ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᓴᖅᑭᑦᑎᕗᑦ ᓄᑖᒥᒃ ᑐᐊᕕᕐᓇᙱᑦᑐᓄᑦ ᐃᒡᓗᓄᑦ ᖃᐅᔨᒋᐊᕐᕕᖕᒥᑦ

ᑐᑭᓯᒋᐊᕈᓐᓇᕐᓂᖅ ᐃᒡᓗᓕᕆᓂᕐᒧᑦ ᐱᓕᕆᐊᓂᑦ ᐱᔨᑦᑎᕋᐅᑎᓂᒡᓗ ᓄᓇᕗᒻᒥ ᐱᔭᕐᓂᕐᓂᖅᓴᐅᓂᐊᖅᑐᖅ ᖁᔭᓕᓂᕐᒥᑦ ᓄᑖᒧᑦ ᐃᒡᓗᓕᕆᓂᕐᒧᑦ ᖃᐅᔨᒋᐊᕐᕕᒃᓴᒧᑦ, ᐊᑐᐃᓐᓇᐅᔪᖅ ᐊᑭᖃᙱᑦᑐᒃᑯᑦ ᐅᕗᖓ 1-844-413-9355.

ᓄᓇᕗᒻᒥᐅᑦ ᓇᓃᕈᓘᔭᖅᑐᑦ ᑲᓇᑕᒥ ᐅᖄᓚᔪᓐᓇᖅᑐᑦ 1-844-413-9355−ᒧᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓪᓗ (NHC) ᐅᖄᓚᐅᓯᕆᔨᖏᑦ ᐃᑲᔪᕐᓂᐊᖅᑐᑦ ᐅᖄᓚᔪᓂᑦ ᓇᓂᓯᓇᓱᒃᑎᓪᓗᒋᑦ ᐃᓄᖕᒥᑦ ᐃᑲᔪᕈᓐᓇᖅᑐᒥᑦ ᐃᒡᓗᓕᕆᓂᕐᒧᑦ−ᐊᒃᑐᐊᔪᓂᑦ ᐊᐱᖅᑯᑎᓂᑦ.  ᐅᖄᓚᔪᑦ ᒫᓐᓇ ᐃᓄᒃᑎᑐᑦ ᖃᓪᓗᓈᑐᓪᓗ ᐱᔨᑦᑎᕋᖅᑕᐅᔪᓐᓇᖅᑐᑦ.

ᐊᕐᕕᐊᓂ ᐃᒡᓗᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃ ᐊᑐᐃᓐᓇᐅᓛᖅᑐᖅ ᓇᒡᒐᔾᔭᒥ−ᐅᓪᓗᑐᐃᓐᓇᕐᒧᑦ ᐃᒪᐃᓕᖓᓗᑎᒃ:

• 9:30-ᒥ ᐅᓪᓛᒃᑯᑦ 6:00-ᒧᐊᖅᓴᓂᖓᓐᓄᑦ ᐅᓐᓄᒃᑯᑦ. ᑲᓇᖕᓇᐅᑉ ᖃᐅᔨᓴᐅᑎᖓᑦᑎᒍᑦ ᕿᑭᖅᑖᓗᖕᒥ.
• 8:30-ᒥ ᐅᓪᓛᒃᑯᑦ 5:00-ᒧᐊᖅᓴᓂᖓᓄ ᐅᓐᓄᒃᓴᒃᑯᑦ. ᑭᕙᓪᓕᕐᒥᐅᑦ ᖃᐅᔨᓴᐅᑎᖓᑦᑎᒍᑦ ᑭᕙᓪᓕᕐᒥ.
• 7:30-ᒥ ᐅᓪᓛᒃᑯᑦ 4:00-ᒧᑦ ᐅᓐᓄᒃᓴᒃᑯᑦ. ᕿᑎᕐᒥᐅᑦ ᖃᐅᔨᓴᐅᑎᖓᑎᒍᑦ ᕿᑎᕐᒥᐅᓄᑦ.

ᐃᒡᓗᓕᕆᔨᒃᑯᓐᓂ ᖃᐅᔨᒋᐊᕐᕕᒃᓴᖅ ᐊᑐᖅᑕᐅᔪᓐᓇᖅᐳᖅ ᖃᐅᔨᒋᐊᕐᕕᐅᔪᓐᓇᕐᓗᓂ

ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᑦ ᐅᕝᕙᓘᓐᓃᑦ ᓄᓇᓕᖕᓂ ᐱᔨᑦᑎᕋᖅᑎᓄᑦ ᐱᓕᕆᐊᖑᒃᑲᓐᓂᖁᓪᓗᒋᑦ ᓴᓇᔭᐅᖁᔭᐅᔪᑦ, ᖃᐅᔨᒋᐊᕐᓗᑎᒃ ᖃᓄᐃᓕᖓᓕᕐᓂᖏᓐᓂᒃ ᐱᓇᔫᑎᑦ, ᐅᕝᕙᓘᓐᓃᑦ ᖃᐅᔨᒃᑲᓐᓂᕈᒪᒍᔅᓯ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᖏᓐᓂᒃ ᐊᒻᒪ ᐱᔨᑦᑎᕋᐅᑎᖏᓐᓂᒃ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᓂᐅᕕᖅᑎᑦᑎᔨᖏᑦ ᐊᑐᕈᓐᓇᕐᒥᔪᑦ ᓈᓴᐅᑎᒥᒃ ᖃᐅᔨᒋᐊᕐᓗᑎᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᑮᓇᐅᔭᑦ ᖃᓄᐃᓕᖓᓂᖏᓐᓂᒃ.

ᐃᒡᓗᓕᕆᔨᒃᑯᓐᓂ ᖃᐅᔨᒋᐊᕐᕕᒃᓴᖅ ᑐᐊᕕᕐᓇᙱᑦᑐᓄᑦ ᐊᐱᖅᑯᑕᐅᔪᓄᑦ ᑭᓯᐊᓂ ᑐᕌᖓᕗᖅ.

ᑐᐊᕕᕐᓇᖅᑐᖅᑕᖃᓕᖅᐸᑦ, ᖃᐅᔨᒋᐊᕐᕕᒋᓗᒋᑦ ᓈᒻᒪᒃᑐᑦ ᑐᐊᕕᕐᓇᖅᑐᓕᕆᔩᑦ ᓄᓇᔅᓯᓐᓂ.

###