Jaydin's Story
ᔩᑎᓐ ᓄᙵᕐᒥᑦ ᐊᑎᖃᖅᑐᖓ, ᒪᒃᑯᒃᑐᓄᑦ ᐋᕿᒃᓱᐃᔨᐅᔪᖓ ᐃᓄᓕᕆᔨᒃᑯᓐᓂᑦ. ᐱᓕᕆᐊᖃᑲᑕᒃᑎᑦᑎᕙᒃᑐᖓ ᐃᖅᑲᓇᐃᔭᖃᑎᓐᓂᒃ ᒪᒃᑯᒃᑐᑦ ᐱᓕᕆᐊᒃᓴᖏᓐᓂᒃ. ᐃᓱᓕᕝᕕᖃᖅᐸᙱᑦᑐᖅ ᐱᓕᕆᐊᒃᓴᑦ ᑲᔪᓯᓂᕆᔭᖏᑦ ᐱᓕᕆᐊᕆᕙᒃᑕᑦᑎᓐᓂ, ᑭᓯᐊᓂ ᑐᕌᒐᕆᔭᕗᑦ ᐊᑐᑦᑎᐊᕐᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓂᐊᕈᒪᓂᖃᑦᑎᐊᖅᖢᑕᓗ. ᑲᔪᓯᓂᖃᑦᑎᐊᖅᑐᒥ ᒪᒃᑯᒃᑐᓂᑦ ᐊᐅᓚᖅᑎᑦᑎᖃᑦᑕᕐᓂᖅ ᐆᒃᑑᑕᐅᔪᖅ ᐱᓕᕆᐊᖃᓚᐅᕐᓂᕆᔭᕗᑦ ᑭᖑᓂᑦᑎᓐᓂᑦ. ᐊᐅᔭᐅᓚᐅᖅᑐᒥ, ᐃᖅᑲᓇᐃᔭᖃᑎᒐᓗ ᒫᒃᔅ ᔪᐊᐃᓗ ᐅᕙᒍᒃ ᐋᖅᑭᒃᓯᓚᐅᖅᑐᒍᑦ ᐊᐅᓪᓛᕐᓂᐅᔪᒥᑦ ᑕᐃᒎᓯᓕᖕᒥᒃ ᑲᔪᖏᖅᓴᐃᓂᕐᒧᑦ ᐱᓇᓱᐊᕈᓯᖅ. 40−ᓂᖅ ᓄᑕᕋᖃᓚᐅᖅᑐᒍᑦ ᐅᑭᐅᓕᖕᓂᒃ 6-ᒥᑦ 12−ᒧᑦ ᑲᑎᑉᐸᒃᖢᑎᒃ ᐱᓕᕆᐊᒃᓴᕈᓘᔭᕐᓄᑦ ᑐᕌᒐᖃᓗᐊᖅᖢᑎᒃ ᐱᕈᖅᑎᑦᑎᕙᓪᓕᐊᓂᕐᒥᒃ ᐃᓅᖃᑎᖃᕈᓐᓇᑦᑎᐊᕐᓂᕐᒥᒃ, ᐱᓕᕆᖃᑎᒌᑦᑎᐊᕈᓐᓇᕐᓂᕐᒥᒃ, ᐊᒻᒪ ᐊᓕᐊᓇᐃᒍᓲᑎᖃᕐᓂᕐᒥᒃ ᐊᔾᔨᒌᙱᓂᑦᑎᓐᓂᒃ. ᑲᔪᖏᖅᓴᐃᓂᕐᒧᑦ ᐱᓇᓱᐊᕈᓯᕐᒧᑦ ᐊᐅᓪᓛᕐᓂᖅ ᐱᑕᖃᖅᑎᑦᑎᓚᐅᖅᑐᑦ ᓄᑕᖅᑲᓄᑦ ᐃᒥᒐᒃᓴᓂᒃ, ᑕᒧᓗᒐᒃᓴᓂᒃ, ᐊᒻᒪ ᐅᓪᓗᕈᒻᒥᓴᓂᒃ. ᐃᑲᕐᕋᓂᑦ ᐱᖓᓱᓂᑦ ᐅᓪᓗᕐᒧᑦ ᐃᖃᓗᐃᑦ ᑰᖓᓃᑦᑐᓐᓇᓚᐅᖅᑐᒍᑦ, ᑕᑯᓇᒃᖢᑕ ᑲᔾᔭᐅᓴᒃᖢᑕᓗ ᓄᑕᖅᑲᓂᒃ ᐃᓚᐅᑎᑦᑎᓪᓗᑕ. ᐅᓇ ᐊᑕᐅᓯᖅ ᐆᒃᑑᑎ ᐱᓕᕆᐊᒃᓴᓂ ᐃᓚᒋᔭᐅᔪᓐᓇᖅᑐᖅ ᐱᓕᕆᐊᕆᔭᑦᑎᓐᓂ.
ᓄᓇᕗᒻᒥᑦ ᐃᓄᐃᑦ ᐊᒃᑐᐊᖃᑦᑕᐅᑎᓂᖃᑦᑎᐊᕆᐊᖃᖅᑐᑦ ᐅᖃᓪᓚᖃᑎᖃᖅᑎᓪᓗᒋᑦ ᒪᒃᑯᒃᑐᓂ. ᐃᓄᐃᑦ ᒪᓕᑦᑎᐊᖁᒐᓗᐊᖅᐸᕗᑦ ᐱᓕᕆᐊᒃᓴᓄᓪᓗ ᑐᙵᕕᖃᑦᑎᐊᕐᓗᑎᒃ ᑭᓱᑐᐃᓐᓇᓄᑦ ᐊᑐᐃᓐᓇᐅᑎᑕᐅᔪᓄᑦ ᒪᒃᑯᒃᑐᓄᑦ ᐃᓕᓐᓂᐊᕐᕕᖕᓂᑦ ᐃᓕᓐᓂᐊᕐᐅᓪᓘᓐᓃᑦ ᓯᓚᑖᓂ. ᐱᓂᐊᕈᒪᓂᖃᑦᑎᐊᕐᓗᓂ ᒪᓕᑦᑎᐊᖏᓐᓇᕐᓗᓂᓗ ᑲᔪᓯᑎᑦᑎᕙᓪᓕᐊᓂᕐᒥᒃ ᐊᑑᑎᖃᑦᑎᐊᖅᑐᓂ ᐱᓕᕆᐊᒃᓴᒧᑦ ᐃᓕᓐᓂᐊᒐᒃᓴᓄᓪᓘᓐᓃᑦ ᑭᒡᒐᖅᑐᐃᓗᐊᖅᖢᑎᒃ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ. ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐱᔾᔪᑕᐅᔪᑦ ᓴᖅᑭᑉᐸᒃᑐᑦ ᖃᐅᑕᒫᑦ ᐃᖅᑲᓇᐃᔭᕐᕕᓐᓂ ᐃᓄᓕᕆᔨᒃᑯᓐᓂ. ᐃᒃᐱᒍᓱᒃᑐᖓ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖅ ᐅᕿᙱᔾᔪᑎᖃᖅᑐᖅ ᐃᓄᓕᕆᔨᒃᑯᓐᓂᑦ ᓄᓇᕗᒻᒥ. ᐱᓕᕆᐊᖃᐃᓐᓇᖅᑐᖓ, ᐱᔨᑦᑎᕋᖅᑕᐅᔪᑦ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᑐᐊᖑᙱᑦᑐᖅ, ᑭᓯᐊᓂ ᓇᖕᒥᓂᖅᑕᐅᖅ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᓐᓂᒃ.
ᖁᑦᑎᖕᓂᖅᓴᒥ ᐃᓕᓐᓂᐊᖅᑎᓪᓗᖓ, ᐃᓵᒃᓯᒪᒋᑦ ᐃᓅᓯᕐᒥ ᑲᑎᒪᔨᖏᑦ ᖃᐃᓚᐅᖅᑐᑦ ᓴᖅᑭᔮᖅᑎᑦᑎᓪᓗᑎᒡᓗ ᐃᓕᓐᓂᐊᕐᕕᖕᒥ ᐅᖃᐅᓯᖃᖅᖢᑎᒃ ᐃᓕᓐᓂᐊᖅᓯᓐᓈᑦ ᑲᑎᒪᓂᖏᓐᓂᑦ ᐱᓕᕆᐊᕆᖃᑦᑕᖅᓯᒪᓂᑯᖏᓐᓂᒃ. ᐃᖅᑲᐅᒪᔭᕋ ᐱᐅᓪ ᐅᖃᐅᓯᖃᓕᖅᑕ (Bell Let’s Talk) ᐱᓕᕆᔭᐅᑎᓪᓗᒍ ᐅᕙᖓᓗ ᓇᖕᒥᓂᖅ ᐃᓚᐅᓪᓗᖓ. ᐱᓕᕆᐊᒃᓴᐃᑦ ᓲᕐᓗ ᐱᐅᓪ ᐅᖃᐅᓯᖃᓕᖅᑕ (Bell Let’s Talk) ᐅᓪᓗᖏᑦ ᐱᓕᕆᑦᑎᐊᕈᑕᐅᕙᒃᑐᑦ ᓇᓗᓇᐃᖅᓯᓂᕐᒥᒃ ᑲᙳᓱᖕᓂᕆᔭᐅᕙᒃᑐᓂ, ᑭᓯᐊᓂᑦᑕᐅᖅ ᐱᓕᕆᐊᖃᒃᑲᓐᓂᖃᑦᑕᕆᐊᖃᖅᑐᒍᑦ ᐃᓕᓐᓂᐊᖅᓯᓐᓈᑦ ᑲᑎᒪᓂᕐᓂᒃ ᐱᓕᕆᐊᒃᓴᓂᓪᓗ ᑐᕌᒐᖃᑦᑎᐊᖅᑐᓂᒃ. ᐱᓕᕆᐊᖃᐃᓐᓇᕆᐊᖃᖅᑐᒍᑦ ᑲᔪᓯᓂᖃᖅᑐᓂ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᓂ ᓄᓇᕗᒻᒥ ᐱᐅᓯᕚᓪᓕᕈᑕᐅᔪᓐᓇᖅᑐᓂᒃ.
ᐊᔪᕐᓇᖅᑐᖅᓯᐅᖅᑰᓚᐅᖅᐳᖓ ᐃᓕᓐᓂᐊᕐᕕᐊᓗᖕᒦᓐᓂᓕᒫᓐᓂᑦ, ᐊᓂᐊᕝᕕᒃᓯᐅᑐᐃᓐᓇᖅᐸᒃᖢᖓ ᐅᕙᓐᓂᒃ ᓇᓗᓇᐃᖅᖢᖓ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕆᔭᕋ ᑐᐃᓐᓃᑦᑐᓐᓃᖅᑎᖦᖢᒍ ᐃᓕᓐᓂᐊᖅᓯᓐᓈᑦ, ᐃᓕᑦᑎᕙᓪᓕᐊᓇᓱᒃᖢᖓ. ᐃᓅᖃᑎᓐᓂᑦ ᐃᑲᔪᖅᓱᖅᑕᐅᓂᖅ ᐊᒃᑐᐃᓂᖃᕐᔪᐊᕐᓇᖅᑐᖅ ᒪᒃᑯᒃᑐᓄᑦ ᐱᕈᖅᐸᓪᓕᐊᔪᓄᑦ; ᑕᐃᒪᐃᓚᐅᖅᑐᖅ ᐅᕙᓐᓄᑦ. ᐱᕈᖅᓴᓪᓗᖓ ᐃᓅᓪᓗᖓ ᐊᖑᑕᐅᓪᓗᖓ, ᐃᖃᓗᖕᓂ, ᓄᓇᕗᒻᒥ, ᓇᓃᓕᕐᒪᖔᓪᓗ ᒫᓐᓇ, ᐃᒃᐱᒍᓱᒃᑐᖓ ᐊᑐᖃᑦᑕᓚᐅᖅᓯᒪᔭᓐᓂᒃ, ᐃᓱᒪᖅᓱᕐᓂᖅᓴᐅᔭᕆᐊᖃᕐᓂᑦᑎᓐᓂᒃ ᑕᑯᒃᓴᕈᖅᑎᓪᓗᑕ ᓇᖕᒥᓂᖅ ᓴᓇᐅᒐᓕᐊᕆᒃᑲᓐᓂᖅᓯᒪᔪᑎᒍᑦ ᓄᑕᖅᑲᓂᒃ ᐱᔪᒪᓕᕈᑕᐅᕙᒃᑐᓂ, ᐃᓱᒪᖃᓕᖅᑎᓪᓗᒋᑦ ᓯᓚᑖᓂᑦ ᐱᒋᐊᖅᐸᓪᓕᐊᓂᕐᒥᒡᓗ ᓄᑖᓂᒃ ᓴᖅᑭᑉᐸᓪᓕᐊᔪᓂᒃ. ᓲᕐᓗ ᐄ, ᐃᓄᐃᑦ ᑕᒡᕙ ᑕᐃᒪᐃᑉᐳᑦ; ᐃᓄᖁᑎᕗᑦ ᑕᐃᒪᐃᓕᐅᕈᓐᓇᖅᑐᑦ. ᑕᐅᑐᒃᑕᓐᓂᙶᖅᑐᖅ ᑕᒪᓐᓇ. ᐅᓄᖅᑐᓂᒃ ᐊᑐᐃᓐᓇᐅᔪᖃᕆᐊᓕᒃ ᐃᓱᒪᖅᓱᕐᓂᖅᓴᐅᓗᑎᒡᓗ ᐱᓕᕆᐊᖃᖅᑎᓪᓗᑎᑦ ᐱᓕᕆᐊᕆᔭᕆᐊᖃᖅᑕᕐᓂᒃ.