pimmarigharlugin ikajurlugillu iliharvingni nirijakhanik pinahuarutinik ukunani nunallaani-tunnganiqaqtuni paannarijani
• Amigaiqjuummirlugin uuktuqvikhat ukunani hivuagun-havaliqtinnani havangnikkut atuqtakhat ukununga angajukhiinni iliharvingni uvanilu
  iliharvigjuani ilihaqtunun tamaat ukiumi
• Pimmarigharnikkut nakuuninganik ihuarninganiklu uumaani FANSmi aallanilu maniliqtuutikkut ikajurutinik ukununga iliharvigjuani ilihaqtunun
• Pimmarigharlugin ahikkuuqtun ikajurutikhat ukununga iliharvigjuani ilihaqtunun
• Piliurluni atuqtipkailunilu amigaittuni-ukiuqaqtunik ajuirharnikkut parnaqutikhamik ukununga Inuit timiqutiinni aallanilu paannarijani pipkaijaami piliurnirnik Nunavunmi havaktikhainnik piangaijarvianiklu
• Piliurluni atuqtipkailunilu parnaqutikhamik ukununga Inuinnarnun uqauhianun ajuirharnikhanun kavamatkunni havagviiini

Hulidjutit atuqtaujariiliqtun:
Taimailiurniaqtugun:

• Hakugikhaqhimmaalugu Inuktut uqauhia iliharniillu tamaani Nunavunmi havaqatigilugu Nunavut Tunngavik Inc. (NTI) ukuallu kavamatuqatkunni maniliqtuutikkut paannarijait;
• Atuqtipkailuni angiqliharlugillu piniarhimadjutit ajuirhainikkut, havaktikharhiurnikkut pihimanikkullu Inuinnarnik ilihaijinik piqarlutik amigaittunik aallakiingnik angummadjutigijaudjutinik;
• Atuqtihimaarluni pimmarigharutinik uvani ilihaqtuni-ilihaijini aktilaarutainni; imaalu
• Atuqtiluni aulahimmaaqtunik pimmarigharutinik ukunani nunallaani ilharvingni angikliharlugillu aturutain nunallaani pinahuarutinun.

Angiklihaqtirnikkut nunallaaptikni piangaijautikhanik

Pidjutikharniaqtugun aularaanginnaqtaaqtuni nunallaani piangaijarutikhanik taimaatun, ukunanilu iliharnirni, havalirnirniklu, tuniutiniaqtun amigaitqijanik havaakhanik pimmarighaqjuummirlugillu nunallaavun.

Parnaqutini inirutikhat

• Amigaiqjuummiqtun nunallaat ikajuqtaujun iqalukhiurnirnin, anguniarnirnin aquinikkullu havakviinnin
• Amigaiqjuummiqtun nunallaani havaakhat ukuallu mikijun nanminirijaujun havagviit
• Angiklijummirniit piliurnikkut hulidjutin Nunavunmi
• Angiklijuummirniit havaktipkainirni Inuinnarnik ujaraghiuvingni ukunanilu ujaraghiuvingni-pidjutiqaqtuni havagutini
• Angiklijuummirniiit maniliurniit hanaujaqtinun mirhuqtinullu
• Aulahimmaaqtunik paannariingnirnik ukunani Inuit timiqutainni, nanminirijaujuni havakviinni, ukunanilu aallakkiiktuni kavamagijaujuni piangaijarnikkut havaktikhanilu pivalliurnirni

Hulidjutikhat hivumuujaami hapkununga iniqtaujumajunun
Taimailiurniaqtugun:

• Nutaanguqtirlugin parnaqutikhakkut hivunikaht ukununga aularaanginnaqtuni piangaijarnikkut pivalliurliurnirnik angikliharnirniklu tamainni havagviinni
• Amigaijuummiqtirlugin ajuirharniit havaakhanun havagvingni imaatun ujaraghiuvingni, hanaujani mirhanullu, aquinikkut, mikijunilu nanminirijaujun havakviinni paannarilugin Inuit timiqutait ukuallu nanminiqaqtun havagviit
• Naunaijarlugin akhuurharlugillu uuktuqvikhat nutaanun nunallaani nanminirijaujuni havagviinni havagutinilu
• Ihivriuqlugu pittaarnianik aallangajuni igluqpinikkut qanuriliurutikhat atuqtaujukhat piliuqtaujukhallu Nunavunmi, akhuurniqarluni auladjutikkut-nakuuniqarnirnik imaalu hilamun-naammaktunik nappaqtirnirnik
• Utiqtiffaarlugin iqaluliqinikkun laisiit niuvirlunilu amigaqjuummiqtunik iqaluliqinikkun amigaitilaanginnun pijakhanik
• Pimmarigharlugin ikajurutikhat anguniaqtinun
• Piliurluni qautaujakkuuqtukkut niuvvaavikhamik Nunavunmi hanaujanun mirhanullu
• Ihivriuqnia pimmarigharnialu Nunavut Kavamangani iviqtihmanikkut pidjutainnik angummadjutijaami angiklijuummiqtiliqtuni pijumanirnik pinahuarutinik havagutiniklu naunaijariamilu uuktuqvikhanik hiamitiqjuummirutikhanun

Hulidjutit atuqtaujariiliqtun:
Taimailiurniaqtugun:

• Naunaijaqluni ikajurlunilu kiunikkut ihariagijaujunik ihariagijauqpiaqtunik auladjutikhanik ingilradjutikhaniklu tamajakhanik ukunani avikturhimanirni Inuit timiqutainni, kavamatuqatkut maniliqtuutikhakkut paannarijainni, tingmidjutinilu pipkaijaami ikajuriamilu piangaijarnikkut pivallialiurnirni tamainni havagviinni; imaalu
• Upalungaijaqhimmaarluni nanminirhuurnirmun munaridjutiini ukunani Kanadaup nunainni piqutainnilu.