ᐃᓕᓐᓂᐊᖅᑎᑦ ᑎᑎᖅᑲᖁᑎᖏᑦ
ᑎᑎᕋᕆᐊᓕᑦ:
ᐃᓕᓐᓂᐊᕈᑏᑦ ᑎᑎᖅᑲᖁᑎᖏᓐᓂᑦ ᑐᒃᓯᕋᐅᑎᑎᑎᕋᖅᓯᒪᔪᒥᑦ ᑐᒃᓯᕋᕐᓂᖅ ᐃᓕᓴᕆᔭᐅᓯᒪᔪᒥᑦ ᐃᓕᓐᓂᐊᖅᑎᑦ ᑎᑎᕋᖅᓯᒪᔪᖁᑎᖓᓂ – ᐊᖓᔪᖅᑳᕆᔭᐅᔪᒥᑦ, ᐃᓕᓐᓂᐊᖅᑎᒥᑦ ᐅᕝᕙᓘᓐᓃᑦ ᐃᓕᓐᓂᐊᕐᕕᖕᓂ.
SIS - Request for Correction of Student Information (Student Records) IUᐃᓕᓐᓂᐊᖅᑎᐅᑉ ᐊᑎᓪᓚᑦᑖᖓᓂᒃ ᐊᒻᒪ/ᐅᕝᕙᓘᓐᓃᑦ ᐃᓅᕕᖓᑕ ᐅᓪᓗᖓᓂ ᑕᒻᒪᖅᓯᒪᔪᒥᑦ ᐋᖅᑭᒋᐊᖅᓯᖁᔨᓂᖅ ᐃᓕᓐᓂᐊᖅᑎᑦ ᒥᒃᓵᓄᑦ ᑎᑎᕋᖅᓯᒪᔪᖁᑎᖏᓐᓂᒃ
ᑐᓴᕐᕕᒋᔭᐅᔪᓐᓇᖅᑐᑦ:
ᑎᑎᖅᑭᕆᔨ, ᐃᓕᓐᓂᐊᖅᑎᑦ ᑎᑎᖅᑲᖁᑎᖏᓐᓂᒃ
ᑎᑎᖅᑲᒃᑯᕕᐊ 609
ᐸᖕᓂᖅᑑᖅ, ᓄᓇᕗᑦ
X0A 0R0
ᐅᖄᓚᐅᑎ: (867) 473-2612
ᓱᒃᑲᔪᒃᑯᑦ: (867) 473-2695
@email
ᐃᓕᓐᓂᐊᖅᑎᑦ ᑎᑎᖅᑲᖁᑎᖏᓐᓂᒃ ᑲᑎᑦᑎᔭᕆᐊᖃᖅᑎᑕᐅᖃᑦᑕᖅᐳᑦ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᕐᒥ (2020). ᑲᑎᑦᑎᔾᔪᑎᖃᖅᐳᑦ ᑲᔪᓯᑎᑦᑎᔪᒪᓪᓗᑎᒃ ᒫᓐᓇᓕᓴᕐᓂᒃ ᑐᑭᓯᒋᐊᕈᑎᒃᓴᓂᒃ ᐃᓕᓐᓂᐊᖅᑎᐅᓚᐅᖅᓯᒪᔪᓂᒃ ᐊᒻᒪ ᐅᓪᓗᒥ ᐃᓕᓐᓂᐊᖅᑎᐅᔪᓂᒃ ᐃᓕᓴᐃᔨᑦ ᐃᑲᔪᕈᒪᓪᓗᒋᑦ ᐃᓕᓐᓂᐊᕐᕕᖕᓂ ᐊᐅᓚᑦᑎᑎᓪᓗᒋᑦ ᐊᒻᒪᓗᑦᑕᐅᖅ ᓴᖅᑭᑦᑎᓗᑎᒃ ᐊᑐᕆᐊᓕᖕᓂᒃ ᐅᓂᒃᑳᓂᒃ. ᐅᑯᐊ ᖃᕆᓴᐅᔭᒃᑯᑦ ᑲᑎᑦᑎᕙᓪᓕᐊᖃᑦᑕᖅᐳᑦ ᐃᓕᓐᓂᐊᖅᑎᑦ ᖃᓄᐃᓕᖓᓂᖏᑦ, ᐱᐊᓂᒃᓯᒪᔭᖏᑦ ᐊᒻᒪ ᐃᓕᓐᓂᐊᕆᐊᖃᑦᑕᕐᓂᖏᑦ. ᐃᓕᓐᓂᐊᖅᑎᐅᔪᓐᓇᖅᑎᑕᐅᔪᑦ ᑎᑎᕋᖅᓯᒪᔪᖁᑎᖏᑦ ᐊᐱᖅᑯᑕᐅᔪᓐᓇᖅᐳᑦ ᐃᓕᓐᓂᐊᕐᕕᖕᓂ, ᐃᓕᓐᓂᐊᖅᑎᓂᒃ ᐅᕝᕙᓘᓐᓃᑦ ᐊᖓᔪᖅᑳᖏᓐᓂᒃ ᐊᒻᒪ ᑕᑯᔭᐅᔪᓐᓇᕆᓪᓗᑎᒃ ᐃᓕᓐᓂᐊᖅᑎᑦ ᑎᑎᖅᑲᑯᑎᖏᑕ ᑎᑎᕋᕐᕕᖓᓂ ᖃᕆᓴᐅᔭᒃᑯᑦ ᑐᖅᑲᖅᑕᕐᕕᖓᒍᑦ ᑕᐃᔭᐅᓪᓗᓂ ᐃᓕᓐᓂᐊᖅᑎᑦ ᒥᒃᓵᓄᑦ ᑐᑭᓯᒋᐊᕐᕕᒃ ᖃᕆᓴᐅᔭᒃᑯᑦ. ᓇᓗᓇᐃᖅᓯᔾᔪᑎᑦ ᑎᑎᕋᖅᓯᒪᔪᑦ ᐊᒻᒪ ᐃᓕᓴᕆᔭᐅᓯᒪᙱᑦᑐᑦ ᐃᓕᓐᓂᐊᖅᑎᑦ ᑎᑎᕋᖅᓯᒪᔪᖁᑎᖏᑦ ᐃᓕᓐᓂᐊᕐᕕᖕᓂ ᓴᖅᑭᑕᐅᔪᓐᓇᖅᖢᑎᒃ.
ᐃᓕᓐᓂᐊᖅᑎᑦ ᒥᒃᓵᓄᑦ ᑐᑭᓯᒋᐊᕐᕕᖕᒥ ᖃᕆᓴᐅᔭᒃᑯᑦ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐊᐅᓚᑦᑎᔨᓄᑦ ᑐᓴᖅᑎᑦᑎᕙᓪᓕᐊᓕᓚᐅᖅᐳᑦ 2012-13-ᒥ ᐃᓪᓕᐊᕐᓇᐅᑎᓪᓗᒍ. ᖃᕆᓴᐅᔭᒃᑯᑦ ᑐᑭᓯᒋᐊᕐᕕᖕᒥ ᓴᖅᑭᑎᑦᑎᔪᒪᓕᓚᐅᖅᐳᑦ ᑲᑎᑦᑎᔪᒪᓪᓗᑎᒃ ᑕᒻᒪᖅᓯᒪᙱᑦᑐᓂᒃ ᑎᑎᕋᖅᓯᒪᔪᓂᒃ ᐃᓕᓐᓂᐊᖅᑎᑦ ᐃᓕᓐᓂᐊᕆᐊᖃᑦᑕᕐᓂᖏᑕ ᒥᒃᓵᓄᑦ ᐊᒻᒪ ᐱᐊᓂᒃᐸᓪᓕᐊᔭᖏᓐᓂᒃ ᐃᓕᓐᓂᐊᓕᓵᖅᑐᓂᑦ ᐱᒋᐊᖅᖢᓂ ᐊᔪᙱᓐᓂᓕᖕᓄᑦ 12-ᒧᑦ ᑎᑭᖦᖢᒍ. ᖃᕆᓴᐅᔭᒃᑯᑦ ᑐᖅᑲᖅᑕᕐᕕᒃ ᐃᓕᓐᓂᐊᕐᕕᐅᑉ ᐃᖅᑲᓇᐃᔭᖅᑎᖏᓐᓂᒃ ᖃᐅᔨᓴᖅᐸᓪᓕᐊᔾᔪᑕᐅᔪᓐᓇᖅᐳᖅ ᐊᒻᒪ ᐅᖃᐅᓯᖃᕈᓐᓇᕐᓗᑎᒃ ᐃᓕᓐᓂᐊᕆᐊᕐᓂᕆᕙᒃᑕᖏᓐᓂᒃ ᐊᒻᒪ ᐱᐊᓂᒃᓯᒪᔭᖏᓐᓂᒃ ᓄᓇᓕᖕᓂ ᐊᒻᒪ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᖃᐅᔨᓴᖁᓪᓗᒋᑦ ᐅᖃᐅᓯᖃᕈᓐᓇᕐᓗᑎᒡᓗ ᓄᓇᕘᓕᒫᒥ ᖃᕆᓴᐅᔭᒃᑯᑦ ᑐᖅᑯᖅᑐᐃᕕᖕᒥ ᓲᕐᓗ ᐃᓕᓐᓂᐊᕆᐊᖃᑦᑕᕐᓂᖏᑦ ᐊᒻᒪ ᐃᓕᓐᓂᐊᖅᑎᓕᒫᑦ ᐱᐊᓂᒃᑕᖏᑦ ᐸᕐᓇᐃᓂᕐᒧᑦ ᐊᒻᒪ ᐊᑐᓕᖅᑎᑦᑎᓂᕐᒧᑦ ᑐᕌᖓᔪᓂᒃ ᐊᑑᑎᖃᕐᓂᖅᓴᒥᒃ ᐱᕙᓪᓕᐊᔾᔪᑕᐅᒃᑲᓐᓂᕈᓐᓇᖅᑐᑦ ᐱᓕᕆᐊᒃᓴᑦ ᐃᓕᓴᐃᔨᓄᑦ ᐃᑲᔪᕈᒪᓪᓗᒋᑦ ᐱᐅᓯᒋᐊᖅᑎᓪᓗᒋᓪᓗ ᐃᓕᓴᐃᔾᔪᑕᐅᔪᑦ, ᖃᐅᔨᓴᕐᓂᖅ ᐊᒻᒪ ᖃᐅᔨᓴᕈᓰᑦ. SIS ᐱᓕᕆᖃᑎᒌᒃ ᐱᓕᒻᒪᒃᓴᖅᑎᑦᑎᕙᒃᐳᑦ ᐊᒻᒪ ᓄᑖᙳᖅᐸᓪᓕᐊᔪᓂᒃ ᐃᑲᔪᖅᑐᐃᕙᒃᖢᑎᒃ ᐃᓕᓐᓂᐊᕐᕕᐅᑉ ᐃᖅᑲᓇᐃᔭᖅᑎᖏᓐᓄᑦ ᖃᕆᓴᐅᔭᒃᑰᕈᑎᑦ ᐊᐅᓚᑦᔪᑎᖏᓐᓂᒃ ᐋᖅᑭᐅᒪᐃᓐᓇᕈᑎᖏᓐᓂᓪᓗ.
ᑭᓲᕙ ᐃᓕᓴᕆᔭᐅᓯᒪᔪᖅ ᐃᓕᓐᓂᐊᖅᑎᑦ ᑎᑎᕋᖅᓯᒪᔪᖁᑎᖏᑦ?
ᐃᓕᓴᕆᔭᐅᓯᒪᔪᖅ ᐃᓕᓐᓂᐊᖅᑎᑦ ᑎᑎᕋᖅᓯᒪᔪᖁᑎᖏᑦ ᐃᓕᓴᕆᔭᐅᓯᒪᓪᓗᓂ ᑎᑎᖅᑲᐅᕗᖅ ᐊᖏᕈᑕᐅᓯᒪᔪᓕᒫᓂᒃ ᑎᑎᕋᖅᓯᒪᓪᓗᓂ ᐃᓕᓐᓂᐊᒐᒃᓴᓂᒃ ᐃᓕᓐᓂᐊᖅᑎᐅᑉ ᐊᑎᓕᐅᖅᑕᐅᕝᕕᒋᓯᒪᔭᖏᓐᓂᒃ ᐃᓕᓐᓂᐊᖅᑎᐅᓪᓗ ᓇᓗᓇᐃᒃᑯᑕᖅᑖᕆᓚᐅᖅᑕᖏᑦ ᑎᑎᕋᖅᓯᒪᒋᓪᓗᑎᒃ, ᐊᒻᒪ ᐃᓕᓴᕆᔭᐅᔾᔪᑎᒥᓄᑦ ᐱᕙᓪᓕᐊᔾᔪᑎᒋᔭᖏᑦ. ᐃᓕᓐᓂᐊᒐᒃᓴᖅ ᐊᑕᐅᓯᐊᙱᓪᓗᓂ ᐃᓕᓐᓂᐊᖅᑕᐅᓯᒪᒃᐸᑦ, ᓇᓗᓇᐃᒃᑯᑕᖅ ᖁᑦᑎᓛᖑᔪᖅ ᓴᖅᑭᑎᑕᐅᓂᐊᖅᐳᖅ. ᓇᓕᐊᖕᓂᑐᐃᓐᓇᖅ ᐃᓕᓐᓂᐊᖅᑕᒥᓂᒃ ᐊᓂᒍᖅᑕᐅᙱᑦᑐᑦ ᑎᑎᕋᖅᑕᐅᖃᑦᑕᔾᔮᙱᑦᑐᑦ. ᐃᓕᓐᓂᐊᖅᑎᐅᑉ ᒥᒃᓵᓄᑦ ᑎᑎᕋᖅᓯᒪᔪᑦ ᑐᒃᓯᕋᖅᑕᐅᒐᔪᖕᒪᑕ ᐊᓂᒍᐃᔪᓄᑦ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᖕᒥ, ᓯᓚᑦᑐᖅᓴᕐᕕᒡᔪᐊᕐᒥ, ᐃᓕᓐᓂᐊᖅᓯᓐᓈ ᐃᖅᑲᓇᐃᔭᖅᑎᓄ ᑐᒃᓯᕋᖅᑕᐅᒐᔪᒃᐳᑦ ᐃᓚᖏᓐᓄᓪᓗ ᐃᖅᑲᓇᐃᔮᓄᑦ ᑐᒃᓯᕋᖅᑕᐅᕙᒃᑭᓪᓗᑎᒃ.
ᑭᓲᕙ ᓇᓗᓇᐃᖅᓯᔾᔪᑎ ᑎᑎᕋᖅᓯᒪᔪᖅ?
ᓇᓗᓇᐃᖅᓯᔾᔪᑎ ᑎᑎᕋᖅᓯᒪᔪᖅ ᐃᓕᓴᕆᔭᐅᓯᒪᙱᖦᖢᓂ ᑎᑎᖅᑲᐅᕗᑦ ᐊᕕᒃᑐᖅᓯᒪᔪᓂᒃ ᑎᑎᕋᖅᓯᒪᓪᓗᑎᒃ ᐊᓂᒍᐃᓂᐊᖅᑐᓄᑦ ᐱᕙᓪᓕᐊᔭᕆᐊᖃᖅᑕᓕᒫᖏᓐᓂᒃ (ᑕᑯᓗᒍ ᐃᓱᓕᑦᑎᔪᓄᑦ ᐊᑐᕆᐊᓖᑦ), ᐃᓕᓐᓂᐊᕈᑎᒥᓄᑦ ᐱᕙᓪᓕᐊᔭᖏᑦ ᒫᓐᓇᒧᑦ ᑎᑭᖦᖢᒍ, ᓱᓕ ᐱᕙᓪᓕᐊᔭᕆᐊᖃᖅᑕᖏ ᐃᓱᓕᑦᑎᓂᐊᕐᓗᓂ ᐊᒻᒪ ᐃᓕᓐᓂᐊᖅᑕᐅᔪᒃᓴᖅ ᐅᕝᕙᓘᓐᓃᑦ ᖃᓄᐃᑦᑑᓂᖏᑦ, ᐃᓕᓐᓂᐊᖅᓯᒪᓕᖅᑕᖏᑦ (ᐃᓕᓐᓂᐊᕌᓂᒃᑕᖏᑦ ᐊᒻᒪ ᐃᓕᓐᓂᐊᒃᑲᓐᓂᕆᐊᖃᖅᑕᖏᑦ) ᐊᒻᒪ ᓇᓗᓇᐃᒃᑯᑕᖅᑖᕆᔭᖏᑦ (ᐱᖃᓯᐅᑎᓗᒍ ᐊᔪᙱᓐᓂᓕᑦ 12-ᒥ ᐃᐅᓪᐴᑕᒥ ᐃᓕᓴᕆᔭᐅᔾᔪᑎᑖᕐᓂᕐᒧᑦ ᖃᐅᔨᓴᖅᑕᐅᔾᔪᑎᖏᑕ ᓇᓗᓇᐃᒃᑯᑕᖏᑦ), ᐊᒻᒪ ᓇᓗᓇᐃᒃᑯᑕᑦ ᐃᓕᓐᓂᐊᖅᑎᐅᑉ ᑎᑎᕋᖅᓯᒪᔪᖁᑎᖏᓐᓄᐊᖅᑕᐅᓇᔭᖅᑐᑦ. ᑖᒃᑯᐊ ᑎᑎᕋᖅᓯᒪᔪᑦ ᐊᑐᖅᑕᐅᓪᓗᐊᑕᖃᑦᑕᖅᐳᑦ ᐃᓕᓐᓂᐊᕐᕖᑦ, ᐊᖓᔪᖅᑳᕆᔭᐅᔪᑦ, ᐊᒻᒪ ᐃᓕᓐᓂᐊᖅᑎᑦ ᑕᒻᒪᖅᓯᒪᙱᑦᑎᐊᖅᑐᓂᒃ ᑎᑎᕋᖅᓯᒪᔪᓂᒃ ᐱᖃᑦᑕᖁᓪᓗᒋᑦ ᐃᓕᓐᓂᐊᖅᑎ ᑲᔪᓯᕙᓪᓕᐊᑎᓪᓗᒍ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ. ᐃᓕᓐᓂᐊᖅᑏᑦ ᐊᖓᔪᖅᑳᕆᔭᐅᔪᓪᓗ ᑐᒃᓯᕋᕈᓐᓇᖅᐳᑦ ᓇᓗᓇᐃᖅᓯᔾᔪᑎᒥᒃ ᑎᑎᕋᖅᓯᒪᔪᒥᒃ ᐃᓕᓐᓂᐊᕐᕕᖕᒥ.