Unniutinikkut Hivumuudjutiptingni
Havagutikhaqqut piliuqtaa hivulliurutikhaq ukununga hivulliutijaujukhani hulidjutikhani atuqtauniaqtun Nunavut Kavamanganin havagviinnin nunaptiknilu kuapuriisinginnin.
Una 6singa Katimania piliuqtaa kavamapta havaqutikhaa atauttikkut uvani aulahimmaaqtuq COVID-19 qalagjuarniq nunarjuami-hiamihimajuq pipkailirhuni naunarhidjutinik inungun, kavamanun, havagviinnun, ukunungalu tamajakhani ilaudjutikhanik nunarjuami. Pigaluaqtillugu naunaiqtun ublukhat, havagumajugun pijumaqpiaqtumik hivumullu-tautungniqaqtumik havaktakhanik. Upalungaiqhimajugullu aallanguqtiriami ihuarhaijaamilu kiudjutikkut ajurnavjaktukhanik tikinniarungnarhijunik.
Kavamapta havaqutaa naittuq hitamanik ukiuqaqtuq aturniarhungnarhijugullu ajurnavjaktukhanik auladjutimi. Uvagut, kihimi, ihumagugun Nunavunmiut takuniaqtait piqpiaqtun hivumuudjutit tamainni hivulliutijumajaptikni.
Havakviit nunaptiiknilu kuapuriisitkut naittumik naunaijaqtait aulapkaidjutimingnik hivulliutijumajamingnik ukuallu hivumuurniit ukunani ukiuq tamaat havangnikkut hivunikhani, taapkua hailihimajun Nunavunmiunnun uvani Kiinaujaliqinikkut Havagviani qaritaujakkuurutikkut-makpiraangani. Ukiuq tamaat unniudjutit pijumajaujullu ilijaujullu katimadjutimun Maligaliurvingmi ilanginnun aulapkaidjutini.
Pipailiqtugun ilaliutihimajunik qanuqtun unniudjutijaaqtun Nunavunmiunnun hulidjutini havakliqtaptikni hivumuudjutiptiknilu parnaqutikkut inirutainni niriuqtavun takujaami hivunikhani. Tunihimmaaqtilluta ilitturipkaidjutikhanik mighaagun aulapkainikkut hivulliutiujukhanik havagvingni hivunikhani ukiuq tamaallu unniudjutini, uqarniaqtavun kavamapta inirhimaijain imaatun nutaangutqijaujuni pijaaqtaaqtaujukkullu qanuqtun.
Unniutinikkut hivumuudjutiptingni, imailiurniaqtugun:
- Uqarlugin kitullu inirhimajun piniarhimadjutillu qilamik;
- Naunaijarlugin unniutilugillu nakuujuni naunaitkutini tautungnikkut piqpiarhimajunik inirutinik pigaangata tamaat ukiumi; imaatullu
- Iliuraqlugin katimadjutikhamun tunilugillu unniudjutit hivummuudjutiptiknun inirhimajaptikniklu uvani qitqani nungunninganilu uumani 6singani Katimadjutimi ublungani havaktillugu.
Quviagijaqqut una uuktuqvikhaq takunikkut takunnarutiptingnik Nunavunmiunnun maniliqtuutikkullu paannarijaptiknun aullaqtiliqhuta aullaarutikhaptiknik uvani aallangajumi aallanguqtirnirmi Nunavunmi.