ᑯᐄᓐ ᐃᓕᓴᐱ II ᐃᓕᓐᓂᐊᕈᓯᐊᑦ ᐊᒻᒪᓗ ᓴᕚᓇ ᐱᑯᔭᒃ ᐃᓕᓐᓂᐊᕈᓯᐊᖅ ᑐᓂᔭᐅᓪᓗᓂ ᓄᓇᕗᒻᒥ ᖁᑦᑎᓛᒧᑦ ᐋᓐᓂᐊᓯᐅᖅᑎᐅᓂᕐᒧᑦ ᐊᒻᒪᓗ ᓯᕗᓂᐊᓂ−ᐋᓐᓂᐊᓯᐅᑎᕈᕋᓱᒃᑐᓄᑦ ᐃᓕᓐᓂᐊᖅᑎᓄᑦ

ᐃᖃᓗᐃᑦ, ᓄᓇᕗᑦ (ᒫᑦᓯ 8, 2024) – ᐅᓪᓗᕈᒻᒥᓴᕐᓇᒥ ᐅᓪᓗᒥ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᑐᓂᓯᖅᑲᐅᕗᖅ ᐱᖓᓱᓂᒃ ᑯᐃᓐ ᐃᓕᓴᐱ II−ᒧᑦ ᐃᓕᓐᓂᐊᕈᓯᐊᓂᒃ ᖁᓪᓕᖅᐹᖑᖃᑕᐅᔪᓂᒃ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᓗᐊᖅᓴᐃᔨᙳᕆᐅᖅᓴᔪᓄᑦ ᐃᓕᓐᓂᐊᖅᑎᓄᑦ ᐊᒻᒪ ᐊᑕᐅᓯᕐᒥᒃ ᓴᕚᓇ ᐱᑯᔭᖅ ᐃᓕᓐᓂᐊᕈᓯᐊᕐᒥᒃ ᓯᕗᓂᐊᓂ−ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓕᓐᓂᐊᖅᑎᒧᑦ.

ᑯᐄᓐ ᐃᓕᓴᐱ II ᐃᓕᓐᓂᐊᕆᐊᒃᑲᓐᓂᕈᓯᐊᖅ $3,000−ᖑᕗᖅ ᐊᕐᕌᒍᑕᒫᓪᓗ ᖁᓪᓕᖅᐹᖑᖃᑕᐅᓪᓗᓂ ᐊᐃᑉᐸᖓᓂ, ᐱᖓᔪᖓᓂ, ᐊᒻᒪ ᑎᓴᒪᖓᓂ ᐊᕐᕌᒍᓂ ᐃᖢᐊᖅᓴᐃᔨᐅᓂᕐᒧᑦ ᐃᓕᓐᓂᐊᖅᑐᓂ. ᓴᕚᓇ ᐱᑯᔭᒃ ᐃᓕᓐᓂᐊᕈᑎᒃᓴᖅᑖᖅᑎᑦᑎᕙᒃᑐᑦ $5,000−ᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓕᓐᓂᐊᖅᑎᒧᑦ ᐃᑲᔫᑕᐅᓪᓗᑎᒃ ᐃᓕᓐᓂᐊᕈᑎᖏᓐᓄᑦ.

"ᑯᐃᓐ ᐃᓕᓴᐱ II ᐊᒻᒪ ᓴᕚᓇ ᐱᑯᔭᖅ ᐃᓕᓐᓂᐊᕈᓯᐊᑦ ᑭᒡᒐᖅᑐᐃᕗᑦ ᓄᓇᕗᑦ ᒐᕙᒪᒃᑯᑦ ᐱᓕᕆᓪᓚᕆᒍᒪᓂᖏᓐᓂᒃ ᓴᖅᑭᑦᑎᓇᓱᒃᖢᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᓂᒃ ᓄᓇᑦᑎᓐᓂ," ᐅᖃᓚᐅᖅᐳᖅ ᒥᓂᔅᑕ ᒪᐃᓐ. "ᐱᓕᒻᒪᒃᓴᖅᑎᑦᓯᓂᖅ ᐋᓐᓂᐊᓯᐅᖅᑎᓂᑦ ᓄᓇᓕᓐᓂᑦ ᐊᑐᐃᓐᓇᐅᑎᑦᓯᖃᑦᑕᖅᑐᖅ ᐱᕕᖃᕐᓂᐅᔪᓂᑦ ᐃᖅᑲᓇᐃᔭᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᓪᓗ ᓴᙱᓂᖅᓴᒥᑦ, ᐃᓕᖅᑯᓯᕐᒥᑦ ᑐᓴᐅᒪᑎᑦᓯᓂᕐᒥᑦ ᐃᖅᑲᓇᐃᔭᖅᑎᓂᑦ. ᐃᓕᓴᕆᔪᒪᕙᒃᑲ ᑕᒪᕐᒥᑦᑎᐊᖅ ᑕᒪᑐᒪᓂ ᐊᕐᕌᒍᒥ ᑐᓐᓂᖅᑯᓯᐊᕐᓂᐊᖅᑐᑦ ᐱᓕᕆᐊᖃᓪᓚᕆᒍᒪᓂᖏᓐᓄᑦ ᐃᖅᑲᓇᐃᔭᕐᓂᕐᒥᒃ ᐃᓗᐊᖅᓴᐃᔨᐅᓂᕐᒧᑦ."

2024-ᒥ ᑐᓂᔭᐅᓚᐅᖅᑐᑦ ᑯᐃᓐ ᐃᓕᓴᐱ II ᐃᓕᓐᓂᐊᖅᑎᓄᑦ ᐃᑲᔫᑎᒥᒃ ᐅᑯᐊᖑᕗᑦ ᑲᐃᕋ ᕿᓚᕝᕙᖅ, ᐃᕗᕋ ᐃᓲ, ᐊᒻᒪ ᓴᐅᕋᑎ ᐆᓯ. ᓴᕚᓇ ᐱᑯᔭᖅ ᐃᓕᓐᓂᐊᕈᑎᒃᓴᖅᑖᕈᓯᐊᖅ ᑐᓂᔭᐅᓚᐅᖅᐳᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓕᓐᓂᐊᖅᑎᓄᑦ ᑕᐃᑎᐊᓇ ᑲᓪᓗᒃ−ᒪᒃᑖᓄᑦ. ᓄᓇᕗᒻᒥᐅᑦ ᐃᓗᐊᖅᓴᐃᔨᐅᓂᕐᒧᑦ ᐃᓕᓐᓂᐊᖅᑐᓄᑦ ᐃᓕᓴᕆᔭᐅᔾᔪᓯᖏᓐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑮᓇᐅᔭᕐᓂᑦ ᐃᑲᔪᐃᓐᓇᕐᒪᑕ ᓄᓇᕗᒻᒥ ᐃᓗᐊᖅᓴᐃᔨᙳᕆᐅᖅᓴᔪᓄᑦ.