ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᕝᕕᒃᓴᑦ
ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ
ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᕝᕕᒃᓴᑦ
ᓄᕙᒡᔪᐊᕐᓇᖅ-19−ᒧᑦ ᑲᐴᑦ ᓄᓇᕗᒻᒥ ᓴᐳᔾᔨᔾᔪᑎᑦᑎᐊᕙᐅᓛᖑᕗᖅ ᖃᓂᒪᓐᓇᒧᑦ, ᓄᓇᕗᒻᒥᐅᓕᒫᓪᓗ ᑲᐱᔭᐅᖁᔭᐅᕗᑦ ᐊᔪᕐᓇᕈᓐᓂᑐᐊᖅᐸᑦ.
ᑲᐱᔭᐅᑎᑦᑎᑲᑕᒃᑐᑦ ᐊᐅᓚᑦᑎᓛᖅᑐᑦ ᓯᕗᓪᓕᕐᒥ ᑭᖑᓪᓕᕐᒥᓗ ᑲᐱᔭᐅᔾᔪᑎᓄᑦ ᓄᕙᒡᔪᐊᕐᓇᖅ-19 ᐋᓐᓂᐊᓕᕇᒃᑯᑎᒧᑦ ᐅᑯᓇᓂ:
ᑭᓇᑐᐃᓐᓇᖅ ᓯᕗᓪᓕᖅᐹᒥ ᑲᐱᔭᐅᔪᖅ ᐋᓐᓂᐊᕐᕕᖕᒥ ᐃᖅᑲᐃᓯᔾᔪᑎᒥᒃ ᑐᓂᔭᐅᓂᐊᖅᐳᑦ ᑭᖑᓪᓕᕐᒥ ᑲᐱᔭᐅᕝᕕᒃᓴᖓᓄᑦ. ᑕᕝᕙᓂᑦᑕᐃᓐᓇᖅ ᓄᓇᓕᖕᓃᑦᑕᕆᐊᖃᖅᐳᑎᑦ ᑕᒪᐃᓐᓄᑦ ᑲᐱᔭᐅᓂᐊᕐᓗᑎᑦ. ᐅᑯᐊ ᓇᒃᓴᕐᓂᐊᖅᐸᑎᑦ ᑲᐱᔭᐅᔭᖅᑐᓕᕈᕕᑦ:
ᓄᓇᕗᒻᒥᐅᑕᐅᓂᕐᒧᑦ:
- ᓄᓇᕗᒻᒥ ᐋᓐᓂᐊᕐᕕᓕᐊᕈᓐᓇᐅᑏᑦ ᐊᓯᐊᓂᒡᓘᓐᓃᑦ ᓇᓗᓇᐃᒃᑯᑕᕐᓂᒃ (ᓲᕐᓗ ᑲᓇᑕᐅᑉ ᓯᓚᑖᓄᐊᕈᓐᓇᐅᑦ, ᐊᖁᑦᑐᓐᓇᐅᑦ, ᐊᓯᖏᓪᓗ) ᑕᑯᔭᐅᕝᕕᒃᓴᕐᓂᑦ ᓄᓇᕗᒻᒥᐅᑕᐅᓂᕐᓂᑦ ᑕᑯᑎᑦᑎᓗᑎᑦ.
- ᐊᓯᖏᑦ ᓇᓗᓇᐃᒃᑯᑕᐃᑦ ᐊᑐᕈᓐᓇᖅᑐᑦ: ᓄᓇᕗᑦ ᑐᙵᕕᒃᑯᓐᓂ ᐃᓚᒋᔭᐅᔾᔪᑏᑦ, ᐊᖑᓇᓱᒍᓐᓇᐅᑏᑦ, ᐊᒻᒪ ᑎᑎᖅᑲᑦ ᓲᕐᓗ ᐊᑐᖅᑐᐊᕐᓂᕐᒧᑦ ᐊᖏᖃᑎᒌᒍᑎ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᖃᐅᒻᒪᖅᑯᑎᓯᐅᑎ ᓇᓗᓇᐃᒃᑯᑕᕆᔪᓐᓇᖅᑐᖅ ᓄᓇᕗᒻᒥᐅᑕᐅᓂᕐᓂᑦ.
- ᑎᑎᕋᖅᓯᒪᔪᓂᑦ ᓇᒃᓴᕐᓗᑎᑦ ᐄᔭᒐᖃᑦᑕᖅᑕᓐᓂᑦ ᑎᒥᒧᑦ ᓈᒻᒪᒍᓐᓃᕈᑎᒋᕙᒃᑕᕐᓂᓪᓘᓐᓃᑦ, ᐄᔭᒐᐃᓪᓘᓐᓃᑦ ᓇᒃᓴᕐᓗᒋᑦ.
ᓄᓇᕗᒻᒥᐅᑕᐅᓕᓵᖅᑐᑦ ᐅᕝᕙᓘᓐᓃᑦ ᐃᖢᐊᖅᓴᐃᔨᑦ, ᓘᒃᑖᑦ, ᐃᕐᓂᓱᒃᓰᔨᑦ, ᐸᓖᓯᑦ, ᑐᐊᕕᕐᓇᖅᑐᓕᕆᔨᑦ ᐊᒻᒪ ᖃᑦᑎᕆᔨᑦ:
- ᐊᑐᖅᑐᒥᑦ ᐊᔾᔨᙳᐊᓕᖕᒥᒃ ᓇᓗᓇᐃᒃᑯᑕᕐᒥᒃ, ᓲᕐᓗ ᑲᓇᑕᐅᑉ ᓯᓚᑖᓄᐊᕈᓐᓇᐅᑦ, ᐋᓐᓂᐊᕐᕕᓕᐊᕈᓐᓇᐅᑦ ᐅᕝᕙᓘᓐᓃᑦ ᐊᖁᑦᑐᓐᓇᐅᑦ, ᐊᒻᒪᓗ ᐅᑯᓇᙵᑦ ᓇᓕᐊᖕᓂᑐᐃᓐᓇᖅ:
- ᓄᓇᕗᒻᒥ ᐃᖅᑲᓇᐃᔮᖃᕐᓂᕐᒧᑦ ᓇᓗᓇᐃᖅᓯᒪᔪᒥᒃ.
- ᓄᓇᕗᒻᒥᐅᑕᐅᓂᕐᓂᑦ ᓇᓗᓇᐃᖅᓯᒪᔪᒥᒃ (ᓲᕐᓗ, ᖃᐅᒻᒪᖅᑯᑎᓯᐅᑎ, ᐊᑐᖅᑐᐊᕈᑎ, ᐊᓯᖏᓐᓂᒡᓗ).
- ᑎᑎᕋᖅᓯᒪᔪᓂᒃ ᓇᒃᓴᕐᓗᑎᑦ ᐄᔭᒐᖃᑦᑕᖅᑕᓐᓂᑦ ᑎᒥᒧᑦ ᓈᒻᒪᒍᓐᓃᕈᑎᒋᕙᒃᑕᕐᓂᓪᓘᓐᓃᑦ, ᐄᔭᒐᐃᓪᓘᓐᓃᑦ ᓇᒃᓴᕐᓗᒋᑦ.
ᐋᓐᓂᐊᕕᔅᓯᓐᓄᑦ ᐅᖄᓚᓗᑎᑦ ᓯᕗᓪᓕᕐᒥ ᑲᐱᔭᐅᑲᑕᒃᑎᓪᓗᒋᑦ ᐅᐸᒍᓐᓇᓚᐅᙱᒃᑯᕕᑦ ᓄᓇᔅᓯᓐᓂ ᑲᐱᔭᐅᔪᒪᓗᑎᓪᓗ. ᐳᐃᒍᖅᑕᐃᓕᒋᑦ ᓄᓇᕗᒻᒥᐅᑦ ᓯᕗᓪᓕᐅᑎᑕᐅᓂᐊᖅᑐᑦ ᑭᖑᓪᓕᕐᒥ ᑲᐱᔭᐅᕝᕕᒃᓴᖓᓄᑦ ᐃᓂᒃᓴᓕᐅᖅᑕᐅᓯᒪᔪᑦ. ᑲᐴᑎᑕᖃᒃᑲᓐᓂᕈᓐᓃᖅᐸᑦ, ᐅᑕᖅᑭᑎᑕᐅᔪᓄᑦ ᑎᑎᕋᖅᑕᐅᑲᑕᖕᓂᐊᖅᐳᑦ ᐃᓄᐃᓪᓗ ᓯᕗᓪᓕᕐᒥ ᑲᐱᔭᐅᔪᓐᓇᖅᓯᓂᐊᖅᖢᑎᒃ ᑲᐴᑎᓂᒃ ᑎᑭᑕᐅᒃᑲᓐᓂᖅᐸᑕ ᓄᓇᕗᒻᒥ.
ᐃᓅᖃᑎᖕᓂ ᖃᓂᒃᓴᓗᐊᖅᑕᐃᓕᒪᓗᑎᑦ, ᐊᒡᒐᑎᑦ ᐅᐊᓴᑦᑎᐊᖅᐸᒡᓗᒋᑦ ᓴᓗᒻᒪᖅᓴᐃᑦᑎᐊᒃᑲᓐᓂᕈᓐᓇᖅᑐᓪᓗ ᐊᑐᐃᓐᓇᐅᓂᐊᖅᐳᑦ ᑭᒃᑯᓕᒫᑦ ᖃᐃᙱᑦᑎᐊᖁᓗᒋᑦ. ᐃᓕᖕᓂᒃ ᓄᓇᖅᑲᑎᖕᓂᓪᓗ ᓴᐳᑎᓯᒪᖁᓪᓗᓯ, ᒪᑐᐊᖅᓯᒪᔭᕆᐊᖃᕐᓂᐊᖅᐳᓯ ᑲᐱᔭᐅᔭᖅᑐᕈᔅᓯ.
ᖃᐅᔨᒋᐊᒃᑲᓐᓂᕈᒪᒍᕕᑦ ᑲᐱᔭᐅᑎᑦᑎᑲᑕᖕᓂᐊᖅᑐᓂᒃ, ᐅᕗᙵᕐᑎᑦ https://gov.nu.ca/health/information/covid-19-vaccination
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
@email