Anniem Unipkaanga

Tamna atauhiuyuq uingairvigivakhimayaga ilihaqtilunga Puqtunirmi 11mi. Talvuuna, hivuliqpaarmik qimaktauliqtilunga angutaunmin, hivuliqpaarmik atungalihaaliqtaga in'ngummaniq. Talvuuna qaffiuyunaqut tatqikhiutit ihumaga qauhimangitutun ilivaliqtunga. Itqaumahuiqhungalu ilauqatigiyaangat ilannatka, itqaumangitunlu ulapqiyaangat ulapqidjutingnik. Talvuuna ubluq tamaat mihingnautiqaluangitunga. Ayuqhaqpakhimayunga qauhimaligama, taima talvuuna qaffiunik tatqikhiutit atugiikhimaligamik. Iningniit iliharviani uqaudjiukharnik pivakhimayunga ayukhalihaaliqtilunga. Ikayuktikhailiuligaangama qaitquinginaqtuq uqarvigiyaangat. Qaffiuyut ukiungit qangiutiut, uqarvigivakhimayatka allat uqaqtiuliqiyiit. Ilihaliarpaalirvilialigama naunairutiqaliqhimayunga In'ngummanirmik aanniarutiqaliqtunga Ihumaalungnirmik Ayuingnautiqaliqhunga hivulirpaarmiklu havautituliqtunga ihumalungnirmik.

Qangangurman ayungnautiqahuiqtaga apigiyaangat ikayuktikhamik pigiaqalikhunga. Amihunik ublurnik irhiuqpaktunga uqallagiangat, talvanganin ayungnairutiliqtaga irhiugungnaiqhunga. Namagiliqataga taima uqallagiangani talvuuna. Hivuliuyut uqarvigiyaangat ihumatimnun ayungnautigivakhimayaga. Piqagianganik amaamangminin ikayuutikharnik uqallaktangitlu qinigiangnaik ayuittiagiikhimayunik ikayuktukharnik pidjutigiiniaqtuq uvamnun, ikayuutigivakhimayuq iqhiurnaitukharnik qinigiakhiyaangat ikayuutikharnik.

Hadja, namakyumiliqtunga. Ilaani qakungugaangat namainaliqpaktunga qaffinuanik tatqikhiutingnik talvanga ayungnautiginaliqpaktunga. Una itqaumadjutikhaq qiniqhimaaqpakhimayunga uqautiukharnik uvamnun ikayuutikharnik. Piqaliqtunga quviahuutikharnik aulaniaqtunik hivunirmi nuutaami ukiumi quviahuktungalu uqaqtiuyaangat talvuuna ihumaliqinikkut inuuhirittiarutikharniklu Inuinarnik.

Ihumayunga taima ayungnautiqaqhimaanginaqtunik piqaqtun ihumaliqinikkut talvuunaluaq inulramiinun angutingnunlu inuuhirinikkut. Iningniluat piqaluaqtun ayungnautiqaqhimaanginaqtunik. Taima angikliliqhunga, tautukpakhimayunga ilangi ilitugiluaqhimangitun ihumarlungniga uqallakpakhimayut ihumanminiituq avaliituq. Una uingairutigivakhimayaga ayungnautiqarniq aulayuituq. Allatqingutiqaqtuq talvanga iningnit ilihaqtilunga hadjaminun. Ihumaliqiyit inuuhirittiarnikkutlu uqaqtauvakhimayugaluaq, kihimi uqaqtiqayuittuq huli. Naunaipkaktitiyiutugut taima iningniit ilihaqtilunga kihimi taimailiuliqtun uvani kingulirmi ukium. Una pivakhimayuq anginirmik ilitugidjutikharnik taima inulramiit aulatitivakhimagamik. Taima tamaigamik ilihaqatigiyaingit piliqhutiklu hanaqidjutikhaq naunaipkaktitiyaangat, anginirmik akhurutiqaqtuq. Ihumayunga namaktumik aulaliqtun uqaqtiuyaangat ihumaliqinikkut ilihairutikharnik. Inuit kituliqaak ihumaliuliqtun nuutaanik qanuriliurutikharnik ikayugiangani inmikkut allanunlu inuuqatigiyaingit.

Amigakhuqtailidjavutit ilikkut ayungnautigiluaqtailutin ilingnun. Uqaqqatigivaklugit angajuqqaanun, ilagijarnik, ilanarijatinunluuniit. Taima aulagiaqaguvit ayungnautikhaiguvitlu, uqarvigilugit uqaqtiuyunun! Hivulirpaarmik hivunikhaliurlutin qangiutiyaangat ayungnautigiyan taima angmaqtiginikkut allanun ikayuutiginiaqtuq uqaqhimaaguvit inungnun qanuqtun ayungnautiqaliqtutin hivunikharnik. Itqaumalutin inuuhirittiarutikhatin havautit iiqataqlugit!

Ilvitluuniit inukluuniit ajuqhalirumi, ikajuqtikharnik apiqhidjavutit. Una pittaaqtuq ilagiiqataujumun, ilannamun, unaluuniin ihumaliqijinin ikajuutikhaq munaqhiqarvingmin aanniarvingmiluuniin.

Uqaqqaqtigilugu ukpigiyainnik: ilangnut, inirnikhaq, ilananimunluuniin.