ᐃᓱᒪᓕᕆᔨ

ᑖᓐᓇ ᐃᖅᑲᓇᐃᔮᒃᓴᖅ ᐃᖅᑲᓇᐃᔮᖅᑖᕋᓱᒃᑐᓕᒫᓄᑦ ᑐᕌᖓᔪᖅ.

ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ ᒪᒃᑯᒃᑐᓂᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓚᐅᖅᑐᓂᒃ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᑦᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᑦ ᐆᒻᒪᕆᒃᑐᖅ, ᐱᔪᒪᓂᖃᑦᑎᐊᖅᑐᖅ, ᐊᖏᖅᓯᒪᑦᑎᐊᖅᖢᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ.  ᒐᕙᒪᐅᑎᓪᓗᒋᑦ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓂᕐᒧᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᓴᖅᑭᔮᖅᑎᑦᑎᓂᕐᒧᑦ ᐃᓄᒃᑐᑦ ᐅᖃᐅᓯᖓᓐᓂᑦ, ᑭᒡᒐᖅᑐᐃᑦᑎᐊᕐᓂᕐᒧᑦ ᒐᕙᒪᒃᑯᓐᓂᑦ ᐃᖅᑲᓇᐃᔭᖅᑎᓂᑦ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᑲᔪᓯᑎᑦᑎᓂᕐᒧᑦ ᐊᖏᖅᓯᒪᓂᕆᔭᖓᓂᑦ ᓄᓇᕗᒻᒧᑦ. ᑲᔪᓯᓂᖃᑦᓯᐊᖅᑐᑦ ᐃᖅᑲᓇᐃᔮᖅᑖᖅᑐᑦ ᖁᕕᐊᒋᔭᖃᕐᓂᐊᖅᑐᑦ ᐊᑭᓕᖅᑐᖅᑕᐅᑦᓯᐊᕐᓂᕐᒧᑦ, ᐋᓐᓂᐊᕐᕕᓕᐊᕐᓂᕐᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᓂᑦ, ᓇᓗᓇᐃᖅᔭᖅᑕᐅᓯᒪᔪᓂᑦ ᐃᓐᓇᑐᖃᐅᔪᓯᐊᑦᓴᓄᑦ ᐸᕐᓇᐅᑎᓂᑦ, ᓅᑕᐅᓂᕐᒧᑦ ᐱᕕᖃᕐᓂᕐᒧᑦ ᐱᕕᖃᕐᓂᕐᒧᓪᓗ ᐱᓕᒻᒪᑦᓴᕐᓂᕐᒧᑦ ᐃᖅᑲᓇᐃᔮᒥᓪᓗ ᖁᕝᕙᖅᐸᓪᓕᐊᓂᕐᒧᑦ.  

ᑲᒪᔨᖓᓂ ᐊᑕᐅᓯᙱᑦᑐᒥᑦ ᐱᓕᕆᐊᖑᖃᑦᑕᖅᑐᓂ ᓂᕈᐊᖅᑕᐅᔪᓂᒡᓘᓐᓃᑦ ᑭᐅᖃᑦᑕᖅᐳᖅ ᐃᖅᑲᓇᐃᔮᖓᑦ ᐱᓕᕆᖃᑎᖃᖃᑦᑕᖅᐳᖅ ᓘᒃᑖᒻᒪᕆᖕᓂᑦ ᓄᓇᓕᖕᓂᑦ ᐱᔨᑦᑎᕆᐊᖃᖅᑐᓂ ᐃᓄᖕᓄᑦ ᐃᓱᒪᒥᒍᑦ ᐋᓐᓂᐊᖅᑐᓂ ᐊᒻᒪ/ᐅᕝᕙᓘᓐᓃᑦ ᐃᓗᐊᙱᔾᔪᑎᖃᖅᑐᓂ, ᐊᑕᐅᓯᙱᑦᑐᓂ ᐅᐃᕆᔾᔪᑎᓕᖕᓂᑦ ᐊᒻᒪ ᐃᓅᓯᕐᒥᓂᒃ ᑭᐱᓯᔪᒪᓂᕐᒧᑦ ᐃᓱᒪᖃᑦᑕᖅᑐᓂ/ᐃᓅᓯᕐᒥᓂᒃ ᑭᐱᓯᓇᓱᐊᖃᑦᑕᖅᑐᓄᓪᓗ ᐊᒻᒪ ᑐᓴᕐᕕᐊᖃᑦᑕᕐᓗᓂ ᓘᒃᑖᓂᑦ, ᓄᓇᓕᖕᓂᖔᖅᑐᓂ, ᐅᑭᐅᖅᑕᖅᑐᒥᑦ ᐊᒻᒪ ᓄᓇᕗᒻᒥᑦ ᓯᓚᑖᓂᒃ, ᖃᐅᔨᓴᖅᐸᒃᖢᑎᒃ ᐸᕿᔭᐅᔾᔪᑎᒃᓴᓂ ᑐᓴᕆᐊᖃᓪᓚᕆᒃᑐᓂ.

ᐃᖅᑲᓇᐃᔭᖅᑎ ᓯᕗᓕᖅᑕᐅᓂᐊᖅᑐᖅ ᐊᑐᐃᓐᓇᐅᑎᑦᑎᓂᕐᒧᑦ ᐋᓐᓂᐊᕐᕕᖕᒥ ᑐᑭᒧᐊᑦᑎᑦᑎᓂᕐᒧᑦ ᐅᐸᒃᑕᐅᖃᑦᑕᖅᑐᓄᓪᓗ ᐱᔨᑦᑎᕐᕕᐅᔪᓂᑦ ᓄᓇᓕᖕᓂᑦ. ᐃᓱᒪᓕᕆᔨ ᑲᒪᒋᔭᖃᖃᑦᑕᕐᓂᐊᖅᑐᖅ ᑲᒪᒋᔭᐅᓂᕐᒧᑦ ᐸᕐᓇᐅᑎᓂᑦ ᐱᕙᓪᓕᐊᑎᑦᑎᓂᕐᒧᑦ, ᐱᓕᕆᐊᓄᑦ ᐊᐅᓚᑦᑎᓂᕐᒧᑦ, ᑲᑎᒪᓂᐅᓂᐊᖅᑐᓄᑦ, ᐱᒋᐊᙵᕐᓂ ᖃᐅᔨᓴᖅᑕᐅᖏᓐᓇᖅᑐᓄᑦ, ᐄᔭᒐᕐᓂᑦ ᐊᐅᓚᑦᑎᓂᕐᒧᑦ ᖃᐅᔨᓴᕐᓂᕐᒧᓪᓗ ᑐᐊᕕᕐᓇᖅᑐᓕᕆᔪᓐᓇᕐᓗᓂᓗ ᐊᐅᓚᑦᑎᖃᑦᑕᖅᐳᖅ ᐃᓕᓐᓂᐊᖅᑎᑦᑎᕙᒃᖢᓂᓗ ᐱᓕᕆᖃᑎᒌᒃᑐᓂ.

ᖃᐅᔨᒪᓂᖓ, ᐊᔪᙱᓐᓂᖏᓐᓂᖓᓗ ᐱᔭᐅᒐᔪᒃᑐᑦ ᑖᔅᓱᒧᖓ ᐃᖅᑲᓇᐃᔮᖃᕐᓂᐊᕐᓗᓕᓂ ᐃᓕᓐᓂᐊᕈᑎᖏᓐᓂᑦ ᐱᔭᕇᖅᓯᓯᒪᓗᓂ ᐃᓗᐊᖅᓴᐃᔨᐅᓂᕐᒧᑦ ᐱᓕᕆᖃᑦᑕᖅᓯᒪᓗᓂ ᐃᓱᒪᓕᕆᓂᕐᒧᑦ, ᐱᔭᕇᕈᓯᐊᕐᒥᓪᓘᓐᓃᑦ ᓯᓚᑦᑐᖅᓴᕐᕕᒡᔪᐊᕐᒥ ᐃᓱᒪᓕᕆᓂᕐᒧᑦ ᐃᓗᐊᖅᓴᐃᔨᐅᓂᕐᒧᑦ ᐱᖓᓱᓄᓪᓗ ᐅᑭᐅᓄᑦ ᐱᓕᕆᖃᑦᑕᖅᓯᒪᓗᓂ ᐃᓱᒪᓕᕆᔨᐅᖃᑕᐅᓗᓂ. ᐃᖅᑲᓇᐃᔮᖅᑖᕋᓱᐊᖅᑐᑦ ᐊᑎᖃᖃᑕᐅᔪᓐᓇᕆᐊᓖᑦ ᐱᒋᐊᙱᓐᓂᖏᓐᓂᑦ ᐋᓐᓂᐊᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ ᓄᓇᑦᓯᐊᕐᒥ ᓄᓇᕗᒻᒥᓗ (CANNN) ᐊᕐᕌᒍᑕᒫᖅ ᐃᓕᓴᕆᔭᐅᔾᔪᑎᑖᖃᑦᑕᕐᓂᐊᕐᓗᑎᑦ.

ᐃᖅᑲᓇᐃᔮᖅᑖᕋᓱᐊᖅᑐᑦ ᐊᑎᓕᐅᕈᓐᓇᕆᐊᓖᑦ ᒐᕙᒪᒃᑯᓐᓂ ᑎᒥᖓᓄᑦ ᐱᓕᕆᖃᑦᑕᖅᓯᒪᓗᓂ ᒪᓕᒍᓐᓇᕐᓗᓂᓗ ᒪᓕᒐᕐᓂᑦ ᐃᓕᖅᑯᓯᕆᔭᐅᔭᕆᐊᓖᓪᓗ ᒪᓕᒃᑕᐅᖃᑦᑕᖅᑐᑦ. ᐊᕐᕌᒍᓂ ᑕᓪᓕᒪᓂ ᐃᓱᒪᓕᕆᔨᐅᓂᕐᒧᑦ ᐋᓐᓂᐊᓲᖅᑎᐅᓂᕐᒧᑦ ᐃᓱᒪᒋᔭᐅᒐᔭᖅᑐᖅ. ᐊᑐᖅᑐᒥᒃ ᐊᖁᑦᑐᓐᓇᐅᑎᖃᕆᐊᓕᒃ.

ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ.

ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᔭᕆᐊᓕᒃ ᐃᖅᑲᓇᐃᔮᖅᑖᕋᓱᒃᑐᖅ. ᑐᓐᓂᖅᑯᑎᒋᓗᒍ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᒧᑦ ᓇᓗᓇᐃᒃᑯᑕᐃᑦ ᐃᖅᑲᓇᐃᔮᖅᑖᕋᓱᒍᑎᒋᔭᕐᓄᑦ.

ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑎᑐᑦ (ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐅᐃᕖᑎᑐᓪᓗ. ᑐᓴᐅᒪᑎᑦᑎᔪᓐᓇᖅᐸᑦ ᓄᓇᕗᒻᒥ ᐅᖃᐅᓯᖅᑕᕆᔭᐅᔪᓂᒃ ᐊᑕᐅᓯᐅᙱᑦᑐᒥᑦ ᐃᑲᔫᑎᖃᑦᑎᐊᕋᔭᖅᐳᖅ. ᖃᐅᔨᒪᒃᐸᑦ ᐃᓄᐃᑦ ᐅᖃᐅᓯᖓᓂᒃ, ᓄᓇᓕᖕᓂ, ᐃᓕᖅᑯᓯᖏᓐᓂᒃ, ᓄᓇᒥᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔫᑎᖃᕋᔭᖅᐳᖅ.

ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑎᓕᐅᕆᒃᑲᓐᓂᖅᑐᒍᑦ ᐱᓇᔪᖁᔨᓪᓗᑕ ᐃᓕᖕᓂᑦ ᑕᐃᒪᓐᓇᑎᒋ ᐅᑭᐅᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᒍᕕᑦ ᐃᓕᓐᓂᐊᖅᓯᒪᔭᕆᐊᓕᑦ ᐱᓕᕆᖃᑦᑕᖅᓯᒪᔭᕆᐊᓕᓪᓗ ᐊᔾᔨᖓᓂ ᖁᓛᓂᑦ ᑎᑎᕋᖅᓯᒪᔪᓂᑦ.

ᐃᖅᑲᓇᐃᔭᐃᓐᓇᖅᑐᓄᑦ, ᐊᑕᐃᓐᓇᕐᓂᐊᖅᑐᓄᑦ ᐃᓗᐊᖅᓴᐃᔨᓄᑦ, ᐃᖅᑲᓇᐃᔮᖃᐃᓐᓇᖅᑐᑦ ᐊᑭᓕᖅᑕᐅᒃᑲᓐᓂᖃᑦᑕᕐᓂᐊᖅᐳᑦ: $5,000 ᐃᖅᑲᓇᐃᔮᒥ ᐱᒋᐊᓕᓵᖅᑎᓪᓗᒋᑦ, $5,000 ᑕᖅᑭᓄᑦ 18−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ ᐊᒻᒪ $10,000 ᑕᖅᑭᓄᑦ 30−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ. ᐃᓚᓕᐅᔾᔭᐅᓯᒪᔪᑦ ᐊᑭᓕᐅᑎᑦ ᐃᓚᖃᖅᐳᑦ $9,000 ᐊᕐᕌᒍᑕᒫᑦ ᐃᓄᖕᓄᑦ ᐱᔨᑦᑎᕋᖅᑎᐅᓂᕐᒧᑦ ᐃᑲᔫᑕᐅᕙᒃᑐᒥᑦ ᐊᒻᒪ $375 ᑕᖅᑭᑕᒫᑦ ᐃᖅᑲᓇᐃᔮᖃᐃᓐᓇᕐᓂᕐᒧᑦ ᑐᓂᔭᐅᒃᑲᓐᓂᖅᐸᒃᑐᖅ ᑲᑎᓕᒫᖅᖢᒍ $4,500 ᐊᕐᕌᒍᓕᒫᒧᑦ.

ᐱᓕᕆᐊᒃᓴᖅ 1 ᐊᑭᓕᐅᑎᑦ $10/ᐃᑲᕐᕋᒧᑦ ᐊᑕᐅᓯᕐᒧᑦ ᐱᐅᓛᒻᒪᕆᖕᒧᑦ ᐊᑐᐃᓐᓇᐅᕗᑦ ᐅᑯᓄᖓ ᐅᓪᓗᓕᒫᖅ ᐃᖅᑲᓇᐃᔭᖅᑎᐅᔪᓄᑦ, ᐃᖅᑲᓇᐃᔮᖃᐃᓐᓇᖅᑐᓄᑦ, ᐊᒻᒪ ᐃᖅᑲᓇᐃᔭᖃᑎᒌᓄᑦ: ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᓄᑦ, ᓄᓇᓕᖕᓂ ᐃᓗᐊᖅᓴᐃᔨᑦ, ᐃᓗᐊᖅᓴᐃᔨᙳᕆᐅᖅᓴᔪᑦ, ᐃᓄᖕᓄᑦ ᐃᓗᐊᖅᓴᐃᔨᑦ, ᐃᓱᒪᓕᕆᔨᑦ, ᐃᓱᒪᒥᒍᑦ ᐊᔪᕈᑎᓕᖕᓄᑦ ᖃᐅᔨᒃᑲᐃᔨᑦ ᐊᒻᒪ ᐃᕐᓂᓱᒃᓰᔨᑦ. ᐃᖅᑲᓇᐃᔮᒃᓴᑦ ᐊᔪᖅᑎᑕᐅᙱᑦᑐᑦ ᑖᒃᑯᓄᖓ ᐱᐅᑦᑎᐊᖅᑐᓄᑦ ᐅᑯᓇᓂ ᓄᓇᓕᖕᓃᑉᐳᑦ ᓴᓪᓕᖅ, ᓇᐅᔮᑦ, ᐃᖃᓗᒃᑑᑦᑎᐊᖅ, ᑰᒑᕐᔪᒃ, ᑕᓗᕐᔪᐊᖅ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᓴᓂᕋᔭᒃ, ᐃᖃᓗᐃᑦ, ᑭᒻᒥᕈᑦ, ᕿᑭᖅᑕᕐᔪᐊᖅ, ᖃᐅᓱᐃᑦᑐᖅ.

ᐱᓕᕆᐊᒃᓴᖅ 2−ᒧᑦ ᐊᑭᓕᐅᑎᑦ $15/ᐃᑲᕐᕋᒧᑦ ᐊᑕᐅᓯᕐᒧᑦ ᐱᐅᓛᒻᒪᕆᖕᒧᑦ ᐊᑐᐃᓐᓇᐅᕗᑦ ᐅᑯᓄᖓ ᐅᓪᓗᓕᒫᕐᒧᑦ ᐃᖅᑲᓇᐃᔮᓕᖕᓄᑦ, ᐃᖅᑲᓇᐃᔮᖃᐃᓐᓇᖅᑐᓄᑦ, ᐊᒻᒪ ᐃᖅᑲᓇᐃᔭᖃᑎᒌᓄᑦ: ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᓄᑦ, ᓄᓇᓕᖕᓂ ᐃᓗᐊᖅᓴᐃᔨᑦ, ᐃᓗᐊᖅᓴᐃᔨᙳᕆᐅᖅᓴᔪᑦ, ᐃᓄᖕᓄᑦ ᐃᓗᐊᖅᓴᐃᔨᑦ, ᐃᓱᒪᓕᕆᔨᑦ, ᐃᓱᒪᒥᒍᑦ ᐊᔪᕈᑎᓕᖕᓄᑦ ᖃᐅᔨᒃᑲᐃᔨᑦ ᐊᒻᒪ ᐃᕐᓂᓱᒃᓰᔨᑦ. ᐃᖅᑲᓇᐃᔮᒃᓴᑦ ᐊᔪᖅᑎᑕᐅᙱᑦᑐᑦ ᑖᒃᑯᓄᖓ ᐱᐅᓛᒻᒪᕆᖕᓄᑦ ᐅᑯᓇᓂ ᓄᓇᓕᖕᓃᑉᐳᑦ ᐊᕐᕕᐊᑦ, ᖃᒪᓂ'ᑐᐊᖅ, ᐃᒡᓗᓕᒑᕐᔪᒃ, ᐅᖅᓱᖅᑑᖅ, ᐊᐅᓱᐃᑦᑐᖅ, ᐃᒡᓗᓕᒃ, ᑭᙵᐃᑦ, ᖁᕐᓗᖅᑐᖅ, ᐸᖕᓂᖅᑑᖅ, ᒥᑦᑎᒪᑕᓕᒃ, ᑲᖏᖅᖠᓂᖅ, ᓴᓂᑭᓗᐊᖅ, ᑎᑭᕋᕐᔪᐊᖅ.

ᐊᔪᙱᑎᑕᐅᔪᓐᓇᕐᓂᕐᒧᑦ ᓇᓗᓇᐃᖅᓯᒪᔪᑦ ᓴᖅᑭᑕᐅᑐᐃᓐᓇᕆᐊᓖᑦ ᐃᓐᓄᒃᓯᒪᙱᑦᑐᑦ ᓯᕗᓂᒃᓴᒥ ᐃᓐᓄᒍᓐᓇᖁᓪᓗᒋᑦ.

ᑕᔅᓱᒥᖓ ᐃᖅᑲᓇᐃᔮᒃᓴᒧᑦ ᐆᒃᑐᕈᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕐᓗᑎᑦ ᐃᖅᑲᓇᐃᔮᒧᑦ ᐱᔪᒥᓴᐅᑎᑦ ᓇᒃᓯᐅᑎᓗᒍ ᐅᑯᓄᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᑎᑎᕋᕐᕕᐅᔪᓐᓇᖅᑐᒥ ᐃᕐᖐᓐᓈᖅᑕᐅᒃᑯᑦ.

• ᓄᓇᕗᑦ ᒐᕙᒪᒃᑯᖏᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᓂᕐᒥᑦ ᐃᖅᑲᓇᐃᔭᖅᑎᓂᒃ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᒻᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᒪᓕᒡᓗᒍ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᐃᑦ.
• ᒐᕙᒃᑯᓐᓂᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᖃᐅᔨᓴᖅᑕᐅᓂᕐᒦᑦᑐᑦ ᐱᔭᕆᐊᖃᖅᑐᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓐᓂᑦ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ. 
• ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᑦ ᐊᔪᓕᕈᑕᐅᙱᑐᐃᓐᓇᕆᐊᓕᒃ ᐆᒃᑐᕐᓂᕆᔭᖏᑦ ᐃᓱᒪᒋᔭᐅᓂᖏᓐᓄᑦ. ᖃᐅᔨᓴᖅᑕᐅᓂᖏᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐱᓕᕆᐊᒃᓴᕆᔭᐅᔪᑦ ᐃᖅᑲᓇᐃᔮᒃᓴᒥ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᓈᒻᒪᒋᔭᐅᔪᓂᒃ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᓄᑦ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ. 
• ᐃᖅᑲᓇᐃᔭᖅᑖᕋᓱᒃᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ.
• ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
• ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ.  ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᓱᐊᕈᑏᑦ ᐋᒡᒑᖅᑕᐅᑐᐃᓐᓇᕆᐊᓕᒃ.