ᐅᔾᔨᖅᓱᕆᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ ᓴᒡᓗᕿᑦᑎᔪᓂᑦ
ᑭᖑᓪᓕᖅᐹᒥᒃ ᓄᑖᙳᕆᐊᖅᑎᑕᐅᓚᐅᖅᑐᖅ ᐱᖓᔪᐊᑦ, ᒫᔾᔨ 6, 2024
ᓄᓇᕗᑦ ᒐᕙᒪᖓ (GN) ᖃᐅᔨᒪᖁᔨᔪᑦ ᒫᓐᓇᓕᓵᒥᑦ ᓴᒡᓗᕿᑦᑎᔪᖃᓚᐅᖅᑎᓪᓗᒍ ᐃᓕᑳᓕᐊᖑᔪᒥᑦ ᐃᑭᐊᕿᕕᒃᑯᑦ ᐱᔾᔪᑎᖃᖅᖢᓂ 2024−ᒥ ᐅᑭᐅᖅᑕᖅᑐᒥᑦ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥᑦ (AWG).
ᐃᑭᐊᕿᕕᒃᑯᑦ ᐱᕋᔭᒃᒍᑕᐅᓪᓗᓂ ᐱᑎᑦᑎᓂᐊᕐᓂᕋᖅᓯᒪᔪᖅ ᐱᙳᐊᕕᒡᔪᐊᖅᑐᓂᑦ ᑕᕐᕆᔭᒐᒃᓴᓂᑦ ᐅᑭᐅᖅᑕᖅᑐᒥᑦ ᐅᑭᐅᒃᑯᑦ ᐱᙳᐊᕕᒡᔪᐊᖅᑎᓪᓗᒋᑦ ᐊᑭᖃᖅᑐᒥᑦ ᐊᒻᒪ ᐊᐱᖅᓱᖅᖢᓂ ᐃᓕᖕᓅᖓᔪᓂᑦ ᑐᓴᖅᑕᐅᔭᕆᐊᖃᙱᑦᑐᓂᑦ. ᑖᓐᓇ ᐱᓇᔪᒃᑕᐅᔪᖅ ᑎᒡᓕᒃᑕᐅᓗᓂ ᐃᓕᖕᓅᖓᔪᑦ ᑐᓴᖅᑕᐅᔭᕆᐊᖃᙱᑦᑐᓂᑦ, ᐱᖃᓯᐅᑎᓗᒋᑦ ᐊᑭᓕᒃᓴᓂᒍᓐᓇᐅᕈᑎ ᐊᐅᒃᑕᔫᖅ, ᐱᑎᑦᑎᔪᓐᓇᖅᑐᖅ ᑭᓇᐅᓂᕐᒥᓂᒃ ᑎᒡᓕᒃᑕᐅᒍᔾᔨᓂᖅ ᐊᒻᒪ ᐱᕋᔭᒃᑐᓄᑦ ᐊᑭᓕᒐᒃᓴᙳᖅᑎᑕᐅᓗᓂ.
ᐱᓂᕐᓗᒃᑕᐅᒍᕕᑦ ᖃᕋᓴᐅᔭᒃᑯᑦ ᐱᕋᔭᒃᑕᐅᓂᕐᒧᑦ ᓄᓇᕗᒻᒥ ᒐᕙᒪᒃᑯᑦ ᐱᖁᔨᔪᖅ ᐃᕐᖐᓐᓇᖅ ᐅᖃᐅᓯᕆᓗᒍ ᖃᓄᐃᔾᔪᑎᒋᓚᐅᖅᑕᑦ ᐸᓖᓯᒃᑯᓐᓄᑦ ᐱᕋᔭᒃᑕᐃᓕᒪᑎᑦᑎᔨᒧᑦ ᐅᕗᖓ 1-888-495-8501.
ᖃᕆᑕᐅᔭᒃᑯᑦ ᑕᑯᒃᓴᐅᑎᑕᐅᖃᑦᑕᖅᑐᖅ ᐅᑭᐅᖅᑕᖅᑐᒥᑦ ᐅᑭᐅᒃᑯᑦ ᐱᙳᕕᔾᔪᐊᕐᓂᐅᔪᓂᑦ ᑭᒃᑯᑐᐃᓐᓇᕐᓄᑦ ᐊᑭᖃᙱᑦᑐᒥᑦ. ᓄᓇᕗᒻᒥᐅᑦ ᑕᕐᕆᔭᕈᓐᓴᖅᑐᑦ ᓴᖅᑭᔮᑲᐅᑎᒋᔪᒃᑯᑦ ᖃᐅᔨᒋᐊᕐᓗᓂ www.awg2024.org/livestream.