ᐸᓴᒋᔭᐅᔪᖅᑕᓕᒃ ᓄᕙᔾᔪᐊᕐᓇᖅ 19 ᓄᓘᔮᑦ ᐅᔭᕋᕐᓂᐊᕐᕕᖓᓂ
ᐱᕙᓪᓕᐊᔪᑦ ᑐᓴᕋᑦᓴᑦ
ᐸᓴᒋᔭᐅᔪᖅᑕᓕᒃ ᓄᕙᔾᔪᐊᕐᓇᖅ 19 ᓄᓘᔮᑦ ᐅᔭᕋᕐᓂᐊᕐᕕᖓᓂ
ᐃᖃᓗᐃᑦ, ᓄᓇᕗᑦ (ᔪᓚᐃ 15, 2020) − ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᐅᓪᓗᒥ ᓇᓗᓇᐃᖅᓯᔪᖅ ᒪᕐᕈᓐᓂᒃ ᐸᓴᒋᔭᐅᔫᓐᓂᒃ ᓄᕙᔾᔪᐊᕐᓇᖅᑖᖅᓯᒪᔪᖃᕐᓂᖓᓂᒃ 19 ᓄᓘᔮᑦ ᐅᔭᕋᕐᓂᐊᕐᕕᖓᓂ, 176 ᑭᓛᒥᑕᐃᑦ ᓂᒋᐊᑕ ᐱᖓᓐᓇᖓᓂ ᒥᑦᑎᒪᑕᓕᐅᑉ.
“ᑖᒃᑯᐊ ᐊᒻᒪᓗ ᑲᑎᔭᒥᓂᖏᑦ ᖃᓄᐃᒍᑎᖃᙱᑦᑐᑦ ᕿᓚᒥᐅᔪᒃᑯᓪᓗ ᐃᓄᑑᒋᐊᖃᓕᖅᑎᑕᐅᓚᐅᖅᑑᒃ. ᖃᐅᔨᓴᕋᑦᓴᑲᓐᓂᕐᓂᒃ ᓄᐊᑦᓯᕕᐅᓚᖅᑑᒃ ᐊᐅᓪᓚᖅᑎᑕᐅᓪᓗᑎᓪᓗ ᓇᓗᓇᐃᖅᑕᐅᒍᑎᑦᓴᖏᓐᓂᒃ ᖃᓪᓗᓈᓂ ᖃᐅᔨᓴᕐᕕᒻᒥ, ᓴᖅᑭᖅᑕᐅᔪᑦ ᓂᕆᐅᒋᔭᐅᓪᓗᑎᒃ ᐱᓇᓱᐊᕈᓯᐅᓛᖅᑐᒥ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ.
ᒫᓐᓇᐅᔪᖅ, ᖃᐅᔨᓇᖅᑐᖃᖅᓯᒪᙱᑦᑐᖅ ᐊᐃᑦᑐᕐᓘᑕᐅᓯᒪᓂᖓᓂᒃ ᓄᓘᔮᓂ ᐅᔭᕋᕐᓂᐊᕐᕕᖓᓂ. ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᖃᑎᒌᑦ ᐊᑐᐃᓐᓇᐅᔪᑦ ᐃᑲᔪᕆᐊᕆᐊᖃᕐᓂᕈᑎᒃ ᑲᒪᒋᐊᖃᕐᓂᕈᑎᓪᓗ, ᑕᐃᒪᐃᒋᐊᖃᓕᕐᓂᖅᑲᑕ.
“ᑕᒪᓐᓇ ᖃᐅᔨᓴᖅᐸᓪᓕᐊᖏᓐᓇᖅᑕᕗᑦ, ᑭᓯᐊᓂ ᓄᓇᕗᒻᒥᐅᓂᒃ ᐃᖅᑲᓇᐃᔭᖅᑐᖃᓚᐅᙱᑦᑐᖅ ᓄᓘᔮᑦ ᐅᔭᕋᕐᓂᐊᕐᕕᖓᓂ ᒫᑦᓯᒥᓂᑦ. ᐅᓗᕆᐊᓇᓂᖓ ᓯᐊᕐᒪᒍᓐᓇᕐᓂᖓᑕ ᓄᕙᔾᔪᐊᕐᓇᖅ 19 ᓄᓇᓕᑦᑎᓐᓂ ᐱᔾᔪᑎᒋᓪᓗᒍ ᑖᒃᑯᐊ ᐸᓴᒋᔭᐅᔪᑦ ᓱᓕ ᐊᑉᐸᓯᑦᑐᖅ,: ᐅᖃᖅᓯᒪᔪᖅ ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᔪᐊᔾ ᕼᐃᒃᔅ.
ᒫᓐᓇᐅᔪᖅ ᖃᓄᐃᒍᑕᐅᓂᖓ ᐊᑦᑐᐃᓂᖃᔾᔮᙱᑦᑐᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒃᑲᖅᑕᐅᔪᓄᑦ, ᓄᓇᕗᒻᒥ ᒪᑐᐃᖅᐸᓪᓕᐊᓂᕐᒧᑦ ᐅᕝᕙᓘᓐᓃᑦ ᐊᐅᓚᖃᑦᑕᕐᕕᐅᒍᓐᓇᕐᓂᖏᓐᓄᑦ ᑰᔾᔪᐊᕌᓗᒃ, ᒫᓂᑑᐸ ᐊᒻᒪᓗ ᓄᓇᑦᓯᐊᕐᒧᑦ.
ᑭᓇᑐᐃᓐᓇᖅ ᖃᓂᒋᔭᖃᖅᓯᒪᓱᕆᒍᓂ ᓄᕙᔾᔪᐊᕐᓇᖅᑐᓕᒻᒥᒃ ᐅᖄᓚᖁᔭᐅᔪᑦ ᓄᕙᔾᔪᐊᕐᓇᖅ ᐅᖓᓯᑦᑐᒥᒃ ᐊᑭᖃᙱᑦᑐᒧᑦ ᐅᖄᓚᕕᐅᒍᓐᓇᖅᑐᒧᑦ ᐅᕙᓂ 1-888-975-8601 ᐊᑯᓐᓂᖓᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᓗᑎᓪᓘᓐᓃᑦ ᓄᓇᖓᓐᓂ ᐋᓐᓂᐊᕐᕕᒻᒧᑦ ᒫᓐᓇᑦᓴᐅᑎᒋ, ᕿᓚᒥᐅᔪᒃᑯᓪᓗ ᐊᓂᑦᑕᐃᓕᓕᕐᓗᓂ ᐊᖏᕐᕋᒥᓂ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᓯ ᐋᓐᓂᐊᕐᕕᑦᓯᓐᓄᑦ.
ᖃᓄᐃᒍᑎᐅᒍᓐᓇᖅᑐᑦ ᓄᕙᔾᔪᐊᕐᓇᖅ 19-ᒧᑦ ᐃᓚᒋᔭᐅᓪᓗᑎᒃ ᐆᑎᕐᓇᕐᓂᖅ, ᖁᐃᖅᓱᖃᑦᑕᕐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ. ᓴᐳᒻᒥᔭᐅᑦᓯᐊᖅᓯᒪᒍᓐᓇᖅᑐᑦ ᐊᐃᑦᑐᕐᓘᑕᐅᒍᓐᓇᕐᓂᖓᓂᒃ ᐅᕝᕙᓘᓐᓃᑦ ᓄᕙᔾᔪᐊᕐᓇᖅᑖᖅᑕᐃᓕᓂᕐᒧᑦ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖃᑦᑕᕐᓗᑎᒃ, ᐊᒡᒐᑎᑦ ᐅᐊᓴᖃᑦᑕᕐᓗᒋᑦ 20 ᓴᑲᓐᓯ ᐅᖓᑖᓄᑦ, ᖁᐃᖅᓱᖃᑦᑕᕐᓗᑎᑦ ᑕᒋᐅᖃᑦᑕᕐᓗᑎᓪᓗ ᐊᐃᓐᓄᑦ ᐊᖏᕐᕋᖅᓯᒪᖃᑦᑕᕐᓗᑎᓪᓗ ᑕᐃᒪᐃᒍᓐᓇᕐᓂᓕᒫᕐᓂ.
ᑐᓴᖅᑎᑦᓯᒋᐊᕐᓂᐊᖅᑐᑦ ᐱᕙᓪᓕᐊᔪᓕᕆᔨᓂᒃ 2-ᒥ ᐅᓐᓇᓴ ᐅᓪᓗᒥ.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ
ᓴᕕᑲᑖᕐᒧᑦ
867-975-5059
@email
ᔅᑳᑦ ᕼᐃᑦᔅᑳᒃᔅ
ᑐᓴᕋᑦᓴᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5712
@email