Havaktuliqijitkut

Havakviuyuq Havaktuliqiyinit ihumakhaqhiuqtiluaq Kavamanut Nunavumi (GN) tamaini havaktuliqinikut pijutauyunik. Tamna havakvinga naunaiqtaa ihuaqtuq havaktuliriyiitkunnit pivallianiq tikinnahuarutingit, tikinnahuarutingit hivulliutiyakhangillu kavamatkut piyait. Tamna havakvinga qitqani timiqutigiyauyuq havaktuq tunngavingani ikayuqtuq tamaita aadlat havakvingit kavamatkunnilu timiqutigiyangit GN-kunni.

Atuqniqaqtut ilaunigit Havakviuyumi Havaktuliqiyinit uqautauyut Kavamani Havaktut Maligaqyuagani (PSA). Una Maligaq havaktitiniaqtuq Ministamun Havaktuliqiyitkuni kitunun hakugingniitigut uvalu munatingniqnun.

Havakviuyuq hivuliqhuqtuq pipkaiyaagani maliruakhamik turaaqvikhamiklu pivalianiganik havaktuliqinikut atulirumayainik GN-kuni. Naunaitun havagvingit munagidjutikhangit ilauyut:

• Hivuliqhuqlugit pivalliadjutit kavamatkut-tamainun Inuinnarnik havaktitinirmun pinahuarutit, ikayuqhugit kavamatkut piyaangini piyakhatik ataani Titiraqhimayumi 23 haffumani Nunavunmi Nunataarutaanut Angirutaa.
• Tunihimaaqtukhaq hivuliqtikharnik pivalliadjutikharnik auladjutikharnik ihuaqtumik kiudjutikharniklu havaktuliqiyitkut atugakhangit, havaaqhangit, atuqtakharnik ikayuutikharniklu.
• Havaklugit uvalu pihimalugit atuguminaqtut uvalu kiudjutiqaqtut havaktuliqiyit maliguagahait hapkununga Kavamatkunun Nunavunmi, aghuurutigiblugit Inuit havaktut.
• Nutaanguqtirlugu, pihimaluni, havaklugit uvalu titiraqhugit Kavamatkut Nunavunmi Havaktuliqiyit Atugahait.
• Ihuaqhiyuumiqlugit Inuit kivgaqtuqtut kavamatkuni imaa ikayuqhugit havagviit uvalu kavamatkut timiit pivallianirmun atulirniranunlu inmi Inuinnarnik Havaktitinirmun upalungaiyautit.
• Tunihimaaqtukhaq hivuliqtikharnik hanaqidjutikharnik havaktukhahiurnikkut, talvuuna hanaqidjutikharnik taima angikliyumiqtitivakhimayut Inuit havaktukharnik.
• Tunihimaarniq ihuaqtunik ayuiqhautikharnik pidjutikharnik ayuiqhautikharniklu ilihairutikharnik taima ihuaryumiqtitiniaqtun ayuittiarutikharnik, ilihimayainik havagiaqaqtainiklu nunalaani havaktunik.
• Tunihimaaqtukhaq hivuliqtikharnik tutqikhaidjutikharnik ayuiqhautikharnik pivalliadjutikharnik hulilukaarutikharnik talvani avikturvingmi nunalaani qullirutiqaqtunik.
• Aghuurutigilugit uvalu pihimalugit malikhautit haffumunga Hivulliulluaqtukhat Havaaktikhaqhiuqtut Maliguagahat.
• Munariblugit ihuangnikkut uvalu tautuknaqtumik havaktukhaqhiuqtut uvalu havaktukhaqhiuqnikkut havauhiit.
• Tunihimaarniq ihuaqtunik ikaaknikharnik uqaudjiukharnik ikayuutikharniklu kavamanmi havakvingnun tamainun havaktukhahiuqtunik havaktukharniklu ihumagiyauyunik.
• Tunihimaaqtukhaq hivuliqtikharnik malikhautikharnik auladjutikharnik Inuit pinnagiyainik titiqiqidjutiliqinikkut havagvingmi inuuhirinikkut ilihairutikharnik.
• Havaklugit havaktut havaqatigiingnikkut havauhiit tapkua ikayuutauyut uvalu havakhutik mikhaanun ihuaqhiyuumiqlugit Inuit kivgaqtuqtut kavamatkuni.
• Tunihiluni qilamik uvalu ihuaqtumik havaatigut naunaiyautinik kivgaqtuutinik ikayuutikhat havaktukhaqhiuqnikkut tamainun kavamatkuni havakviini, uvalu kavamatkut timiqutait.