ᐊᑕᐅᓯᕐᒥᒃ ᓄᑖᒥᒃ ᓄᕙᒡᔪᐊᕐᓇᖅ-19−ᑖᖅᑐᖃᓕᕐᐳᖅ ᐊᕐᕕᐊᓂ
ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
ᐊᑕᐅᓯᕐᒥᒃ ᓄᑖᒥᒃ ᓄᕙᒡᔪᐊᕐᓇᖅ-19−ᑖᖅᑐᖃᓕᕐᐳᖅ ᐊᕐᕕᐊᓂ
ᐃᖃᓗᐃᑦ, ᓄᓇᕗᑦ (ᔮᓄᐊᕆ 28, 2021) – ᐅᓪᓗᒥ, ᓄᓇᕗᑦ ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᕐᔪᐊᕐᓇᖅ-19−ᒥᑦ ᐊᕐᕕᐊᑦᒥ. ᒫᓐᓇ 18−ᖑᓕᖅᑐᑦ ᓇᓗᓇᐃᖅᑕᐅᓯᒪᔪᑦ ᓄᕙᒃᔪᐊᕐᓇᒧᑦ ᓄᓇᕗᒻᒥ.
“ᖁᔭᓐᓇᒦᒃ ᐃᓚᐅᓚᐅᕐᑐᓕᒫᑦ ᑲᐱᔭᐅᔭᕐᑐᖅᐸᒃᖢᑎᒃ ᐅᓪᓗᒥᒧᑦ. ᐆᒃᑑᑎᐅᓪᓗᓯ ᐊᖏᕐᓯᒪᓂᓯᓗ ᐋᓐᓂᐊᖅᑕᐃᓕᒪᓂᖕᒧᑦ ᖃᓄᐃᙱᑦᑎᐊᕐᓂᖕᒧᓪᓗ ᓄᓇᕗᒻᒥᐅᓕᒫᓄᑦ ᖁᔭᓇᖅᐳᑦ,” ᐅᖃᖅᑐᕕᓂᖅ ᓘᒃᑖᖅ ᒪᐃᑯ ᐹᑐᓴᓐ, ᓄᓇᕗᒻᒥᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ. “ᐱᒻᒪᕆᐅᕗᖅ ᑭᒃᑯᓕᒫᑦ ᒪᓕᒃᑐᐃᓐᓇᐅᓗᑎᒃ ᑕᒪᐃᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᕐᓄᑦ ᐊᑐᕐᑕᐅᔭᕆᐊᓕᖕᓂᑦ ᓯᕗᓂᒃᓴᑦᑎᓐᓄᑦ. ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᕐᓄᑦ ᓄᓇᓕᖕᓄᓪᓗ ᐊᖏᕐᓯᒪᓂᖅ ᑭᒃᑯᑐᐃᓐᓇᕐᓄᑦ ᐊᑲᐅᓛᖑᕗᑦ. ᑲᐱᔭᐅᔪᓐᓇᕈᕕᑦ ᓄᕙᒡᔪᐊᕐᓇᖅ-19−ᒧᑦ, ᐅᖃᓗᖁᕙᔅᓯ ᐋᓐᓂᐊᕕᔅᓯᓐᓄᑦ ᑐᑭᓯᒋᐊᒃᑲᓐᓂᖁᓪᓗᓯ ᐃᓂᒃᓴᓕᐅᕐᓗᓯᓗ.”
ᑭᒃᑯᑐᐃᓐᓇᐃᑦ ᑕᒪᕐᒥᒃ ᖃᓂᒪᖅᑰᔨᙱᑦᑐᑦ, ᖃᓄᐃᙱᖦᖢᑎᒃ ᐃᓄᑑᔭᕆᐊᖃᖅᑎᑕᐅᓪᓗᑎᒡᓗ. ᐊᐃᑦᑐᕐᓗᒃᑕᐅᓯᒪᑐᐃᓐᓇᕆᐊᓕᖕᓂᒃ ᖃᐅᔨᓴᐃᓐᓇᖅᐳᑦ ᑕᒪᐃᓐᓂ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᑦ ᐋᓐᓂᐊᖃᓐᓇᙱᑦᑐᓕᕆᔨᒃᑯᓪᓗ ᐃᖅᑲᓇᐃᔭᖅᑎᖏᑦ ᖃᐅᔨᓴᖅᐸᓪᓕᐊᖏᓐᓇᖅᐳᑦ ᐃᓄᑐᐊᒃᑯᕕᖕᒦᑦᑐᓕᒫᓂᑦ. ᓄᓇᕗᒻᒥᑦ ᑐᐊᕕᕐᓇᖅᑐᓕᕆᔨᒃᑯᖏᑦ ᐃᑲᔪᖅᑐᐃᔪᑦ ᓄᓇᓕᖕᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᖃᑎᒌᒃᑯᖏᓐᓂᑦ.
ᑭᓇᑐᐃᓐᓇᖅ ᐊᕐᕕᐊᓄᑦ ᓂᐅᕐᕈᓚᐅᖅᑐᖅ ᐊᕐᕕᐊᓂᙶᓚᐅᖅᑐᕐᓗ ᔮᓄᐊᕆ 19-ᒥ ᐱᒋᐊᕐᓗᓂ ᐃᓄᖕᓄᑦ ᐊᒃᑐᐊᑲᑕᖁᔭᐅᙱᑦᑐᑦ ᓇᖕᒥᓂᕐᓗ−ᖃᐅᔨᓴᖁᔭᐅᓪᓗᑎᒃ ᖃᓂᒻᒪᒃᐸᓪᓕᐊᖕᒪᖔᑦ. ᐋᓐᓂᐊᕐᕕᖓᓄᑦᑕᐅᖅ ᖃᐅᔨᒋᐊᖁᔭᐅᔪᑦ ᐅᕝᕙᓘᓐᓃᑦ ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᖓᓄᑦ, ᓄᓇᓕᐸᐅᔭᒦᑉᐸᑕ, ᐃᑲᔪᖅᑕᐅᖁᓪᓗᒋᑦ ᐊᒃᑐᖅᑕᐅᓯᒪᑐᐃᓐᓇᕆᐊᓕᖕᓂᒃ ᖃᐅᔨᓴᖅᑕᐅᑎᓪᓗᒋᑦ ᓇᐅᑦᑎᖅᓱᖅᐸᓪᓕᐊᑎᓪᓗᒋᓪᓗ.
ᓱᓕ ᓄᕙᒡᔪᐊᕐᓇᒧᑦ ᑲᐴᑎᑦ ᐊᕐᕕᐊᓂ ᐊᑐᐃᓐᓇᐅᕗᑦ. ᐋᓐᓂᐊᕕᖕᒧᑦ ᖃᐅᔨᒋᐊᕐᓗᑎᑦ ᐃᓂᒃᓴᓕᐅᕈᓐᓇᖅᐳᑎᑦ.
ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᒃᐸᑦ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᖅ−19 ᐅᖄᓚᕝᕕᖓᓄᑦ ᐅᕗᖓ 1-888-975-8601 10:00−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6:00−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.
ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: https://www.gov.nu.ca/health/information/covid-19-novel-coronavirus.
ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path.
ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
@email