GN-kut NEU-kullu havaqatigiiklutik ihuaqhijuumiqlugit havaktukhaqhiuqtut pihimajaangini aanniaqtailinirmun ajuittiaqhimajut
Iqaluit, Nunavut (Hikutirvia 10, 2023) –Nunavut Kavamangat (GN) ukuallu Nunavunmi Havaktiit Ikajuqtingit (NEU) qanganuaq sainiqtaat Angiqatigiingnirmut Nalunaitkutingit (MOU) ilitarijauhimajunik aanniaqtailinikkut ajuiqhattiaqhimajut aviktuqhimajumi.
Angiqatigiingnirmut pipkainiaqtut GNkut Havagviinun Aanniaqtailinirmun ihuaqhijuumiriangani pijaarnirit qanuriniit aanniaqtailinirmun hapkununga Nunavummiut imaa tunihilutik piumanirmun anginirhakkut ajuittiaqhimajut aghut havajuktullu munaqhit ajuittiaqhimajut Nunavunmun.
“Nunavummiut nihariagijaqaqtut pijaujughallu ihuaqtunik uvalu ajuittiaqhimajunik munaqhitkuni havaktuni. Hapkua aktilaangit ikajuutaujut qilamik pijaangnirmun munaridjutinun, nakuutqiamik aanniaqtailinirmun qanuriniit, aanniaqtailinirmun-auladjutit akiit ihuangnirit, aanniaqtununlu nakuudjutait," uqaqtuq Minista Aanniaqtailinirmun John Main. "Tamna atiliurniq uminga angirutikharnik naunairutiqaqtuq hakugiktumik havagviingit havaqatigiikharnik talvuuna munarhiliqidjutikharnik havaktunik pidjutikharnik Nunavunmi. Qujagijatka Havagviat Aanniaqtailinikkut, Havagviat Havaktuliqijitkut, ukuallu NEU-kut havakpaktainik uumani uuktuutikhami."
Pijumalikhautit MOU-mi ilaqaqtut ukuniga:
- Ikaarnikkut akiliuhiaghat tapkua hivuliujait ajungnaqtut-havaktughaqhiunirmun havaaghat nunallaat atuqtut havaktiiliunirmik.
- Pijumalikhautit ihuaqhijuumiqlugit havaktit atuqtilugu anginiqhakkut-pihimajut ikaangniit.
- Havaktikhaqhiurniq pihimanikkullu akiliuhiarutait ilitarihimajait amigaittuni ukiuni kivgaqtungnirmun.
- Maniktigut Ikajuutit Nunavunmi Ilihaqtunun atukkiutit ihumagijungnaiqlugit imaa 20%-mut.
- Utiffaarninnga havakvikmi uuktulihaaqtaq pinahuarut tunijuq ilihaidjutikhamut manik utiqtiffaarniq himmautinga ubluq tamaat ikajuutikhamik nunavunmi.
"Aanniaqtailinikkut havaktiit ikitpallaangittun ihariagijauqpiaqtun aktilaangin hivitujun ahinin Nunavunmi," uqaqtuq Minista Havaktuliqijikkut Margaret Nakashuk. "Hamna Havagviat Havaktuliqijitkut imaalu Aanniaqtailinikkut amigaigjuumijut ajuqhautaujunut nutaanik ihuaqhautikhainnik imaalu pijumalirutikhainnik pijumaplutik pihimalugillu ajuittiagiiktangittut havaktit. Havagutivut piangaijarnikkut aanniaqtailinikkut havakviinni pidjutiujuq uumani angirutimi."
"Tautuktavut una MOU ihuaqtumik atuqtakharnik ilituqhaijjaangat munarhiliqidjutikharnik ajungnautiqaqtunik ajuqhautaujut Nunavunmi," uqallaktuq NEU Angijuqaak Jason Rochon. "Munaqhivut ilaujut akhuuqtut ajuittiaqhimajut kitut talvaniinginaqtut kivgaqtuqlugit Nunavunmiut. Una kangiqhidjutikhaq ikajuutauniaqtuq pijaangini tapkua ihuaqtut havaktughaqhiuqtut uvalu pihimanikkut unguvaqtiqlugit ilangit akhuurutit tadjamin aanniaqtailinikkut havaktut uvalu ihuaqhijuumiqlugit pijaangnirit aanniaqtailinikkut tamaini Nunavunmi."
Tamna angirutikhaq aulaniaqtuq talvuuna Niqiliqivik 1, 2025mun.