ᓄᓇᕗᑦ ᒐᕙᒪᖓ ᐃᖅᑲᓇᐃᔭᖅᑎᖏᑦ ᑕᑯᔪᑦ ᐅᓄᖅᓯᕙᓪᓕᐊᔪᓂᑦ ᐊᒻᒪ ᐊᖏᒡᓗᕙᓪᓕᐊᔪᒥᑦ ᓄᓇᕗᒻᒥᑦ ᐃᒡᓗᒥᐅᑕᐅᖃᑎᒌᖕᓄᑦ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᓄᑦ

ᐃᖃᓗᐃᑦ, ᓄᓇᕗᑦ (ᒪᐃ 9, 2024) – ᓄᓇᕗᑦ ᒐᕙᒪᖓᑦ ᐃᖅᑲᓇᐃᔭᖅᑎᖏᑦ ᐃᒡᓗᖃᖅᑎᐅᔪᑦ ᓇᖕᒥᓂᖁᑎᒋᔭᐅᔪᒥᑦ ᐅᔾᔨᕈᓱᒃᑐᒃᓴᐅᓚᐅᖅᑐᑦ ᓯᒃᑭᖏᑦ ᐊᖏᓂᖅᓴᐅᓂᖏᓐᓂᑦ ᑕᖅᑭᐅᔪᒥᑦ, ᖁᔭᓕᕙᕗᑦ ᓗᑖᖅ ᐊᖏᒡᓕᒋᐊᖅᑕᐅᓂᖅ ᓄᓇᕗᑦ ᐃᒡᓗᒥᐅᑕᐅᖃᑎᒌᓄᑦ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᓄᑦ.

ᓄᓇᕗᒻᒥᑦ ᐃᒡᓗᒥᐅᑕᐅᖃᑎᒌᑦ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᓄᑦ ᐃᖅᑲᓇᐃᔭᖅᑎᓄᑦ ᐃᑲᔫᑎᐅᕗᖅ ᓄᓇᕗᑦ ᒐᕙᒪᖓ (GN) ᐃᖅᑲᓇᐃᔭᖅᑎᓄᑦ ᓇᖕᒥᓂᖃᖅᑎᐅᔪᓄᑦ ᐅᕝᕙᓘᓐᓃᑦ ᐊᑐᖅᑐᐊᖅᑎᑦᑎᕙᒃᑐᑦ ᐃᒡᓗᒥᓂᒃ, ᐊᑭᒃᖠᒋᐊᖅᑕᐅᓯᒪᔪᒥᑦ ᐃᖅᑲᓇᐃᔭᖅᑎᓄᑦ ᐃᒡᖃᖅᑎᐅᙱᖔᕐᓗᓂ.

ᐊᐃᕐᕆᓂᒥ, ᒥᖤᔅᑕ ᑮᓇᐅᔭᓕᕆᔨᒃᑯᓐᓄᑦ ᖁᐊᓴ ᑯᓱᒐᖅ ᑐᓴᖅᑎᑦᑎᓚᐅᖅᑐᖅ ᓄᓇᕗᒻᒥᑦ ᐃᒡᓗᒥᐅᑕᐅᖃᑕᐅᔪᓄᑦ ᑮᓇᐅᔭᑦ ᐱᔾᔪᑎᒃᓴᓄᑦ ᐊᖏᒡᓕᒋᐊᖅᑕᐅᓂᐊᕐᓂᖓᓄᑦ $400ᒥ $1,000ᒧ ᑕᖅᑭᑕᒫᖅ, ᐃᒡᓗᒥᐅᑕᐅᖃᑕᐅᔪᓄᑦ, ᐊᒻᒪ ᐊᑭᓕᖅᑕᐅᓗᓂ ᐊᔾᔨᒌᒃᑐᒥᑦ ᐃᓕᔭᐅᓗᓂ ᓯᕗᓪᓕᕐᒥᑦ ᓯᒃᑭᓄᑦ ᑕᖅᑭᒧᑦ. ᒥᓂᔅᑕ ᑯᓱᒐᖅ ᑐᓴᖅᑎᑦᑎᖅᑲᐅᖕᒥᔪᖅ ᐅᓪᓗᒥ ᐅᓄᕐᓂᖅᓴᐅᓕᕐᓂᖏᓐᓂᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᑦ ᐱᔪᓐᓇᕐᑐᑦ ᐃᑲᔫᑎᒥᑦ.

"ᒐᕙᒪᕗᑦ ᐊᖏᕈᑎᖃᖅᓯᒪᔪᑦ ᑲᑐᔾᔨᓗᑕ ᐱᓕᕆᐊᒃᓴᖏᓐᓂᑦ ᖃᐅᔨᓇᓱᒡᓗᑎᑦ ᐊᓯᐊᒎᕈᑕᐅᔪᓐᓇᖅᑐᓂᒃ ᓇᖕᒥᓂᖁᑎᒋᔭᐅᔪᓂᑦ ᓇᖕᒥᓂᖃᕐᓂᕐᒧᑦ ᐊᒻᒪ ᐊᑐᖅᑐᐊᓂᖅ ᐊᑭᑐᓗᐊᙱᓐᓂᖅᓴᓂᑦ ᓄᓇᕗᒻᒥᐅᓄᑦ ᖃᓄᐃᓕᐅᕈᑕᐅᔪᖅ ᐃᑲᔪᕈᒪᓪᓗᒋᑦ ᐃᖅᑲᓇᐃᔭᖅᑎᑦ ᓅᖃᑦᑕᕐᓂᕐᒧᑦ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᓄᑦ ᐃᒡᓗᒧᑦ ᓇᖕᒥᓂᖁᑎᖏᓐᓄᑦ. ᑖᓐᓇ ᐊᖏᒡᓕᒋᐊᖅᑕᐅᓂᖅ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᓄᑦ ᐊᑐᐃᓐᓇᐅᑎᑦᑎᕗᖅ ᐃᑲᔪᕈᒪᓪᓗᒋᑦ ᐃᖅᑲᓇᐃᔭᖅᑎᑦ ᐃᒡᓗᒥᑦ ᓇᖕᒥᓂᖃᖅᑎᐅᔪᑦ ᐅᕝᕙᓘᓐᓃᑦ ᐊᑐᖅᑐᐊᖅᐸᒃᑐᑦ ᓇᖕᒥᓂᖁᑎᒋᔭᐅᔪᒥᑦ," ᐅᖃᖅᑐᖅ ᑯᓱᒐᖅ.

"ᐃᓕᓴᕆᔭᕗᑦᑕᐅᖅ ᐊᒥᓱᑦ ᐃᓚᒋᔭᐅᖃᑕᐅᔪᑦ ᐊᒃᓱᕈᖅᖢᑎᒃ ᐃᖅᑲᓇᐃᔭᖅᐸᒃᑐᑦ ᐊᑯᓂᐅᔪᒥᑦ ᐃᖅᑲᓇᐃᔭᖅᑎᑕᐅᓚᐅᑲᒃᐸᒃᑐᑦ. ᐃᓚᒋᐊᕐᓗᒍ ᓄᑖᖅ $1,000 ᑮᓇᐅᔭᑦ ᐱᔾᔪᑎᒃᓴᖅᑖᕈᑎ ᖃᔅᓯᐅᓂᖓ, ᖁᕕᐊᓱᒃᐳᖓ ᑐᓴᖅᑎᑦᑎᔪᓐᓇᕋᒪ ᐃᖅᑲᓇᐃᔭᖅᑎᑕᐅᓚᐅᑲᒃᑐᑦ ᐊᕐᕕᓂᓕᒃ ᑕᖅᑭᑦ ᐅᖓᑖᓂᓗ ᐱᔨᑦᑎᕋᖅᑎᐅᔪᑦ ᐱᔪᓐᓇᐅᑎᑖᖅᑎᑕᐅᔪᑦ ᑐᓂᔭᐅᓗᓂ ᓄᓇᕗᒻᒥᑦ ᐃᒡᓗᒥᐅᑕᐅᖃᑎᒌᓄᑦ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᓄᑦ."

ᑐᓴᖅᑕᐅᑎᑦᑎᔾᔪᑎᑦ ᓄᓇᕗᒻᒥᑦ ᐃᒡᓗᒥᐅᑕᐅᖃᑕᐅᔪᓄᑦ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᒧᑦ ᐊᑐᐃᓐᓇᐅᔪᖅ ᓄᓇᕗᑦ ᒐᕙᒪᖓ ᐃᑭᐊᕿᕕᖓᒍᑦ. ᐃᖅᑲᓇᐃᔭᖅᑎᑦ ᑐᓂᔭᐅᓯᒪᔪᑦ ᓄᓇᕗᒻᒥᑦ ᐃᒡᓗᒥᐅᑕᐅᖃᑕᐅᔪᓄᑦ ᑮᓇᐅᔭᑦ ᐱᔾᔪᑎᒃᓴᖅᑖᕈᑎᓄᑦ ᐃᖃᐃᓯᒋᐊᖁᔭᐅᔪᑦ ᓄᑖᙳᕆᐊᖅᑎᑦᑎᓗᑎᒃ ᑐᓴᖅᑕᐅᑎᑦᑎᔾᔪᑎᓄᑦ ᑐᕌᕈᑎᓄᓪᓗ ᑎᑎᖃᑎᒍᑦ. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕈᓐᓇᖅᐳᑎᑦ @email or call 1-800-316-3324.