ᐃᖢᐊᖅᓴᐃᔨᒃᓴᓄᑦ ᐃᓕᓴᐃᔨ

ᑖᓐᓇ ᐃᖅᑲᓇᐃᔮᒃᓴᖅ ᐃᖅᑲᓇᐃᔮᖅᑖᕋᓱᒃᑐᓕᒫᓄᑦ ᑐᕌᖓᔪᖅ.

ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ ᒪᒃᑯᒃᑐᓂᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓚᐅᖅᑐᓂᒃ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᑦᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᑦ ᐆᒻᒪᕆᒃᑐᖅ, ᐱᔪᒪᓂᖃᑦᑎᐊᖅᑐᖅ, ᐊᖏᖅᓯᒪᑦᑎᐊᖅᖢᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ.  ᒐᕙᒪᐅᑎᓪᓗᒋᑦ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓂᕐᒧᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᓴᖅᑭᔮᖅᑎᑦᑎᓂᕐᒧᑦ ᐃᓄᒃᑐᑦ ᐅᖃᐅᓯᖓᓐᓂᑦ, ᑭᒡᒐᖅᑐᐃᑦᑎᐊᕐᓂᕐᒧᑦ ᒐᕙᒪᒃᑯᓐᓂᑦ ᐃᖅᑲᓇᐃᔭᖅᑎᓂᑦ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᑲᔪᓯᑎᑦᑎᓂᕐᒧᑦ ᐊᖏᖅᓯᒪᓂᕆᔭᖓᓂᑦ ᓄᓇᕗᒻᒧᑦ. ᑲᔪᓯᓂᖃᑦᓯᐊᖅᑐᑦ ᐃᖅᑲᓇᐃᔮᖅᑖᖅᑐᑦ ᖁᕕᐊᒋᔭᖃᕐᓂᐊᖅᑐᑦ ᐊᑭᓕᖅᑐᖅᑕᐅᑦᓯᐊᕐᓂᕐᒧᑦ, ᐋᓐᓂᐊᕐᕕᓕᐊᕐᓂᕐᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᓂᑦ, ᓇᓗᓇᐃᖅᔭᖅᑕᐅᓯᒪᔪᓂᑦ ᐃᓐᓇᑐᖃᐅᔪᓯᐊᑦᓴᓄᑦ ᐸᕐᓇᐅᑎᓂᑦ, ᓅᑕᐅᓂᕐᒧᑦ ᐱᕕᖃᕐᓂᕐᒧᑦ ᐱᕕᖃᕐᓂᕐᒧᓪᓗ ᐱᓕᒻᒪᑦᓴᕐᓂᕐᒧᑦ ᐃᖅᑲᓇᐃᔮᒥᓪᓗ ᖁᕝᕙᖅᐸᓪᓕᐊᓂᕐᒧᑦ.  

ᓄᓇᕗᒻᒥ ᐃᓅᑦᑎᐊᕐᓂᕐᒥᒃ ᐃᓕᓐᓂᐊᖅᑎᑦᑎᔨᑦ ᐊᐅᓚᑦᑎᔨᖓᓄᑦ ᑐᓴᖅᑎᑦᑎᕙᒡᓗᓂ, ᐃᖢᐊᖅᓴᐃᔨᓂᑦ ᐃᓕᓴᐃᔨ ᐱᓕᕆᐊᒃᓴᖃᖅᐳᖅ ᓴᖅᑭᔮᖅᑎᑦᑎᕙᒡᓗᓂ ᐱᐅᔪᓂᒃ, ᐃᓕᖅᑯᓯᑦᑎᓐᓄᑦ ᐊᑦᑕᕐᓇᙱᑦᑐᒥᑦ ᐃᖢᐊᖅᓴᐃᓂᕐᒥᒃ, ᐱᐅᓯᕚᓪᓕᑎᑦᑎᓇᓱᐃᓐᓇᕐᓗᓂ, ᐋᓐᓂᐊᕕᓕᐊᖅᓯᒪᔪᑦ ᐱᔪᓐᓃᖅᐹᓪᓕᖅᑎᓐᓇᓱᐊᕐᓗᒋᑦ ᐊᒻᒪ ᑕᑯᔭᐅᔪᑦ ᖃᓄᐃᓐᓇᖏᑦᑐᒦᑎᓪᓗᒋᑦ ᐋᓐᓂᐊᕕᖕᒥᑦ.  ᐃᖅᑲᓇᐃᔮᖅᑖᖅᑐᖅ ᐱᒻᒪᕆᐅᔪᒥᑦ ᐱᓕᕆᐊᒃᓴᖃᖅᐳᖅ ᐱᐅᔪᒥᑦ ᐃᖢᐊᖅᓴᐃᔨᑦ ᐱᔨᑦᑎᕋᑦᑎᐊᒃᑲᓐᓂᖁᓪᓗᒋᑦ ᐃᑲᔪᖅᐸᒡᓗᒋᑦ ᐃᖢᐊᖅᓴᐃᔨᑦ ᐱᓕᕆᔪᓐᓇᖅᓯᑦᑎᐊᖁᓪᓗᒋᑦ ᐱᔭᕆᐊᓕᖏᓐᓂᒃ ᑲᔪᓯᑦᑎᐊᖁᓪᓗᒋᑦ ᐃᖢᐊᖅᓴᐃᔨᐅᓂᕐᒧᑦ. ᐃᖢᐊᖅᓴᐃᔨᒃᓴᓄᑦ ᐃᓕᓴᐃᔨ ᐱᓕᕆᐊᒃᓴᖃᖅᐳᖅ ᐱᔪᓐᓇᕐᓂᖏᓐᓂᑦ ᖃᐅᔨᓴᖅᐸᒡᓗᓂ, ᐋᖅᑭᒃᓱᐃᕙᒡᓗᓂ ᐃᓕᓐᓂᐊᕈᑎᒃᓴᑦ ᐸᕐᓇᐅᑎᖏᓐᓂ, ᐃᑲᔪᖅᑐᐃᕙᒡᓗᓂ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᒃᓴᓂᑦ, ᐊᐅᓚᑦᑎᕙᒡᓗᓂ ᐊᒻᒪ ᑲᔪᓯᑎᑦᑎᕙᒡᓗᓂ ᖃᐅᔨᕚᓪᓕᕈᑎᓂᒃ, ᐃᓕᓐᓂᐊᑎᑦᑎᓂᕐᒥᑦ ᐊᒻᒪ ᐱᓕᒻᒪᒃᓴᖅᑎᑦᑎᕙᒡᓗᓂ ᐃᖢᐊᖅᓴᐃᔨᓂᑦ ᐃᖅᑲᓇᐃᔮᖃᖅᑐᓂᑦ ᐊᔾᔨᒌᙱᑦᑐᓂᑦ ᐱᓕᕆᐊᒃᓴᖏᓐᓂᒃ ᓄᓇᕘᓕᒫᒥ.

ᐃᖢᐊᖅᓴᐃᔨᓄᑦ ᐃᓕᓴᐃᔨ ᓴᖅᑭᔮᖅᑎᑦᑎᖃᑦᑕᖅᐳᖅ ᐊᔾᔨᒌᑎᑦᑎᔪᓂᑦ ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᐅᑎᓂᑦ ᓄᓇᕘᓕᒫᒥ ᓇᓗᓇᐃᖅᓯᕙᒡᓗᓂ ᐋᓐᓂᐊᖅᑐᓕᕆᓂᕐᒧᑦ ᐊᑐᖅᑕᐅᔭᕆᐊᖃᓪᓚᕆᒃᑐᓂᑦ ᐃᖢᐊᖅᓴᐃᔨᓄᑦ ᒪᓕᒃᑕᐅᕙᒃᑐᓂᑦ ᑖᒃᑯᓂᖓ ᐱᔨᑦᑎᕋᖅᑎᓪᓗᒋᑦ. ᑖᔅᓱᒥᖓ ᐱᓕᕆᐊᒃᓴᖃᖅᑐᖅ, ᐊᒻᒪᓗ ᐃᖢᐊᖅᓴᐃᔨᓂᑦ ᐃᓕᓐᓂᐊᖅᑎᑦᑎᔨᑦ ᐱᓕᕆᖃᑎᒌᑦ, ᐋᓐᓂᐊᕐᕕᓕᐊᖅᑐᓂᑦ ᓈᒻᒪᒃᓴᕐᓂᖅᓴᐅᑎᑦᑎᔪᓐᓇᖅᐳᑎᑦ, ᑭᒃᑯᑐᐃᓐᓇᓂᒃ ᖁᓱᙱᓐᓂᖅᓴᐅᓕᖅᑎᑦᑎᓗᑎᑦ ᐋᓐᓂᐊᖅᑐᓕᕆᔨᑦ ᑲᒪᒋᔭᐅᔾᔪᑎᖏᓐᓂ, ᐊᒻᒪᓗ ᐊᒃᑐᐃᕙᒡᓗᓂ ᓄᓇᕗᒻᒥᐅᓂᑦ ᖃᓄᐃᙱᑦᑐᓂᑦ ᐃᓅᓯᖃᑦᑎᐊᖅᑐᓂᓪᓗ ᐱᕙᓪᓕᐊᑎᑦᑎᓗᑎᒃ ᐋᖅᑭᐅᒪᑎᑦᑎᓗᑎᒡᓗ ᐃᖢᐊᖅᓴᐃᔨᓂᑦ ᐱᔪᓐᓇᕐᓂᖃᖅᑐᓂᒃ.

ᖃᐅᔨᒪᔭᕆᐊᓕᖏᑦ, ᐊᔪᙱᑦᑕᕆᐊᓕᖏᑦ, ᐱᓕᕆᔪᓐᓇᕆᐊᓕᖏᓪᓗ ᑖᔅᓱᒧᖓ ᐃᖅᑲᓇᐃᔮᒧᑦ ᐱᔭᐅᒐᔪᒃᑐᑦ ᐃᖢᐊᖅᓴᐃᔨᙳᕐᓂᕐᒧᑦ ᐃᓕᓴᕆᔭᐅᔾᔪᑎᑖᖅᑐᓄᑦ ᐊᔾᔨᐸᓗᖓᓂᓪᓘᓐᓃᑦ, ᐊᕐᕌᒍᓄᑦ ᐱᖓᓱᓄᑦ

ᐃᖢᐊᖅᓴᐃᔨᐅᖃᑦᑕᖅᓯᒪᓗᓂ, ᓄᓇᓕᖕᓂ ᐃᖢᐊᖅᓴᐃᔨᐅᕙᒡᓗᓂ, ᐃᖢᐊᖅᓴᐃᔨᓄᑦ ᑲᒪᔨᐅᕙᒡᓗᓂ, ᑐᐊᕕᕐᓇᖅᑐᓕᕆᕝᕕᖕᒥ ᐃᖢᐊᖅᓴᐃᔨᐅᓂᕐᒥᒃ, ᐅᕝᕙᓘᓐᓃᑦ ᐱᕕᒡᔪᐊᖅᑐᓂᒃ ᑲᒪᔨᐅᖃᑦᑕᖅᓯᒪᓗᓂ ᐃᖢᐊᖅᓴᐃᔨᐅᓗᓂ ᐅᑯᓂᖓᓗ ᐊᕐᕌᒍᒥ ᐊᑕᐅᓯᕐᒥᒃ ᐱᓕᒻᒪᒃᓴᖅᑎᑦᑎᖃᑦᑕᖅᓯᒪᓗᓂ ᐃᓐᓇᕐᓂᒃ ᐃᓕᓐᓂᐊᖅᑐᓂᒃ, ᐃᖢᐊᖅᓴᐃᔨᙳᓵᖅᑐᓂᒃ ᖃᐅᔨᕚᓪᓕᖅᑎᑦᑎᔪᓐᓇᕐᓗᓂ, ᐃᖢᐊᖅᓴᐃᔨᙳᕆᐅᖅᓴᔪᓂᑦ, ᐅᕝᕙᓘᓐᓃᑦ ᐱᔭᕆᐅᖅᓴᑎᑦᑎᔪᓂᑦ. ᐃᖅᑲᓇᐃᔮᖅᑖᕋᓱᐊᖅᑐᑦ ᐊᑎᓕᐅᖃᑕᐅᔪᓐᓇᕆᐊᓕᑦ ᐃᓗᐊᖅᓴᐃᔨᒃᑯᑦ ᑲᑐᔾᔨᖃᑎᒌᓄᑦ ᓄᓇᑦᓯᐊᕐᒥ ᓄᓇᕗᒻᒥᓗ.  ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ.

ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒌᒃᑯᓯᖅᑕᐅᓯᒪᒋᐊᓕᒃ ᐃᖅᑲᓇᐃᔮᒧᑦ. ᑐᓐᓂᖅᑯᑎᒋᓗᒍᑦ ᓇᓗᓇᐃᕈᑏᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒌᒃᑯᓯᖅᓯᒪᓂᕐᓂᑦ ᐃᖅᑲᓇᐃᔮᖅᑖᕋᓱᒍᑎᒋᔭᓪᓗ.

ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑐᑦ, ᖃᓪᓗᓈᑎᑐᑦ ᐅᐃᕖᑎᑐᓪᓗ. ᐱᓇᔪᒃᑐᑦ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑎᑎᕋᕈᓐᓇᖅᑐᖅ ᓂᕈᐊᕆᔭᒥᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ. ᐅᖃᕈᓐᓇᖅᐸᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐅᖃᐅᓯᕐᓂᑦ ᐃᑲᔫᑎᖃᑦᑎᐊᕋᔭᖅᑐᖅ. ᖃᐅᔨᒪᒃᐸᑦ ᐃᓄᐃᑦ ᓄᓇᓕᓐᓂ, ᐃᓕᖅᑯᓯᖏᓐᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐃᓄᒃᑐᑦ ᐱᓕᕆᖃᑦᑕᖅᓯᒪᓗᓂᓪᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.

ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᑦ ᑖᑦᓱᒧᖓ ᐃᖅᑲᓇᐃᔮᖅᒧᑦ. ᑎᓕᐅᕆᑲᓐᓂᖅᑐᒍᑦ ᐱᓇᓱᐊᖁᔨᑦᓱᑕ ᐃᓕᓐᓂᑦ ᓇᓕᒧᓱᑦᑐᓂᑦ ᐊᕐᕌᒍᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᓂᕐᒧᑦ ᐃᓕᓐᓂᐊᖅᓯᒪᓂᕐᒧᑦ ᐱᓕᕆᖃᑦᑕᖅᓯᒪᓂᕐᒧᓪᓗ ᐱᔭᕆᐊᖃᖅᑐᓂᑦ ᖁᓛᓂᑦ ᑎᑎᕋᖅᓯᒪᔪᓂᑦ.

ᐃᖅᑲᓇᐃᔭᐃᓐᓇᖅᑐᓄᑦ, ᐊᑕᐃᓐᓇᕐᓂᐊᖅᑐᓄᑦ ᐃᓗᐊᖅᓴᐃᔨᓄᑦ, ᐃᖅᑲᓇᐃᔮᖃᐃᓐᓇᖅᑐᑦ ᐊᑭᓕᖅᑕᐅᒃᑲᓐᓂᖃᑦᑕᕐᓂᐊᖅᐳᑦ: $5,000 ᐃᖅᑲᓇᐃᔮᒥ ᐱᒋᐊᓕᓵᖅᑎᓪᓗᒋᑦ, $5,000 ᑕᖅᑭᓄᑦ 18−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ ᐊᒻᒪ $10,000 ᑕᖅᑭᓄᑦ 30−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ. ᐃᓚᓕᐅᔾᔭᐅᓯᒪᔪᑦ ᐊᑭᓕᐅᑎᑦ ᐃᓚᖃᖅᐳᑦ $9,000 ᐊᕐᕌᒍᑕᒫᑦ ᐃᓄᖕᓄᑦ ᐱᔨᑦᑎᕋᖅᑎᐅᓂᕐᒧᑦ ᐃᑲᔫᑕᐅᕙᒃᑐᒥᑦ ᐊᒻᒪ $375 ᑕᖅᑭᑕᒫᑦ ᐃᖅᑲᓇᐃᔮᖃᐃᓐᓇᕐᓂᕐᒧᑦ ᑐᓂᔭᐅᒃᑲᓐᓂᖅᐸᒃᑐᖅ ᑲᑎᓕᒫᖅᖢᒍ $4,500 ᐊᕐᕌᒍᓕᒫᒧᑦ.

ᐃᖅᑲᓇᐃᔮᖅᑖᕋᓱᒃᑐᓄᑦ ᐊᑏᑦ ᐃᓚᔭᐅᑐᐃᓐᓇᕆᐊᓕᒃ ᓯᕗᓂᒃᓴᒥ ᐃᖅᑲᓇᐃᔮᒃᓴᓄᑦ ᐃᓄᒃᑕᐅᒋᐊᖃᓕᕐᓂᖅᐸᑦ ᓇᐅᑦᑎᐅᒪᖃᑕᐅᓛᕐᒪᑦ

ᑕᔅᓱᒥᖓ ᐃᖅᑲᓇᐃᔮᒃᓴᒧᑦ ᐆᒃᑐᕈᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕐᓗᑎᑦ ᐃᖅᑲᓇᐃᔮᒧᑦ ᐱᔪᒥᓴᐅᑎᑦ ᓇᒃᓯᐅᑎᓗᒍ ᐅᑯᓄᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᑎᑎᕋᕐᕕᐅᔪᓐᓇᖅᑐᒥ ᐃᕐᖐᓐᓈᖅᑕᐅᒃᑯᑦ.

• ᓄᓇᕗᑦ ᒐᕙᒪᒃᑯᖏᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᓂᕐᒥᑦ ᐃᖅᑲᓇᐃᔭᖅᑎᓂᒃ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᒻᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᒪᓕᒡᓗᒍ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᐃᑦ.
• ᒐᕙᒃᑯᓐᓂᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᖃᐅᔨᓴᖅᑕᐅᓂᕐᒦᑦᑐᑦ ᐱᔭᕆᐊᖃᖅᑐᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓐᓂᑦ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ. 
• ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᑦ ᐊᔪᓕᕈᑕᐅᙱᑐᐃᓐᓇᕆᐊᓕᒃ ᐆᒃᑐᕐᓂᕆᔭᖏᑦ ᐃᓱᒪᒋᔭᐅᓂᖏᓐᓄᑦ. ᖃᐅᔨᓴᖅᑕᐅᓂᖏᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐱᓕᕆᐊᒃᓴᕆᔭᐅᔪᑦ ᐃᖅᑲᓇᐃᔮᒃᓴᒥ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᓈᒻᒪᒋᔭᐅᔪᓂᒃ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᓄᑦ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ. 
• ᐃᖅᑲᓇᐃᔭᖅᑖᕋᓱᒃᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ.
• ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
• ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ.  ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᓱᐊᕈᑏᑦ ᐋᒡᒑᖅᑕᐅᑐᐃᓐᓇᕆᐊᓕᒃ.