ᐊᖏᕐᕋᓕᓂᕐᒧᑦ ᓄᓇᓕᓐᓂᓗ ᑲᒪᔨᐅᔪᓄᑦ ᐊᖓᔪᖅᑳᖓ

ᐅᓇ ᐃᖅᑲᓇᐃᔮᒃᓴᖅ ᑭᒃᑯᑐᐃᓐᓇᓄᑦ ᐱᓇᔪᒍᒪᔪᓄᑦ ᒪᑐᐃᖓᔪᖅ.

ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ, ᐃᖅᑲᓇᐃᔭᕐᕕᑦᑎᐊᕙᐅᓛᖑᓂᖓᓄᑦ  ᒪᒃᑯᒃᑐᓄᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓵᓚᐅᖅᑐᓂᑦ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᒃᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᑦ ᐆᒻᒪᕆᒃᑐᖅ, ᐱᔪᒪᓂᖃᑦᑎᐊᖅᑐᑦ, ᐊᖏᖅᓯᒪᑦᑎᐊᖅᖢᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ.  ᒐᕙᒪᐅᑎᓪᓗᑕ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓂᕐᒧᑦ ᐃᓄᐃᑦ ᐱᖅᑯᓯᖏᓐᓂᒃ, ᓴᖅᑭᔮᖅᑎᑦᑎᓂᕐᒧᑦ ᐃᓄᒃᑐᑦ ᐅᖃᐅᓯᖓᓐᓂᑦ, ᑭᒡᒐᖅᑐᐃᑦᑎᐊᕐᓂᕐᒧᑦ ᒐᕙᒪᒃᑯᓐᓂᑦ ᐃᖅᑲᓇᐃᔭᖅᑎᓂᒃ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᑲᔪᓯᑎᑦᑎᓂᕐᒧᑦ ᐊᖏᖅᓯᒪᓂᕆᔭᖓᓂᑦ ᓄᓇᕗᒻᒧᑦ. ᐃᖅᑲᓇᐃᔮᖅᑖᖅᑐᑦ ᐊᑭᓕᖅᓱᖅᑕᐅᑦᑎᐊᕐᓂᐊᖅᑐᑦ, ᐋᓐᓂᐊᕐᕕᖕᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᓂᑦ, ᓇᓗᓇᐃᔭᖅᑕᐅᓯᒪᔪᓂᑦ ᐃᓐᓇᖅᓯᐅᑎᒃᓴᓄᑦ ᐃᑲᔫᑎᒃᓴᓂᑦ, ᓅᑕᐅᓂᕐᒧᑦ ᐱᔪᓐᓇᐅᑎᓂᑦ ᐃᓕᓐᓂᐊᕈᓐᓇᖅᑎᑕᐅᓗᓂ ᐃᖅᑲᓇᐃᔮᒥᓪᓗ ᖁᕝᕙᖅᐸᓪᓕᐊᓗᓂ.

ᑐᓴᖅᑎᑦᑎᕙᒡᓗᓂ ᐊᖏᕐᕋᓕᕆᔨᑦ ᓄᓇᓕᖕᓂᓗ ᑲᒪᔨᐅᔪᑦ ᐊᖓᔪᖅᑳᖓᓄᑦ ᐱᓕᕆᖃᑎᖃᕐᓗᓂᓗ ᐋᓐᓂᐊᖃᕐᓇᙱᑦᑐᓕᕆᔨᑦ ᐱᓕᕆᐊᖑᕙᒃᑐᑦ ᐊᖓᔪᖅᑳᖓᓂ ᐊᒻᒪᓗ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᑦ ᐃᓗᐊᖅᓴᐃᔨᖏᓐᓂ, ᑖᓐᓇ ᐊᖓᔪᖅᑳᕆᔭᐅᔪᖅ ᐊᖏᕐᕋᓕᕆᓂᕐᒧᑦ ᓄᓇᓕᓐᓂᓗ ᑲᒪᔨᐅᔪᓄᑦ ᓴᖅᑭᑎᑦᑎᕙᒃᐳᖅ ᐃᓗᐊᖅᓴᐃᔨᓄᑦ ᑲᒪᔨᐅᔪᓂᑦ ᐃᑲᔪᖅᑐᐃᔨᓪᓗ ᐱᔨᑦᑎᕋᐅᑎᖏᓐᓂᒃ ᑭᒃᑯᑐᐃᓐᓇᓄᑦ ᐃᓅᓯᓕᒫᒥᓂ ᐊᖏᕐᕋᖅᓯᒪᐃᓐᓇᖁᓪᓗᒋᑦ ᐱᐅᓛᒃᑯᓪᓗ ᐊᐅᓚᔪᓐᓇᑦᑎᐊᖁᓪᓗᒋᑦ ᐱᓕᕆᐊᕆᕙᒃᑕᖏᓐᓂ ᖃᐅᑕᒫᑦ ᐃᓅᓯᕐᒥᓂ.

ᐊᖏᕐᕋᓕᕆᔨᑦ ᓄᓇᓕᖕᓂᓪᓗ ᐊᖓᔪᖅᑳᕆᔭᐅᔪᖅ ᖃᐅᔨᓴᖃᑦᑕᕐᓂᐊᖅᐳᖅ ᑲᒪᒋᔭᐅᔪᑦ ᖃᓄᐃᓕᕐᓂᖏᓐᓂᒃ ᐊᖏᕐᕋᓕᕆᔨᓄᑦ ᓄᓇᓕᖕᓂᓪᓗ ᑲᒪᒋᔭᐅᕙᒃᑐᓄᑦ ᐃᓂᑖᖅᑎᑕᐅᔪᓄᑦ. ᐋᖅᑭᓱᐃᕙᒃᖢᓂ, ᐋᖅᑭᒋᐊᖅᓯᕙᒃᖢᓂ, ᐊᑐᓕᖅᑎᑦᑎᕙᒃᖢᓂᓗ ᑲᒪᒋᔭᐅᔪᓄᑦ ᐸᕐᓇᐅᑎᖓᓂ ᐃᓄᒃ ᖃᐅᔨᓴᖅᑕᐅᔭᕆᐊᓕᒃ ᒪᓕᒡᓗᒍ ᐃᖢᐊᖅᓴᐅᑎᒋᖁᔭᐅᔪᓪᓗ ᒪᓕᒡᓗᒋᑦ. ᐊᖏᕐᕋᓕᕆᔨᑦ ᓄᓇᓕᖕᓂᓗ ᑲᒪᔨᐅᔪᑦ ᐊᖓᔪᖅᑳᖓ ᑲᒪᒋᔭᖃᓲᖅ, ᐱᓕᒻᒪᒃᓴᐃᕙᒃᖢᓂ ᐊᐅᓚᑦᑎᕙᒃᖢᓂᓗ ᐊᖏᕐᕋᓕᕆᔨᑦ ᓄᓇᓕᖕᒥᓗ ᑲᒪᔨᐅᔪᑦ ᐃᖅᑲᓇᐃᔭᖅᑎᖏᓐᓂ ᐱᓕᕆᐊᒃᓴᖃᖅᑎᑕᐅᔪᓂᑦ ᓄᓇᓕᖕᓂ.

ᖃᐅᔨᒪᔭᕆᐊᓕᖏᑦ, ᐊᔪᙱᑦᑕᕆᐊᓕᖏᑦ ᐊᒻᒪ ᐱᓕᕆᔪᓐᓇᕆᐊᓕᖏᑦ ᐃᖅᑲᓇᐃᔮᒥᓄᑦ ᐱᔭᐅᓯᒪᓕᕋᔪᒃᑐᑦ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᒥᑦ, ᐊᕐᕌᒍᓄᓪᓗ ᑕᓪᓕᒪᓄᑦ ᐃᖢᐊᖅᓴᐃᔨᐅᖃᑦᑕᖅᓯᒪᓗᓂ. ᐊᑕᐅᓯᕐᒥ ᐊᕐᕌᒍᒥ ᐊᖓᔪᖅᑳᖑᖃᑦᑕᖅᓯᒪᓗᓂ ᐊᑕᐅᓯᕐᒥᓪᓗ ᐊᕐᕌᒍᒥ ᐱᓕᕆᖃᑦᑕᖅᓯᒪᓗᓂ ᐊᖏᕐᕋᓕᕆᔨᑦ ᓄᓇᓕᖕᓂᓗ ᑲᒪᔨᐅᓂᕐᒥᒃ. ᐃᓕᓐᓂᐊᖅᑕᒥᓂᒃ ᐊᓂᒍᐃᔪᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᓗᐊᖅᓴᐃᔨᙳᕆᐅᖅᓴᔪᑦ, NCLEX−ᒥ ᐊᓂᒍᐃᓚᐅᖅᑐᑦ ᖃᐅᔨᓴᖅᑕᐅᔾᔪᑎᓂᒃ, ᐊᑎᓕᐅᖅᑕᐅᓯᒪᓪᓗᑎᒡᓗ ᓄᓇᕗᒻᒥ ᐃᓕᓐᓂᐊᖅᑕᒥᓂᒃ ᐊᓂᒍᐃᔪᑦ ᐃᓗᐊᖅᓴᐃᔨᙳᕆᐅᖅᓴᔪᑦ ᐱᓕᕆᐊᖓᓂ ᐃᓱᒪᒋᔭᐅᓂᐊᕐᒥᔪᑦ. ᐃᖅᑲᓇᐃᔮᖅᑖᕋᓱᒃᑐᑦ ᐊᑎᓕᐅᑕᐅᔪᓐᓇᕆᐊᓖᑦ ᐋᓐᓂᐊᓯᐅᖅᑎᑦ ᑲᑐᔾᔨᖃᑎᒌᖏᓐᓄᑦ ᓄᓇᑦᓯᐊᒥ ᓄᓇᕗᒻᒥᓗ. ᐃᖅᑲᓇᐃᔮᓕᒃ ᐊᖁᑦᑐᓐᓇᐅᑎᖃᕆᐊᓕᒃ. ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᖏᑲᓗᐊᕐᒪᖔᖅ ᖃᐅᔨᓴᖅᑕᐅᔭᕆᐊᖃᕆᓪᓗᓂ.

ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᔭᕆᐊᓕᒃ ᐃᖅᑲᓇᐃᔮᖅᑖᕋᓱᒃᑐᖅ. ᑐᓐᓂᖅᑯᑎᒋᓗᒍ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᒧᑦ ᓇᓗᓇᐃᒃᑯᑕᐃᑦ ᐃᖅᑲᓇᐃᔮᖅᑖᕋᓱᒍᑎᒋᔭᕐᓄᑦ.

ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑐᑦ, ᖃᓪᓗᓈᑐᑦ ᐅᐃᕖᑐᓪᓗ. ᐱᓇᔪᒃᑐᑦ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑎᑎᕋᕈᓐᓇᖅᑐᖅ ᓂᕈᐊᕆᔭᒥᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ. ᐅᖃᕈᓐᓇᖅᐸᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐅᖃᐅᓯᕐᓂᑦ ᐃᑲᔫᑎᖃᑦᑎᐊᕋᔭᖅᑐᖅ. ᐃᓄᐃᑦ ᓄᓇᓕᖏᓐᓂ, ᐃᓕᖅᑯᓯᖓᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᐃᓄᒃᑐᑦ ᖃᐅᔨᒪᒍᓂ ᐱᓕᕆᖃᑦᑕᖅᓯᒪᓗᓂᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.

ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᖅ ᑖᔅᓱᒧᖓ ᐃᖅᑲᓇᐃᔮᕐᒧᑦ. ᑎᓕᐅᕆᒃᑲᓐᓂᖅᑐᒍᑦ ᐱᓇᔪᖁᔨᓪᓗᑕ ᐃᓕᖕᓂᑦ ᑕᐃᒪᓐᓇᑎᒋ ᐊᕐᕌᒍᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᒍᕕᑦ ᐃᓕᓐᓂᐊᖅᓯᒪᔭᕆᐊᓕᑦ ᐱᓕᕆᖃᑦᑕᖅᓯᒪᔭᕆᐊᓕᓪᓗ ᐊᔾᔨᖓᓂ ᖁᓛᓂᑦ ᑎᑎᕋᖅᓯᒪᔪᓂᑦ.

ᐃᖅᑲᓇᐃᔭᐃᓐᓇᖅᑐᓄᑦ, ᐊᑕᐃᓐᓇᕐᓂᐊᖅᑐᓄᑦ ᐃᓗᐊᖅᓴᐃᔨᓄᑦ, ᐃᖅᑲᓇᐃᔮᖃᐃᓐᓇᖅᑐᑦ ᐊᑭᓕᖅᑕᐅᒃᑲᓐᓂᖃᑦᑕᕐᓂᐊᖅᐳᑦ: $5,000 ᐃᖅᑲᓇᐃᔮᒥ ᐱᒋᐊᓕᓵᖅᑎᓪᓗᒋᑦ, $5,000 ᑕᖅᑭᓄᑦ 18−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ ᐊᒻᒪ $10,000 ᑕᖅᑭᓄᑦ 30−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ. ᐃᓚᓕᐅᔾᔭᐅᓯᒪᔪᑦ ᐊᑭᓕᐅᑎᑦ ᐃᓚᖃᖅᐳᑦ $9,000 ᐊᕐᕌᒍᑕᒫᑦ ᐃᓄᖕᓄᑦ ᐱᔨᑦᑎᕋᖅᑎᐅᓂᕐᒧᑦ ᐃᑲᔫᑕᐅᕙᒃᑐᒥᑦ ᐊᒻᒪ $375 ᑕᖅᑭᑕᒫᑦ ᐃᖅᑲᓇᐃᔮᖃᐃᓐᓇᕐᓂᕐᒧᑦ ᑐᓂᔭᐅᒃᑲᓐᓂᖅᐸᒃᑐᖅ ᑲᑎᓕᒫᖅᖢᒍ $4,500 ᐊᕐᕌᒍᓕᒫᒧᑦ.

ᐊᔪᙱᑎᑕᐅᔪᓐᓇᕐᓂᕐᒧᑦ ᓇᓗᓇᐃᖅᓯᒪᔪᑦ ᓴᖅᑭᑕᐅᑐᐃᓐᓇᕆᐊᓖᑦ ᐃᓐᓄᒃᓯᒪᙱᑦᑐᑦ ᓯᕗᓂᒃᓴᒥ ᐃᓐᓄᒍᓐᓇᖁᓪᓗᒋᑦ.

ᐱᓇᔪᒍᒪᒍᕕᑦ ᐃᖅᑲᓇᐃᔮᒃᓴᒧᑦ, ᓇᒃᓯᐅᑎᓗᒍ ᐃᕐᖐᓐᓈᖅᑕᐅᒃᑯᑦ ᑎᑎᖅᑲᖃᕐᓗᓂᓗ ᐃᖅᑲᓇᐃᔭᖅᑖᕋᓲᑎᑦ ᐅᕗᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᑎᑎᕋᕐᕕᐅᔪᓐᓇᖅᑐᒥ ᐃᕐᖐᓐᓈᖅᑕᐅᒃᑯᑦ.

• ᓄᓇᕗᑦ ᒐᕙᒪᒃᑯᖏᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᓂᕐᒥᑦ ᐃᖅᑲᓇᐃᔭᖅᑎᓂᒃ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᖕᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᒪᓕᒡᓗᒍ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᐃᑦ.
• ᒐᕙᒃᑯᓐᓂ ᓄᓇᕗᒻᒥ ᐃᖅᑲᓇᐃᔭᖅᑏᑦ ᖃᐅᔨᓴᖅᑕᐅᓂᕐᒦᑦᑐᑦ ᐱᔭᕆᐊᖃᖅᑐᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓐᓂᑦ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ. 
• ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᑦ ᐊᔪᓕᕈᑕᐅᙱᑐᐃᓐᓇᕆᐊᓕᑦ ᐆᒃᑐᕐᓂᕆᔭᖏᑦ ᐃᓱᒪᒋᔭᐅᓂᖏᓐᓄᑦ. ᖃᐅᔨᓴᖅᑕᐅᓂᖏᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐱᓕᕆᐊᒃᓴᕆᔭᐅᔪᑦ ᐃᖅᑲᓇᐃᔮᒃᓴᒥ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᓈᒻᒪᒋᔭᐅᔪᓂᒃ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᓄᑦ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ. 
• ᐃᖅᑲᓇᐃᔭᖅᑖᕋᓱᒃᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᓂᑦ ᓄᓇᕗᒻᒥ.
• ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
• ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ.  ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᓱᐊᖅᑕᑦ ᐋᒃᑳᖅᑕᐅᑐᐃᓐᓇᕆᐊᓕᒃ.