ᓄᓇᕗᒻᒥ ᒐᕙᒪᒃᑯᑦ ᖃᕆᑕᐅᔭᒃᑰᕈᑎᖏᑦ ᐊᒃᑐᖅᑕᐅᓯᒪᔪᑦ ᐱᑦᑎᐊᙱᔾᔪᑎᒧ

ᑐᓴᒐᒃᓴᐅᑲᐅᑎᒋᓂᐊᖅᑐᖅ

ᓄᓇᕗᒻᒥ ᒐᕙᒪᒃᑯᑦ ᖃᕆᑕᐅᔭᒃᑰᕈᑎᖏᑦ ᐊᒃᑐᖅᑕᐅᓯᒪᔪᑦ ᐱᑦᑎᐊᙱᔾᔪᑎᒧ 

ᐃᖃᓗᐃᑦ, ᓄᓇᕗᑦ (ᓄᕕᐱᕆ 3, 2019) - ᓴᓇᑦᑕᐃᓕᐊᕈᓯᕐᒥᑦ ᓯᕙᑖᕐᕕᖕᒥᑦ, ᓄᕕᐱᕆ 2, 2019, ᓄᑖᖅ ᐊᒻᒪᓗ ᐊᔪᕐᓇᖅᑑᔪᖅ ᖃᕆᑕᐅᔭᒃᑯᑦ ᐱᑦᑎᐊᙱᔾᔪᑎ ᓄᓇᕗᒻᒥ ᒐᕙᒪᒃᑯᑦ ᖃᕆᑕᐅᔭᙱᓐᓄᐊᖅᑕᐅᓚᐅᖅᑐᖅ, ᓄᓇᕗᓗᒃᑖᕐᒥᑦ. ᖃᕆᑕᐅᔭᕐᒧᑦ ᐱᑦᑎᐊᙱᔾᔪᑎ ᓇᓗᓇᐃᒃᑯᑦᑎᖅᑕᐅᓚᐅᖅᑐᖅ ᐊᑕᐅᓯᐅᖓᑉᓗᒋᑦ ᑐᖅᑯᖅᓯᓯᒪᕝᕕᖕᓄᑦ ᐊᔾᔨᒌᙱᑦᑐᓄᑦ ᖃᕆᑕᐅᔭᓄᑦ ᐱᔨᑦᑎᕋᐅᑎᓄᑦ ᐊᒻᒪᓗ ᐱᓕᕆᕝᕕᐅᔪᓄᑦ. ᑕᐃᒪᓐᓇᒧᑦ, ᒐᕙᒪᒃᑯᑦ ᐱᔨᑦᑎᕋᐃᔨᓗᒃᑖᖏᑦ ᖃᕆᑕᐅᔭᒃᑯᑦ ᑐᑭᓯᐅᒪᔾᔪᑎᓂᒃ ᑐᖅᑯᖅᓯᓯᒪᔭᕆᐊᖃᖅᑐᑦ ᓄᓇᕗᒻᒥ ᒐᕙᒪᒃᑯᑦ ᖃᕆᑕᐅᔭᒃᑰᕈᑎᖓᓐᓂᑦ ᐊᒃᑐᖅᑕᐅᓯᒪᔪᑦ, ᐃᓚᐅᖏᖦᖢᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ. 

“ᖃᐅᔨᒪᖁᔭᒃᑲ ᓄᓇᕗᒻᒥᐅᑕᐃᑦ ᐋᖅᑭᒍᒪᑉᓗᒍ ᑲᒪᒌᓐᓇᕋᑉᑎᒍᑦ ᑕᒪᓐᓇ ᓄᖅᑲᓚᐅᖅᓯᒪᙱᖦᖢᑕ,” ᐅᖃᖅᑐᖅ ᓯᕗᓕᐅᖅᑎ ᔫ ᓴᕕᑲᑖᖅ. “ᐱᔭᕆᐊᖃᑦᑎᐊᖅᑐᑦ ᐱᔨᑦᑎᕋᐅᑏᑦ ᐊᒃᑐᖅᑕᐅᔾᔮᙱᑦᑐᑦ ᐊᒻᒪᓗ ᓄᓇᕗᒻᒥ ᒐᕙᒪᒃᑯᑦ ᐊᐅᓛᕐᓂᖃᐃᓐᓇᕐᓂᐊᖅᑐᑦ ᐱᓕᕆᐊᕆᔭᐅᑎᓪᓗᒍ ᑕᒪᓐᓇ. ᐅᖓᓯᒃᓯᒋᐊᖅᓯᓂᖅᑕᖃᖃᑦᑕᕐᓂᐊᖅᑐᒃᓴᐅᔪᖅ ᖃᕆᑕᐅᔭᒃᑰᕈᖕᓇᖅᓯᒍᑉᑕ, ᐊᒻᒪᓗ ᖁᔭᓐᓇᒦᖅᑕᒃᑲᑦ ᑭᑐᓗᒃᑖᑦ ᐅᑕᖅᑭᔪᖕᓇᕐᓂᖏᓐᓄᑦ ᐊᒻᒪᓗ ᑐᑭᓯᐅᓂᖏᓐᓄᑦ.”  

ᐃᓱᒫᓘᑎᒃᓴᖅᑕᖃᙱᑦᑐᖅ ᒫᓐᓇᐅᔪᖅ ᐊᓯᐅᔨᓂᐅᔪᓄᑦ ᓇᖕᒥᓂᖅ ᑐᑭᓯᐅᒪᔾᔪᑎᓂᒃ ᐅᕝᕙᓘᓐᓃᑦ ᐊᓯᒧᑦ ᖃᐅᔨᒪᔭᐅᔭᕆᐊᖃᙱᑦᑐᓄᑦ ᓯᖁᒥᑦᑎᓂᐅᔪᓂᒃ. ᐃᒪᓐᓇᐃᒐᔪᒃᑐᖅ, ᖃᕆᑕᐅᔭᓄᑦ ᐱᑦᑎᐊᙱᔾᔪᑏᑦ ᑐᓂᐅᖅᑲᐃᖃᑦᑕᙱᑦᑐᑦ ᑐᑭᓯᐅᒪᔾᔪᑎᓂᒃ ᐊᓯᖏᓐᓄᐊᖅᖢᒋᑦ ᐊᒻᒪᓗ ᐃᓗᐊᓃᑦᑐᓂᒃ ᐱᓂᖅ ᐊᔪᖅᖢᓂ. ᐊᑐᖅᑎᐅᔪᓂᒃ ᐊᔪᓕᖅᑎᑦᑎᔪᖕᓇᑐᐃᓐᓇᖅᑐᖅ ᐱᓂᐊᕐᓗᒋᑦ ᑐᑭᓯᐅᒪᔾᔪᑏᑦ. ᐱᔾᔪᑕᐅᔪᖅ ᖃᐅᔨᔭᐅᖕᒪᑦ, ᓄᓇᕗᒻᒥ ᒐᕙᒪᒃᑯᑦ ᐱᓕᕆᐊᕆᒋᐊᑲᐅᑎᒋᓚᐅᖅᑕᖓ ᐱᓕᕆᖃᑎᒌᖑᔪᖅ, ᖃᐅᔨᑎᖦᖢᒋᑦ ᖃᕆᑕᐅᔭᒃᑯᑦ ᒥᐊᓂᖅᓯᓂᕐᒧᑦ ᖃᐅᔨᒪᓂᖃᖅᑐᑦ ᐊᒻᒪᓗ ᐱᓕᕆᖃᑎᒋᑉᓗᒋᑦ ᖃᕆᑕᐅᔭᓄᑦ ᐃᓚᒋᔭᐅᔪᓂᒃ ᑐᓂᓯᖃᑦᑕᖅᑐᖁᑎᕗᑦ. ᐊᔪᕐᓇᖅᑐᖅ ᓇᓚᐅᑦᑖᕐᓂᐊᕐᓗᒍ ᖃᑯᒍ ᐋᖅᑭᖕᓂᐊᕐᓂᖓᓄᑦ ᒪᓐᓇᐅᔪᖅ ᐱᒋᐊᓵᕐᓂᕐᒥᑦ.

ᓄᓇᕗᒻᒥ ᐊᕕᒃᑐᖅᓯᒪᔪᑦ ᓂᕆᐅᓇᙱᑦᑐᓕᕆᓂᕐᒧᑦ ᐸᕐᓇᐅᑎᒥᒃ ᑲᒪᒋᔭᖃᖅᑐᑦ ᐃᖢᐃᓵᕆᓂᖃᖁᓇᒍᑦ ᐱᔨᑦᑎᕋᐅᑎᓂᒃ ᓄᓇᕗᒻᒥᐅᓄᑦ. ᐅᑐᖅᑎᕆᓂᖅ ᖃᕆᑕᐅᔭᒃᑯᑦ ᓈᓴᐅᑎᓂᒃ/ᑎᑎᖅᑲᓂᒃ ᐱᔨᑦᑎᕋᐅᑎᓄᑦ ᐱᔾᔪᑎᖃᖅᑐᑦ ᐋᓐᓂᐊᖃᖅᑕᐃᓕᒪᓕᕆᓂᕐᒧᑦ, ᖃᑕᙳᑎᒌᓄᑦ ᐱᔨᑦᑎᕋᐅᑏᑦ, ᐃᓕᓐᓂᐊᖅᑐᓕᕆᔨᒃᑯᑦ, ᐊᒻᒪᓗ ᐃᖅᑲᖅᑐᐃᔪᓕᕆᔨᒃᑯᑦ ᐊᒻᒪᓗ ᑮᓇᐅᔭᓕᕆᔨᒃᑯᑦ, ᓯᕗᓪᓕᖅᐸᐅᑎᔭᒃᓴᐅᑕᐅᔪᑦ.

ᓄᓇᕗᒻᒥ ᒐᕙᒪᒃᑯᑦ ᐱᔨᑦᑎᕋᐅᑎᖏᑦ ᒪᓂᒪᐃᓐᓇᕐᓂᐊᖅᑐᑦ ᐊᒻᒪᓗ ᐅᒃᑯᐃᖓᓗᑎᒃ, ᑭᓯᐊᓂ ᐃᓚᖏᑦ ᐱᔨᑦᑎᕋᐅᑏᑦ ᐅᖓᓯᒃᓯᒋᐊᖅᑕᐅᓯᒪᓂᐊᖅᑐᑦ. ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᓐᓄᑦ ᑕᑯᔭᐅᓂᐊᖅᑐᓄᑦ, ᑕᑯᔭᐅᓂᐊᖅᑐᓗᒃᑖᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᓇᓪᓕᐅᒃᑯᒫᖏᓐᓄᑦ ᐊᐅᒃᑕᔫᖓᓐᓂᒃ ᓇᒃᓴᖁᔭᐅᔪᑦ ᐊᒻᒪᓗ ᓱᓇᑐᐃᓐᓇᐃᑦ ᐃᖢᐊᖅᓴᐅᑎᒋᔭᖏᑦ ᐋᓐᓂᐊᕐᕕᓕᐊᕈᑎᒃ. 

ᓄᓇᕗᒻᒥ ᒐᕙᒪᒃᑯᑦ ᐱᓕᕆᔪᑦ ᓈᓴᐅᑏᑦ/ᑎᑎᖅᑲᐃᑦ ᐅᑎᖅᑎᓐᓂᐊᕐᓗᒋᑦ ᐊᒻᒪᓗ ᐱᔭᐅᔪᖕᓇᕐᓗᑎᒃ ᐱᔪᖕᓇᖅᓯᑐᐊᖅᐸᑕ, ᓂᕆᐅᒃᑐᓪᓗ ᐊᒥᓲᓂᖅᓴᐃᑦ ᑐᖅᑯᖅᑕᐅᓯᒪᔪᑦ ᐅᑎᖅᑎᑕᐅᓂᐊᖅᑐᑦ, ᐊᑐᕐᓗᑎᒃ ᑕᐃᒪᐅᔪᓂᒃ ᐅᑉᓗᒥᒨᖓᔪᓂᒃ ᖃᕆᑕᐅᔭᓄᑦ ᐅᑎᖅᑎᑦᑎᔪᖕᓇᕐᓂᖏᓐᓄᑦ ᐊᑐᖃᑦᑕᖅᑕᖏᓐᓂᑦ. 

ᓄᓇᕗᒻᒥ ᒐᕙᒪᒃᑯᑦ ᐅᖃᓘᑎᖏᑦ ᐃᖃᓗᖕᓂᑦ ᐊᔪᙱᑦᑐᑦ ᑕᐃᑯᙵ ᓯᕙᓂᕐᓂᐊᕐᓗᓂᑐᐃᓐᓇᖅ. ᓂᐱᓕᐅᕈᖕᓇᖅᑐᑦ ᐊᒻᒪᓗ ᐅᖃᓘᑏᑦ ᓄᓇᓕᖕᓂᑦ ᐊᒃᑐᖅᑕᐅᓯᒪᙱᑦᑐᑦ. ᕿᑭᖅᑕᓂ ᐋᓐᓂᐊᕐᕕᒃ, ᐃᓕᓐᓂᐊᕐᕖᑦ ᓄᓇᕗᒻᒥᑦ, ᕿᑭᖅᑕᓂ ᑎᒍᔭᐅᓯᒪᕝᕕᒃ ᐊᒻᒪᓗ ᓄᓇᕗᒻᒥ ᓯᓚᑦᑐᖅᓴᕐᕕᒃᑯᑦ ᐅᖃᓘᑎᖏᑦ ᐊᒃᑐᖅᑕᐅᓯᒪᙱᑦᑐᑦ. ᓄᓇᕗᒻᒥ ᒐᕙᒪᒃᑯᑦ ᑐᓴᖅᑎᑦᑎᔾᔪᑎᖓᑦ ᓯᓚᐅᑉ ᒥᒃᓵᓄᑦ ᐅᖃᐅᓯᐅᖃᑦᑕᕐᓂᐊᖅᑐᖅ ᓄᓇᕗᒻᒥ ᒐᕙᒪᒃᑯᑦ ᖃᕆᑕᐅᔭᒃᑯᑦ ᐃᓄᓗᒃᑖᓄᑦ ᑐᕌᖓᔪᖁᑎᖓᒍᑦ. 

ᖃᓄᐃᓕᐅᖅᐸᓪᓕᐊᓂᐅᔪᑦ ᑐᓴᖅᑎᑦᑎᔾᔪᑕᐅᖃᑦᑕᕐᓂᐊᖅᑐᑦ ᒪᓂᒪᓕᕌᖓᑕ ᓄᓇᕗᒻᒥ ᒐᕙᒪᒃᑯᑦ ᖃᕆᑕᐅᔭᒃᑯᑦ ᐃᓄᓗᒃᑖᓄᑦ ᑐᕌᖓᔪᖁᑎᖓᒍᑦ ᐊᒻᒪᓗ ᓈᓚᐅᑎᒃᑯᑦ.

###

ᑐᓴᒐᒃᓴᓕᕆᔨᒃᑯᑦ ᖃᐅᔨᒋᐊᕐᕕᒋᓗᒋᑦ: 

ᑯᕆᔅ ᐳᒡᓕᔭ                                            
ᑐᓴᐅᒪᖃᑦᑕᐅᑎᓕᕆᔨ                                
ᓄᓇᕗᒻᒥ ᒐᕙᒪᒃᑯᑦ
1-587-834-2845
@email