ᖃᓂᒪᓐᓇᖅ COVID-19 ᐅᓪᓗᑕᒫᑦ ᑐᓴᖅᑎᑦᓯᒋᐊᕈᑎ - ᒫᑦᓯ 17, 2020
ᑭᖑᓪᓕᖅᐹᒥᒃ ᓄᑖᙳᕆᐊᖅᑎᑕᐅᓚᐅᖅᑐᖅ ᐱᖓᔪᐊᑦ, ᒫᔾᔨ 18, 2020
ᖃᓂᒪᓐᓇᖅ COVID-19 ᐅᓪᓗᑕᒫᑦ ᑐᓴᖅᑎᑦᓯᒋᐊᕈᑎ
- ᓱᓕ ᓇᓗᓇᐃᖅᑕᐅᓯᒪᔪᖃᙱᑦᑐᖅ ᖃᓂᒪᓐᓇᖅᑐᓕᓐᓂᒃ ᓄᓇᕗᒻᒥ.
- ᐅᖄᓚᖅᑳᖃᑦᑕᕐᓗᑎᑦ ᐋᓐᓂᐊᕐᕕᓕᐊᓚᐅᙱᓂᕐᓂ, ᑐᐊᕕᕐᓇᖅᑑᙱᑉᐸᑦ. ᖃᐅᔨᓴᖅᑕᐅᒐᔭᖅᑐᑎᑦ ᐅᖄᓚᐅᑎᒃᑯᑦ. ᐃᖃᓗᓐᓂ, ᑐᐊᕕᕐᓇᖅᑑᙱᑉᐸᑦ, ᑕᐃᒫᑦᓴᐃᓐᓇᖅ- ᐅᖄᓚᖅᑳᖃᑦᑕᕐᓗᑎᑦ ᐅᐸᒍᑎᓚᐅᙱᓂᕐᓂ ᕿᑭᖅᑕᓂ ᐋᓐᓂᐊᕐᕕᐊᓗᒻᒧᑦ.
- ᓄᓇᕗᑦ ᒐᕙᒪᒃᑯᖏᑕ ᐱᔨᑦᓯᕋᐅᑎᖏᑦ ᓱᓕ ᐊᑐᐃᓐᓇᐃᑦ ᑭᓯᐊᓂ ᓱᒃᑲᐃᓐᓂᖅᓴᐅᑐᐃᓐᓇᕆᐊᓖᑦ ᐃᖅᑲᓇᐃᔭᖅᑎᖏᑦ ᖃᑦᓰᓐᓇᕈᕆᐊᖅᓯᒪᓂᖏᓐᓄᑦ.
- ᐱᓕᕆᐊᖃᖅᐸᓪᓕᐊᔪᒍᑦ ᑲᑎᖅᓱᐃᓪᓗᑕ ᑮᓇᐅᔭᖅᑎᒍᑦ ᐃᑲᔫᑎᑦᓴᓂᒃ ᓄᓇᕗᒻᒥᐅᑦ ᐊᑲᕐᕆᔮᕈᓐᓃᖁᓇᒋᑦ ᑮᓇᐅᔭᖅᑎᒍᑦ ᑕᒪᓐᓇ ᐱᓪᓗᒍ.
- ᐃᓅᖃᑎᒌᓂ ᐅᖓᓯᒌᖃᑎᒌᖃᑦᑕᕐᓗᓯ ᐊᒡᒐᓯᓗ ᐅᐊᓴᐃᓐᓇᖃᑦᑕᕐᓗᒋᑦ ᐃᑲᔪᕐᓂᖃᕈᓐᓇᒻᒪᕆᑦᑐᖅ ᓱᒃᑲᐃᓪᓕᒋᐊᖅᑎᑦᓯᓂᕐᒥᒃ ᐊᐃᑦᑐᕐᓘᑎᑕᐅᒍᓐᓇᕐᓂᖓᓄᑦ ᖃᓂᒪᓐᓇᖅ COVID-19, ᐊᒥᓱᕋᔭᐅᒐᓗᐊᕈᑦᓯ ᐃᓪᓗᒥᐅᖃᑎᒌᑦ.
- ᑕᒪᓐᓇ ᑕᖃᓇᖅᑐᖅ ᐃᓱᒫᓗᓐᓇᖅᑐᓂ, ᐊᕝᕕᐊᕈᑎᐅᓪᓗᓂ ᑭᒃᑯᓕᒫᓄᑦ, ᑭᓯᐊᓂ ᐊᑕᖏᖅᑐᑕ ᐃᑲᔪᕈᓐᓇᖅᑐᒍᑦ ᓯᐊᕐᒪᐸᓪᓕᐊᖁᓇᒍ ᖃᓂᒪᓐᓇᖅ COVID-19. ᐊᖏᕐᕋᖅᓯᒪᑐᐃᓐᓇᖃᑦᑕᕐᓗᓯ ᐃᖅᑲᓇᐃᔭᙱᒃᑯᑦᓯ, ᖃᓄᐃᑦᑑᔮᙱᒃᑲᓗᐊᕈᕕᑦ.
- ᑭᒃᑯᓕᒫᓂᑦ ᐃᑲᔪᖅᑎᐅᓪᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᕗᑦ ᐃᖅᑲᓇᐃᔭᖅᑎᓕᒫᕗᓪᓗ ᒪᑐᐃᖓᑐᐃᓐᓇᕐᓕᑦ ᐊᐅᓚᑦᓯᑐᐃᓐᓇᕐᓗᑎᓪᓗ - ᖁᔭᓐᓇᒦᒃ!
- ᑐᙵᓇᕐᓂᖅ ᐅᑕᖅᑭᑦᓯᐊᕈᓐᓇᕐᓂᕐᓗ ᐱᒻᒪᕆᐅᕗᖅ ᖁᔭᒋᔭᐅᓪᓗᓂᓗ ᒫᓐᓇ, ᑕᐃᒪᙵᓕᒫᖅ ᐱᓂᖅᐹᖑᓪᓗᓂ.
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
- ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᖃᑎᖃᖅᑐᑦ ᐋᓐᓂᐊᓯᐅᖅᑎᓄᑦ ᓇᖕᒥᓂᖁᑎᒋᔭᐅᔪᓂᒃ ᐋᖅᑭᑦᓱᐃᓂᕐᒧᑦ ᓇᓪᓕᐅᒃᑯᒫᖃᕐᓂᒃᑯᑦ ᐸᕐᓇᐅᑎᓕᐅᕐᓂᕐᒧᑦ ᐃᑲᔪᕈᑕᐅᒐᔭᖅᑐᓂᒃ ᐱᔭᑦᓴᖃᓗᐊᓕᕐᓂᖅᑲᑕ ᐋᓐᓂᐊᕐᕕᓐᓂ.
- ᑐᐊᕕᕐᓇᙱᑦᑐᓕᒫᑦ ᑐᑦᓯᕋᐅᑏᑦ ᐅᓪᓗᑕᒫᑦ ᓇᓪᓕᐊᑦ ᓯᕗᓪᓕᐅᔾᔭᐅᒋᐊᖃᕐᒪᖔᑕ ᓇᓗᓇᐃᔭᖅᑕᐅᖃᑦᑕᕐᓂᐊᖅᑐᑦ. ᐊᑐᐃᓐᓇᖃᑲᐅᑎᒋᓂᖅ ᑐᐊᕕᕐᓇᖅᑐᒃᑯᑦ ᐋᓐᓂᐊᕐᕕᓕᐊᕈᓐᓇᕐᓂᖅ ᐊᑐᐃᓐᓇᐅᓂᐊᖅᑐᑦ ᐃᑲᕐᕋᐃᑦ 24 ᐅᓪᓗᑕᒫᑦ, ᐅᓪᓗᐃᑦ 7 ᐱᓇᓱᐊᕈᓯᑕᒫᑦ.
- ᐃᖃᓗᓐᓂ, ᑐᐊᕕᕐᓇᙱᑦᑐᓄᑦ ᖃᓄᐃᒍᑎᖃᖅᑐᑦ ᐅᖄᓚᖅᑳᖃᑦᑕᕐᓗᑎᒃ ᐅᐸᒍᑎᓚᐅᙱᓐᓂᖏᓐᓂ ᕿᑭᖅᑕᓂ ᐋᓐᓂᐊᕐᕕᐊᓗᒻᒧᑦ.
- ᓄᓇᓕᓕᒫᓂ, ᑐᐊᕕᕐᓇᙱᑦᑐᒃᑯᑦ ᖃᓄᐃᒍᑎᖃᖅᑐᑦ ᐅᖄᓚᖅᑳᖃᑦᑕᕐᓗᑎᒃ ᐅᐸᒍᑎᓚᐅᙱᓐᓂᖏᓐᓂ ᐋᓐᓂᐊᕐᕕᒻᒧᑦ. ᐅᖄᓚᐅᑎᒃᑯᑦ ᐊᐱᖅᓱᖅᑕᐅᓗᑎᑦ ᖃᐅᔨᓴᖅᑕᐅᒐᔭᖅᑐᑎᑦ.
- ᓘᑦᑖᑦ ᓄᓇᓕᓐᓄᑦ ᓱᓕ ᐳᓚᕋᖃᑦᑕᖅᑐᑦ.
- ᐃᓱᒪᓕᕆᓂᕐᒧᑦ ᐱᔨᑦᓯᕋᐅᑎᐅᔪᑦ ᐊᑐᐃᓐᓇᐅᔪᑦ.
ᐃᖅᑲᓇᐃᔭᖅᑐᓕᕆᔨᒃᑯᑦ
- ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑏᑦ ᐊᑦᑐᖅᑕᐅᓂᖃᖅᓯᒪᔪᑦ ᐃᓕᓐᓂᐊᕐᕕᑦ ᐸᐃᕆᕕᓪᓗ ᒪᑐᔭᐅᓯᒪᓂᖏᓐᓄᑦ ᐱᖓᓱᓂᒃ ᐱᓇᓱᐊᕈᓯᕐᓂᒃ ᑮᓇᐅᔾᔭᑦᓴᓗᑎᒃ ᕿᑲᕈᓐᓇᖅᑐᑦ (ᐊᓯᖏᑎᒍᓪᓘᓐᓃᑦ ᐋᖅᑭᐅᔾᔭᐅᓗᑎᒃ) ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑏᑦ
- ᐅᓪᓗᐃᑦ 14 ᓇᒻᒥᓂᖅ ᐊᓂᑦᑕᐃᓕᓗᑎᒃ ᑮᓇᐅᔾᔭᑦᓴᓗᑎᒃ ᕿᑲᕈᓐᓇᖅᑐᑦ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᓕᒫᖏᓐᓄᑦ ᐃᑉᐱᓐᓂᐊᒍᑎᒃ ᖃᓂᒪᓐᓇᑎᑐᑦ ᖃᓄᐃᒍᑎᐅᔪᓂᒃ ᐅᕝᕙᓘᓐᓃᑦ ᐅᖃᐅᑎᔭᐅᒋᐊᖅᑐᑦ ᓇᒻᒥᓂᖅ ᐊᓂᑦᑕᐃᓕᒪᓗᑎᒃ ᐊᖏᕐᕋᒥᓐᓂ
- ᓄᓇᕗᑦ ᒐᕙᒪᒃᑯᖏᑦ ᖁᔭᓈᖅᓯᑲᐃᓐᓇᖅᓯᒪᔪᑦ ᓘᑦᑖᓂᒃ ᐋᓐᓂᐊᕐᕕᓕᐊᖅᑐᒥᓂᐅᓂᕐᒧᑦ ᓇᓗᓇᐃᒃᑯᑕᓂᒃ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᖏᓐᓄᑦ
- ᐃᓘᓐᓇᑎᒃ ᑲᑎᙵᓗᑎᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᒻᒪᑦᓴᔭᐅᒍᑏᑦ ᐃᓕᓐᓂᐊᕈᑏᓪᓗ ᓄᖅᑲᖅᑎᑕᐅᓯᒪᔪᑦ ᑭᖑᕙᕆᐊᖅᑕᐅᓯᒪᓪᓗᑎᓪᓘᓐᓃᑦ
- ᐃᓘᓐᓇᑎᒃ ᐱᒻᒪᕆᐅᙱᑦᑐᑦ ᐃᖅᑲᓇᐃᔭᕆᐊᕐᓗᑎᒃ ᐊᐅᓪᓚᖃᑦᑕᕐᓂᐅᔪᑦ ᓄᖅᑲᖓᑎᑕᐃᑦ
ᐃᓄᓕᕆᔨᒃᑯᑦ
- ᑐᑦᓯᕋᖅᑐᒍᑦ ᐃᓘᓐᓇᑎᒃ ᐃᓄᓕᕆᔨᒃᑯᓐᓂᒃ ᐃᑲᔫᓯᐊᖅᑖᐸᑦᑐᑦ, ᐃᖅᑲᓇᐃᔮᑦᓴᖅᓯᐅᖅᑎᓄᑦ ᐊᒻᒪᓗ ᐃᓚᒌᓄᑦ ᐃᑲᔪᖅᑕᐅᕙᑦᑐᑦ ᐅᖄᓚᖃᑦᑕᕆᐊᓖᑦ ᐃᓂᑦᓴᓕᐅᕐᓗᑎᒃ, ᐅᐸᒍᑎᙱᖔᕐᓗᑎᒃ ᐊᓪᓚᕝᕕᑦᑎᓐᓄᑦ.
- ᐃᑲᔪᖅᑕᐅᒍᒪᔪᓕᒫᑦ ᐅᖄᓚᖅᑳᖃᑦᑕᕆᐊᓖᑦ ᐃᓂᑦᓴᓕᐅᕐᓗᑎᒃ ᖃᖓᒃᑯᑦ ᓯᕿᕐᖑᔭᖅ ᐅᓪᓗᖓᓂᓪᓗ ᐊᒥᓲᓗᐊᖅᑐᓂᒃ ᑲᑎᖃᑦᑕᖁᔨᒐᑕ ᐅᑕᖅᑭᕕᐅᔪᓂ.
- ᓇᓗᓇᐃᖅᓯᒐᓱᐊᖅᑐᒍᑦ ᑭᓱᑦ ᐊᑲᐅᓂᖅᐹᖑᒻᒪᖔᑕ ᐃᓕᓐᓂᐊᖅᑎᑦᑎᓐᓄᑦ ᖃᓪᓗᓈᓃᑦᑐᓄᑦ, ᑎᓕᔭᐅᓯᒪᒐᑦᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖏᔪᖅᑳᖓᓄᑦ.
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
- ᑎᑭᑉᐸᑦᑐᑦ ᓄᓇᕗᒻᒧᑦ ᖃᖓᑕᔫᒃᑯᑦ ᖃᑦᓰᓐᓇᕈᖅᐹᓪᓕᖅᓯᒪᔪᒻᒪᕇᑦ. ᖃᖓᑕᔫᓕᕆᔩᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᒌᑦᓯᐊᖅᑐᑦ ᓂᐅᕕᐊᑦᓴᐃᑦ ᑎᑭᑎᑕᐅᕙᑦᑐᑦ ᒪᑐᐃᖓᐃᓐᓇᖁᓪᓗᒋᑦ ᓂᖀᓪᓗ ᐊᓯᖏᓪᓗ ᓱᓇᒃᑯᑖᑦ ᑎᑭᑎᑕᐅᖏᓐᓇᖁᓪᓗᒋᑦ.
- ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᑦᓯᐊᖅᑐᑦ ᐅᔭᕋᕐᓂᐊᖅᑎᒃᑯᓐᓂᒃ ᖃᐅᔨᓴᖅᐸᓪᓕᐊᓪᓗᑎᒃ ᐊᐅᓚᑕᖏᓐᓂᒃ. ᒫᓐᓇᐅᔪᖅ, ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᖃᖅᑐᑦ ᐊᑐᐊᒐᖃᖅᑎᑦᓯᒋᐊᖃᕐᓂᕐᒥᒃ ᒪᓕᑦᑕᐅᒋᐊᓕᓐᓂᒃ ᖃᐅᔨᒪᓪᓗᑎᓪᓗ ᐊᑐᓂᑦ ᐅᔭᕋᕐᓂᐊᕐᕕᑦ ᐊᐅᓚᑕᐅᔪᑦ ᐃᓱᒪᓕᐅᕈᑎᖃᕆᐊᖃᖅᓯᒪᔪᑦ ᒪᓕᑦᑐᒋᑦ ᐊᐅᓚᒋᐊᖃᖅᑕᖏᓐᓂᒃ.