ᐊᐅᓚᑦᑎᔨ, ᑮᓇᐅᔭᕆᔭᐅᓂᐋᑦᑐᓂᑦ ᐊᒻᒪᓗ ᑮᓇᐅᔭᓕᕆᓂᒻᒥ ᐸᕐᓇᖕᓂᕐᒥ

ᑖᓐᓇ ᐃᖅᑲᓇᐃᔮᒃᓴᖅ ᒪᑐᐃᖓᔪᖅ ᐆᒃᑐᕈᒪᔪᓕᒫᓄᑦ.

ᓄᓇᕗᑦ ᒐᕙᒪᖓᑦ ᓂᕈᐊᕐᑕᐅᓚᐅᕐᓯᒪᒻᒪᑦ ᐃᓚᒋᔭᐅᓂᖏᓐᓄᑦ ᑲᓇᑕᒥ ᐊᔾᔨᒌᖏᑦᑐᓂᑦ ᐃᖅᑲᓇᐃᔭᕐᑎᖃᕈᓐᓇᕐᓂᖏᓐᓄᑦ, ᖁᑦᓯᓂᕐᐹᖑᓪᓗᓂ ᐃᓅᓱᑦᑐᓂᑦ ᐃᖅᑲᓇᐃᔭᕐᑎᖃᕐᓂᖏᓐᓄᑦ, ᐊᒻᒪ ᒫᓐᓇᓂᓴᕐᓂᑦ ᐃᓕᓐᓂᐊᕐᕕᒻᒥ ᐱᔭᕇᕋᑖᕐᓂᑯᓂᑦ 2023−ᖑᑎᓪᓗᒍ. ᓄᓇᕗᑦ ᐱᕙᓪᓕᐋᑎᑦᑎᓂᖅᐹᖑᖕᒪᑦ, ᐆᒻᒪᕆᒃᑑᓪᓗᓂ ᓄᓇᓕᖃᕐᕕᒃ, ᐃᒪᓐᓇᐅᔪᒪᓪᓗᓂ ᐱᐅᓂᖅᐹᖑᓕᕈᒪᓪᓗᓂ ᐃᓂᒋᔭᐅᔪᓐᓇᕋᔭᕐᓂᕐᒥ ᓯᕗᓂᒃᓴᒥ ᑭᖑᕚᕆᔭᐅᓂᐊᖅᑐᓄᑦ. ᒐᕙᒪᐅᓂᑦᑎᓐᓄᑦ, ᓴᙱᓂᖅᓴᐅᓕᖅᑎᑦᑎᕙᓪᓕᐊᒐᑦᑕ ᐊᔾᔨᐅᖏᑦᑐᖁᑎᑕ ᐋᖅᑭᒃᓯᒪᓂᖓᓂᑦ ᐊᐅᓚᑦᑎᓂᕐᒥ – ᐃᓚᓕᐅᔾᔨᓪᓗᓂᓗ ᐃᓄᐃᑦ ᐃᓅᖃᑎᒋᖕᓂᕐᒧᑦ ᐱᕕᐋᕐᓇᖅᑐᖁᑎᖏᓐᓂᑦ, ᐊᑐᖅᑕᐅᓂᖅᓴᐅᑎᑦᑎᓪᓗᓂ ᐃᓄᒃᑐᑦ ᐅᖃᓪᓚᒍᓯᖓᓂᑦ, ᐱᕙᒡᓗᓂ ᑭᒡᒐᖅᑐᐃᔪᒥᒃ ᒐᕙᒪᒃᑯᓐᓂ ᐱᔨᑦᓯᕈᑎᒥᒃ, ᐊᒻᒪᓗ ᐃᖃᓇᐃᔭᖃᑎᖃᓲᖑᓪᓗᑕ ᐱᓕᕆᖃᑎᒋᔭᑦᑎᓐᓂᑦ ᐱᔪᓐᓇᖅᓯᖁᓪᓗᒋᑦ ᐱᔭᐅᓂᐋᕐᓂᕋᒃᑕᐅᓯᒪᔪᓂᒃ ᓄᓇᕗᕐᒧᑦ. ᑲᔪᓯᑎᑕᐅᔪᑦ ᐃᖃᓇᐃᔭᖅᑖᕋᓱᐊᖅᑐᑦ ᖁᕕᐋᒋᔭᖃᕋᔭᖅᑐᑦ ᐱᐅᓚᒥᒃ ᑮᓐᓇᐅᔭᒃᓴᓂᕐᒥᑦ, ᐃᓅᓕᓴᐅᑎᓂ ᐊᒻᒪᓗ ᑭᒍᓐᓂᐋᖅᑕᐅᓂᕐᒧᑦ ᐃᑲᔪᖅᑕᐅᔾᔪᑎᓂᒃ, ᓇᓗᓇᐃᖅᑕᐅᓯᒪᓗᓂ ᐃᑲᔪᖅᑕᐅᔾᔪᑎ ᐃᑦᑐᐋᕿᓂᕐᒧᑦ ᐸᕐᓇᒍᑎ, ᓅᑦᑕᕆᐊᖃᑐᖃᑉᐸᑦ ᐱᔪᓐᓇᖅᑎᑕᐅᔾᔪᑎᓂᑦ ᐊᒻᒪᓗ ᐱᔪᓐᓇᖅᑎᑕᐅᓗᑎᒃ ᐊᔪᕈᓐᓃᖅᓴᓂᕐᒥᑦ ᐊᒻᒪᓗ ᐃᖃᓇᐃᔮᒥ ᐊᔪᖏᓐᓂᖅᓴᐅᓕᖅᐸᓪᓕᐋᓂᕐᒥᑦ.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᕝᕕᐅᕗᖅ ᓄᓇᕗᑦ ᒐᕙᒪᖓᓂ ᐱᔨᑦᑎᖅᖢᑎᒃ ᐃᒡᓗᓕᕆᓂᕐᒥᒃ ᐃᓄᒋᐊᒃᓯᕙᓪᓕᓂᖅᐹᖑᓪᓗᓂ ᐊᕐᕌᒍᑭᓐᓂᖅᐹᖑᓪᓗᑎᒡᓗ ᑲᓇᑕᒥ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᖓ ᓴᖅᑭᑎᑦᑎᓗᑎᒃ, ᐱᓕᕆᐊᖃᑎᖃᕐᓗᑎᒃ, ᐊᒻᒪᓗ ᐊᐅᓚᑦᑎᓗᑎᒃ ᓴᖅᑭᑕᐅᓯᒪᔪᓂᒃ ᓈᒻᒪᒃᑐᓂᒃ ᐊᑐᐃᓐᓇᐅᑎᑕᐅᔪᓂᒃ ᐃᒡᓗᒥᒃ ᐊᑐᖅᑐᐊᖅᑕᒥᓂᒃ ᐊᑭᓕᖅᓱᒐᒃᓴᐅᓂᖅᓴᐅᓗᑎᒃ ᐃᓚᒌᓄᑦ ᑭᓇᑐᐃᓐᓇᕐᒧᓪᓗ ᓄᓇᕗᒻᒥ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖃᖓᑦᑎᐊᖅ ᓄᓇᕗᒻᒧᑦ 3000 ᐸᕐᓇᒍᑎ, (www.igluliuqatigiingniq.ca) ᐱᓕᕆᖃᑎᒌᖕᓂᒃᑯᑦ ᒐᕙᒪᒃᑯᑎᒍᑦ ᐱᓕᕆᖃᑎᖏᓪᓗ ᓴᖅᑭᑎᑦᑎᓗᑎᒃ 3,000−ᓂᒃ ᓄᑖᓂᒃ ᐃᒡᓗᒋᔭᐅᔪᒃᓴᓂᒃ ᐱᓕᕆᐊᖑᐃᓐᓇᕋᔭᖅᖢᓂ 2030−ᒨᖓᓗᒍ.

ᐊᖓᔪᖅᑳᕆᓗᓂᐅᒃ ᐊᖓᔪᖅᑳᑉ ᑐᒡᓕᐊ, ᑮᓇᐅᔭᓕᕆᔨᒃᑯᓐᓄᑦ ᐊᒻᒪ ᐱᓕᕆᕝᕕᖕᒥ ᐊᐅᓚᑦᑎᓂᕐᒧᑦ ᐱᔨᑦᑎᕋᖅᑏᑦ, ᐊᐅᓚᑦᑎᔨ, ᑮᓇᐅᔭᕆᔭᐅᓂᐋᑦᑐᓂᑦ ᐊᒻᒪᓗ ᑮᓇᐅᔭᓕᕆᓂᒻᒥ ᐸᕐᓇᖕᓂᕐᒥ ᑲᒪᒋᔭᖃᕆᐊᖃᖅᑐᖅ ᐱᕙᓪᓕᐊᑎᑕᐅᓂᖏᓐᓄᑦ ᐊᐅᓚᑕᐅᓂᖏᓐᓄᓪᓗ ᐊᑭᓂᐅᔪᒧᑦ ᐊᑭᓂᐅᙱᑦᑐᒧᓪᓗ ᐊᑭᑐᔫᑎᓄᑦ ᐊᐅᓚᑦᑎᓂᕐᒧᓪᓗ ᐊᒻᒪᓗ ᒪᑭᒪᑎᑦᑎᓂᕐᒧᑦ ᐸᕐᓇᐃᓂᕐᒥᒃ, ᐱᕙᓪᓕᐊᑎᑦᑎᓂᕐᒥᒃ ᑮᓇᐅᔭᑦ ᐊᑐᖅᑐᒃᓴᑦ ᐋᖅᑭᒃᑕᐅᓯᒪᓂᖏᓐᓂᒃ ᐊᒻᒪᓗ ᑮᓇᐅᔭᓕᕆᓂᕐᒥᒃ ᐸᕐᓇᐃᖃᑦᑕᕐᓗᓂᒃ ᐃᒡᓗᓕᕆᔨᕐᔪᐊᒃᑯᓐᓄᑦ. ᐃᖅᑲᓇᐃᔮᖃᖅᑐᖅ ᐱᕙᓪᓕᐊᑎᑦᑎᓂᐊᖅᑐᖅ ᐊᐅᓚᑎᓪᓗᓂᒋᓪᓗ ᐃᒡᓗᓕᕆᔨᕐᔪᐊᒃᑯᑦ ᑮᓇᐅᔭᑦ ᐊᑐᖅᑐᒃᓴᑦ ᐋᖅᑭᒃᑕᐅᓯᒪᓂᖏᓐᓂᒃ ᐱᓕᕆᔾᔪᓯᐊᕆᖃᑦᑕᖅᑕᖏᓐᓂᒡᓗ ᐊᖏᔫᑎᓄᑦ ᐸᕐᓇᐃᓂᕐᒧᑦ ᐊᒻᒪᓗ ᐊᐅᓚᑦᑎᓂᕐᒧᑦ ᑮᓇᐅᔭᑦ ᐃᓯᖅᐸᓪᓕᐊᔪᑦ ᐊᒻᒪᓗ ᐊᑭᓕᖅᑕᐅᕙᓪᓕᐊᔪᑦ.

ᐊᑑᑎᖃᓂᖅᐹᑦ ᑲᒪᒋᔭᕆᓂᐋᑦᑕᖏᑦ ᐃᖃᓇᐃᔭᖅᑖᖅᑑᑉ ᐃᖃᓇᐃᔭᑕᕋᓱᐊᖃᑕᐅᓯᒪᔪᓂ ᐃᓚᖃᓂᐋᒻᒥᔪᑦ ᒪᑯᓂᖓ:

• ᐋᖅᑭᓱᐃᕙᓪᓗᓂ ᐊᕐᕌᒍᑕᒪᑦ ᑎᒥᖑᖅᑎᑕᐅᓯᒪᔪᑉ ᐊᑭᑐᔫᑎᑦ ᐸᕐᓇᒍᑎᖓᓂᒃ, ᐱᓕᕆᐊᖑᒍᒪᔪᓄᑦ ᐸᕐᓇᒍᑎᒥᒃ, ᐊᐅᓚᔾᔪᑎᓄᑦ ᐸᕐᓇᒍᑎᒥᒃ ᐊᒻᒪᓗ ᐱᓪᓗᐊᑕᓂᖏᓐᓂᒃ ᒥᒃᓴᐅᓴᑕᐅᓯᒪᔪᓂᒃ;
• ᐃᑲᔪᖃᑦᑕᕐᓂᖅ ᐊᖓᔪᖅᑳᓂᒃ ᐋᖅᑭᒃᓯᓂᖏᓐᓄᑦ ᐅᐸᓗᖓᐃᔭᐃᓂᕐᒧᑦ ᑐᕌᕈᑎᖏᑦ ᐸᕐᓇᐅᑎᖏᓪᓗ ᓴᓇᔭᐅᓂᖏᓐᓄᑦ ᐊᑯᓂᐅᔪᒧᑦ ᐊᑭᑐᔫᑎᓄᑦ ᐸᕐᓇᐃᓃᑦ;
• ᖃᐅᔨᓴᖅᓯᕙᓪᓗᓂ ᑐᒃᓯᕌᖑᓯᒪᔪᓂᒃ ᐊᑐᐋᒐᓐᓂᒃ ᐊᒻᒪᓗ ᖃᐅᔨᒐᓱᐋᑉᐸᓗᓂᒋᑦ ᑮᓇᐅᔭᓕᕆᓯᒪᔪᑦ ᖃᐅᔨᒪᔾᔪᑎᓴᐃᑦ ᐊᒻᒪᓗ ᐅᓂᒃᑳᓕᐊᖑᓯᒪᔪᑦ ᐃᓱᒪᓕᐅᕈᑎᒋᒐᓱᐋᓪᓗᓂᒋᑦ ᐊᑦᑐᐃᓂᖏᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑎᒥᖁᑖᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᐱᓪᓗᐊᑕᑦ ᒥᒃᓴᐅᓴᑕᐅᓯᒪᔪᓂ ᐊᒻᒪᓗ ᑮᓇᐅᔭᓕᕆᓯᒪᔪᑦ ᐊᒻᒪᓗ ᐊᑭᑐᔫᑎᑦ ᐸᕐᓇᒍᑎᖏᓐᓂᒃ;
• ᖃᐅᔨᒪᒋᐋᖅᐸᓪᓗᓂᒋᑦ ᑎᒥᖁᑎᐅᑉ ᑮᓇᐅᔭᓚᕆᑦ ᐊᐅᓚᑕᐅᓂᖏᑦ ᐊᒻᒪᓗ ᐊᑐᕈᒫᓂᐊᖅᑐᓕᐅᐸᓗᓂ ᐊᒥᐋᑯᓂᒃ ᑮᓇᐅᔭᓂᒃ; ᐊᒻᒪᓗ
• ᐋᖅᑭᓱᐃᕙᓪᓗᓂ ᐃᑲᔪᕈᑎᓂᒃ ᐊᒻᒪᓗ ᐱᔭᕇᓯᕙᓪᓗᓂ ᑕᒻᒪᖅᓯᒪᔪᖅᓯᐅᕈᑎᓂᒃ ᐊᒻᒪᓗ ᐅᓂᒃᑳᓕᐊᖑᓯᒪᒋᐊᖃᑐᓂᒃ.

ᖃᐅᔨᒪᓂᕆᔭᐅᔪᑦ, ᐱᓕᕆᑦᑎᐋᕈᓐᓇᓃᑦ, ᐊᒻᒪᓗ ᐱᓕᕆᒍᓐᓇᑦᑎᐋᕆᐊᖃᒻᒪᑕ ᑖᔅᓱᒧᖓ ᐃᖃᓇᐃᔭᒧᑦ ᐱᔭᐅᓲᖑᓪᓗᓂ ᒪᑯᑎᒎᓇ ᐃᓕᓴᕆᔭᐅᓯᒪᔪᒃᑯᑦ ᐃᓕᓐᓂᐋᖅᓯᒪᓂᖃᓪᓗᓂ ᓈᓴᐅᓯᕆᓂᒻᒥ, ᓇᒻᒥᓂᖁᑎᓂᒥᒃ ᐊᐅᓚᑦᑎᔨᐅᓂᒻᒥ, ᑮᓇᐅᔭᕆᔭᐅᓂᐋᑐᓕᕆᓂᒻᒥ, ᐅᕝᕙᓘᓐᓃᑦ ᑮᓇᐅᔭᓕᕆᓂᒻᒥ ᐊᒻᒪᓗ ᑎᓴᒪᓂᒃ (4) ᐊᕐᕌᒍᓂᒃ ᐃᖃᓇᐃᔭᓚᐅᖅᓯᒪᓗᓂ ᑮᓇᐅᔭᓕᕆᓂᒻᒧᑦ ᐸᕐᓇᓐᓂᒻᒥ. ᐃᖃᓇᐃᔭᖅᑎᓚᕆᐅᓗᓂ ᓈᓴᐅᓯᕆᓂᒻᒥ ᐱᓕᕆᐊᖃᖁᔭᐅᓗᓂ (ᓇᓗᓇᐃᒃᑯᑕᓕ ᒐᕙᒪᒃᑯᓐᓂ ᓈᓴᐅᓯᕆᔨ [CPA]) ᐃᓱᒪᒋᔭᐅᕗᖅ ᐃᑲᔫᑎᖃᕋᔭᕐᓂᖓ.

ᓈᒻᒪᒋᔭᐅᒐᔭᕐᒪᑕ ᐊᑕᐅᑦᑎᒃᑰᖅᓯᒪᒃᐸᑕ ᐃᓕᓐᓂᐊᖅᓯᒪᓂᖅ ᐊᒻᒪᓗ ᐃᖃᓇᐃᔭᖅᓯᒪᓂᑦ ᐃᓱᒪᒋᔭᐅᖃᓯᐅᑎᔪᓐᓇᕋᔭᕐᒥᔪᑦ ᑖᔅᓱᒧᖓ ᐃᖃᓇᐃᔭᒧᑦ. ᐃᓕᖕᓂᑦ ᑲᔪᖏᖅᓴᐃᕗᒍᑦ ᐃᖃᓇᐃᔭᖅᑖᕋᓱᐋᖁᓪᓗᑎᑦ ᐱᖃᑐᐋᕈᕕᑦ ᑕᐃᒪᓗᐊᐸᓘᖃᑎᖏᓐᓂᑦ ᐊᕐᕌᒍᓂ ᐃᓕᓐᓂᐊᖅᓯᒪᓂᖃᕈᕕᑦ ᐊᒻᒪᓗ/ᐅᕝᕙᓘᓐᓃᑦ ᐃᖃᓇᐃᔭᖅᓯᒪᓗᑎᑦ ᑕᐃᒫᓪᓗᐊᖃᑕᐅᓗᑎᒃ ᐃᓕᓐᓂᐊᖅᓯᒪᓂᕐᒧᑦ ᐊᒻᒪᓗ ᐃᖃᓇᐃᔭᖅᓯᒪᓂᕐᒧᑦ ᐱᔭᐅᓯᒪᖁᔭᐅᓪᓗᑎᒃ ᑎᑎᖅᑕᐅᓯᒪᔪᓂᑦ ᑕᑉᐸᒃᑯᓇᓃᑦᑐᓂᑦ.

ᐃᓕᓴᕆᔭᐅᓯᒪᔪᑦ ᐅᖃᐅᓯᓕᕆᓃᑦ ᓄᓇᕗᕐᒥ ᒪᑯᐊᖑᖕᒪᑕ ᐃᓄᒃᑐᑦ, ᖃᓪᓗᓈᑎᑐᑦ ᐊᒻᒪᓗ ᐅᐃᕕᒃᑯᑎᑐᑦ. ᐃᖃᓇᐃᔭᖅᑖᕋᓱᐋᖅᑐᑦ ᑐᓂᓯᔪᓐᓇᖅᐳᑦ ᐃᖃᓇᐃᔮᖅᑕᕋᓱᐊᕈᑎᒥᖕᓂᑦ ᓇᓪᓕᐋᓄᑐᐃᓐᓇᖅ ᐃᓕᓴᕆᔭᐅᓯᒪᔪᑦ ᐅᖃᐅᓯᓕᕆᓂᕐᒧᑦ ᓄᓇᕗᕐᒥ. ᐅᖃᕈᓐᓇᑦᑎᐊᕐᓗᓂ ᑎᑎᕋᕈᓐᓇᑦᑎᐊᕐᓗᓂᓗ ᐅᓄᕐᓂᖅᓴᐅᔪᒥ ᐊᑕᐅᓯᕐᒥ ᓄᓇᕘᑉ ᒪᓕᒐᑎᒍᑦ ᐊᑐᖅᑕᐅᖁᔭᐅᓯᒪᔪᑦ ᐅᖃᐅᓯᓂᑦ ᐃᓱᒪᒋᔭᐅᓇᔭᖅᐳᖅ ᐱᒻᒪᕆᐅᓂᖓᓂ. ᖃᐅᔨᒪᓗᓂ ᐃᓄᖕᓄᑦ ᓄᓇᓕᖕᓂᑦ, ᐃᓕᖅᑯᓯᖏᓐᓂᑦ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᐃᓄᒃᑐᑦ ᐊᒻᒪᓗ ᐃᖃᓇᐃᔭᖅᓯᒪᓗᓂ ᐃᖃᓇᔭᓪᓗᓂ ᐅᑭᐅᖅᑕᖅᑐᕐᒥ ᐊᔾᔨᒌᖏᑦᑐᓂᒃ−ᐃᓕᖅᑯᓯᓕᖕᓄᑦ ᐃᖃᓇᐃᔭᕐᕕᖕᒥ ᐃᓱᒪᒋᔭᐅᖃᓯᐅᑎᖕᒪᑕ ᐊᑑᑎᖃᓂᖏᓐᓂᑦ.

ᐱᔪᓐᓇᖅᑎᑕᐅᓂᕐᒧᑦ ᑎᑎᖅᓯᒪᔪᑦ ᓴᓇᔭᐅᔪᓐᓇᖅᓯᔪᓐᓇᖅᑐᑦ ᐃᓐᓄᒃᑕᐅᖁᓪᓗᒋᑦ ᒫᓐᓇ ᐊᒻᒪᓗ ᓯᕗᓂᒃᓴᒥ ᐃᖃᓇᐃᔭᖅᑎᖃᖏᑦᑐᖃᓕᕐᓂᖅᐸᑦ ᓇᓪᓕᐋᖕᓂᑐᐃᓐᓇᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑎᒥᖁᑖᓂ ᐃᓘᓐᓇᖏᓐᓂ ᓄᓇᓕᓕᒫᓂ.

ᑖᔅᓱᒥᖓ ᐃᖅᑲᓇᐃᔮᖅᑖᕈᒪᓐᓂᕈᕕᑦ, ᖃᕆᑕᐅᔭᒃᑯᑦ ᐃᕐᖐᓐᓈᕈᑎᒃᑯᑦ ᓇᒃᓯᐅᑎᔪᓐᓇᖅᑕᑦ ᑎᑎᖅᑲᓕᐊᑦ ᐃᖅᑲᓇᐃᔭᖅᑖᕋᓱᐊᕈᑎᒥᒡᓗ ᐅᕗᖓ @email. ᐃᓚᓕᐅᑎᓯᒪᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᖃᕆᑕᐅᔭᒃᑯᑦ ᐃᕐᖐᓐᓈᕈᑎᒃᑯᑦ.

• ᓄᓇᕗᑦ ᒐᕙᒪᒃᑯᑦ ᐱᓕᕆᔪᒪᖕᒪᑦ ᓴᕿᑎᑦᑎᔪᒪᓪᓗᓂ ᑭᒡᒐᖅᑐᐃᓂᕐᒧᑦ ᐃᖃᓇᐃᔭᖅᑎᐅᖃᑎᒌᓂᑦ; ᑕᐃᒪᐃᒻᒪᑦ, ᓯᕗᓪᓕᐅᑎᑕᐅᓇᓱᖕᓂᐋᖅᑐᑦ ᓄᓇᕗᑦ ᐃᓄᖏᑦ ᑕᐃᒃᑯᐊ ᓇᖕᒥᓂᖅ−ᓇᓗᓇᐃᖅᑐᑦ ᐊᑎᓕᐅᖅᑕᐅᓯᒪᓂᕋᕐᓗᑎᒃ ᓄᓇᕗᑦᑖᕈᑎᑦ ᐊᖏᖃᑎᒋᒍᑎᖏᓐᓂ ᒪᓕᒡᓗᒍ ᓯᕗᓪᓕᐅᑎᑕᐅᔭᕆᐊᖃᕐᓂᖏᓐᓄᑦ ᐃᖃᓇᐃᔭᓕᖅᑎᑦᑎᓂᕐᒧᑦ ᐊᑐᐊᒐᕐᒧᑦ.
• ᓄᓇᕗᑦ ᒐᕙᒪᒃᑯᑦ ᐃᖃᓇᐃᔭᖅᑎᖏᑦ ᐃᖃᓇᐃᔭᖅᑐᑦ ᖃᐅᔨᓴᖅᑕᐅᓗᑎᒃ ᐃᖃᓇᐃᔭᖅᑎᑕᐅᔪᑦ ᐱᔭᕆᐊᖃᒃᑎᑕᐅᕗᑦ ᐊᒻᒪᓗ ᑐᓂᓯᓗᑎᒃ ᑎᑎᕋᒃᓯᒪᔪᓂᒃ ᐱᓕᕆᔪᓐᓇᖅᑎᑦᑎᔾᔪᑎᓂᒃ ᑐᖓᓂᖅ ᓂᐊᖁᕆᔭᐅᔪᒦᙵᕐᓗᑎᒃ ᐃᖃᓇᐃᔭᖅᑎᑦᑎᔨᒋᔭᖏᓐᓅᕐᓗᑎᒃ ᐱᓕᕆᕕᖕᒧᑦ. ᐱᓕᕆᔪᓐᓇᖅᓯᑎᑦᑎᔪᑦ ᑐᖓᓕᖅ ᓂᐊᖁᕆᔭᐅᔪᒦᖓᖅᑐᑦ ᐱᖃᓯᐅᔾᔨᓯᒪᔭᕆᐋᓕᑦ ᐃᖃᓇᐃᔮᖅᑖᕋᓱᐋᕈᑎᖕᓂᑦ ᑐᒃᓯᕋᐅᑎᒋᔭᑎᑦ ᐃᓱᒪᒃᓴᖅᓯᐅᕈᑕᐅᔪᓐᓇᖅᓯᖁᓪᓗᒍ.
• ᐃᖅᑲᖅᑐᐃᕕᒃᑯᑦ ᐸᓯᔭᒃᓴᕕᓃᑦ ᐃᖅᑲᓇᐃᔮᖅᑖᕋᓱᒃᑐᓄᑦ ᐃᓱᒪᒃᓴᖅᓯᐅᔾᔪᑕᐅᒐᔭᖅᐳᑦ. ᖃᐅᔨᓴᖅᓯᓂᖅ ᐱᕋᔭᒃᓯᒪᓂᕐᒧᑦ ᐅᓂᑳᓕᐊᖑᓯᒪᔪᓂᒃ ᖃᐅᔨᓴᖅᑕᐅᒐᔭᕐᒪᑕ ᖃᐅᔨᒋᐋᕈᑕᐅᓗᑎᒃ ᑎᑭᐅᒪᔭᖏᑦ ᐊᒻᒪᓗ ᐃᖃᓇᐃᔮᕆᔭᐅᒐᔭᖅᑐᓂᑦ ᐃᖃᓇᐃᔮᒧᑦ. ᑕᒪᓐᓇ ᒪᑯᓂᖓᑐᐋᖅ ᐱᓕᕆᐋᖑᔭᕆᐊᖃᒃᑎᑦᑎᖕᒪᑦ ᐃᖃᓇᐃᔭᑦ ᑕᐃᒃᑯᐊ ᓈᒻᒪᒋᔭᐅᔭᕆᐊᖃᒃᑎᑦᑎᔪᑦ ᐱᕋᔭᒃᓯᒪᔪᖅᓯᐅᑎᑦ ᐅᓂᑳᓕᐊᖑᓯᒪᓂᖏᓐᓂᑦ ᐅᕝᕙᓘᓐᓃᑦ ᐱᓂᕐᓗᒃᑕᐅᑐᐃᓐᓇᕆᐊᖃᓂᖓᓄᑦ ᐃᖃᓇᐃᔭᕐᕕᖁᑎ ᖃᐅᔨᓴᖅᑕᐅᓗᓂ.
• ᐃᖃᓇᐃᔭᖅᑖᕋᓱᐋᖅᑐᑦ ᑐᓂᓯᔪᓐᓇᖅᐳᑦ ᐃᖃᓇᐃᔮᖅᑕᕋᓱᐊᕈᑎᒥᖕᓂᑦ ᓇᓪᓕᐋᓄᑐᐃᓐᓇᖅ ᐃᓕᓴᕆᔭᐅᓯᒪᔪᑦ ᐅᖃᐅᓯᓕᕆᓂᕐᒧᑦ ᓄᓇᕗᕐᒥ.
• ᐃᖅᑲᓇᐃᔮᖅᑖᕋᓱᒃᑐᑦ ᓈᒻᒪᒋᔭᐅᒍᑎᒃ ᐊᐱᖅᓱᖅᑕᐅᒐᔭᖅᑐᑐᐊᑦ.
• ᐃᖅᑲᓇᐃᔮᖅᑖᕋᓱᒃᑐᖅ ᑲᒪᒋᔭᕆᐊᖃᖅᐸᐅᒃ ᐃᓕᓐᓂᐊᒃᑲᓐᓂᕐᓂᕆᓯᒪᔭᖓᓂᒃ ᓇᓗᓇᐃᒃᑯᑕᕐᓂᒃ ᑕᕆᐅᑉ ᐊᑭᐊᓂᕐᒥᐅᓂᒃ ᐱᔪᓐᓇᕐᓂᕋᖅᑕᐅᓯᒪᔪᓂᒃ ᖃᐅᔨᓴᖅᑕᐅᔭᕆᐊᖃᖅᑐᓂᒃ ᐃᓕᓴᕆᔭᐅᓯᒪᔪᒥᒃ ᑲᓇᑕᐅᑉ ᐃᓕᓐᓂᐊᖅᑐᓕᕆᔨᒃᑯᖏᑎᒍᑦ. ᑖᓐᓇ ᐱᓕᕆᐊᖑᖏᑉᐸᑦ ᐃᖅᑲᓇᐃᔮᖅᑖᕋᓱᒃᑐᖅ ᑕᑯᓇᒃᑕᐅᙱᑐᐃᓐᓇᕆᐊᓕᒃ ᖁᔭᓈᖅᑕᐅᓗᓂ.