ᐊᑦᑕᕐᓇᖅᑐᒦᑦᑕᐃᓕᓂᖅ ᖃᕋᓴᐅᔭᒃᑯᑦ ᐱᔭᐅᔾᔭᐃᖅᓯᒪᓂᖅ
ᐃᑲᔫᑎᒃᓴᑦ ᖃᓄᖅ ᐃᑭᐊᖅᑭᕕᒃᑯᑦ ᖃᐅᔨᓇᓱᒍᓐᓇᕐᒪᖔᑦ ᐊᑦᑕᕐᓇᙱᑦᑐᒃᑯᑦ
ᐃᑭᐊᖅᑭᕕᒃ ᓴᙱᓪᓗᓂ ᐊᑐᒐᒃᓴᐅᔪᖅ ᐱᕕᖃᕈᑎᒋᓪᓗᑎᒍᑦ ᑲᓲᑎᓗᑕ ᐊᓯᑦᑎᓐᓄᑦ ᐊᔾᔨᒌᙱᑦᑐᒃᑯᑦ. ᐃᑭᐊᖅᑭᕕᒃᑯᑦ ᓂᐅᕕᕈᓐᓇᖅᓯᔪᒍᑦ, ᐱᖃᓐᓇᕆᔭᕗᑦ ᐃᓚᕗᓪᓗ ᑐᓴᐅᒪᖃᑎᒋᕙᒡᓗᑎᒍᑦ, ᐃᖅᑲᓇᐃᔭᕐᕕᒋᔭᑦᑕ ᐅᖓᓯᒋᔮᓃᒃᑲᓗᐊᕐᓗᑕ ᐱᓕᕆᔪᓐᓇᖅᓯᓗᑕ. ᑭᓯᐊᓂᓕ, ᖃᕆᑕᐅᔭᒃᑯᑦ ᓯᕘᕋᓵᕆᓃᑦ ᐊᒥᓱᕈᖅᐸᓪᓕᐊᔪᑦ ᖃᐅᑕᒫᑦ ᐅᔾᔨᖅᓱᑦᑎᐊᕆᐊᖃᖅᖢᑕᓗ ᓇᖕᒥᓂᖅ ᓴᐳᑎᓯᒪᖁᓪᓗᑕ ᖃᕆᑕᐅᔭᒃᑯᑦ.
ᐅᑯᐊ ᑕᕝᕙ ᐊᑐᖅᑕᐅᔪᓐᓇᖅᑐᑦ ᐊᑦᑕᕐᓇᙱᑦᑐᒧᑦ ᐃᑭᐊᖅᑭᔾᔪᑎᒃᑯᑦ ᕿᒥᕐᕈᓂᐊᕐᓗᓂ:
- ᐊᑐᕐᓗᑎᑦ ᓴᙱᔪᒥᑦ ᐊᔾᔨᐅᙱᑦᑐᒥᓪᓗ ᖃᕆᑕᐅᔭᕐᒧᑦ ᐃᓯᕈᓐᓇᐅᑎᒥᑦ: ᖃᕆᑕᐅᔭᕐᒧᑦ ᐃᓯᕈᓐᓇᐅᑖ ᓇᓗᓇᓪᓗᐊᖅᑐᖅ ᐊᓯᖕᓄᑦ ᓇᓚᐅᑦᑖᕆᐊᒃᓴᖅ, ᐊᒻᒪ ᐊᔾᔨᒋᙱᓪᓗᓂᒋᑦ ᐃᓯᕈᓐᓇᐅᑎᑦ ᐊᑐᖃᑦᑕᖅᑕᑎᑦ ᐊᓯᖏᓐᓄᑦ ᐱᖃᐅᑎᖕᓄᑦ. ᐃᓱᒪᒋᓗᒍ ᐊᑐᕆᐊᒃᓴᖅ ᐃᓯᕈᓐᓇᐅᑎᓄᑦ ᐊᐅᓚᑦᑎᔨᒥᒃ ᓴᖅᑭᑦᑎᓂᐊᕈᕕᑦ ᑐᖅᑯᕐᓗᒋᓪᓗ ᐊᔾᔨᐅᙱᑦᑐᑦ ᐃᓯᕈᓐᓇᐅᑎᑦ.
- ᖃᕆᓴᐅᔭᓕᕆᔾᔪᑎᑦ ᓄᑖᙳᕆᐊᖅᓯᒪᑏᓐᓇᕐᓗᒍ: ᐊᐅᓚᑦᑎᔾᔪᑎᓯ, ᐃᑭᐊᖅᑭᕕᖕᒥ ᓇᕈᔾᔪᑎᒃᑯᑦ, ᐊᓯᖏᓪᓗ ᖃᕆᓴᐅᔭᓕᕆᔾᔪᑎᑦ ᓄᑖᙳᕆᐊᖅᑕᐅᒐᔪᒡᓗᑎᒃ ᒫᓐᓇᓕᓴᐅᓛᓂᒃ ᐃᓵᖅᑕᐅᔾᔭᐃᒃᑯᑎᓂᒃ ᐊᒻᒪ ᓄᑖᙳᕆᐊᖅᓯᒪᔪᓂᒃ. ᑕᒪᓐᓇ ᐃᑲᔪᕐᓂᐊᖅᐳᖅ ᓴᐳᔾᔭᐅᓗᑎᒃ ᖃᐅᔨᒪᔭᐅᔪᓄᑦ ᐊᑦᑕᕐᓇᕈᓐᓇᖅᑐᓄᑦ ᐊᑐᕐᓂᕐᓗᒃᑕᐅᔪᓐᓇᖅᑐᓄᑦ ᖃᕆᑕᐅᔭᒃᑯᑦ ᖃᓄᖓᓴᖅᑎᓄᑦ.
- ᐊᑐᖅᐸᒡᓗᑎᑦ ᐅᒃᐱᕐᓇᖅᑐᓂᒃ ᖃᕆᑕᐅᔭᒃᑯᑦ ᖁᐱᕐᕆᔾᔭᐃᒃᑯᑎᓂᒃ ᖃᕆᑕᐅᔭᓕᕆᔾᔪᑎᓂᒃ: ᐃᓕᓯᓗᑎᑦ ᓄᑖᙳᖅᑎᕆᓗᑎᓪᓗ ᖁᐱᕐᕆᔾᔭᐃᒃᑯᑎᓂᒃ ᖃᕆᑕᐅᔭᕋᓛᕐᓂᑦ ᖃᐅᔨᓇᓱᐊᕐᓗᑎᑦ ᐲᔭᕐᓗᒋᓪᓗ ᖃᕆᑕᐅᔭᕐᒧᑦ ᐊᑐᒐᐃᑦ ᒪᓗᖕᓇᖅᑐᑦ ᐱᐅᔪᓐᓃᕈᑎᔪᓐᓇᖅᑐᑦ ᖃᕆᑕᐅᔭᓕᕆᔾᔪᑎᖕᓄᑦ ᐅᕝᕙᓘᓐᓃᑦ ᑎᑎᖅᑲᖁᑎᑎᑦ ᑎᒡᓕᒃᑕᐅᓗᑎᒃ.
- ᐅᔾᔨᖅᓱᑦᑎᐊᖅᐸᒡᓗᑎᑦ ᑲᖐᒋᔭᐅᔪᓂᒃ ᑲᓲᕐᕕᖕᓂᒃ ᐊᒻᒪ ᐃᕐᖐᓐᓈᖅᑕᐅᒃᑰᕈᑎᖕᓂᑦ: ᓇᕿᑦᑕᐃᓕᓗᒋᑦ ᑲᓲᕐᕖᑦ ᖃᕆᑕᐅᔭᒃᑯᓪᓘᓐᓃᑦ ᐊᑦᑕᑕᖅᑎᓯᒪᔪᑦ ᖃᐅᔨᒪᔭᐅᙱᑦᑐᓂᑦ ᑲᖐᒋᔭᐅᔪᓂᒡᓘᓐᓃᑦ. ᑖᒃᑯᐊ ᐃᓗᓕᖃᕈᓐᓇᖅᑐᑦ ᖃᕆᑕᐅᔭᒃᑯᑦ ᐱᕋᔭᒍᑕᐅᔪᓂᒃ ᐅᕝᕙᓘᓐᓃᑦ ᐊᔪᓕᕈᑕᐅᓲᓂᒃ ᖃᕆᑕᐅᔭᕐᓄᑦ ᐋᓐᓂᕈᑕᐅᔪᓐᓇᖅᑐᓂᒃ ᐅᕝᕙᓘᓐᓃᑦ ᑐᑭᓯᒋᐊᒐᒃᓴᔅᓯᓐᓂᒃ ᑎᒡᓕᒍᑕᐅᔪᓐᓇᖅᑐᓂᒃ.
- ᐊᑐᕐᓗᑎᑦ ᐱᔭᐅᔾᔭᐃᖅᓯᒪᔪᓂᒃ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖕᓂᒃ: ᕿᓂᕐᓗᑎᑦ "https" ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕖᑦ URL−ᖏᓐᓂᒃ ᑮᒃᑕᖓᓂᒡᓗ ᑐᕌᕈᑎᒥᑦ ᑖᓐᓇ ᐃᑭᐊᖅᑭᕕᒃ ᐊᑦᑕᕐᓇᙱᒃᑲᓗᐊᕆᐊᒃᓴᖓᓂᑦ, ᓇᓗᓇᐃᔭᐅᑎᑎᓪᓗ ᓇᒧᙵᕈᓘᔭᙱᒃᑲᓗᐊᕆᐊᒃᓴᖏᓐᓂᑦ.
- ᐅᔾᔨᖅᓱᑦᑎᐊᖅᐸᒡᓗᒋᑦ ᐃᓄᖕᓄᑦ Wi-Fi−ᑯᑦ ᑲᓲᖃᑎᒌᒍᑎᖏᑦ: ᐃᓄᖕᓄᑦ Wi-Fi−ᑯᑦ ᑲᓲᖃᑎᒌᒍᑎᖏᑦ ᐱᔭᐅᔪᓐᓇᖃᑦᑕᕐᒪᑕ ᐱᔭᐅᔾᔭᐃᖅᓯᒪᑎᑕᐅᙱᒃᑳᖓᑕ ᖃᕆᑕᐅᔭᒃᑯᓪᓗ ᐱᕋᔭᒃᐸᒃᑐᓄᑦ ᐱᔭᐅᔪᓐᓇᖅᖢᑎᒃ. ᐃᓯᖅᑎᑦᑎᑦᑕᐃᓕᓗᑎᑦ ᐊᒃᑐᖅᑕᐅᓴᕋᐃᑦᑐᓄᑦ ᑮᓇᐅᔭᖃᕐᕕᖕᓄᑦ ᖃᐅᔨᔭᐅᑎᑦᑎᕙᙱᓪᓗᑎᓪᓘᓐᓃᑦ ᐊᒃᑐᖅᑕᐅᓴᕋᐃᑦᑐᓂᒃ ᑐᓴᖅᑕᐅᔪᒃᓴᓂᒃ ᐊᑐᖅᑕᐅᑎᓪᓗᒋᑦ ᐃᓄᖕᓄᑦ Wi-Fi−ᓕᕆᔾᔪᑎᒃᑯᑦ.
- ᖃᕆᑕᐅᔭᒃᑯᑦ ᐃᓛᒃᑰᖅᑐᒥᒃ ᐱᓕᕆᔾᔪᑎᒥᒃ ᐊᑐᕐᓗᑎᑦ (VPN): ᖃᕆᑕᐅᔭᒃᑯᑦ ᐃᓛᒃᑰᖅᑐᒃᑯᑦ ᐃᑭᐊᖅᑭᕕᒃᑰᕈᓐᓇᐅᑎᖕᓂᒃ ᐊᑐᖃᑦᑕᖅᐳᑦ ᐊᒻᒪ ᓴᐳᔾᔨᔪᓐᓇᖅᖢᑎᒃ ᐃᕐᖐᓐᓈᖅᑕᐅᒃᑯᑦ ᖃᐅᔨᔭᐅᔭᕆᐊᖃᙱᑦᑐᓂᒃ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᒃ. ᐃᓱᒪᒋᓗᒍ ᐊᑐᕆᐊᒃᓴᖅ ᖃᕆᑕᐅᔭᒃᑯᑦ ᐃᓛᒃᑰᖅᑐᒥᒃ ᐱᓕᕆᔾᔪᑎᒥᒃ ᕿᓂᓕᕌᖓᕕᑦ ᐃᓄᖕᓄᑦ Wi-Fi−ᓕᕆᔾᔪᑎᓂᒃ ᐊᑐᕐᓂᐊᕐᓗᓂᓘᓐᓃᑦ ᐊᒃᑐᖅᑕᐅᓴᕋᐃᑦᑐᓂᒃ ᑐᓴᖅᑕᐅᔪᒃᓴᓂᒃ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑕᑯᓂᐊᕐᓗᒍ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᒃ ᖃᕆᑕᐅᔭᒃᑯᑦ ᐱᔭᐅᔾᔭᐃᖅᓯᒪᓂᕐᒧᑦ ᒪᒃᐱᖅᑐᒐᖏᑦ.
ᖃᓄᖅ ᓴᐳᒻᒥᔪᓐᓇᕐᒪᖔᑦ ᓄᑕᖅᑲᓂᑦ ᖃᕆᑕᐅᔭᒃᑯᑦ
ᐃᑭᐊᖅᑭᕕᒃ ᐃᑲᔫᑎᒃᓴᑦᑎᐊᕙᐅᔪᓐᓇᖅᐳᖅ ᓄᑕᖅᑲᓄᑦ ᐃᓕᑦᑎᔾᔪᑕᐅᔪᓐᓇᖅᖢᓂ ᖃᐅᔨᓇᓱᒍᑕᐅᔪᓐᓇᖅᖢᓂᓗ, ᑭᓯᐊᓂᑦᑕᐅᖅ ᐊᑦᑕᕐᓇᕈᓐᓇᕆᓪᓗᓂ ᓲᕐᓗ ᖃᕆᑕᐅᔭᒃᑯᑦ ᓲᖑᓴᖕᓂᖅ, ᓈᒻᒪᙱᑦᑐᑦ ᑕᑯᔭᐅᔪᓐᓇᖅᑐᑦ, ᐊᒻᒪ ᐃᑭᐊᖅᑭᔾᔪᑎᑎᒍᑦ ᐱᑦᑎᐊᙱᑦᑐᒪᔪᑦ. ᐊᖓᔪᖅᑳᖑᓪᓗᑎᑦ ᐅᕝᕙᓘᓐᓃᑦ ᑲᒪᔨᐅᓪᓗᑎᑦ, ᐱᒻᒪᕆᐅᕗᖅ ᕿᑐᕐᖓᑎᑦ ᓴᐳᒻᒥᓇᓱᐊᕐᓗᒋᑦ ᖃᕋᓴᐅᔭᒃᑯᑦ. ᐅᑯᐊ ᑕᕝᕙ ᐊᑐᖅᑕᐅᔪᓐᓇᖅᑐᑦ ᓄᑕᖅᑲᑎᑦ ᖁᐊᖅᓵᕐᓇᖅᑐᒦᖁᓇᒋᑦ ᐃᑭᐊᖅᑭᕕᖕᒥᑦ:
- ᖃᕆᑕᐅᔭᖅ ᐅᐸᒃᑕᐅᒐᔪᒃᑐᒦᑎᓪᓗᒍ: ᖃᕋᓴᐅᔭᖅ ᐅᐸᒃᑕᐅᒐᔪᒃᑐᒦᓪᓗᓂᑦ ᐃᒡᓗᒥᑦ, ᓲᕐᓗ ᐃᓄᒃᑯᕕᖕᒥᑦ, ᕿᑐᕐᖓᑎᑦ ᑲᒪᒋᔪᓐᓇᕐᓗᒋᑦ ᐃᑭᐊᖅᑭᕕᓕᕆᑎᓪᓗᒋᑦ.
- ᓴᖅᑭᑦᑎᓗᑎᑦ ᒪᓕᒋᐊᓕᖕᓂᒃ ᐊᒻᒪ ᖃᐅᔨᒪᔾᔪᑎᒃᓴᓂᒃ: ᐋᖅᑭᒃᓯᔪᖃᕐᓗᓂ ᒪᓕᒋᐊᓕᖕᓂᒃ ᖃᐅᔨᒪᔾᔪᑎᒃᓴᓂᒡᓗ ᐃᑭᐊᖅᑭᕕᒃᑯᑦ ᐊᑐᖅᑕᐅᖃᑦᑕᕐᓂᐊᖅᑐᓂᒃ, ᓲᕐᓗ ᖃᖓ ᖃᓄᕐᓗ ᐊᑯᓂᐅᑎᒋᔪᖅ ᐃᑭᐊᖅᑭᕕᓕᕆᔪᓐᓇᕋᔭᕐᒪᖔᑕ, ᑭᓱᓪᓗ ᐃᑭᐊᖅᑭᕖᑦ ᐊᑐᖅᑕᐅᕙᒃᑐᓪᓗ ᐊᑐᖁᔭᐅᙱᒻᒪᖔᑦ.
- ᓇᐅᑦᑎᖅᓱᕐᓗᒋᑦ ᖃᓄᐃᓕᐅᕈᑎᒋᔭᖏᑦ: ᐅᔾᔨᖅᓱᕐᓗᒋᑦ ᓄᑕᖅᑲᕕᑦ ᖃᕆᑕᐅᔭᒃᑯᑦ ᐱᓕᕆᐊᖏᑦ, ᐃᓚᐅᓗᑎᒃ ᐃᓄᖕᓄᑦ ᑐᓴᐅᒪᔾᔪᑎᖏᑦ ᑐᓴᖅᑎᑦᑎᔾᔪᑎᖏᓪᓗ. ᐃᓱᒪᒋᓗᒍ ᐊᑐᕆᐊᒃᓴᖅ ᐊᖓᔪᖅᑳᓄᑦ ᐊᐅᓚᑦᑎᔾᔪᑎᓂᑦ ᖃᕆᑕᐅᔭᒃᑯᑦ ᐃᑲᔪᕐᓗᑎᑦ ᖃᐅᔨᓴᖕᓂᕐᒥᑦ ᖃᓄᐃᓕᐅᖕᓂᖏᓐᓂᑦ.
- ᐃᓕᓴᕐᓗᒋᑦ ᖃᕆᑕᐅᔭᒃᑯᑦ ᐊᑦᑕᕐᓇᖅᑕᐃᓕᒪᓂᕐᒥᒃ: ᐃᓕᓐᓂᐊᖅᑎᓪᓗᒋᑦ ᕿᑐᕐᖓᑎᑦ ᖃᕋᓴᐅᔭᒃᑯᑦ ᐊᑦᑕᕐᓇᖅᑕᐃᓕᒪᓂᕐᒥᒃ, ᐃᓚᐅᓗᑎᒃ ᐊᑦᑕᕐᓇᕐᓂᖏᑦ ᐊᒥᖅᑳᖃᑎᖃᕐᓂᕐᒥᒃ ᓇᖕᒥᓂᕆᔭᕐᓂ ᑐᓴᐅᒪᔾᔪᑎᒃᓴᓂᑦ ᐃᓚᐅᖃᑕᐅᓂᕐᓗ ᐋᓪᓚᓄᑦ ᖃᕋᓴᐅᔭᒃᑯᑦ.
- ᐊᑦᑕᕐᓇᙱᑦᑐᒃᑯᑦ ᕿᓂᕈᑎᒥᒃ ᐊᑐᖅᐸᒡᓗᓯ: ᐊᑦᑕᕐᓇᙱᑦᑐᒃᑯᑦ ᕿᓂᕐᕖᑦ ᐋᖅᑭᒃᓯᒪᑎᓪᓗᒋᑦ ᕿᓂᕈᑎᓂᒃ ᐊᒻᒪ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ ᓱᕈᐃᔭᐃᔾᔪᑕᐅᓇᓱᒃᖢᑎᒃ ᓈᒻᒪᙱᑦᑐᓂᒃ ᐃᓗᓕᖅᑕᖏᓐᓂᒃ.
- ᐋᖅᑭᒡᓗᒋᑦ ᑐᓴᖅᑕᐅᔭᕆᐊᖃᙱᑦᑐᓄᑦ ᐊᑐᕆᐊᓕᖏᑦ: ᐃᑲᔪᕐᓗᒋᑦ ᕿᑐᕐᖓᓯ ᐋᖅᑭᒃᓯᑎᓪᓗᒋᑦ ᑐᓴᖅᑕᐅᔭᕆᐊᖃᙱᑦᑐᓄᑦ ᐊᑐᕆᐊᓕᖕᓂᒃ ᐃᓄᖕᓄᑦ ᑐᓴᒐᒃᓴᓕᕆᔾᔪᑎᖏᓐᓄᑦ ᖃᐅᔨᒪᖁᓪᓗᒋᑦ ᐱᖃᓐᓇᕆᔭᑐᐊᖏᑦ ᖃᑕᙳᑎᖏᓪᓗ ᑕᑯᔪᓐᓇᕐᓗᑎᒃ ᓴᖅᑭᑕᖏᓐᓂᒃ ᐊᒻᒪ ᑐᑭᓯᒋᐊᕈᑎᖏᓐᓂᒃ.
- ᐅᔾᔨᖅᓱᕐᓗᑎᑦ ᖃᕋᓴᐅᔭᒃᑯᑦ ᓲᖑᓴᖕᓂᐅᔪᓂᒃ: ᐅᖃᖃᑎᒋᓗᒋᑦ ᕿᑐᕐᖓᑎᑦ ᖃᕋᓴᐅᔭᒃᑯᑦ ᓲᖑᓴᖕᓂᐅᔪᑦ ᒥᒃᓵᓄᑦ ᑎᓕᐅᕐᓗᒋᓪᓗ ᐅᖃᖃᑦᑕᖁᓗᒋᑦ ᐃᒻᒥᓂᒃ ᑭᓇᒥᒡᓘᓐᓃᑦ ᖃᐅᔨᒪᔭᖓᓂᒃ ᐱᑦᑎᐊᙱᓴᒃᑕᐅᖃᑦᑕᕐᓂᖓᓂᒃ ᖃᕋᓴᐅᔭᒃᑯᑦ.
- ᓇᖕᒥᓂᖅ ᐱᖁᑎᒋᔭᐅᔪᑦ ᐊᑐᕈᓐᓇᓗᐊᙱᓪᓗᒋᑦ: ᕿᑐᕐᖓᕕᑦ ᓇᖕᒥᓂᖅ ᖃᕆᑕᐅᔭᕋᓛᕆᔭᐅᔪᓂᒃ ᐊᑐᕈᓐᓇᖅᑎᓗᐊᙱᓪᓗᒋᑦ, ᓲᕐᓗ ᐅᖄᓚᐅᑎᕋᓛᑦ ᐊᒻᒪ ᖃᕋᓴᐅᔭᕋᓛᑦ, ᐊᒻᒪ ᐃᓱᒪᒋᓗᒍ ᐊᖓᔪᖅᑳᑦ ᐊᐅᓚᑦᑎᔾᔪᑎᖏᓐᓂᒃ ᐊᑐᕆᐊᒃᓴᖅ ᖃᕆᓴᐅᔭᒃᑯᑦ ᐱᓕᕆᔾᔪᑎᓂᒃ ᐃᓗᓕᖏᓐᓂᒡᓗ ᐊᑐᕈᓐᓇᖁᙱᓪᓗᒋᑦ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑕᑯᓂᐊᕐᓗᒍ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓ ᖃᕆᑕᐅᔭᒃᑯᑦ ᐱᔭᐅᔾᔭᐃᖅᓯᒪᓂᕐᒧᑦ ᒪᒃᐱᖅᑐᒐᖏᑦ.
ᑭᓲᕙ ᖃᕆᓴᐅᔭᓕᕆᔾᔪᑎᓂᒃ ᐊᔪᓕᖅᑎᑦᑎᕙᒃᑐᑦ?
ᖃᕆᓴᐅᔭᒃᑯᑦ ᐱᕋᔭᒃᑕᐅᓂᖅ ᖃᕆᓴᐅᔭᒃᑯᑦ ᐱᕋᔭᒍᑕᐅᓲᖅ ᖃᕆᓴᐅᔭᓂᑦ ᐊᓯᖏᓐᓂᒡᓗ ᖃᕆᓴᐅᔭᓂᑦ, ᑭᒡᓕᖃᖅᑎᑦᑎᓪᓗᓂᓗ ᑐᖅᑯᐃᕕᖕᓂᑦ, ᐊᑐᒐᒃᓴᓂᑦ ᑕᒪᐃᓐᓂᒡᓘᓐᓃᑦ ᐱᓕᕆᔾᔪᑎᒥᑦ ᑭᓯᐊᓂ ᐱᕋᔭᒍᑕᐅᓇᓱᒃᑐᖅ ᐊᑭᓕᖅᑕᐅᒃᐸᑦ ᐹᔨᒧᑦ. ᖃᕆᓴᐅᔭᒃᑯᑦ ᐱᕋᔭᒃᑕᐅᔪᑦ ᓇᒧᙵᕈᓘᔭᖅᑎᑦᑎᓲᖑᕗᑦ ᐅᕝᕙᓘᓐᓃᑦ ᑮᒃᓯᓲᖑᕗᑦ ᐱᕋᔭᒃᑕᐅᔫᑉ ᑎᑎᖅᑲᖁᑎᖏᓐᓂᒃ, ᐊᑐᖅᑕᐅᔪᓐᓇᐃᓪᓕᑎᑦᑎᓪᓗᓂ, ᐊᒻᒪ ᐊᑭᓖᔭᕆᐊᖃᓕᖅᐸᒃᖢᑎᒃ ᑕᐅᖅᓰᔾᔪᑕᐅᓪᓗᑎᒃ ᐱᕋᔭᒍᑕᐅᔪᓄᑦ ᑮᖏᓐᓄᑦ ᐅᕝᕙᓘᓐᓃᑦ ᐱᓕᕆᔾᔪᑎᖏᑦ ᓴᖅᑭᑕᐅᑎᓪᓗᒋᑦ.
ᖃᓄᖅ ᖃᕆᓴᐅᔭᒃᑯᑦ ᐱᕋᔭᒃᑕᐅᓂᖅ ᐱᓕᕆᐊᖑᓲᖑᕙ?
ᖃᕆᓴᐅᔭᒃᑯᑦ ᐱᕋᔭᒃᑕᐅᓲᑦ ᓯᐊᒻᒪᒃᑎᑕᐅᒐᔪᒃᐳᑦ ᐃᕐᖐᓐᓈᖅᑕᐅᒃᑯᑦ, malicious ᐃᓚᓕᐅᑎᓯᒪᔪᑦ, ᐊᐃᑦᑐᕐᓗᒃᑕᐅᓯᒪᔪᑦ ᐃᑭᐊᖅᑭᕕᑦ, ᐅᕝᕙᓘᓐᓃᑦ ᖃᕆᓴᐅᔭᓕᕆᔾᔪᑎᑦ ᖃᕆᓴᐅᔭᒃᑯᑦ ᐱᔭᐅᓲᑦ. ᓱᕈᐃᒃᐸᑦ ᖃᕆᓴᐅᔭᕋᓛᒥᑦ, ᓇᒧᙵᕈᓘᔭᖅᑎᑦᑎᓲᖅ ᑮᒃᑕᐅᑎᓪᓗᓂᓘᓐᓃᑦ ᐅᕝᕙᓘᓐᓃᑦ ᑕᒪᐃᓐᓂᒃ ᐊᑐᖃᑦᑕᖅᑐᖅ, ᓴᖅᑭᔮᖅᑎᑦᑎᓪᓗᓂᓗ ᑐᓴᖅᑕᐅᔪᒪᔪᒥᑦ ᐊᑭᓖᖁᔨᔪᒥᑦ ᓇᓗᓇᐃᖅᑕᐅᓯᒪᔪᒥᑦ ᕐᑳᖏᐅᑎᔪᒥᑦ ᐱᕕᒃᓴᕆᑎᑕᐅᔪᒥᑦ.
ᖃᓄᐃᓕᐅᕈᓐᓇᖅᐱᑦ ᐃᓕᖕᓂᒃ ᓴᐳᑎᓯᒪᓇᓱᒡᓗᑎᑦ ᖃᕆᓴᐅᔭᒃᑯᑦ ᐱᕋᔭᒃᑕᐅᑦᑕᐃᓕᔾᔪᑎᓂᒃ?
ᓴᐳᒻᒥᓗᒍ ᑲᑉᐱᐊᓵᖅᑕᐅᓂᖅ ᖃᕆᓴᐅᔭᒃᑯᑦ ᐱᓂᕐᓗᒃᑕᐅᓂᕐᒧᑦ, ᐱᒻᒪᕆᐅᔪᖅ ᐊᑐᕐᓗᓂ ᐅᓄᖅᑐᓂᒃ ᐱᑎᑦᑎᑕᐃᓕᒪᔾᔪᑎᓂᒃ, ᐃᓚᐅᓗᑎᒃ:
- ᖃᕆᓴᐅᔭᓕᕆᔾᔪᑎᑦ ᐊᒻᒪ ᐊᐅᓚᑦᑎᔾᔪᑎᓯ ᓄᑖᙳᕆᐊᖅᓯᒪᑏᓐᓇᕐᓗᒋᑦ ᒫᓐᓇᓕᓴᐅᓛᓂᒃ ᐃᓵᖅᑕᐅᔾᔭᐃᒃᑯᑎᓂᒃ ᐊᒻᒪ ᓄᑖᙳᕆᐊᖅᓯᒪᔪᓂᒃ.
- ᐊᑐᖅᐸᒡᓗᑎᑦ ᐊᑐᒃᑲᓐᓂᕈᓐᓇᖅᑐᓂᒃ ᖁᐱᕐᕈᓂᒃ ᑐᖁᓴᐃᔾᔪᑎᓂᒃ ᖃᕆᓴᐅᔭᒥ ᓄᑖᙳᕆᐊᖅᑎᒐᔪᒡᓗᒍᓗ.
- ᐅᔾᔨᖅᓱᑦᑎᐊᖅᐸᒃᓗᑎᑦ ᒪᑐᐃᖅᓯᓕᕌᖓᕕᑦ ᐃᕐᖐᓐᓈᖅᑕᐅᑎᓂᒃ ᐅᕝᕙᓘᓐᓃᑦ ᐊᑦᑕᑕᖅᑎᑕᐅᔪᓂᒃ ᖃᐅᔨᒪᔭᐅᙱᑦᑐᓂᒃ ᓇᒃᓯᐅᔾᔨᓲᓂᒃ ᐅᕝᕙᓘᓐᓃᑦ ᑲᖐᒋᔭᐅᔪᓂᒃ.
- ᑭᖑᕝᕕᕐᓗᒋᑦ ᐱᒻᒪᕆᐅᔪᑦ ᑎᑎᖅᑲᖁᑎᑎᑦ ᑎᑎᖅᑲᓪᓗ ᑐᖅᑯᑦᑎᐊᕐᓗᒋᓪᓗ ᐱᔭᐅᔾᔭᐃᖅᓯᒪᔪᒧᑦ ᐃᓂᒧᑦ, ᖃᕆᓴᐅᔭᒃᑯᑦ ᐊᒻᒪ ᓯᓚᑖᓂ.
- ᖃᕆᓴᐅᔭᕐᒧᐊᖅᑎᑦᑕᐃᓕᓗᒋᑦ ᖃᕆᓴᐅᔭᑦ ᐅᕝᕙᓘᓐᓃᑦ ᐱᓇᔫᑎᑦ ᐸᒡᕕᓴᒃᑕᐅᓯᒪᙱᑦᑐᓂᒃ ᐱᕝᕕᐅᔪᓐᓇᖅᑐᓂᒃ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑕᑯᓂᐊᕐᓗᒍ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᒃ ᖃᕆᓴᐅᔭᒃᑯᑦ ᐱᔭᐅᔾᔭᐃᖅᓯᒪᓂᕐᒧᑦ ᒪᒃᐱᖅᑐᒐᖏᑦ.
ᖃᕆᑕᐅᔭᒃᑯᑦ ᐱᕋᔭᒃᑕᐅᓂᖅ ᑭᓲᖕᒪᑦ?
ᖃᕆᑕᐅᔭᒃᑯᑦ ᐱᕋᔭᒃᑕᐅᓂᖅ ᑲᓱᖅᓯᒪᔾᔪᑕᐅᓪᓗᓂ ᐱᕋᔭᒍᑕᐅᓲᖅ ᐊᑐᖅᐸᒃᖢᑎᒃ ᐃᕐᖐᓐᓈᖅᑕᐅᑎᓂᒃ, ᑎᑎᖅᑲᑎᒍᑦ ᑎᑎᖅᑲᐅᓯᐊᓂᒃ, ᐅᕝᕙᓘᓐᓃᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖕᓂᒃ ᓴᒡᓗᕿᓪᓗᒋᑦ ᐃᓄᐃᑦ ᐊᒃᑐᖅᑕᐅᓴᕋᐃᑦᑐᑦ ᑐᑭᓯᒋᐊᒐᒃᓴᖏᑦ ᐱᕋᔭᖕᓂᒃᑯᑦ ᐱᔪᓐᓇᖃᑦᑕᕐᒪᑕ, ᓲᕐᓗ ᐊᑐᖅᑑᑉ ᐊᑎᖓ, ᐃᓯᕈᓐᓇᐅᑖ, ᐊᑭᓕᒃᓴᓂᒍᓐᓇᐅᑎᓯᓗ ᐊᐅᒃᑕᔫᑦ ᓈᓴᐅᑎᖏᓐᓂᒃ ᐱᔪᒪᔪᓐᓇᖅᑐᑦ, ᐅᕝᕙᓘᓐᓃᑦ ᐃᓕᔅᓯᓐᓅᖓᔪᓂᒃ ᑎᑎᖅᑲᓂᒃ. ᐱᕋᔭᒃᐸᒃᑐᑦ ᓴᖅᑭᑦᑎᓕᖅᐸᒃᐳᑦ ᐱᐅᙱᑦᑐᓂᒃ ᑐᓴᖅᑕᐅᔪᒃᓴᓂᒃ ᓱᓕᖅᑰᔨᔪᓂᒃ ᐃᒪᓐᓇᐅᒐᔪᒃᐸᒃᖢᑎᒡᓗ ᓴᖅᑭᑦᑎᓇᓱᒃᐸᒃᖢᑎᒃ ᑐᐊᕕᕐᓇᖅᓯᔪᒥᒃ ᑲᑉᐱᐊᓇᖅᑐᒥᒡᓘᓐᓃᑦ ᑕᐃᒃᑯᐊ ᐱᕋᔭᒡᕕᐅᓯᒪᔪᑦ ᑭᐅᖁᓪᓗᒋᑦ.
ᖃᓄᖅ ᖃᕆᑕᐅᔭᒃᑯᑦ ᐱᕋᔭᒃᑕᐅᓂᖅ ᐱᓕᕆᐊᖑᕙᖕᒪᑦ?
ᖃᕆᑕᐅᔭᒃᑯᑦ ᐱᕋᔭᒃᑕᐅᓂᖅ ᐊᑐᖅᑕᐅᓲᖑᖕᒪᑦ ᐃᓅᖃᑎᒌᓄᑦ ᓴᓇᔪᓕᕆᓂᕐᒥᑦ ᐱᓕᕆᔾᔪᓯᕐᓂᑦ ᐊᐅᓚᑦᑎᓂᕐᒥᑦ ᐃᓄᖕᓂᑦ ᓇᕿᑦᑎᑎᓪᓗᒋᑦ ᑲᓲᕐᕕᖕᒥᑦ, ᒪᑐᐃᖅᓯᑎᓪᓗᒋᑦ ᐃᓚᓕᐅᑎᓯᒪᔪᒥᑦ, ᐃᓯᓗᓂᓘᓐᓃᑦ ᐃᓄᖕᒨᖓᔪᓂᑦ ᑐᑭᓯᒋᐊᕈᑎᓂᑦ ᐃᑭᐊᖅᑭᕕᙳᐊᒃᑯᑦ. ᓴᒡᓗᕿᑦᑎᔨ ᓴᖅᑭᑎᑦᑎᒐᔪᖕᓂᐊᖅᐳᖅ ᐅᒃᐱᕆᔭᐅᔪᓐᓇᕐᓂᕐᒥᓂᒃ ᑎᒥᒋᔭᐅᓗᓂ, ᓲᕐᓗ ᑮᓇᐅᔭᒃᑯᕕᖕᒥᙶᕐᓂᕋᕐᓗᓂ, ᒐᕙᒪᒃᑯᑦ ᑐᑦᑕᕐᕕᒋᕙᒃᑕᖏᓐᓂᒃ, ᖃᐅᔨᒪᔭᐅᑦᑎᐊᖅᑐᒥᒡᓘᓐᓃᑦ ᑲᒻᐸᓂᒋᔭᐅᔪᒥᒃ, ᓴᖅᑭᑎᑦᑎᓗᓂᓗ ᑐᐊᕕᕐᓇᖅᓯᔪᒥᒃ ᑲᑉᐱᐊᓱᖕᓂᕐᒥᒡᓘᓐᓃᑦ ᐊᒃᓱᕈᖅᑎᑦᑎᓇᔭᕐᓂᕐᒥᒃ ᐱᓂᕐᓗᒡᕕᐅᓯᒪᔪᒥᒃ ᐱᓕᕆᐊᖃᕐᓂᐊᕐᓗᓂ. ᓲᕐᓗ ᐃᒪᓐᓇ, ᓴᒡᓗᔪᖅ ᐅᖃᑐᐃᓐᓇᕆᐊᓕᒃ ᐊᑦᑕᕐᓇᖅᑐᒦᑎᑦᑎᔪᖃᕐᓂᖓᓂᒃ ᐱᓂᕐᓗᒡᕕᐅᓯᒪᔫᑉ ᑮᓇᐅᔭᒃᑯᕕᖓᓄᑦ ᓄᑖᙳᕆᐊᖅᑎᑦᑎᑲᐅᑎᒋᔭᕆᐊᖃᖅᖢᑎᒡᓗ ᐃᓯᕈᓐᓇᐅᑎᒥᓂᒃ.
ᐱᕋᔭᒃᑕᐅᔪᖅ ᓇᕿᑦᑎᒃᐸᑦ ᑲᓲᕐᕕᖕᒧᑦ ᐃᓕᓗᓂᔾᔪᒡᓘᓐᓃᑦ ᑐᓴᐅᒪᔭᒃᓴᖏᑦ ᐃᑭᐊᖅᑭᕕᖕᒧᑦ, ᐱᕋᔭᒃᑎ ᑎᒡᓕᒍᓐᓇᖅᑐᖅ ᑎᑎᖅᑲᖏᓐᓂᑦ ᐊᑐᕐᓗᓂᔾᔪᒡᓗ ᑭᓇᐅᖕᒪᖔᑦ ᑎᒡᓕᒃᑕᐅᓗᓂ, ᑮᓇᐅᔭᑎᒍᑦ ᐱᕋᔭᖕᓂᕐᒧᑦ, ᐊᓯᖏᓐᓄᓪᓘᓐᓃᑦ ᐱᕋᔭᖕᓂᕐᒧᑦ.
ᖃᓄᐃᓕᐅᕈᓐᓇᖅᐱᑦ ᐃᓕᖕᓂᒃ ᓴᐳᑎᓯᒪᓇᓱᒡᓗᑎᑦ ᖃᕆᓴᐅᔭᒃᑯᑦ ᐱᕋᔭᒃᑕᐅᑦᑕᐃᓕᒪᓂᕐᒧᑦ?
ᓴᐳᑎᓗᑎᑦ ᐃᓕᖕᓂᒃ ᑲᑉᐱᐊᓵᖅᑕᐅᓂᖅ ᖃᕆᓴᐅᔭᒃᑯᑦ ᐱᕋᔭᒃᑕᐅᓂᕐᒧᑦ, ᐱᒻᒪᕆᐅᔪᖅ ᐊᑐᕐᓗᓂ ᐅᓄᖅᑐᓂᒃ ᐱᑎᑦᑎᑕᐃᓕᒪᔾᔪᑎᓂᒃ, ᐅᑯᓂᖓᓗ:
- ᐅᔾᔨᖅᓱᑦᑎᐊᖅᐸᒡᓗᑎᑦ ᒪᑐᐃᖅᓯᓕᕌᖓᕕᑦ ᐃᕐᖐᓐᓈᖅᑕᐅᑎᓂᒃ ᐅᕝᕙᓘᓐᓃᑦ ᐊᑦᑕᑕᖅᑎᑕᐅᔪᓂᒃ ᖃᐅᔨᒪᔭᐅᙱᑦᑐᓂᒃ ᓇᒃᓯᐅᔾᔨᓲᓂᒃ ᐅᕝᕙᓘᓐᓃᑦ ᑲᖐᒋᔭᐅᔪᓂᒃ.
- ᖃᐅᔨᒋᐊᕐᓗᒍ ᓇᒃᓯᐅᔾᔨᔫᑉ ᐃᕐᖐᓐᓈᖅᑕᐅᑎᖓᑕ ᑐᕌᕈᑖ ᕿᓂᕐᓗᑎᓪᓗ ᑎᑎᕋᐅᓯᕐᓂᒃ ᐅᕝᕙᓘᓐᓃᑦ ᐅᖃᐅᓯᖅᑕᓂᒃ ᑕᒻᒪᖅᓯᒪᔪᓂᒃ, ᓇᓗᓇᐃᖅᓯᑐᐃᓐᓇᕆᐊᖃᖅᖢᓂ ᖃᕆᑕᐅᔭᒃᑯᑦ ᐱᕋᔭᒐᓱᖕᓂᖓᓂᒃ.
- ᓇᕿᑦᑕᐃᓕᓗᒋᑦ ᑲᓲᕐᕖᑦ ᖃᕆᑕᐅᔭᒃᑯᓪᓘᓐᓃᑦ ᐊᑦᑕᑕᖅᑎᓯᒪᔪᑦ ᖃᐅᔨᒪᔭᐅᙱᑦᑐᑦ ᑲᖐᒋᔭᐅᔪᓘᓐᓃᑦ.
- ᐊᑐᕐᓗᑎᑦ ᒪᕐᕉᖕᓂᒃ−ᓴᓇᓯᒪᔫᖕᓂᒃ ᓱᓕᔾᔪᑎᓂᒃ ᐊᔪᕐᓇᙱᑐᐊᕌᖓᑦ ᐃᓚᓯᓗᑎᑦ ᖄᒃᑲᓐᓂᐊᒍᑦ ᓴᐳᔾᔨᔾᔪᑎᒥᒃ ᐱᖃᐅᑎᖕᓄᑦ.
- ᓇᓗᒍᕕᑦ ᐃᕐᖐᓐᓈᖅᑕᐅᑎᑦ ᑐᓴᖅᑕᐅᔪᓪᓘᓐᓃᑦ ᓱᓕᖕᒪᖔᑕ, ᖃᐅᔨᒋᐊᕐᕕᒋᓗᒍ ᓇᒃᓯᐅᔾᔨᔪᖅ ᐊᑐᕐᓗᒍ ᖃᐅᔨᒪᔭᐅᔪᖅ ᐅᖃᓘᑎᐅᑉ ᓈᓴᐅᑖ ᐃᕐᖐᓐᓈᖅᑕᐅᒃᑯᓪᓘᓐᓃᑦ ᑐᕌᕈᑖ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑕᑯᓂᐊᕐᓗᒍ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᒃ ᖃᕆᑕᐅᔭᒃᑯᑦ ᐱᔭᐅᔾᔭᐃᖅᓯᒪᓂᕐᒧᑦ ᒪᒃᐱᖅᑐᒐᖏᑦ.