ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᕐᓂᖅ
ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᕐᓂᖅ
ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᖅᑎᒃᑯᑦ ᐱᓕᕆᕝᕕᖓᑦ ᐃᓚᖃᖅᐳᑦ ᐋᓐᓂᐊᕕᓐᓂ ᐱᔨᑦᑎᕋᕐᓂᐅᔪᓂᒃ ᓄᓇᓕᓐᓂ ᐊᕕᒃᑐᖅᓯᒪᔪᓂᓪᓗ ᐋᓐᓂᐊᕕᖕᓂ, ᕿᑭᖅᑕᓂ ᐋᓐᓂᐊᕐᕕᖓᓐᓂᓗ. ᐱᓕᕆᕝᕕᐅᔪᖅ ᐃᓱᒪᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᑦ ᐱᔨᑦᑎᕋᖅᐸᖕᒥᔪᑦ, ᐊᑯᓂᐅᔪᒥᒃ ᐊᖏᕐᕋᕆᔭᐅᔪᓂ ᓄᓇᓕᖕᓂᓗ ᑲᒪᒋᔭᖃᕐᓂᖅ ᐃᑲᔪᖅᑐᐃᓂᕐᒧᑦ ᐱᔨᑦᑎᕋᐅᑎᓂᕐᒥᒃ. ᐱᓕᕆᕝᕕᐅᔪᖅ ᐱᓇᓱᐊᖅᑐᑦ ᐃᓕᖅᑯᓯᐅᔪᓂᒃ ᐃᒃᐱᒍᓱᑦᑎᐊᕋᓱᐊᖅᖢᑎᒃ ᓈᒻᒪᒃᑐᓂᒃ ᐱᔨᑦᑎᕋᕐᓂᒃᑯᑦ ᐃᓗᐃᑦᑑᓕᖓᔪᒃᑯᑦ, ᐋᓐᓂᐊᕐᕕᓕᐊᖅᓯᒪᔪᓂᒃ ᐃᓱᒪᒋᔭᖃᖅᖢᑎᒃ. ᐃᓚᓕᐅᔾᔨᓯᒪᖕᒥᔪᑦ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᓪᓕᐅᒃᑯᒻᒫᓂᒃ ᐊᑐᖅᑕᐅᓲᓄᑦ ᐋᓐᓂᐊᕐᕕᓕᐊᖅᑐᓄᑦ ᓄᓇᕗᒻᒥ ᓯᓚᑖᓂᓗ, ᐊᒻᒪᓗᑦᑕᐅᖅ ᐃᓚᒋᐊᖅᓯᒪᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔫᑎᓂᒃ ᐊᒻᒪ ᑭᒡᓕᓯᓂᐊᖅᑕᐅᓯᒪᔪᓂᒃ. ᐱᓕᕆᕝᕕᐅᔪᖅ ᑲᒪᒋᔭᖃᓲᖅ ᑕᑯᔭᐅᔪᒃᓴᙳᖅᑎᑕᐅᓯᒪᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᖅᑕᐅᓂᕐᒧᑦ ᓄᓇᕗᒻᒥ ᓯᓚᑖᓂᓗ. ᐱᓕᕆᕝᕕᐅᔪᖅ ᑮᓇᐅᔭᖃᖅᑎᑦᑎᕙᒃᐳᑦ ᓘᒃᑖᓂᒃ ᐊᒻᒪᓗ ᖃᐅᔨᒪᔨᑕᒻᒪᕆᖕᓄᑦ ᐱᔨᑦᑎᕋᖅᑎᓄᑦ, ᐃᓚᓕᐅᔾᔭᐅᓪᓗᑎᒃ ᑎᒥᒥᒍᑦ ᐱᓕᒻᒪᒃᓴᐃᕙᒃᑐᓂᒃ ᐊᑐᖅᑕᐅᓲᑦ ᑕᒪᐃᓐᓂᒃ ᓄᓇᕗᒻᒥ ᓯᓚᑖᓂᓗ ᑕᐃᒪᐃᑦᑕᕆᐊᖃᕐᓂᖏᑦ ᒪᓕᓪᓗᒋᑦ. ᓇᓪᓕᐅᒃᑯᒫᖃᖏᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᑦ, ᑲᒪᒋᔭᐅᓲᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ (ᓂᕈᐊᖅᓯᒪᔪᑦ 4 ᑮᓇᐅᔭᓂᒃ), ᐱᓕᕆᕝᕕᐅᔪᒥ ᑲᒪᒋᔭᐅᕙᒃᑐᖅ.
ᓄᓇᓕᖕᓂ ᐋᓐᓂᐊᕐᕖᑦ
ᓄᓇᓕᖕᓂᒃ ᐋᓐᓂᐊᕐᕖᑦ ᐱᓕᕆᐊᖃᐅᖅᐳᑦ ᐊᒥᓱᒐᓚᖕᓂᒃ ᖃᓄᐃᙱᑦᑎᐊᕐᓂᕐᒨᖓᔪᑦ ᐊᒻᒪᓗ ᑭᒃᑯᑐᐃᓐᓇᐃᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᐱᔨᑦᑎᕋᕐᓂᖏᓐᓄᑦ. ᐱᓕᕆᐊᒃᓴᑦ ᐱᔨᑦᑎᕋᖃᑦᑕᖅᑐᑦ ᐊᔾᔨᒌᙱᑦᑐᓂᒃ ᐃᓚᒋᓪᓗᓂᐅᒃ ᐋᓐᓂᐊᖃᖅᑕᐃᓕᒪᔾᔪᓯᓐᓂᒃ ᑐᓴᐅᒪᑎᑦᑎᓂᕐᒥᒃ, ᐋᓐᓂᐊᖅᑕᐃᓕᒪᑎᑦᑎᓂᕐᒥᒃ, ᑲᒪᒋᔭᖃᕐᖓᐅᑎᓂᕐᒥᒃ ᐊᒻᒪ ᑐᐊᕕᕐᓇᖅᑐᒃᑯᑦ ᒪᒥᓴᐃᓂᕐᒥᒃ ᓄᓇᓕᐅᔪᓄᑦ ᓄᓇᕗᓕᒫᒥ.
ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᓇᓪᓕᐅᒃᑯᒫᓄᑦ ᐱᓕᕆᐊᑦ ᑭᒡᓕᓯᓂᐊᕐᓂᖅ
ᑖᓐᓇ ᐱᓕᕆᐊᖅ ᑎᑎᖃᑎᒍᑦ ᓇᓗᓇᐃᖅᓯᓲᑦ ᐃᓅᓕᕐᕕᓯᐅᑎᓂᑦ, ᑲᑎᑎᑕᐅᔪᓂᑎᓂᒃ, ᑐᖁᔪᓄᓪᓗ ᓇᓗᓇᒃᑯᑕᓂᑦ ᓄᓇᕗᒻᒥᑦ. ᑎᑎᖅᓯᕙᒃᑐᑦ ᐊᑎᕐᓂᒃ ᐊᓯᔾᔨᖅᑕᐅᔪᓂᒃ, ᑎᒍᐊᖅᑕᐅᔪᓂᒃ, ᐊᑖᑕᒋᔭᐅᔫᑉ ᒥᒃᓵᓅᖓᔪᓂᒃ ᐃᓅᓕᕐᕕᒃᓯᐅᑎᓄᑦ, ᐃᓚᒋᐊᕈᑎᓂᓪᓗ ᐊᓯᔾᔨᕈᑕᐅᔪᓂᓪᓘᓐᓃᑦ ᐊᑎᕐᓄᑦ. ᑖᒃᑯᐊ ᑲᒪᒋᔭᖃᕐᒥᔪᑦ ᐊᐅᓚᑦᑎᓂᕐᒥᒃ ᑲᔪᓯᑎᑦᑎᓂᕐᒥᓪᓗ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᓪᓕᐅᒃᑯᒫᖏᓐᓂᒃ ᐊᒻᒪᓗ ᐅᐃᒍᖏᓐᓂᒃ ᐋᓐᓂᐊᕐᕕᓕᐊᖅᑐᖅᓯᐅᑏᑦ ᐃᑲᔫᑎᒃᓴᖏᓐᓂᒃ. ᐱᓕᕆᐊᖑᔪᖅ ᑲᒪᒋᔭᖃᓲᖅ ᓇᓪᓕᐅᒃᑯᒫᖃᖏᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᓂᒃ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕈᑏᑦ ᑲᓇᑕᒥᐅᓄᑦ, ᐃᓚᒋᓪᓗᓂᒋᑦ ᐃᔨᓕᕆᔭᐅᓂᖅ, ᖃᓂᓕᕆᔭᐅᓂᖅ ᐊᒻᒪ ᐋᓐᓂᐊᕕᓕᐊᖅᐸᒃᑐᓄᑦ ᓇᔪᕐᕕᐅᕙᒃᑐᑦ.
ᐊᖏᕐᕋᕆᔭᐅᔪᓂ ᓄᓇᓕᖕᓂᓗ ᑲᒪᒋᔭᖃᕐᓂᖅ
ᐊᖏᕐᕋᕆᔭᐅᔪᓂ ᓄᓇᓕᖕᓂᓗ ᑲᒪᔨᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒨᖓᔪᓂᒃ ᐱᔨᑦᑎᕋᖃᑦᑕᖅᑐᑦ ᓄᓇᕗᒻᒥᐅᓄᑦ ᑲᒪᒋᔭᐅᒋᐊᓕᓐᓄᑦ ᐱᔾᔪᑎᒋᓪᓗᒍ ᐋᓐᓂᐊᕐᓂᖅ, ᖃᓄᐃᑦᑎᐊᙱᓐᓂᖏᓐᓄᑦ ᐅᕝᕙᓘᓐᓃᑦ ᑎᒥᒥᒍᑦ ᐊᔪᕈᑎᖃᕐᓂᕐᒧᑦ. ᐱᓇᓱᐊᖅᑕᐅᔪᖅ ᑖᓐᓇ ᐃᓄᒃ ᐃᒻᒥᓂᒃ ᑲᒪᒋᔭᖃᕈᓐᓇᕐᓂᐊᕐᒪᑦ ᓄᓇᓕᓐᓂ ᑲᒪᒋᔭᐅᑦᑎᐊᓯᓐᓈᕐᓗᓂ, ᐋᓐᓂᐊᓯᐅᖅᑎᓄᑦ ᐅᐸᒃᑕᐅᕙᓪᓗᓂ, ᓇᒻᒥᓂᕐᓗ ᑲᒪᒋᔭᖃᕐᓂᕐᒥᒃ ᐃᑲᔪᖅᑕᐅᓂᕐᒧᑦ. ᑕᒪᓐᓇ ᐃᑲᔪᖅᑐᐃᔪᖅ ᐊᒻᒪᓗ ᓴᙱᒃᑎᑎᑦᑎᕙᒃᖢᓂ ᐃᓚᒌᓂᒃ ᓄᓇᓖᓪᓗ ᐃᓚᓕᐅᔾᔭᐅᓯᒪᓂᖏᓐᓂᒃ ᐱᔨᑦᑎᕋᕐᓂᒃᑯᑦ ᑲᒪᒋᔭᐅᔭᕆᐊᓕᖕᒧᑦ. ᐱᔨᑦᑎᕋᖅᐸᒃᑐᑦ ᑲᒪᒋᔭᐅᔫᑉ ᐅᖃᐅᓯᖓᓂᒃ ᒪᓕᓪᓗᑎᑦ ᑕᐃᒪᐃᑦᑐᓐᓇᕐᓂᓕᒫᖏᓐᓂᒃ. ᑕᒪᕐᒥᑲᓴᒃ ᐊᑕᖏᐅᒪᖏᑉᐸᑦ, ᐊᖏᕐᕋᕆᔭᒥᒃ ᑲᒪᒋᔭᐅᓂᖏᓪᓗ ᐱᔨᑦᑎᕋᖅᑕᐅᑎᓪᓗᒋᑦ ᐃᓄᒃᑎᑑᕐᕕᐅᕙᒃᑐᑦ. ᐊᖏᕐᕋᕆᔭᐅᔪᓂ ᓄᓇᓕᖕᓂᓗ ᑲᒪᔨᒃᑯᑦ ᑕᐃᒃᑯᓂᖓᓪᓗᐊᑕᖅ ᐅᓗᕆᐊᓇᖅᑐᒦᑦᑐᓂᒃ ᓄᓇᓕᐅᔪᓂ ᐃᑲᔪᖅᐸᒃᑐᑦ, ᐃᑲᔪᓲᖑᒻᒥᔪᑦ ᐱᐅᓯᕚᓪᓕᖅᑎᑦᑎᓂᕐᒥᒃ ᖃᓄᐃᙱᑦᑎᐊᕆᐊᖅᑎᑦᑎᓂᕐᒥᒃ ᐋᓐᓂᐊᖅᑕᐃᓕᒪᑎᑦᑎᓂᒃᑯᑦ. ᐊᖏᕐᕋᕆᔭᐅᔪᓂ ᓄᓇᓕᖕᓂᓗ ᑲᒪᒋᔭᒃᑯᑦ ᑲᒪᔨᖓ ᐃᓚᐅᖃᑦᑕᖅᑐᖅ ᑲᓇᑕᓕᒫᒥ; ᑲᑐᔾᔨᖃᑎᒌᒃᑐᓂᒃ ᑲᑎᒪᓂᕐᒥᓪᓗ ᓄᓇᕗᒻᒥ ᐃᓕᓴᕆᔭᐅᕚᓪᓕᖅᑎᑦᑎᓇᓱᓐᓂᕐᒥᒃ ᓄᓇᕐᔪᐊᓕᒫᒧᑦ. ᐃᓚᐃᓐᓇᖓ ᐃᑲᔪᖅᓱᖅᑕᐅᕙᒃᑐᖅ ᒐᕙᒪᑐᖃᒃᑯᓐᓂᙶᖅᑐᓂᒃ ᑮᓇᐅᔭᕐᓂᑦ.
ᐋᓐᓂᐊᕐᕖᑦ ᓘᒃᑖᓕᕆᔨᒃᑯᓪᓗ
ᐋᓐᓂᐊᕐᕕᒻᒥ ᐱᔨᑦᓯᕋᖅᑕᐅᓃᑦ ᑕᐃᒃᑯᐊᖑᔪᑦ ᒪᓂᒪᑎᑕᐅᔪᑦ ᕿᑭᖅᑕᓂ ᐋᓐᓂᐊᕐᕕᒻᒥ. ᑖᓐᓇ 35-ᓂᒃ ᐃᒡᓕᖃᖅᑐᖅ ᐋᓐᓂᐊᖅᑐᓂᒃ ᑲᒪᒋᔭᖃᓲᑦ, ᐅᓂᒃᓯᒪᔪᖃᕈᓐᓇᖅᑐᖅ, ᐱᓚᒃᑐᐃᕕᑕᖃᐅᖅᖢᓂ, ᐃᑲᕐᕋᓄᑦ 24-ᓄᑦ ᑐᐊᕕᕐᓇᖅᑐᓕᕆᓲᖑᓪᓗᑎᒃ, ᐃᑲᕐᕋᓄᑦ 24-ᓄᑦ ᑕᕐᕋᖅᑐᕐᓂᒃᑯᑦ ᓱᖅᑯᐃᖅᓯᓇᓱᒃᑯᕕᖃᖅᑐᑎᒃ, ᖃᐅᔨᓴᕐᕕᖃᖅᑐᑎᓪᓗ. ᐋᓐᓂᐊᕐᕕᖕᒥ ᐅᓪᓗᒃᑯᑦ ᐱᓚᒃᑐᐃᓲᖑᓪᓗᑎᒃ ᐊᒻᒪ ᑐᐊᕕᕐᓇᖅᑐᒃᑯᑦ ᐱᓚᒃᑐᐃᓲᖑᒋᓪᓗᑎᒃ, ᓘᒃᑖᓂᒃ ᐃᓂᒃᓴᓕᐅᖅᓯᒪᔪᒃᑯᑦ ᑕᑯᔭᐅᓐᓇᖅᑐᖅ, ᑐᐊᕕᕐᓇᖅᑐᒃᑯᑦ ᑕᑯᔭᐅᓐᓇᖅᑐᖅ, ᐊᒻᒪ ᐊᔾᔨᒌᙱᑦᑐᓄᑦ ᓘᒃᑖᓄᑦ ᑕᑯᔭᐅᓐᓇᖅᑐᖅ ᐃᖃᓗᓐᓂ ᕿᑭᖅᑖᓗᒻᒥᓪᓗ. ᐃᑲᔪᖅᑐᐃᓂᕐᒥᒃ ᐱᔨᑦᑎᕋᐅᑏᑦ ᐃᓚᖃᖅᑐᖅ ᓴᓗᒻᒪᖅᓴᐃᓂᕐᒥᒃ, ᓂᕿᓕᕆᓂᕐᒥᒃ, ᐊᓂᖅᑎᕆᑦᑎᐊᖅᑎᑦᑎᓂᕐᒥᒃ, ᐋᖅᑭᒋᐊᕆᐊᓕᖕᓂᒃ, ᐊᒻᒪ ᖃᐅᔨᓴᖅᑐᓕᕆᓂᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ.
ᐊᑯᓂᐅᔪᑯᒃ ᑲᒪᒋᔭᖃᕐᓂᖅ
ᐊᖏᕐᕋᕆᔭᒥ ᐊᑯᓂᐅᔪᒃᑯᑦ ᑲᒪᔨᒃᑯᑦ ᐱᔨᑦᑎᕋᖃᑦᑕᖅᐳᑦ ᐃᑲᕐᕋᓄᑦ 24-ᓄᑦ, ᐅᓪᓗᓄᑦ 7-ᓄᑦ ᐋᓐᓂᐊᓯᐅᖅᑎᓄᑦ ᑲᒪᒋᔭᐅᒋᐊᓕᓐᓄᑦ ᐃᒻᒥᓄᓪᓗ ᐃᑲᔪᖅᑕᐅᔭᕆᐊᓕᓐᓄᑦ ᐃᓐᓇᕐᓄᑦ ᐊᓯᖏᓪᓗ ᐃᓐᓇᐅᔪᓄᑦ ᐋᓐᓂᐊᓯᐅᖅᑎᒧᑦ ᑲᒪᒋᔭᐅᔭᕆᐊᓕᓐᓄᑦ ᐃᑲᔪᖅᑕᐅᔭᕆᐊᓕᓐᓄᓪᓗ.
ᐋᓐᓂᐊᕐᕕᓕᐊᖅᑐᓄᑦ ᖃᖓᑦᑕᐅᑎᓕᕆᔨᒃᑯᑦ
ᐋᓐᓂᐊᕐᕕᓕᐊᖅᐸᒃᑐᑦ ᖃᖓᑦᑕᐅᑎᑖᖅᑎᑦᑎᕙᒃᐳᑦ ᐱᔪᓐᓇᖅᑐᓄᑦ ᐋᓐᓂᐊᕐᕕᓕᐊᖅᓯᒪᔪᓄᑦ ᐋᓐᓂᐊᕐᕕᓕᐊᕆᐊᖃᖅᑐᖕᓄᑦ ᐱᔨᑦᑎᕋᐅᑎᖃᙱᑦᑐᓄᑦ ᓄᓇᓕᖏᓐᓂᒃ ᓄᓇᕗᒻᒥᓪᓘᓐᓃᑦ.
ᐃᓱᒪᓕᕆᓂᖅ ᐅᐃᕆᓯᒪᓂᕐᓗ
ᐃᓱᒪᓕᕆᓂᖅ ᐊᔪᓕᕈᑎᖃᖅᓯᒪᔪᓕᕆᓂᕐᓗ ᐱᔭᒃᓴᖃᖅᑎᑕᐅᕗᑦ ᐊᑐᐃᓐᓇᐅᑎᑦᑎᓂᕐᒥᒃ ᐃᓄᓕᕆᔭᐅᔪᒧᑦ ᑐᕌᖓᔪᒥᒃ ᑲᒪᒋᔭᖃᐃᓐᓇᕐᓂᕐᒥᒃ ᐃᓚᖃᖅᑐᖅ ᖃᐅᔨᓴᕐᖓᐅᑎᒥᒃ, ᐅᖃᖃᑎᖃᕐᓂᕐᒥᒃ, ᑲᒪᒋᔭᖃᕐᓂᕐᒥᒃ ᐊᒻᒪᓗ ᑕᑯᔭᐅᔪᒃᓴᙳᐃᑎᑦᑎᓂᕐᒥᒃ ᐃᓄᑐᐃᓐᓇᕐᓄᑦ ᐃᓚᒌᖑᔪᓄᓪᓗ ᐃᓱᒪᒃᑯᑦ ᐊᒃᓱᕈᖅᑐᓄᑦ ᐊᒻᒪ/ᐅᕝᕙᓘᓐᓃᑦ ᐃᓱᒪᒥᒍᑦ ᐊᑲᐃᓪᓕᐅᕈᑎᖃᖅᑐᓄᑦ. ᑕᒪᓐᓇ ᐃᓚᖃᖅᑐᖅ ᐃᑲᔪᖅᑐᐃᓂᕐᒥᒃ ᓄᓇᓕᐅᔪᓄᑦ ᑲᑎᙵᔪᓄᓪᓘᓐᓃᑦ ᑐᑭᓯᐅᒪᓂᖅᓴᐅᓕᖁᓪᓗᒋᑦ ᑲᒪᒋᔭᖃᑦᑎᐊᕈᓐᓇᕐᓂᕐᒥᓪᓗ ᕿᓚᒻᒥᐅᔪᒃᑯᑦ, ᐋᖅᑭᒐᒃᓴᐅᔪᒃᑯᑦ ᐊᒻᒪᓗ/ᐅᕝᕙᓘᓐᓃᑦ ᑐᐊᕕᕐᓇᖅᑐᒃᑯᑦ ᐃᓱᒪᓕᕆᓂᕐᒨᖓᔪᓂᒃ, ᐃᓅᓯᕐᒥᓂᒃ ᑭᐱᓯᓂᕐᒥᒃ ᐃᓱᒪᔪᓄᑦ ᑕᐃᒪᐃᓐᓇᓱᑦᑐᓄᓪᓗ, ᐃᒻᒥᖕᓂᒃ ᐋᓐᓂᖅᑐᑦ ᐱᔮᕆᓪᓗᑎᒃ, ᐊᒃᓱᕈᓪᓚᕆᒃᑐᒃᑰᖅᑐᓂᒃ, ᐃᒻᒥᓂᒃ ᖃᓄᐃᓐᓂᕆᔭᖃᕐᓂᕐᒥᒃ ᐊᒻᒪᓗ ᖃᓄᐃᙱᑦᑎᐊᕐᓂᕐᒨᖓᔪᓂᒃ, ᐃᓚᒋᓪᓗᓂᒋᑦ ᐅᐃᕆᓯᒪᐅᑏᑦ ᐃᒻᒥᓂᒃ ᑲᒪᒋᔭᖃᑦᑎᐊᕈᓐᓇᓪᓕᓗᓂ ᖃᓄᐃᑦᑎᐊᕈᓐᓃᕐᓗᓂᓗ.
ᖃᓂᒃᑯᑦ ᖃᓄᐃᙱᑦᑎᐊᕐᓂᖅ
ᖃᓂᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᐱᓕᕆᐊᒃᓴᖅ ᐱᔨᑦᓯᕋᕐᓂᐅᕗᖅ ᑭᒍᓐᓂᐊᖅᑕᐅᕙᒃᑐᓂᒃ, ᐃᓚᒋᓪᓗᓂᐅᒃ ᐊᔾᔨᒌᙱᑦᑐᓂᒃ ᑭᒍᑎᓕᕆᔨᐅᔪᑦ, ᐃᓄᓕᒫᓄᑦ ᓄᓇᓕᓕᒫᓂ ᓄᓇᕗᒻᒥ. ᑕᒪᓐᓇ ᑮᓇᐅᔭᖃᖅᑎᑕᐅᔪᖅ ᑲᑐᔾᔨᖃᑎᖃᖅᑐᑦ ᓇᓪᓕᐅᒃᑯᒫᖃᖏᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᖅᑐᓕᕆᔨᒃᑯᓐᓂᑦ, ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑮᓇᐅᔭᑎᒍᑦ, ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᐅᓚᑦᑎᓂᕐᒧᑦ ᑮᓇᐅᔭᖁᑎᖏᓐᓂᒃ. ᖃᓂᑦᑎᐊᕆᒃᑎᑦᑎᓇᓱᐊᕐᓂᖅ ᐊᒻᒪ ᓱᕈᓰᑦ ᑲᒪᒋᔭᐅᓂᖏᑦ ᐃᓅᕋᑖᒥᑦ 8-ᓄᑦ ᐊᕐᕋᒍᓕᓐᓄᑦ ᐊᑐᐃᓐᓇᐅᑎᑕᐅᓲᑦ ᓄᓇᕗᒻᒥ ᓱᕈᓯᕐᓄᑦ ᑭᒍᓐᓂᐊᖅᑕᐅᓂᖏᓐᓄᒃ ᐱᓕᕆᐊᑎᒍᑦ. ᐃᓚᒃᑲᓐᓂᕐᓗᒍ, ᑭᒍᓐᓂᐊᖅᑎᒃᑯᑦ ᐱᔨᑦᑎᕋᖅᐸᒃᑐᑦ ᓱᕈᓯᕐᓂᒃ ᐋᓐᓂᐊᕐᕕᓐᓂ ᐃᓕᓐᓂᐊᕐᕕᓐᓂᓗ. ᑕᐃᒃᑯᓄᖓ ᓱᕈᓯᕐᓄᑦ 12 ᑐᖔᓂ ᐅᑭᐅᖃᖅᑐᓄᑦ ᑭᒍᑎᖏᑦ ᐊᐅᓂᕐᔪᐊᖃᖅᐸᑕ, ᐋᓐᓂᐊᕕᖕᒥ ᑲᒪᒋᔭᐅᔪᓐᓇᖅᑐᑦ
ᓄᓇᕗᑦ ᓯᓚᑖᓃᑦᑐᑦ ᐋᓐᓂᐊᕐᕖᑦ
ᑖᓐᓇ ᐱᓕᕆᐊᖅ ᑲᒪᒋᔭᒃᓴᖃᖅᑐᑦ ᐊᑭᓖᖃᑦᑕᓂᕐᒥᒃ ᓄᓇᕘᑉ ᓯᓚᑖᓂ ᐋᓐᓂᐊᕐᕕᖕᒥ ᐱᔨᑦᑎᕋᕐᓂᐅᔪᓂᒃ. ᐋᓐᓂᐊᕐᕕᓕᐊᖅᑐᑦ ᑕᑯᔭᐅᒑᖓᒥᒃ ᓄᓇᕗᒻᒥ ᐋᓐᓂᐊᕐᕕᓕᐊᖅᑐᖅᓯᐅᑎᖃᖅᖢᑎᒃ ᐊᓯᖏᓐᓂᒃ ᐊᕕᒃᑐᖅᓯᒪᔪᓂ, ᐊᕕᒃᑐᖅᓯᒪᔪᕐᒥᐅᑕᐃᑦ ᐊᑭᓕᒐᒃᓴᓕᐅᓲᖑᕗᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐱᔨᑦᑎᕋᐅᑎᓄᑦ.
ᐱᓕᕆᔨᒻᒪᕇᑦ ᖃᓄᐃᓕᐅᕈᑎᖏᑦ
ᐱᓕᕆᔨᒻᒪᕇᑦ ᐱᓕᕆᖃᑦᑕᕐᓂᖏᑦ ᓴᖅᑭᔮᖅᑎᑦᑎᓇᓱᓲᑦ, ᐋᖅᑭᒃᓱᐃᓲᑦ ᑲᒪᒋᔭᖃᓲᖑᓪᓗᑎᓪᓗ ᐱᓕᕆᔨᒻᒪᕆᓐᓄᑦ ᒪᓕᒃᑕᐅᔪᒃᓴᓂᒃ ᐊᒻᒪ ᓈᒻᒪᓛᒃᑯᑦ ᐱᓕᕆᔾᔪᓯᕐᓂᒃ ᓴᐳᔾᔨᓯᒪᓂᕐᒥᒃ ᑭᒃᑯᓕᒫᓂᒃ ᒪᓕᑦᑎᐊᓂᕐᒧᓪᓗ ᒪᓕᒐᕐᓂᒃ. ᑕᓐᓇ ᐱᓕᕆᕝᕕᐅᔪᖅ ᐊᐅᓚᑦᑎᓲᑦ ᖃᐅᔨᓴᕐᓂᕐᒥᒃ ᐃᓕᓐᓂᐊᕐᓂᒃᑯᑦ ᓇᓗᓇᐃᒃᑯᑕᖅᑖᖅᓯᒪᑦᑎᐊᕆᐊᒃᓴᖏᓐᓂᒃ, ᐊᑎᓕᐅᖃᑕᐅᓯᒪᓂᖏᓐᓂᒃ, ᐱᔪᓐᓇᐅᑎᑖᖅᑖᖅᑎᑦᑎᓂᕐᒥᓪᓗ 12-ᓂᒃ ᒪᓕᒐᖅᑎᒍᑦ ᐋᓐᓂᐊᖅᑐᓕᕆᔨᒻᒪᕆᓐᓄᑦ ᐃᖅᑲᓇᐃᔮᕆᔭᐅᔪᓐᓇᖅᑐᓄᑦ. ᑲᒪᒋᔭᖃᓲᖑᒻᒥᔪᖅ ᖃᐅᔨᓴᕐᓂᐅᔪᓂᒃ ᐅᓐᓂᕐᓗᒍᑕᐅᓯᒪᔪᓂᒃ ᐱᔪᓐᓇᐅᑎᑎᒍᑦ ᐋᓐᓂᐊᖅᑐᓕᕆᔨᐅᔪᓂᒃ. ᐃᑲᔪᖅᑐᐃᓲᑦ ᐃᓄᓐᓂᒃ ᑕᑯᖅᑳᖅᐸᒃᑐᓂᒃ ᐊᒻᒪᓗ ᐊᐅᓚᑦᑎᓂᕐᒧᑦ ᑕᒪᒃᑯᐊ ᐱᔾᔪᑎᒋᓪᓗᒋᑦ ᐊᑦᑕᕐᓇᖅᑐᓕᕆᓂᖅ, ᐸᓯᔭᐅᔪᓐᓇᕐᓂᖅ ᐊᒻᒪᓗ ᐱᓕᕆᔾᔪᓯᐅᕙᒃᑐᑦ ᐋᓐᓂᐊᖅᑐᓕᕆᔨᒻᒪᕆᐅᔪᑦ ᓄᓇᕗᒻᒥ.
ᓘᒃᑖᓄᑦ ᐊᑭᓕᕆᐊᓖᑦ
ᑖᓐᓇ ᐱᓕᕆᐊᖅ ᐱᔨᑦᑎᕋᐅᑎᓂᒃ ᓄᓇᕗᒻᒥᐅᓄᑦ ᑲᒪᕙᒃᑐᑦ ᑕᒪᒃᑯᓂᖓ: ᐅᓂᒃᓯᒪᔪᓂᒃ, ᐋᓐᓂᐊᕐᕕᓕᐊᑐᐃᓐᓇᖅᑐᓂᒃ, ᐱᓕᕆᔨᒻᒪᕆᓐᓄᑦ ᓘᒃᑖᓄᑦ ᑕᑯᔭᐅᔪᓂᒃ, ᓘᒃᑖᒧᑦ ᑕᑯᔭᐅᔪᓂᒃ, ᐱᓕᒻᒪᒃᓴᖅᑎᑕᐅᓂᕐᒧᑦ (ᐃᓚᒋᓪᓗᓂᒋᑦ ᐃᖃᐃᓕᓴᕐᓂᖅ, ᑎᒥᒥᒃ ᐱᓕᒻᒪᒃᓴᐃᓂᕐᒥᒃ, ᐅᖃᐅᓯᕐᒥᒃ ᐱᓕᒻᒪᒃᓴᐃᓂᕐᒥᒃ ᐊᒻᒪ ᓯᐅᑎᓕᕆᓂᕐᒥᒃ). ᑖᓐᓇ ᐱᓕᕆᐊᖅ ᐊᑭᓖᕙᒃᑐᑦ ᐱᔨᑦᑎᕋᕐᓂᐅᔪᓂᒃ ᐱᔨᑦᑎᕋᐅᑕᐅᐸᑦ ᓄᓇᕗᒻᒥ ᓄᓇᖃᖅᑐᓄᑦ ᓄᓇᕗᓕᒪᒥᑦ ᐅᕝᕙᓗᓂᑦᓄᓇᕗᑦ ᓯᓚᑖᓂᓘᓐᓃᑦ. ᐱᓕᕆᐊᖑᔪᒧᑦ ᐊᑭᓕᕆᐊᓖᑦ ᐃᓚᖃᖅᑐᖅ ᐊᑭᐅᔪᓂᒃ ᑎᑭᑎᑦᑎᔭᕆᐊᖃᖅᐸᑕ ᐋᓐᓂᐊᖅᑐᓕᕆᔨᒻᒪᕆᓐᓂᒃ ᓄᓇᕗᑦ ᓯᓚᑖᓃᙶᖅᑐᒥᒃ ᑕᒫᓂ ᐱᔨᑦᑎᕋᖅᑎᑦᑎᓂᕐᒧᑦ.