ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᖓ

ᒐᕙᒪᒃᑯᓐᓂᑦ ᐃᓄᖕᓄᑦ ᑐᓴᒐᒃᓴᖅ

ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᖓ

ᒫᔾᔨ 24 ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᕆᕙᐅᒃ ᐊᕐᕌᒍᑕᒫᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓕᓴᕆᔭᖃᖅᐸᒃᐳᑦ ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᖓᓂ ᐃᓚᒋᔭᐅᓪᓗᓂ ᐅᔾᔨᕐᓇᖅᓯᑎᑦᑎᕙᓪᓕᐊᖏᓐᓇᕐᓂᕐᒥᒃ ᐊᑦᑕᕐᓇᕐᓂᖓᓂᒃ ᖃᓄᐃᙱᑦᑎᐊᕐᓂᕐᒧᑦ, ᐃᓅᖃᑎᒌᓄᑦ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕐᒧᓪᓗ ᖃᓄᐃᓕᖓᓕᕐᓂᕆᔭᐅᕙᒃᑐᓂᒃ ᐳᕙᒡᓗᖕᓇᕐᓂᕐᒧᑦ.

ᓄᓇᕗᒻᒥ, ᑕᒪᑐᒪᓂ ᐊᕐᕌᒍᒥ ᐳᕙᒡᓗᖕᓇᐅᑉ ᐅᓪᓗᖓᑕ ᐱᓕᕆᐊᒃᓴᖓ, “ᐳᕙᒡᓗᖕᓇᖅ ᓄᕙᕐᔪᐊᕐᓇᖅ-19−ᓗ,” ᐃᖅᑲᐃᓯᒋᐊᖅᑎᑦᑎᕗᖅ ᐳᕙᒡᓗᖕᓇᖅ ᑭᒃᑯᑐᐃᓐᓇᕐᓂᑦ ᐋᓐᓂᐊᖅᑐᓕᕆᓂᕐᒧᑦ ᐃᓱᒪᒋᔭᐅᖏᓐᓇᖅᑐᖅ ᓇᓂᑐᐃᓐᓇᖅ ᓄᓇᕐᔪᐊᕐᒥ, ᐃᓚᒋᓪᓗᒍ ᓄᓇᕗᑦ.

ᓄᕙᕐᔪᐊᕐᓇᖅ-19 ᐊᒻᒪ ᐳᕙᒡᓗᖕᓇᖅ ᐊᔾᔨᒌᖕᓂ ᐋᓐᓂᐊᕈᑕᐅᖃᑦᑕᖅᑐᑦ ᓲᕐᓗ ᑎᒥᒃᑯᑦ ᐆᓇᓗᐊᕐᓂᖅ, ᖁᐃᖅᓱᑲᑕᒃᓗᓂ ᓄᑭᑭᓪᓗᓂᓗ. ᑕᒪᕐᒥᒃ ᓯᐊᒻᒪᒃᑎᑕᐅᕙᒃᐳᒃ ᐊᓂᖅᓵᖅᑐᒐᒃᑯᑦ ᐃᓄᖕᒥᑦ ᐃᓄᖕᒧᑦ, ᓲᕐᓗ, ᖁᐃᖅᓱᕐᓂᒃᑯᑦ, ᑕᒋᐅᕐᓂᒃᑯᑦ, ᐃᙱᕐᓂᒃᑯᑦ, ᐅᖃᓪᓚᖕᓂᒃᑯᓪᓘᓐᓃᑦ.

ᐳᕙᓪᓗᓇᖅ ᑲᒪᒋᔭᐅᔪᓐᓇᖅᐳᖅ ᐱᑕᖃᕈᓐᓃᖅᑎᑕᐅᓗᓂᓗ ᖁᐱᕐᕈᓄᑦ ᑐᖁᓴᐅᑎᓄᑦ ᐄᔭᒐᕐᓄᑦ. ᐳᕙᒡᓗᖕᓇᖅᑎᑑᙱᑦᑐᖅ, ᓄᕙᕐᔪᐊᕐᓇᖅ-19 ᐃᓅᓕᓴᐅᑎᖃᙱᑦᑐᖅ, ᑭᓯᐊᓂ ᓄᕙᒡᔪᐊᕐᓇᖅ-19−ᒧᑦ ᑲᐴᑦ ᓴᐳᔾᔨᔾᔪᑎᑦᑎᐊᕙᐅᓛᖑᕗᖅ ᖃᓂᒪᓐᓇᒧᑦ, ᓄᓇᕗᒻᒥᐅᓕᒫᓪᓗ ᑲᐱᔭᐅᖁᔭᐅᕗᑦ ᐊᔪᕐᓇᕈᓐᓂᑐᐊᖅᐸᑦ.

ᐃᒃᐱᒍᓱᒃᑯᕕᑦ ᐋᓐᓂᐊᕈᑕᐅᖃᑦᑕᖅᑐᖅᓂ ᖃᐅᔨᒪᔭᕐᓂᒡᓘᓐᓃᑦ ᐳᕙᒡᓗᖕᓇᖅᑐᒥ ᓄᕙᕐᔪᐊᕐᓇᖅ-19−ᒥᒡᓘᓐᓃᑦ, ᐅᖄᓚᕕᒋᓗᒋᑦ ᓄᓇᑦᓯᓐᓂᑦ ᐋᓐᓂᐊᕕᒃ ᐅᖃᐅᔾᔪᖅᓱᐃᓇᔭᖅᑐᑦ ᐱᐅᓛᒃᑯᑦ ᐱᓕᕆᓂᕆᔪᓐᓇᖅᑕᕐᓂᒃ.

ᑖᒃᑯᓂᖓ ᐊᑐᖅᑕᐅᕙᓪᓕᐊᓇᔭᖅᑐᒥᒃ ᒪᓕᒡᓗᓂ ᐃᑲᔪᕈᓐᓇᖅᐳᖅ ᓄᖅᑲᖅᑎᑦᑎᓂᕐᒥᒃ ᓄᕙᒡᔪᐊᕐᓇᖅ-19−ᒥᒃ, ᐊᓯᖏᓐᓂᒡᓗ ᐳᕝᕕᕆᓂᒃᑯᑦ ᐋᓐᓂᐊᕈᑕᐅᕙᒃᑐᓂᒃ:

• ᐊᖏᕐᕋᖅᓯᒪᓗᑎᑦ ᖃᓂᒪᒍᕕᑦ.
• ᖁᐃᖅᓱᖅᐸᒡᓗᓯ ᑕᒋᐅᒃᐸᒡᓗᓯᓗ ᑕᓕᔅᓯᓐᓄᑦ.
• ᐊᒡᒐᑎᑦ ᐅᐊᓴᕋᔪᒡᓗᒋᑦ.
• ᑮᓇᐃᑦ ᐊᒃᑐᖅᑕᐃᓕᒪᓗᒍ.
• ᑲᒃᑭᐅᑎᒋᐊᓂᒃᑕᓯ ᐃᕐᖐᓐᓇᖅ ᐊᒃᑕᑰᓯᕝᕕᖕᒧᑦ ᐃᒋᑉᐸᒡᓗᒋᑦ.
• ᐃᓅᖃᑎᓯ ᖃᓂᒋᓗᐊᖅᐸᙱᓪᓗᒋᑦ ᐊᓂᓯᒪᑎᓪᓗᓯ.
• ᐃᒡᓗᒥ ᓱᐴᖅᑐᖅᐸᙱᓪᓗᓯ ᐅᕝᕙᓘᓐᓃ ᐃᓅᖃᑎᓯ ᖃᓂᒋᔮᓂ, ᐱᓗᐊᖅᑐᒥᑦ ᓄᑕᕋᓛᑦ ᖃᓂᒋᔭᖏᓐᓂᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐳᕙᒡᓗᖕᓇᖅ ᑭᓲᖕᒪᖔᑦ, ᐅᔾᔨᕐᓇᕈᑎᖏᑦ ᖃᓄᐃᓐᓇᕈᑎᖏᓪᓗ ᐊᒻᒪ ᖃᐅᔨᓴᖅᑕᐅᓂᖏᓐᓂᒃ ᑲᒪᒋᔭᐅᓂᖏᓐᓂᒡᓗ, ᐅᐸᒡᓗᒍ www.gov.nu.ca/health/information/tuberculosis or livehealthy.gov.nu.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᓐᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
@email