ᓄᓇᓕᖕᓂ ᒪᓕᒐᓕᕆᔨᑦ
ᓄᓇᓕᖕᓂ ᒪᓕᒐᓕᕆᔨᒃᑯᑦ ᐊᑐᖃᑦᑕᖅᐳᑦ ᐃᓄᐃᑦ ᐅᒃᐱᕆᔭᖏᓐᓂᒃ ᐃᑲᔪᖅᖢᑎᒃ ᓄᓇᓕᖕᓂᒃ ᐋᖅᑭᒃᓱᐃᑎᓪᓗᒋᑦ ᐃᓕᖅᑯᓯᒨᖓᔾᔫᒥᔪᓂᒃ ᐃᓱᒪᒃᓴᖅᓯᐅᕈᑎᓂᒃ ᐃᖅᑲᖅᑐᐃᓂᓕᕆᔪᓂᒃ ᐱᓕᕆᐊᖃᕐᓗᑎᑦ ᐃᖅᑲᖅᑐᐃᓂᓕᕆᓂᕐᒨᖓᔪᓂᒃ. ᒪᓕᒐᓕᕆᔨᒃᑯᑦ ᐃᑲᔪᖅᑐᐃᖃᑦᑕᕆᕗᑦ ᐱᓕᕆᐊᒃᓴᓂᒃ ᐱᔨᑦᑎᕋᐅᑎᓂᓪᓗ ᓄᓇᓕᖕᓂᑦ ᑮᓇᐅᔭᖃᖅᑎᑦᑎᕙᒃᖢᑎᒡᓗ ᓄᓇᓕᖕᓂᙶᖅᑐᓂᒃ ᒪᓕᒐᓕᕆᓂᕐᒧᑦ ᐱᓕᕆᐊᓂᒃ ᓲᕐᓗ ᐱᕋᔭᒃᑎᑦᑎᑦᑕᐃᓕᒪᔾᔪᑎᓂᒃ ᐊᒻᒪ ᐃᑲᔪᖅᐸᒃᖢᑎᒃ ᐱᕋᔭᒃᑕᐅᓯᒪᔪᓂᒃ.
ᓄᓇᓕᖕᓂ ᒪᓕᒐᓕᕆᓂᕐᒧᑦ ᐱᓕᕆᐊᖑᔪᑦ ᒪᑯᐊᖑᕗᑦ:
- ᐃᖅᑲᖅᑐᐃᕕᓕᕆᓂᖅ ᐱᕋᔭᑦᑐᒥᓃᑦ ᒪᒥᓴᖅᑎᑕᐅᓂᖏᑦ ᓴᐃᒻᒪᖃᑎᒌᖕᓂᒃᑯᑦ ᐱᕋᔭᑦᑕᒥᓂᐅᔪᑦ ᓄᓇᓕᐅᔪᕐᓗ ᐱᓕᕆᐊᖓ
- ᒪᒥᓴᕐᓂᕐᒧᑦ ᒪᓕᒐᓕᕆᔨᒃᑯᑦ ᐱᓕᕆᐊᒃᓴᖓ
- ᐃᓚᒌᓂ ᐋᓐᓂᖅᓯᕆᖃᑦᑕᖅᑐᓄᑦ ᐃᑲᔪᖅᑕᐅᓂᕐᒧᑦ ᐱᓕᕆᐊᖅ
- ᐱᓂᕐᓗᒃᑕᐅᓯᒪᔪᓄᑦ ᐱᔨᑦᑎᕋᐅᑏᑦ
- ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᖅ
ᐃᖅᑲᖅᑐᐃᕕᓕᕆᓂᖅ ᐱᕋᔭᑦᑐᒥᓃᑦ ᒪᒥᓴᖅᑎᑕᐅᓂᖏᑦ ᓴᐃᒻᒪᖃᑎᒌᖕᓂᒃᑯᑦ ᐱᕋᔭᑦᑕᒥᓂᐅᔪᑦ ᓄᓇᓕᐅᔪᕐᓗ ᐱᓕᕆᐊᖓ
ᐃᖅᑲᖅᑐᐃᕕᓕᕆᓂᖅ ᐱᕋᔭᑦᑐᒥᓂᕐᓄᑦ ᐱᕋᔭᑦᑐᒥᓃᑦ ᒪᒥᓴᖅᑎᑕᐅᓂᖏᑦ ᓴᐃᒻᒪᖃᑎᒌᖕᓂᒃᑯᑦ ᐱᕋᔭᑦᑐᒥᓂᐅᓂᕐᒧᑦ ᐱᕋᔭᑦᑐᒥᓃᑦ ᓄᓇᓕᐅᔪᖅᑎᒍᑦ ᐋᖅᑮᓇᓱᑦᑎᓪᓗᒋᑦ ᐋᓐᓂᖅᑕᐅᔪᓂᑦ ᐱᕋᔭᑦᑐᒥᓂᐅᓂᕐᒧᑦ ᐊᒻᒪ ᐃᓅᖃᑎᒌᑦᑎᐊᕈᓐᓇᖅᓯᖁᓪᓗᒋᑦ ᓄᓇᓕᓐᓂᑦ.
ᓄᓇᓕᖕᓂ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᑦ ᐊᒻᒪ ᓄᓇᓕᖕᓂ ᒪᓕᒐᓕᕆᓂᕐᒧᑦ ᑲᑎᒪᔨᕋᓛᑦ ᐊᐅᓚᑦᑎᓲᖑᕗᑦ ᐅᑎᖅᑎᑦᑎᓂᕐᒧᑦ ᒪᓕᒐᓕᕆᓂᕐᒧᑦ ᐊᓯᐊᒎᖔᖅᑎᑦᑎᓂᕐᒥᒃ ᐱᓕᕆᐊᒥᒃ ᓄᓇᓕᖏᓐᓂ.
ᓄᓇᓕᖕᓂ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᑦ ᐱᖃᑦᑕᖅᑐᑦ ᐱᔾᔪᑎᓂᒃ ᐸᓖᓯᒃᑯᓐᓂᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐃᖅᑲᖅᑐᖅᑕᐅᑎᑦᑎᔩᑦ ᑲᓇᑕᒥ. ᐊᔪᖅᑎᑕᐅᙱᑦᑐᑦ 'ᐊᓯᔾᔨᖅᑕᐅᔪᓐᓇᖅᑐᑦ' ᐱᕋᔭᒃᑐᓄᑦ ᐃᖅᑲᖅᑐᐃᕕᒃᑯᑦ ᐱᓕᕆᔾᔪᓯᕐᒧᑦ ᐅᑎᖅᑎᑦᑎᓂᕐᒧᑦ ᒪᓕᒐᓕᕆᔾᔪᑎᑦ ᐱᓕᕆᐊᖑᑎᓪᓗᒋᑦ.
ᓄᓇᓕᖕᓂ ᒪᓕᒐᓕᕆᓂᕐᒧᑦ ᑲᑎᒪᔨᕋᓛᑦ ᐱᓕᕆᐊᒃᓴᖃᖅᐳᑦ ᐋᖅᑭᒃᓯᕙᒡᓗᑎᒃ ᐃᓄᖕᒥᒃ ᐱᕋᔭᓚᐅᖅᓯᒪᔪᒥᒃ ᑕᐃᒃᑯᓄᖓ ᐊᒃᑐᖅᑕᐅᓯᒪᔪᓄᑦ ᐱᕋᔭᒃᐸᒃᑐᓄᑦ ᐊᒻᒪ ᓄᓇᓕᖕᓂ ᓇᖕᒥᓂᖃᖃᑕᐅᔪᓄᑦ ᐊᑐᖅᐸᒡᓗᑎᒃ ᐋᖅᑭᐅᒪᖃᑎᒌᒍᑕᐅᓇᓱᒃᑐᓂᒃ ᐊᒻᒪ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᐋᖅᑭᒋᐊᕈᑕᐅᓗᓂ ᐋᓐᓂᕈᑕᐅᔪᒧᑦ ᐊᒻᒪ ᐅᑎᖅᑎᑕᐅᓗᓂ ᓄᓇᓕᖕᓂ.
ᐊᑐᓂ ᓄᓇᓖᑦ ᓄᓇᕗᒻᒥ ᓄᓇᓕᖕᓂ ᐃᖅᑲᖅᑐᐃᔨᕋᓛᑦ ᑲᑎᒪᔨᕋᓛᖃᖅᐳᑦ, ᑭᒡᒐᖅᑐᐃᓪᓗᑎᒃ ᖃᓄᑐᐃᓐᓇᖅ ᐅᑭᐅᓕᖕᓂᒃ, ᐱᒻᒪᕆᐅᓪᓗᑎᒃ ᒪᒃᑯᒃᑐᑦ ᐊᒻᒪ ᐃᓐᓇᐃᑦ ᐊᑐᓂ ᓄᓇᓕᖕᓂ.
ᖃᐅᔨᒃᑲᓐᓂᕈᒪᒍᕕᑦ ᐅᑎᖅᑎᑦᑎᓂᕐᒧᑦ ᒪᓕᒐᓕᕆᓂᕐᒧᑦ ᐊᓯᐊᒎᖔᖅᑎᑦᑎᕙᖕᓂᕐᒧᑦ ᐱᓕᕆᐊᖑᕙᒃᑐᒥᒃ, ᖃᐅᔨᒋᐊᕐᕕᒋᓗᒍ ᓄᓇᔅᓯᓐᓂ ᓄᓇᓕᖕᓂ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᓯ.
ᐃᖅᑲᖅᑐᐃᕕᓕᕆᓂᖅ ᑐᙵᕕᖃᖅᑐᖅ ᐋᖅᑭᒋᐊᕆᓂᕐᒥᑦ ᐋᓐᓂᖅᑕᐅᔪᓂᑦ ᐱᕋᔭᓐᓂᕐᒧᑦ. ᐊᑐᖅᑕᐅᓂᖓ ᐅᑎᖅᑎᑦᑎᓂᕐᒧᑦ ᐃᖅᑲᖅᑐᐃᕕᓕᕆᓂᖅ ᐃᑲᔪᖅᓱᖅᑕᐅᔪᖅ ᒪᓕᒐᖏᑎᒍᑦ ᐱᕋᔭᒃᑐᓄᑦ ᒪᓕᒐᐃᑦ ᑲᓇᑕᒥ, ᐅᑭᐅᑭᑦᑐᓄᑦ ᐱᕋᔭᒃᐸᒃᑐᓄᑦ ᐱᖁᔭᖅ, ᐱᕋᔭᑦᑕᒥᓂᐅᔪᑦ ᐱᔪᓐᓇᐅᑎᖏᓐᓄᑦ ᐱᖁᔭᖅ, ᐊᒻᒪᓗ ᐃᑲᔪᖅᑕᐅᕝᕕᓕᕆᔨᒃᑯᑦ ᐊᒻᒪᓗ ᒪᓕᒋᐊᖃᖅᑎᑕᐅᔪᓄᑦ ᐊᓂᑎᑕᐅᓂᕐᒧᑦ ᐱᖁᔭᖅ.
ᒪᒥᓴᕐᓂᕐᒧᑦ−ᑐᕌᖓᔪᒥᒃ ᐱᓕᕆᐊᖃᕐᓂᖅ ᑲᒪᒋᔭᖃᕐᓂᕐᒧᑦ ᐱᕋᔭᖕᓂᕐᒥᒃ−ᐊᒃᑐᐊᔪᓂᒃ ᐋᓐᓂᕈᑕᐅᕙᒃᑐᓂᒃ ᓄᓇᓕᖕᓂ ᓇᓕᒧᓐᓂᖃᖅᑐᒥᒃ ᐃᓄᐃᑦ ᐱᒻᒪᕆᐅᒋᔭᖏᓐᓄᑦ ᐃᓕᖅᑯᓯᑐᖃᒃᑯᓪᓗ ᐃᓄᐃᑦ ᑕᐅᑐᒐᕆᔭᖏᓐᓄᑦ ᒪᓕᒐᓕᕆᓂᕐᒧᑦ. ᐋᖅᑭᒋᐊᖅᓯᓂᒃᑯᑦ ᐃᖅᑲᖅᑐᐃᕕᓕᕆᓂᖅ ᓄᓇᕗᒻᒥᐅᓂᒃ ᐱᕕᖃᖅᑎᑦᑎᕗᖅ ᐱᓕᕆᖃᑎᒌᓂᒃ ᐋᖅᑭᒃᓯᔪᓐᓇᖅᖢᑎᒃ ᐊᒃᑐᖅᑕᐅᓯᒪᔪᓂᒃ ᐱᕋᔭᒃᑐᓄᑦ ᐱᓕᕆᐊᖑᖔᕈᓐᓇᕐᓗᓂ ᐱᕋᔭᒃᑐᓄᑦ ᒪᓕᒐᓕᕆᔾᔪᑎᓄᑦ.
ᒪᒥᓴᕐᓂᕐᒧᑦ ᒪᓕᒐᓕᕆᔨᒃᑯᑦ ᐱᓕᕆᐊᒃᓴᖓ
ᒪᒥᓴᕐᓂᕐᒧᑦ ᒪᓕᒐᓕᕆᔨᒃᑯᑦ ᐱᓕᕆᐊᖓ ᐊᑐᖅᑕᐅᓲᖑᕗᖅ ᐱᕋᔭᒃᑐᕕᓂᕐᓄᑦ ᑲᒪᒋᔭᖃᕐᓗᑎᒃ ᐱᔾᔪᑎᒋᔭᖏᓐᓂᒃ ᐱᕋᔭᖕᓂᕐᒧᑦ, ᓲᕐᓗ ᐃᓱᒪᓕᕆᓂᖅ, ᐅᐃᕆᓯᒪᓂᖅ, ᓄᓇᑖᖅᑎᑕᐅᓯᒪᓂᖅ, ᑭᖑᕚᕇᓐᓄᓪᓗ ᐋᓐᓂᕈᑕᐅᓯᒪᔪᑦ ᐊᓯᐊᒎᕈᑕᐅᓪᓗᓂᑦ ᐱᕋᔭᒃᑐᓄᑦ ᐃᖅᑲᖅᑐᐃᕕᒃᑰᕈᓯᐅᑉ.
ᐱᓕᕆᐊᖅ ᒪᕐᕈᐃᓕᖓᓪᓗᐊᑕᖅᐳᖅ ᐊᔾᔨᒌᓂᒃ ᐱᒻᒪᕆᐅᓪᓗᑎᒃ:
- ᐃᓗᐊᖅᓴᐃᓂᖅ ᐃᑲᔪᖅᑐᐃᔾᔪᑕᐅᓪᓗᓂᑦ ᐃᓱᒪᓕᕆᔨᓂᒃ, ᓘᒃᑖᓂᒃ, ᐊᒻᒪᓗ ᐃᓱᒪᓕᕆᔨᓪᓚᕆᖕᓂᑦ, ᐊᒻᒪᓗ
- ᐃᓕᖅᑯᓯᓕᕆᓂᖅ ᐃᑲᔪᖅᑐᐃᔾᔪᑕᐅᕗᖅ ᓄᓇᓕᖕᓂ ᐃᓄᓕᕆᔨᐅᔪᓂᑦ ᐊᒻᒪᓗ ᐃᓄᖕᓂᒃ ᐃᓐᓇᕐᓂᑦ ᐊᒻᒪᓗ ᐃᓚᐅᔾᔪᑕᐅᕙᒃᖢᓂ ᐃᓕᖅᑯᓯᓕᕆᓂᕐᒧᑦ (ᓲᕐᓗ ᓴᓇᕐᕈᑎᓕᐅᖕᓂᖅ, ᒪᑦᑎᑦᑕᐅᓯᐅᕐᓂᖅ, ᐊᐅᓪᓛᕐᓂᖅ, ᒥᖅᓱᕐᓂᖅ).
ᐱᓕᕆᐊᖅ ᐱᖓᓱᓂᒃ ᐃᓯᕈᑎᖃᖅᐳᖅ ᐊᓯᖏᑦᑎᒍᑦ ᐱᓕᕆᔾᔪᓯᐅᓪᓗᓂᑦ:
- ᐸᓯᔭᒃᓴᙳᖅᑎᑕᐅᓚᐅᙱᑎᓪᓗᒋᑦ ᑐᓐᓂᖅᑯᑕᐅᔪᑦ ᐸᓖᓯᒃᑯᓐᓂᑦ,
- ᐸᓯᔭᒃᓴᓕᐊᖑᓚᐅᖅᑎᓪᓗᒋᑦ ᑐᓂᔭᐅᓲᑦ ᑭᒃᑯᑐᐃᓐᓇᕐᓄᑦ ᐃᖅᑲᖅᑐᖅᑕᐅᑎᑦᑎᔩᑦ ᑲᓇᑕᒥ, ᐊᒻᒪᓗ
- ᑎᒍᔭᐅᓚᐅᖅᑎᓐᓇᒋᑦ ᑐᓂᔭᐅᓲᑦ ᒪᓕᒐᓕᕆᓂᕐᒧᑦ ᑲᑎᒪᔨᓂᒃ.
ᒪᒥᓴᕐᓂᕐᒧᑦ ᒪᓕᒐᓕᕆᔨᒃᑯᑦ ᐱᓕᕆᐊᒃᓴᖓ ᐃᑲᔪᖅᑐᐃᕗᖅ ᑲᒪᒋᔭᐅᔪᓂᒃ ᒪᒥᓴᖅᐸᓪᓕᐊᑎᓪᓗᒋᑦ ᐊᑐᒐᒃᓴᖃᖅᑎᓪᓗᒋᑦ ᖁᓱᔪᓐᓃᒃᑲᓐᓂᖁᓪᓗᒋᑦ ᑲᑎᒃᑲᓐᓂᕐᓗᑎᒡᓗ ᓄᓇᓕᖏᓐᓄᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓄᑦ ᑭᓇᐅᓂᕐᒧᓪᓗ ᐊᒃᑐᖅᑕᐅᓯᒪᔪᓄᑦ ᓄᓇᖃᓕᖅᑎᑕᐅᓯᒪᓂᕐᒧᑦ. ᐱᓕᕆᐊᒃᓴᐅᑉ ᑐᕌᒐᕆᔭᖏᑦ ᒪᑯᐊᖑᕗᑦ:
- ᒥᒃᖠᒋᐊᖅᑎᓪᓗᒍ ᐱᕋᔭᒃᑲᓐᓂᖃᑦᑕᕐᓂᖅ ᓄᓇᕗᒻᒥ,
- ᒥᒃᖠᒋᐊᕐᓗᒋᑦ ᑭᒡᒐᖅᑐᖅᑕᐅᓗᐊᕐᓂᖏᑦ ᐃᓄᐃᑦ ᑎᒍᔭᐅᕙᒃᑐᑦ ᐱᕋᔭᒃᑕᐅᕙᒃᑐᓪᓗ ᐃᖅᑲᖅᑐᐃᕕᓕᕆᕝᕕᖕᒥᑦ,
- ᐱᕕᖃᕐᓂᖅᓴᐅᓕᕐᓗᑎᒃ ᒪᓕᒐᓕᕆᓂᕐᒧᑦ ᐊᒻᒪ ᐃᓕᖅᑯᓯᕐᒧᑦ ᐊᒃᑐᐊᓂᓖᑦ ᑲᒪᒋᔭᖃᕈᑎᒃᓴᓂᑦ ᐱᕋᔭᒃᑐᓄᑦ ᐱᕋᔭᒃᑐᓕᕆᔪᓄᓪᓗ,
- ᑐᑭᓯᓇᕐᓂᖅᓴᐅᓕᕐᓗᓂ ᐃᓚᐅᖃᑕᐅᕙᒃᑐᑦ ᐱᕋᔭᒃᓯᒪᔪᑦ ᐱᕋᔭᒃᑕᐅᓯᒪᔪᓪᓗ ᐃᖅᑲᖅᑐᐃᕕᓕᕆᓂᕐᒥ,
- ᐊᑐᐃᓐᓇᐅᓕᖅᑎᒃᑲᓐᓂᕐᓗᒋᑦ ᐃᓱᒪᓕᕆᓂᕐᒧᑦ ᐃᑲᔪᖅᑕᐅᔾᔪᑎᑦ ᓄᓇᕗᒥᐅᓄᑦ,
- ᐱᐅᓯᒋᐊᖅᑎᓪᓗᒍ ᓄᓇᓕᖕᓂ ᓴᙱᓂᕆᔭᐅᔪᖅ ᐱᔪᓐᓇᕐᓂᕆᔭᐅᔪᕐᓗ ᐱᔪᓐᓇᕐᓂᖅᑖᖅᑎᓪᓗᒋᑦ ᓄᓇᓕᖕᓂ ᓯᕗᓕᖅᑎᑦ ᐊᒻᒪ ᑲᑐᔾᔨᖃᑎᒌᑦ ᐊᑦᑕᕐᓇᙱᓐᓂᖅᓴᒥᑦ ᐊᒻᒪ ᖃᓄᐃᙱᑦᑎᐊᖅᑐᒥᑦ ᓄᓇᕗᖃᖁᓪᓗᒋᑦ.
ᐋᖅᑭᒃᑕᐅᓚᐅᖅᓯᒪᔪᖅ 2021−ᒥ, ᐱᓕᕆᐊᖅ ᐊᐅᓚᓂᖃᖅᐳᖅ ᐃᖃᓗᒃᑑᑦᑎᐊᒥ ᐊᒻᒪ ᐊᕐᕕᐊᓂ.
ᐃᓚᒌᓂ ᐋᓐᓂᖅᓯᕆᖃᑦᑕᖅᑐᓄᑦ ᐃᑲᔪᖅᑕᐅᓂᕐᒧᑦ ᐱᓕᕆᐊᖅ
ᐃᓚᒌᓄᑦ ᐱᓂᕐᓗᖃᑦᑕᐅᑎᑦᑕᐃᓕᒪᓂᕐᒧᑦ ᐱᖁᔭᖅ, ᐊᑐᓕᖅᑎᑕᐅᓚᐅᖅᓯᒪᔪᖅ 2008−ᒥᑦ. ᐱᔾᔪᑎᒋᓇᓱᐊᖅᑕᖓᑦ ᓄᓇᕗᒻᒥᐅᓄᑦ ᐃᑲᔫᑎᐅᓇᓱᐊᖅᖢᓂ ᖃᓄᑯᓘᔭᖅ ᐃᓚᒌᑦ ᐱᓂᕐᓗᒃᑕᐅᖃᑦᑕᖁᓇᒋᑦ ᐊᑦᑕᕐᓇᖅᑐᒦᑎᓪᓗᒋᑦ ᐸᖅᑭᔭᐅᔪᑦ ᒪᓕᒋᐊᖃᕐᓗᑎᒃ ᐃᓄᐃᑦ ᐅᒃᐱᕆᔭᒥᑎᒍᑦ ᐱᓕᕆᐊᖑᑦᑎᐊᕐᓗᓂ. ᐱᔾᔪᑎᒋᔭᖓ ᐱᖁᔭᐅᑉ ᐊᑐᖅᑎᑦᑎᑦᑕᐃᓕᓪᓗᓂᑦ ᒥᒃᖠᒋᐊᖅᓯᓇᓱᐊᖅᖢᓂᓗ ᐱᑦᑎᐊᙱᓐᓂᐅᖃᑦᑕᖅᑐᒥᑦ.
ᑕᐃᑲᓂ ᖃᑕᙳᑎᒌᓄᑦ ᐱᓂᕐᓗᖃᑦᑕᐅᑎᑦᑕᐃᓕᑎᑦᑎᓂᕐᒧᑦ ᐱᖁᔭᕐᒥᑦ ᑎᓴᒪᓂᒃ ᐃᑲᔫᑎᐅᔪᓐᓇᖅᑐᓂᒃ ᐊᑐᐃᓐᓇᖅᑕᖃᖅᐳᖅ:
- ᑐᐊᕕᕐᓇᖅᑐᒃᑯᑦ ᓴᐳᒻᒥᔭᐅᔾᔪᑎᒋᔭᐅᔪᓐᓇᖅᑐᖅ ᑎᓕᐅᖅᑐᕈᑎ
- ᓄᓇᓕᓐᓂᑦ ᐃᑲᔫᑎᐅᓂᐊᖅᑐᓄᑦ ᑎᓕᐅᖅᑐᕈᑎ
- ᐃᑲᔪᖅᑐᐃᓂᕐᒧᑦ ᑎᓕᓯᔾᔪᑎ
- ᐊᑭᓕᖅᑕᐅᔪᓐᓇᐅᑎᒧᑦ ᑎᓕᓯᔾᔪᑎ
ᓄᓇᓕᖕᓂ ᒪᓕᒐᓕᕆᔨᒃᑯᑦ ᐃᓚᒌᓂ ᐋᓐᓂᖅᓯᕆᖃᑦᑕᖅᑐᓄ ᐃᑲᔫᑎᓕᕆᔨᖏᑦ ᓇᓗᓇᐃᕆᔭᕆᐊᖃᖅᐳᑦ ᓄᓇᕗᒻᒥᐅᑦ ᐱᕕᖃᕋᓗᐊᕐᒪᖔᑕ ᑕᒪᒃᑯᓄᖓ ᑎᓕᐅᕆᔾᔪᑎᓄᑦ ᐊᑐᓂ ᓄᓇᓕᖕᓂ ᓄᓇᕗᒻᒥ. ᓄᓇᓕᖕᓂᑦ ᐃᖅᑲᖅᑐᐃᔨᒃᑯᓐᓂᑦ ᓴᓇᔨᑦ ᐊᒻᒪ ᓄᓇᓕᖕᓂᑦ ᐃᖅᑲᖅᑐᐃᔪᓕᕆᔨᑦ ᐃᑲᔪᕆᐊᖃᖅᐳᑦ ᑖᒃᑯᓂᖓ ᐊᑐᖅᑕᐅᔪᓐᓇᖅᑐᓂ, ᑲᒪᒋᔭᖃᕐᓗᑎᒃ EPOs ᐊᒻᒪᓗ CIO−ᓂᒃ.
ᑐᐊᕕᕐᓇᖅᑐᓂ ᓴᐳᒻᒥᓯᒪᓂᕐᒧᑦ ᑎᓕᓯᔾᔪᑕᐅᔪᑦ:
ᑐᐊᕕᕐᓇᖅᑐᒃᑯᑦ ᓴᐳᒻᒥᔭᐅᓂᕐᒧᑦ ᑎᓕᓯᔾᔪᑎᑦ (EPOs) ᐃᓅᖃᑎᒌᖕᓄᑦ ᐃᖅᑲᖅᑐᐃᕕᖕᒥ ᑎᓕᔭᐅᓯᒪᔾᔪᑎᐅᕗᖅ ᐱᑎᑦᑎᓪᓗᑎᒃ ᓴᐳᒻᒦᓂᕐᒥᒃ ᐃᓄᖕᓂᒃ ᖃᑕᙳᑎᒌᓂᒃᓗ ᐱᓂᕐᓗᒃᑕᐅᓂᕐᒧᑦ ᑐᐊᕕᕐᓇᖅᑐᓄᑦ ᐊᑐᖅᑐᓄᑦ.
ᑐᒃᓯᕋᐅᑎᓕᕆᓲᑦ EPO−ᒧᑦ ᐃᖅᑲᖅᑐᐃᔨᕋᓛᒧᑦ, ᑎᓕᐅᕆᔾᔪᑎᓕᕆᑐᐃᓐᓇᕆᐊᖃᖅᖢᓂᑦ ᐋᖅᑭᒋᐊᕈᑎᓂᒃ ᐱᖃᓯᐅᑎᓪᓗᓂᑦ:
- ᐲᖅᓯᓚᐅᑲᖕᓂᖅ ᐋᓐᓂᖅᑎᕆᔪᒥᑦ ᐃᓚᒥᓂᑦ
- ᐋᓐᓂᖅᑎᕆᔪᖅ ᓯᕗᕋᓵᕆᔾᔮᖏᒻᒪ ᐋᓐᓂᖅᑎᕆᓗᓂᓘᓐᓃᑦ ᐃᓕᖕᓂᑦ ᐃᓚᖕᓂᓪᓘᓐᓃᑦ
- ᐋᓐᓂᖅᑎᕆᔨ ᖃᐅᔨᒋᐊᕈᓐᓇᙱᓪᓗᓂ ᐃᓕᖕᓂᑦ ᐃᓚᖕᓂᓪᓘᓐᓃᑦ, ᓲᕐᓗ ᐃᓚᔅᓯᓐᓄᐊᕈᓐᓇᙱᓪᓗᓂᑦ ᐃᖅᑲᓇᐃᔭᕐᕕᖕᒧᓪᓘᓐᓃᑦ
- ᕿᑐᕐᖓᑎᑦ ᐱᓯᒪᔭᐅᓚᐅᑲᒃᑎᓪᓗᒋᑦ
- ᓴᐳᔾᔨᓯᒪᓚᐅᑲᖕᓂᖅ ᓇᖕᒥᓂᕆᔭᕐᓂᒃ ᓇᖕᒥᓂᕐᓗ ᐱᖁᑎᖕᓂᒃ
ᓄᓇᓕᖕᓂ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᑦ (CJOWs) ᐃᑲᔪᕈᓐᓇᖅᑐᑦ ᐱᓇᔪᒃᓯᒪᔪᓂᒃ EPO−ᒧᑦ ᐱᓕᕆᔾᔪᓯᕐᒧᑦ.
ᐱᓇᔪᒃᑐᑦ ᑭᐅᔪᓪᓗ ᐅᑭᐅᖃᕆᐊᓖᑦ 14−ᓂᑦ ᐅᖓᑖᓄᓪᓘᓐᓃᑦ.
ᓄᓇᓕᖕᓂ ᐱᓕᕆᕝᕕᖃᖔᓕᕐᓂᕐᒧᑦ ᑎᓕᓯᔾᔪᑕᐅᔪᖅ
ᓄᓇᓕᖕᓂ ᐱᓕᕆᕝᕕᖃᖔᓕᕐᓂᕐᒧᑦ ᑎᓕᓯᔾᔪᑕᐅᔪᑦ ᐃᖅᑲᖅᑐᐃᕕᒃᑯᑦ ᑎᓕᓯᔾᔪᑕᐅᕗᑦ ᐱᖃᓯᐅᑎᓪᓗᓂᑦ ᐅᖃᓪᓚᖃᑎᖃᕐᓂᖅ ᑲᒪᒋᓇᓱᐊᕐᓗᒋᑦ ᐱᐅᙱᑦᑐᑦ ᐋᓐᓂᕐᓇᑐᐃᓐᓇᕆᐊᓖᓪᓗ ᐃᓕᖅᑯᓯᕆᔭᐅᔪᑦ ᐃᓚᒌᖑᔪᓂᑦ. ᐃᓅᓯᓕᕆᔩᑦ, ᐃᓚᐅᓪᓗᑎᒃ ᐃᓐᓇᐃᑦ, ᓇᓗᓇᐃᖅᑕᐅᔪᑦ ᐸᕐᓇᐅᑎᒥᒃᓗ ᐃᓕᓯᓪᓗᑎᒃ ᐱᓕᕆᐊᕆᓂᐊᕐᓗᒋᑦ ᐱᔾᔪᑕᐅᔪᑦ.
ᓱᖁᑎᒃᓴᕆᐊᖃᖏᓐᓂᕐᒧᑦ / ᖃᐅᔨᒋᐊᕐᕕᖃᕆᐊᖃᙱᓐᓂᕐᒧᑦ ᑎᓕᓯᔾᔪᑕᐅᔪᑦ
ᓄᓇᓕᖕᓂ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᑦ ᐃᑲᔪᕈᓐᓇᕐᒥᔪᑦ ᑐᒃᓯᕋᐅᑎᓄᑦ ᓱᖁᑎᒃᓴᕆᐊᖃᙱᑎᑕᐅᓂᕐᒥᑦ.
ᖃᐅᔨᒋᐊᕐᕕᖃᕆᐊᖃᙱᓐᓂᕐᒧᑦ ᑎᓕᓯᔾᔪᑎᐅᔪᑦ ᐃᖅᑲᖅᑐᐃᕕᒃᑯᑦ ᑎᓕᓯᔾᔪᑎᐅᕗᑦ ᐃᓄᖕᒥᑦ "ᓴᐃᓕᓇᖅᑐᒦᑎᑦᑎᖁᔭᐅᓪᓗᓂᑦ ᐱᑦᑎᐊᕐᓗᓂᓗ" ᒪᓕᒋᐊᓕᖕᓂᑦ ᐊᑐᖅᑎᑕᐅᓗᓂᑦ ᓲᕐᓗ ᖃᐅᔨᒋᐊᕐᕕᖃᕆᐊᖃᙱᓐᓂᖅ ᐃᓕᖕᓂᑦ ᕿᑐᕐᖓᕐᓂᓪᓘᓐᓃᑦ ᐅᕝᕙᓘᓐᓃᑦ ᖃᒡᓕᔭᕆᐊᖃᙱᓪᓗᓂᑦ ᐊᖏᕐᕋᕐᓄᑦ ᐃᖅᑲᓇᐃᔭᕐᕕᖕᓄᓪᓘᓐᓃᑦ. EPO ᐊᒻᒪᓗ CIO−ᑎᑑᙱᑦᑐᖅ, ᐃᓚᖃᒻᒪᕆᐅᔭᙱᒃᑲᓗᐊᕐᓗᓂᑦ ᐱᓇᓱᐊᖅᑕᐅᔪᓐᓇᖅᑐᖅ.
ᐃᑲᔪᖅᑕᐅᔪᒪᓗᓂ
ᐃᑲᔪᖅᑕᐅᔪᓐᓇᖅᐳᑎᑦ ᐃᓚᒌᓄᑦ ᐋᓐᓂᑎᖅᑕᐅᔪᓄᑦ ᓄᓇᓕᓕᒫᓂᑦ ᓄᓇᕗᒻᒥ.
ᐱᑦᑎᐊᖅᑕᐅᙱᒃᑯᕕᑦ ᐅᕝᕙᓘᓐᓃᑦ ᐸᒡᕕᓵᖅᑕᐅᒍᕕᑦ, ᖃᐅᔨᒋᐊᕈᓐᓇᖅᐳᑎᑦ ᓄᓇᔅᓯᓐᓂ ᐸᓖᓯᒃᑯᓐᓄᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᔅᓯᓐᓂ ᐸᓖᓯᔅᓯ ᒥᒃᓵᓄᑦ, ᐅᕗᙵᐅᓗᑎᑦ:
https://www.rcmp-grc.gc.ca/detach/en/find/NU#wb-cont
ᖃᐅᔨᒋᐊᕈᓐᓇᕐᒥᔪᑎᑦ ᓄᓇᔅᓯᓐᓂ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᒋᔭᕐᓄᑦ ᐃᑲᔪᖅᑕᐅᔪᒪᓗᑎᑦ ᐱᓇᔪᒍᒪᓗᓂ ᑐᐊᕕᕐᓇᖅᑐᒥᒃ ᓴᐳᒻᒥᔾᔪᑎᒥᒃ, CIO−ᒥᒃ ᑐᓴᖅᑕᖃᒃᑲᓐᓂᕈᒪᒍᕕᓪᓘᓐᓃᑦ ᐊᑐᖅᑕᐅᖔᓕᕈᓐᓇᖅᑐᓂᒃ ᒪᓂᒪᔪᓂᒃ ᑲᒪᒋᔭᖃᕐᓂᐊᕐᓗᓂ ᐊᑐᕐᓂᕐᓗᒃᓯᓂᕐᒥᒃ ᐸᒡᕕᓵᕆᓂᕐᒥᒡᓗ. ᐃᓛᒃᑯᑦ ᐃᑲᔪᖅᑕᐅᔪᓐᓇᖅᑐᑎᑦ ᖃᓪᓗᓈᑐᑦ ᐃᓄᒃᑎᑐᓪᓘᓐᓃᑦ.
ᑐᑭᓯᒋᐊᕐᕕᒃᓴᐃᑦ ᐃᖅᑲᖅᑐᐃᔨᒃᑯᓐᓂ ᓴᓇᔨᓂᑦ ᓄᓇᓕᖕᓂᑦ.
ᐃᑲᔪᖅᑕᐅᔪᒪᓗᓂ ᐱᓇᓱᐊᕈᓯᐅᑉ ᓄᙳᐊᓂ ᐃᖅᑲᓇᐃᔭᕐᓇᐅᔪᓐᓃᖅᑎᓪᓗᒍᓗ, ᐅᖄᓚᓗᑎᑦ ᐊᑭᖃᙱᑦᑐᒧᑦ 1-844-534-1038
ᐱᕋᔭᒃᑕᐅᓯᒪᔪᑦ ᐱᔨᑦᑎᕋᖅᑎᖏᑦ ᐊᑭᖃᙱᖦᖢᑎᒃ ᐅᖃᐅᓯᐅᕈᓘᔭᔾᔮᙱᑦᑐᑦ, ᑲᒪᒋᔭᐅᔪᒧᑦ−ᑐᕌᖓᓪᓗᓂ ᐃᑲᔪᖅᑐᐃᔨᑦ ᐱᔨᑦᑎᕋᕐᕕᖏᑦ ᐱᕋᔭᒃᑕᐅᔪᓄᑦ ᐊᒻᒪ ᐊᓂᒍᐃᓯᒪᔪᓄᑦ. ᐱᔨᑦᑎᕋᐅᑏᑦ ᐋᖅᑭᒃᓯᒪᔪᑦ ᐊᑐᓂ ᐱᕋᔭᒃᑕᐅᔪᕕᓂᕐᓄᑦ ᓈᒻᒪᒃᓯᓕᖅᓯᒪᓪᓗᑎᒃ − ᐱᕋᔭᒃᑕᐅᔪᕕᓂᐅᓂᕐᒧᑦ ᐳᑭᖅᑕᓕᖕᓄᑦ ᐅᖃᐅᓯᖃᕈᒪᖕᒪᖔᑕ, ᐅᖃᓪᓚᒡᕕᒃᓴᖃᕈᓐᓇᕐᓗᑎᒃ ᐃᖅᑲᖅᑐᐃᕕᒃᑰᓕᒑᑎᓪᓗᒋᑦ, ᐅᕝᕙᓘᓃᑦ ᑐᑭᓯᒋᐊᒃᑲᓐᓂᕈᒪᔪᖃᖅᐸᑦ ᐃᖅᑲᖅᑐᐃᔨᒧᑦ ᑎᓕᐅᖅᑐᕈᑎᑖᖅᑐᖃᓚᐅᖅᑎᓪᓗᒍ ᖃᓄᒃᑲᓐᓂᐅᔭᕆᐊᖃᕐᒪᖔᑦ ᖃᐅᔨᒋᐊᕈᒪᔪᓄᑦ.
ᐃᑲᔪᕈᓐᓇᖅᑕᑦᑎᒋᑦ ᖃᓄᖅ ᐱᓕᕆᔪᓐᓇᖅᑕᕐᓂᒃ ᕿᓂᖅᓴᖃᑎᒋᓗᑎᒋᑦ, ᑐᓴᐅᒪᔭᕆᐊᖃᖅᑕᑎᑦ ᐱᓯᒪᒐᓗᐊᕐᒪᖔᖅᐱᑦ ᐊᒻᒪ ᐃᑲᔪᖅᓯᖅᑕᐅᒃᑲᓐᓂᕈᓐᓇᖅᖢᑎᑦ ᐃᓱᒪᓕᐅᕆᐊᖃᕈᕕᑦ. ᐱᕋᔭᑦᑕᐅᓯᒪᔪᓄᑦ ᐱᔨᑦᑎᕋᐅᑏᑦ ᐃᓱᒪᖅᓲᑕᐅᕗᑦ. ᓂᕈᐊᕈᓐᓇᖅᐳᑎᑦ ᐃᓚᐃᓐᓇᖏᓐᓂᑦ ᑕᒪᐃᓐᓂᒡᓘᓐᓃᑦ ᐱᔨᑦᑎᕋᐅᑎᓂᒃ − ᐃᓱᒪᖅᓱᖃᑦᑕᖅᑐᑎᑦ. ᐱᕋᔭᒃᑕᐅᔪᕕᓂᓕᒫᑦ ᐊᑐᓂ ᑐᙵᓱᒃᑎᖃᑦᑕᖅᐸᕗᑦ, ᓇᒡᓕᖕᓂᖃᕐᕕᒋᓪᓗᑎᒍ ᐊᒻᒪ ᐃᒃᐱᒋᑦᑎᐊᕋᓱᒃᐸᒃᖢᑎᒍ.
ᐱᕋᔭᒃᑕᐅᔪᕕᓂᕐᓄᑦ ᐱᔨᑦᑎᕋᖅᑏᑦ ᐃᓕᖕᓂ ᒪᑯᓂᖓ ᐃᑲᔪᕈᓐᓇᖅᐳᑦ:
- ᑐᑭᓯᒋᐊᕈᑎᐅᒐᔪᒃᑐᑦ ᐊᒻᒪᓗ ᐃᑲᔫᑏᑦ ᐃᖅᑲᖅᑐᐃᕕᓕᕆᓂᕐᒧᑦ
- ᑐᓴᐅᒪᑎᑦᑎᓂᖅ ᖃᓄᐃᑉᐸᓪᓕᐊᓕᕐᒪᖔᖅ ᐊᑐᖅᑕᕐᓂᑦ
- ᐱᕙᒌᔭᐃᓂᕐᒧᑦ ᐱᕋᔭᒃᑕᐅᓯᒪᔫᑉ ᐅᓂᒃᑳᖓᓐᓂᑦ ᐊᒻᒪᓗ/ᐅᕝᕙᓘᓐᓃᑦ ᐱᕋᔭᒃᑕᐅᓂᕐᒧᑦ ᐊᑎᓕᐅᕐᓂᕐᒥᑦ ᐱᔭᕇᖅᓯᔪᒪᒍᕕᑦ
- ᖃᐅᔨᑎᑕᐅᓗᑎᑦ ᐅᐸᒋᐊᖃᕈᕕᓪᓗ ᐃᓂᒃᓴᓕᐅᕈᔾᔭᐅᓗᑎᑦ ᓄᓇᓕᖕᓂ ᐱᓕᕆᐊᖃᖅᑐᓄᑦ
- ᐃᒃᐱᖕᓂᐊᓂᒃᑯᑦ ᐊᒃᓱᕈᕈᑎᒋᔭᑎᑦ ᐃᑲᔪᖅᑕᐅᔾᔪᑎᒋᓗᒋᑦ ᐃᖅᑲᖅᑐᐃᕕᒃᑰᕆᐊᖃᕐᓂᐊᖅᑎᓪᓗᑎᑦ
- ᑮᓇᐅᔭᑎᒍᑦ ᐃᑲᔪᐃᓂᖅ ᐱᔪᓐᓇᖅᑐᓄᑦ ᐱᕋᔭᒃᑕᐅᓯᒪᔪᓄᑦ ᐊᓐᓇᐅᒪᔪᕕᓂᕐᓄᓪᓗ ᐱᕋᔭᒃᑕᐅᓂᕐᒧᑦ
ᐱᕋᔭᒃᑕᐅᓯᒪᔪᓄᑦ ᐱᔨᑦᑎᕋᖅᑎᓄᑦ ᖃᐅᔨᒋᐊᕈᓐᓇᖅᑐᑎᑦ ᐅᕝᕙᓘᓐᓃᑦ ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᖃᐅᔨᒋᐊᕐᕕᒋᔪᓐᓇᖅᑕᑦ:
ᐅᖄᓚᐅᑖ (ᐊᑭᖃᙱᑦᑐᖅ) 1-866-456-5216
ᐃᕐᖐᓐᓈᖅᑕᐅᒃᑯᑦ: @email
ᐱᕋᔭᒃᑕᐅᔪᓄᑦ ᐃᑲᔪᖅᑕᐅᖁᓪᓗᒋᑦ ᑮᓇᐅᔭᖃᕐᕕᒃ
ᐱᕋᔭᒃᑕᐅᔪᑦ ᐃᑲᔪᖅᑕᐅᖁᓪᓗᒋᑦ ᑮᓇᐅᔭᖃᕐᕕᒃ ᐊᔾᔨᐅᙱᑦᑑᖕᒪᑦ ᑮᓇᐅᔭᖃᕐᕕᐅᔪᖅ ᐋᖅᑭᐅᒪᑎᑕᐅᓲᖑᓪᓗᓂ ᐱᕋᔭᒃᑐᕕᓃᑦ ᐊᑭᓕᕆᐊᖃᓚᐅᖅᑕᖏᑕ ᐊᒥᐊᒃᑯᖏᓐᓂᖔᕐᒪᑦ ᐃᑲᔫᑎᓕᐊᖑᓯᒪᓪᓗᓂ. ᐋᖅᑭᒃᑕᐅᓚᐅᖅᐳᖅ ᐃᑲᔪᖅᑕᐅᖁᓪᓗᒋᑦ ᓄᓇᓕᖕᓂ ᑐᙵᕕᓖᑦ ᐱᓕᕆᐊᒃᓴᑦ ᐊᒻᒪ ᐱᓕᕆᐊᑦ ᐱᔨᑦᑎᕋᕈᑕᐅᓲᑦ ᐃᑲᔫᑕᐅᓲᓪᓗ ᐱᕋᔭᒃᑕᐅᓯᒪᔪᓄᑦ. ᐅᑯᐊ ᐱᖃᓯᐅᔾᔭᐅᕗᑦ:
- ᐱᓕᒻᒪᒃᓴᕐᓂᖅ ᑐᕌᒐᖃᖅᑐᖅ ᓄᓇᓕᖕᓂ ᐱᓕᕆᔨᐅᕙᒃᑐᑦ ᖃᐅᔨᒪᓂᖃᕈᓐᓇᖅᓯᓂᐊᕐᒪᑕ ᑐᑭᓯᐅᒪᔭᐅᔭᕆᐊᓕᖕᓂᒃ ᐱᕋᔭᒃᑕᐅᔪᕕᓃᑦ ᐊᑐᖅᐸᓪᓕᐊᔭᖏᓐᓂᒃ,
- ᐱᔨᑦᑎᕋᐅᑎᑦ ᐃᑲᔫᑕᐅᓲᑦ ᐱᕋᔭᒃᑕᐅᓯᒪᔪᓄᑦ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ, ᐃᓄᖕᓂᒃ ᐃᑲᔪᖅᓱᐃᑎᓪᓗᒋᑦ, ᐱᔨᑦᑎᕋᖅᑕᐅᓯᒪᔪᑦ ᑲᒪᒋᔭᐅᒃᑲᓐᓂᖅᑎᓪᓗᒋᑦ, ᐱᕋᔭᒃᑕᐅᓯᒪᔪᓄᑦ ᑐᑭᓯᒋᐊᕈᑎᑦ ᐊᒻᒪ ᐱᓕᕆᐊᕆᔭᐅᔪᒃᓴᑦ ᐊᓯᖏᓐᓄᑦ ᐱᓕᕆᔨᓄᑦ ᑐᓐᓂᖅᑯᑕᐅᕙᒡᓗᑎᒃ,
- ᑭᒃᑯᑐᐃᓐᓇᕐᓂᑦ ᐅᔾᔨᕈᓱᒃᑎᑦᑎᓗᓂ ᐱᔪᓐᓇᐅᑎᖏᓐᓂᑦ ᐊᒻᒪᓗ ᐱᓕᕆᐊᕆᔭᕆᐊᖃᖅᑕᖏᓐᓂᑦ ᐱᓂᕐᓗᒃᑕᐅᓯᒪᔪᑦ, ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕈᑎᓂᑦ, ᐱᕋᔭᒃᑕᐅᓯᒪᔪᓄᑦ ᓴᐳᓐᓂᐊᖅᑎᑰᖓᔪᑎᒍᑦ ᐊᒻᒪᓗ ᐱᓕᕆᔾᔪᓯᖏᑎᒍᑦ, ᐊᒻᒪᓗ ᐱᔾᔪᓯᐅᔪᓄᑦ ᐊᒃᑐᐊᓂᖃᖅᑐᓄᑦ ᐱᓂᕐᓗᒃᑕᐅᓂᑯᓄᑦ,
- ᖃᐅᔨᓴᖅᑕᐅᖃᑦᑕᖅᓯᒪᔪᑦ ᐊᑲᐅᓛᒃᑯᑦ ᐱᓕᕆᐊᖑᖃᑦᑕᖅᓯᒪᔪᑦ ᐱᔾᔪᑕᐅᓲᓂᒃ ᓴᖅᑭᑦᑎᓂᐊᖅᑎᓪᓗᒋᑦ ᐱᕋᔭᒃᑕᐅᖃᑦᑕᖅᑐᓂᒃ ᑲᓇᑕᓕᒫᒥ ᐱᕙᓪᓕᐊᑎᑕᐅᓂᖏᓪᓗ ᖃᓄᐃᓕᐅᕈᑕᐅᔪᒪᔪᑦ ᐊᑲᐅᓛᒃᑯᑦ ᐃᑲᔪᖅᓱᐃᔾᔪᑕᐅᔪᓐᓇᖅᑐᑦ ᓄᓇᕗᒥᐅᓄᑦ ᐱᕋᔭᒃᑕᐅᓂᒃᑯᑦ ᐋᓐᓂᖅᑕᐅᓯᒪᔪᓄᑦ.
ᓄᓇᓕᖕᓂᑦ ᐃᖅᑲᖅᑐᐃᓂᓕᕆᔨᑦ ᑐᒃᓯᕋᐅᓯᐅᖁᔨᖃᑦᑕᖅᐳᑦ ᐊᕐᕌᒍᑕᒫᖅ ᐱᓕᕆᐊᒃᓴᓄᑦ ᐊᒻᒪ ᖃᓄᐃᓕᐅᕈᑎᒃᓴᓄᑦ ᐃᑲᔪᖅᓯᖅᑕᐅᖁᓗᒋᑦ ᐱᕋᔭᑦᑕᒥᓂᐅᔪᑦ ᐃᑲᔪᖅᑕᐅᖁᓪᓗᒋᑦ ᑮᓇᐅᔭᖏᓐᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐱᕋᔭᒃᑕᐅᕙᒃᑐᓄᑦ ᐃᑲᔫᓯᐊᑦ ᑮᓇᐅᔭᖁᑎᖏᑦᑕ ᒥᒃᓵᓄᑦ ᐊᒻᒪ ᐱᓕᕆᔾᔪᓯᖓᓂ ᑮᓇᐅᔭᓂᒃ ᐊᑐᕈᓐᓇᕐᓂᕐᒥᒃ, ᐃᕐᖐᓐᓈᖅᑕᐅᒃᑯᑦ: @email
ᐃᓚᒋᔭᐅᔪᓄᑦ ᑐᑭᓯᒋᐊᕐᕖᑦ
ᐃᓚᒋᔭᐅᔪᓄᑦ ᑐᑭᓯᒋᐊᕐᕖᑦ ᐃᑲᔫᑎᒋᔭᐅᕗᖅ ᐊᓯᐅᔨᔭᐅᓯᒪᔪᓄᑦ ᐃᓄᐊᖅᑕᐅᓯᒪᔪᓄᓪᓗ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᐃᓚᖏᓐᓄᑦ ᑐᕌᖓᑎᑕᐅᕗᕐᓗ ᐃᓚᒌᑦ ᐃᑲᔪᖅᑕᐅᓗᑎᒃ ᑖᒃᑯᐊ ᐃᓚᒌᑦ ᐃᓚᐅᔪᓐᓇᖅᑎᓪᓗᒋᑦ ᓯᓚᑖᓂᙶᖅᑐᓂᒃ ᑐᑭᓯᒋᐊᒐᒃᓴᓂᒃ ᐊᓯᐅᔨᓯᒪᔭᖏᑦ ᐅᕝᕙᓘᓐᓃᑦ ᐃᓄᐊᖅᑕᐅᓯᒪᔪᖁᑎᖏᑕ ᒥᒃᓵᓄᑦ. ᐊᓯᖏᑦ ᐃᑲᔪᖅᓱᐃᔾᔪᑎᑦ ᐊᑐᐃᓐᓇᕈᖅᑎᑕᐅᔪᑦ ᐊᐅᓚᑦᑎᔨᒧᑦ ᐊᓯᖏᓐᓄᑦ ᐱᓕᕆᔨᓄᑦ ᑐᓐᓂᖅᑯᑕᐅᓲᑦ ᐃᓕᖅᑯᓯᕆᔭᐅᔪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᑐᐃᔾᔪᓯᕐᓄᑦ ᑲᑎᒪᑎᑦᑎᕙᒡᓗᓂᓗ ᐃᓚᒌᓂᒃ ᐊᒻᒪ ᐊᔾᔨᒌᙱᑦᑐᓂᒃ ᑎᑎᖅᑲᓂᒃ ᐸᐸᑦᑎᔨᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐃᓚᒌᓂᑦ ᑐᓴᐅᒪᑎᑦᑎᔩᑦ ᒥᒃᓵᓄᑦ, ᐃᕐᖐᓈᖅᑕᐅᒃᑯᑦ @email
ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᖅ
ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᖅ ᖃᓄᑐᐃᓐᓇᖅ ᖃᓄᐃᓕᐅᕈᑎᖃᕐᓂᐅᕗᖅ, ᐱᒋᐊᕈᑕᐅᔪᑦ ᐊᑐᐊᒐᕐᓘᓐᓃᑦ ᒥᒃᖠᒋᐊᕈᑕᐅᓇᓱᐊᖅᑐᖅ ᐲᖅᓯᔾᔪᑕᐅᓇᓱᐊᖅᑐᕐᓘᓐᓃᑦ ᐱᕋᔭᖃᑦᑕᕐᓂᕐᒥᑦ, ᐱᕋᔭᒃᑕᐅᓂᕐᒥᑦ, ᐱᕋᔭᒃᑲᓐᓂᓂᕐᒥᒡᓗ. ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᖅ ᐱᖃᓯᐅᔾᔨᒋᕗᖅ ᑲᒪᒋᔭᖃᕐᓂᖅ ᐱᔾᔪᑎᒋᔭᐅᕙᒃᑐᓂᑦ ᐱᕋᔭᖕᓂᕐᒥᑦ ᖁᕝᕙᖅᓴᐃᓗᑎᒃ ᓴᙱᒃᑎᒋᐊᕐᓗᑎᒡᓗ ᐃᓅᖃᑎᖃᕈᓐᓇᑦᑎᐊᕐᓂᕐᒥᑦ ᓄᓇᓕᑦᑎᓐᓂᑦ. ᐅᑯᐊ ᐆᒃᑑᑎᒋᔭᐅᔪᑦ ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᕐᒧᑦ:
- ᐊᖓᔪᖅᑳᖑᓂᕐᒥ ᐱᓕᕆᐊᒃᓴᑦ,
- ᒪᒃᑯᒃᑐᑦ ᑲᔪᖏᖅᓴᖅᑕᐅᓗᑎᒃ,
- ᓂᙵᐅᒪᓗᐊᖅᑕᐃᓕᒪᓂᖅ ᐊᒻᒪ ᐃᓅᓯᓕᕆᓂᖅ,
- ᐱᖃᑎᒌᓄᑦ ᐱᑦᑎᐊᖃᑦᑕᙱᓐᓂᕐᒧᑦ ᐱᓕᕆᐊᒃᓴᑦ,
- ᐃᖅᑲᓇᐃᔮᒃᓴᓄᑦ ᐊᒻᒪ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ ᐱᕕᒃᓴᖃᖃᑦᑕᕐᓂᖅ,
- ᐊᑐᒐᒃᓴᑦ ᐊᐅᓚᑦᑎᓂᐊᕐᓗᑎᒃ ᐱᕚᓪᓕᖅᑎᑦᑎᓗᑎᒡᓗ ᐅᓂᒃᑳᓕᐅᖕᓂᖕᓂᑦ ᐱᕋᔭᖕᓂᖕᓂᑦ,
- ᐊᑦᑕᕐᓇᖅᑕᐃᓕᒪᓂᕐᒧᑦ ᒪᑭᒪᔾᔪᑎᑦ, ᓲᕐᓗ ᖃᐅᒻᒪᖅᑯᑎᒃᑲᓐᓂᑦ ᖁᕝᕙᕆᐊᖅᑎᓪᓗᒍ ᐊᑦᑕᕐᓇᖅᑕᐃᓕᒪᓂᖅ.
ᐱᕋᔭᒃᑕᐃᓕᒪᑎᑦᑎᓂᕐᒧᑦ ᖃᓄᖅᑑᕈᑎ
ᓄᓇᕗᒻᒥ ᐱᕋᔭᒃᑕᐃᓕᒪᑎᑦᑎᓂᕐᒧᑦ ᐅᐸᓗᖓᐃᔭᐅᑎ (2017-2022) ᐱᓕᕆᐊᖃᕋᓱᐊᖅᑐᖅ ᐱᕋᔭᒃᑕᐃᓕᒪᓂᕐᒧᑦ ᐊᒃᓱᕈᕈᑕᐅᔪᓂᒃ ᓄᓇᓕᖕᓂ ᐊᒻᒪᓗ ᐱᕈᐃᕙᓪᓕᐊᖁᓪᓗᒋᑦ ᒫᓐᓇᐅᔪᖅ ᐱᓕᕆᐊᖑᓇᓱᐊᖅᑐᓂᒃ. ᓄᓇᓕᖕᓂ ᒪᓕᒐᓕᕆᔨᒃᑯᑦ ᐱᓕᕆᖃᑎᖃᐃᓐᓇᖅᐳᑦ ᐱᖃᖃᑕᐅᔪᓂᒃ ᐱᕙᒌᔭᐃᓂᕐᒧᑦ ᐱᕕᖃᖅᑎᑦᑎᓂᕐᒧᓪᓗ ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᕐᒧᑦ ᐱᓕᕆᐊᒃᓴᓂᒃ.
ᓄᓇᓕᖕᓂ ᒪᓕᒐᓕᕆᔨᒃᑯᑦ ᓴᖅᑮᓚᐅᖅᑐᑦ ᐱᕋᔭᒃᑕᐃᓕᒪᑎᑦᑎᓂᕐᒧᑦ ᖃᓄᖅᑑᕈᑎᒥᑦ ᐅᖃᖃᑎᖃᖅᖢᑎᒃ ᑭᒃᑯᑐᐃᓐᓇᕐᓂᑦ. 2013-ᒥ, ᒪᓕᒐᓕᕆᔨᒃᑯᑦ ᓄᓇᓕᖕᓂᑦ ᑐᓴᕋᓱᖃᑦᑕᓚᐅᖅᑐᑦ ᑕᒪᐃᓐᓂᒃ ᓄᓇᕘᑉ 25 ᓄᓇᓕᖕᓂᑦ ᑲᑎᖃᑎᖃᖅᖢᑎᒡᓗ ᐃᓄᖕᓂᑦ ᐊᔾᔨᒌᙱᑦᑑᑎᓂᑦ ᐅᑭᐅᓕᖕᓂᑦ ᖃᓄᐃᓕᐅᖃᑦᑕᖅᓯᒪᓂᖏᓐᓂᒡᓗ ᓈᓚᒃᖢᑎᒃ ᐃᓄᐃᑦ ᐅᖃᐅᓯᒃᓴᖏᓐᓂᑦ ᖃᓄᖅ ᐱᕋᔭᒃᑕᐃᓕᒪᑎᑦᑎᔪᓐᓇᖕᒪᖔᖏᑦ ᓄᓇᕗᒻᒥᑦ ᐊᒻᒪᓗ ᓄᓇᓕᖏᓐᓂᑦ.
ᓄᓇᓕᖕᓂ ᒪᓕᒐᓕᕆᓂᕐᒧᑦ ᑭᒡᒐᖅᑐᐃᔩᑦ ᐃᓚᐅᓚᐅᖅᐳᑦ 75 ᐅᖓᑖᓂ ᑲᑎᒪᓂᕆᔭᐅᔪᓄᑦ, ᐅᖃᖃᑎᖃᖅᖢᑎᒡᓗ ᕼᐋᓐᓇᓚᖏᓐᓃᑦᑐᓂᒃ ᓄᓇᕗᒻᒥᐅᓂᒃ ᐃᓚᒋᔭᐅᓪᓗᑎᒃ ᒪᒃᑯᒃᑐᑦ, ᐃᓐᓇᐃᑦ, ᕼᐋᒻᓚᒋᔭᐅᔪᑦ ᓯᕗᓕᖅᑎᖏᑦ, ᐃᓱᒫᓘᑎᖃᖅᑐᑦ ᓄᓇᓕᖕᒥᐅᓂᒃ, ᒪᓕᒐᕐᓂᒃ ᐊᑐᖅᑎᑦᑎᓪᓚᕆᖕᓂᕐᒥᒃ, ᓄᓇᓕᖕᓂ ᒪᓕᒐᓕᕆᓂᕐᒧᑦ ᑲᑎᒪᔨᕋᓛᓂᒃ, ᐊᓯᖏᓐᓂᒡᓗ ᐱᓕᕆᔨᓪᓚᕆᖕᓂᒃ. ᓄᓇᓕᖕᓂ ᒪᓕᒐᓕᕆᔨᒃᑯᑦ ᐱᙳᐊᕐᕕᖕᒥ ᑲᑎᒪᑎᑦᑎᖃᑦᑕᓚᐅᕐᒥᔪᑦ ᐅᖃᓪᓚᒡᕕᒃᑰᖅᐸᒃᖢᑎᒡᓗ.
ᑐᑭᓯᒋᐊᕈᑏᑦ ᑲᑎᑕᐅᔪᑦ ᑖᒃᑯᓇᓂ ᑲᑎᒪᓂᐅᔪᓂᑦ ᑲᑎᖅᓱᖅᑕᐅᓚᐅᖅᑐᑦ ᑭᒃᑯᑐᐃᓐᓇᐃᑦ ᐃᓚᐅᑎᑕᐅᓂᖏᓐᓄᑦ ᐅᓂᒃᑳᓂᑦ ᐱᕋᔭᒃᑕᐃᓕᒪᑎᑦᑎᓂᕐᒧᑦ ᖃᓄᖅᑑᕈᑎᒧᑦ (2015). ᑐᓴᕋᓱᒃᑎᓪᓗᒋᑦ ᓇᓗᓇᐃᖅᓯᓚᐅᖅᐳᑦ ᐅᑯᓂᖓ ᐅᖃᐅᓯᐅᓂᖅᐹᖑᓂᖏᓐᓂᒃ ᐱᔾᔪᑕᐅᓪᓗᐊᑕᖅᖢᑎᒃ ᐱᕋᔭᒍᑕᐅᓲᓂᒃ ᓄᓇᕗᒻᒥ:
- ᐃᓄᒋᐊᓗᐊᕐᓂᖅ
- ᐃᖅᑲᓇᐃᔮᒃᓴᖃᑦᑎᐊᙱᓐᓂᖅ
- ᐅᖃᓕᒫᕈᓐᓇᙱᓗᐊᕐᓂᖅ ᐃᓕᓐᓂᐊᖅᓯᒪᙱᓗᐊᕐᓂᕐᓗ
- ᑮᓇᐅᔭᖃᑦᑎᐊᙱᓐᓂᖅ ᓂᕆᔭᒃᓴᖃᑦᑎᐊᙱᓐᓂᕐᓗ
- ᖁᓄᔪᕐᓂᐊᕐᓂᖅ ᐊᒻᒪ ᐃᓚᒌᓂᑦ ᐋᓐᓂᖅᑎᕆᓂᖅ (ᐱᓂᕐᓗᖕᓂᖅ ᐃᓖᔭᕆᔭᐅᓂᕐᓗ)
- ᐊᓯᐅᔨᓂᖅ ᐃᓕᖅᑯᓯᒃᑯᑦ ᐃᓕᓴᕐᓇᐅᑎᒥᒃ, ᓇᖕᒥᓂᖅᓱᕈᓐᓇᕐᓂᕐᒥᒃ, ᐱᓕᕆᐊᒃᓴᓂᒃ ᐊᒻᒪ ᓯᕗᓕᖅᑎᐅᓂᕐᒥᒃ
- ᐊᖓᔪᖅᑳᑦᑎᐊᕙᐅᙱᓗᐊᕐᓂᖅ ᐊᒻᒪ ᐊᐃᑉᐸᖃᑦᑎᐊᕈᓐᓇᙱᓐᓂᖅ
- ᐋᖓᔮᕐᓇᖅᑐᓂᒃ ᐊᑐᕐᓗᖕᓂᖅ
ᐃᑲᔪᖅᑎᒌᖕᓂᕐᒧᑦ ᐱᓕᕆᐊᖅ
ᐃᑲᔪᖅᑎᒌᖕᓂᖅ ᐱᕋᔭᖕᓂᖅᑕᖃᖅᑕᐃᓕᓂᕐᒧᑦ ᐱᓕᕆᐊᖅ ᓴᖅᑭᑦᑎᔾᔪᑕᐅᓇᓱᐊᖅᖢᓂ ᓄᓇᓕᖕᓂᑦ ᐱᕋᔭᖕᓂᖅᑕᖃᖅᑕᐃᓕᓂᕐᒧᑦ ᐱᓕᕆᐊᒃᓴᓂᑦ ᐊᒻᒪᓗ ᓄᓇᕗᒻᒥ ᐱᓕᕆᖃᑎᒌᒡᓗᑎᒃ ᑐᓂᓯᓂᕐᒧᑦ ᐃᑲᔪᐃᓂᕐᒥᒃ ᓄᓇᓕᖕᓄᑦ ᓄᓇᓕᖕᒥᑦ ᒪᓕᒐᓕᕆᓂᕐᒧᑦ ᐃᓄᓗᒃᑖᓂᒃ ᑲᑎᒪᑎᑦᑎᓚᐅᖅᑎᓪᓗᒋᑦ.
ᐱᓕᕆᐊᒃᓴᖅ ᖃᐅᔨᔭᐅᔪᓂᑦ ᑭᒃᑯᑐᐃᓐᓇᐃᑦ ᐃᓚᐅᑎᑕᐅᓂᖏᓐᓄᑦ ᐅᓂᒃᑳᖅ ᐱᕋᔭᒃᑕᐃᓕᒪᑎᑦᑎᓂᕐᒧᑦ ᖃᓄᖅᑑᕈᑎᒧᑦ (2015) ᐋᖅᑭᒃᓱᐃᓂᐊᕐᓗᑎᒃ ᐊᑲᐅᓂᖅᓴᒃᑰᕆᐊᖅᑎᑦᑎᓂᖕᒧᑦ ᐅᐸᓗᖓᐃᔭᐅᑎᓂᑦ ᐱᓕᕆᐊᖃᓲᑦ ᓄᓇᓕᖕᓂᑦ−ᓇᓗᓇᐃᖅᑕᐅᓯᒪᔪᓂᑦ ᐱᕋᔭᖕᓂᖅᑕᖃᖅᑕᐃᓕᑎᑦᑎᓂᖕᒥᑦ ᓄᓇᓕᖕᓂᓪᓗ ᖃᓄᐃᙱᑦᑎᐊᖕᓂᖕᒧᑦ ᓯᕗᓪᓕᐅᔾᔭᒃᓴᓂᑦ ᑲᔪᓰᓐᓇᕈᓐᓇᖕᓂᖏᓪᓗ ᐃᓚᒋᐊᕐᓗᒋᓪᓗ ᓄᓇᓕᖕᓂᑦ.
ᐱᓕᕆᖃᑎᒋᓪᓗᒋᑦ ᓄᓇᓕᖕᓂ ᐱᖃᖅᑎᐅᖃᑕᐅᔪᑦ ᐱᓕᕆᐊᒃᓴᓕᕆᖃᑕᐅᔪᓪᓗ, ᐱᕋᔭᒃᑕᐃᓕᒪᑎᑦᑎᓂᕐᒧᑦ ᐅᖃᓕᒫᒐᓕᐅᓚᐅᖅᑐᑦ ᐃᑲᔫᑕᐅᓇᓱᒃᖢᓂᑦ ᐊᑐᓕᖅᑎᑦᑎᓂᕐᒧᑦ ᐱᓕᕆᐊᒃᓴᕐᒥᑦ.
ᑕᑯᒋᐊᕐᕕᒃᓴᖓ ᐃᑲᔪᖅᑎᒌᖕᓂᖅ ᐅᖃᓕᒫᒐᕐᒧᑦ
ᒪᓕᒐᓂ ᓱᕋᐃᑎᑦᑎᑦᑕᐃᓕᒪᓂᕐᒧᑦ ᑮᓇᐅᔭᑦ
ᒪᓂᒐᓂ ᓱᕋᐃᑎᑦᑎᑦᑕᐃᓕᒪᓂᕐᒧᑦ ᑮᓇᐅᔭᑦ ᐊᑐᐃᓐᓇᐅᑎᑦᑎᓲᑦ ᑮᓇᐅᔭᖃᖅᑎᑦᑎᓂᕐᒥᑦ ᐃᑲᔪᖅᓱᐃᓂᕐᒧᑦ ᐱᕋᔭᒃᑕᐃᓕᒪᓂᕐᒧᑦ ᑐᕌᖓᔪᓂᑦ ᐱᓕᕆᐊᓂᑦ ᐊᒻᒪᓗ ᖃᓄᐃᓕᐅᕈᑕᐅᔪᓂᑦ ᓄᓇᕘᓕᒫᒥᑦ. ᓴᖅᑭᑕᐅᓚᐅᖅᓯᒪᔪᖅ ᐱᕚᓪᓕᖁᓪᓗᒋᑦ ᓄᓇᓕᖕᓂᑦ ᖃᓄᐃᙱᑦᑎᐊᕐᓂᖏᑦ, ᐊᒥᓲᔪᓐᓃᖅᐹᓪᓕᖁᓪᓗᒋᓪᓗ ᐃᓄᐃᑦ ᐊᑲᐅᙱᑦᑐᓂᒃ ᓂᕈᐊᕆᔭᖃᖃᑦᑕᕐᓂᖏᑦ ᐱᕋᔭᒍᑕᐅᑐᐃᓐᓇᕆᐊᓕᖕᓂᑦ.
ᑮᓇᐅᔭᑦ ᓴᓂᕐᕙᒃᑕᐅᓲᖑᕗᑦ ᓂᕈᐊᕆᔭᐅᔪᒃᑯᑦ ᐊᕐᕌᒍᑕᒫᑦ ᒪᓕᒃᖢᒋᑦ ᒐᕙᒪᐅᑉ ᓯᕗᓪᓕᐅᑎᔪᒪᔭᖏᑦ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᖕᓂ ᐱᔭᐅᔭᕆᐊᓕᖏᑦ. ᓄᓇᕗᑦ ᒐᕙᒪᒃᑯᖏᑦ ᐱᑐᐃᓐᓇᐅᙱᑦᑐᓂᒃ ᓯᕗᓪᓕᖅᐸᐅᔾᔨᑐᐃᓐᓇᕆᐊᖃᕋᓗᐊᖅᑎᓪᓗᒋᑦ, ᐃᓱᒪᒋᔭᒃᓴᖅᑕᖃᖅᐸᑦ ᓄᓇᓕᔅᓯᓐᓄᑦ ᒪᓕᙱᑦᑐᒥᒃ ᑕᒪᒃᑯᓄᖓ ᓯᕗᓪᓕᖅᐸᐅᔾᔭᐅᓯᒪᔪᓄᑦ, ᐱᓇᔪᒍᑎᒋᔭᐃᑦ ᓱᓕ ᐊᖏᖅᑕᐅᓂᐊᖅᐳᖅ ᕿᒥᕐᕈᐊᖅᑕᐅᓗᓂᓗ ᓂᕈᐊᖅᑎᑦ ᑲᑎᒪᔨᕋᓛᖏᓐᓂᑦ. ᑮᓇᐅᔭᑦ ᑐᓂᐅᖅᑲᖅᑕᐅᓲᑦ ᒪᓕᒐᓕᕆᔨᒃᑯᓐᓄᑦ.
ᑐᒃᓯᕋᐅᓯᐅᖁᔨᓂᖅ ᐱᓕᕆᐊᒃᓴᓄᑦ ᐊᒻᒪ ᐱᓕᕆᐊᖑᕙᓪᓕᐊᔪᒪᔪᓄᑦ ᐊᕐᕌᒍᑕᒫᑦ ᓴᖅᑭᑕᐅᓲᖑᕗᖅ.
ᑐᑦᓯᕋᐅᑏᑦ ᕿᒥᕐᕈᔭᐅᕙᑦᑐᑦ ᑲᑎᒪᔨᕋᓛᓄᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᑐᑭᓯᐊᔪᓂᒃ ᐱᕋᔭᒃᑕᐃᓕᒪᑎᑦᑎᓂᕐᒥᒃ ᐊᒻᒪᓗ ᐱᒻᒪᕆᐊᓗᖕᒥᒃ ᐃᓅᓯᓕᕆᓂᕐᒥᒃ ᓄᓇᓕᖕᓂ. ᒥᓂᔅᑕᐅᑉ ᑐᒡᓕᖓ ᒪᓕᒐᓕᕆᔨᒃᑯᓐᓄᑦ ᐃᓱᒪᒃᓴᖅᓯᐅᓲᖑᕗᖅ ᐊᑐᓕᖁᔭᐅᔪᓂᒃ ᑲᑎᒪᔨᕋᓛᓄᑦ ᐊᒻᒪᓗ ᑭᖑᓪᓕᖅᐹᒥ ᐊᖏᖅᓯᓲᖑᓪᓗᓂᑦ ᐱᓕᕆᐊᑦ ᑮᓇᐅᔭᖃᖅᑎᑕᐅᖁᓪᓗᒋᑦ.
ᖁᑭᐅᑎᓕᕆᑦᓯᐊᕐᓂᖅ ᓄᓇᕗᒻᒥ - ᖁᑭᐅᓯᕆᓂᕐᒧᑦ ᐊᑦᑕᕐᓇᖅᑕᐃᓕᒪᓂᖅ ᓄᓇᕗᒻᒥ
ᓄᓇᓕᖕᓂ ᒪᓕᒐᓕᕆᔨᒃᑯᑦ ᐅᓄᕈᓐᓃᕆᐊᖅᑎᑦᑎᓇᓱᐊᖅᐳᑦ ᐋᓐᓂᕈᑕᐅᕙᒃᑐᓂᑦ ᖃᓄᐃᔾᔪᑕᐅᕙᒃᑐᓂᓪᓗ ᖁᑭᐅᑎᓄᑦ ᐊᑐᖅᖢᒍᑦ ᖁᑭᐅᑎᓕᕆᑦᓯᐊᕐᓂᖅ ᓄᓇᕗᒻᒥ − ᖁᑭᐅᑎᓄᑦ ᐊᑦᑕᕐᓇᖅᑕᐃᓕᒪᔪᓕᕆᓂᖅ.
ᓴᖅᑭᑕᐅᓚᐅᖅᑐᖅ ᓄᕕᐱᕆ 2022−ᒥᑦ, ᐅᓇ ᐃᓕᓐᓂᐊᕈᑎ ᑐᕌᖓᔪᖅ ᐅᔾᔨᖅᓱᓕᖅᐹᓪᓕᕐᑎᑦᑎᓂᖕᒧᑦ ᑲᔪᖏᖅᑕᐅᓂᖕᒥᓪᓗ ᐊᑦᑕᕐᓇᙱᑦᑐᒥ ᐊᑐᕐᓂᖅ, ᑲᒪᒋᔭᖃᕐᓂᖅ, ᑐᖅᑯᐃᓂᕐᒥᓪᓗ ᖁᑭᐅᑎᓂ ᓄᓇᕗᒻᒥᑦ. ᖃᓄᐃᓕᐅᕈᑕᐅᔪᒃᑯᑦ ᑐᓐᓂᖅᓴᐃᓲᑦ ᐊᑐᒐᒃᓴᓂᑦ ᖁᕝᕙᖅᐹᓪᓕᖁᓪᓗᒍᑦ ᐊᑦᑕᕐᓇᖅᑕᐃᓕᒪᓂᖅ ᐅᓄᕈᓐᓃᕆᐊᕐᓗᒋᓪᓗ ᖃᓄᐃᔾᔪᑕᐅᕙᒃᑐᑦ ᐊᒻᒪᓗ ᐋᓐᓂᕈᑕᐅᕙᒃᑐᑦ ᖁᑭᐅᓯᕆᓂᕐᒧᑦ.
ᖁᑭᐅᑎᓂᒃ ᐊᑦᑕᕐᓇᖅᑕᐃᓕᒪᓂᖅ ᓄᓇᕗᒻᒥ ᑐᕌᒐᖃᖅᑐᖅ ᓴᙱᒃᑎᒋᐊᖅᓯᓂᕐᒥᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓕᓐᓂᐊᒐᒃᓴᓂᑦ ᐱᕕᖃᓕᖅᐹᓪᓕᖅᑎᑦᑎᓗᓂᓗ ᐃᓕᓐᓂᐊᒐᒃᓴᓄᑦ.
- ᓯᐊᒻᒪᒃᑎᖅᑕᐅᓂᖏᑦ ᐃᓕᓐᓂᐊᖅᑎᑦᑎᔾᔪᑎᒃᓴᑦ ᐊᒻᒪ ᐱᕚᓪᓕᕈᑎᒃᓴᑦ ᐱᓕᕆᔾᔪᑎᑦ ᓄᓇᕘᓕᒫᒥ;
- ᓄᓇᓕᖕᓂ ᐱᓕᕆᐊᑦ ᐊᒻᒪ ᐅᖃᐅᓯᒃᓴᑦ, ᐱᓕᕆᖃᑎᒋᓪᓗᒋᑦ ᐸᓖᓯᒃᑯᑦ ᐊᒻᒪ ᓄᓇᓕᖕᓂ ᒪᓕᒐᓕᕆᔨᒃᑯᓐᓂ ᐱᑖᖃᑕᐅᓯᒪᔪᑦ;
- ᖁᑭᐅᑎᑖᕈᓐᓇᐅᑎᓄᑦ ᐃᓕᓐᓂᐊᖅᑎᑦᑎᓂᖅ ᐊᑕᐅᑦᑎᒃᑰᖃᑎᖃᕐᓗᓂ ᐅᔾᔨᕈᓱᒃᑎᑦᑎᓂᕐᒧᑦ ᓄᓇᕗᒻᒥ ᓄᓇᓕᖕᓂ;
- ᖁᑭᐅᑎᓂᒃ ᐊᑦᑕᕐᓇᖅᑐᒦᑦᑕᐃᓕᒪᓂᕐᒧᑦ ᐅᔾᔨᕆᔭᐅᓕᖅᑎᑦᑎᓇᓱᖕᓂᖅ ᓄᑲᖅᖡᑦ ᐊᒻᒪ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓄᑦ;
- ᓯᐊᒻᒪᒃᑎᖅᑕᐅᓂᖏᑦ ᐸᑭᓂᒐᖏᓐᓄᑦ ᑮᒃᑕᐅᑎᑦ ᓇᒧᕈᓘᔭᖅ ᓄᓇᕗᒻᒥ, ᐱᓕᕆᖃᑎᒋᓗᒋᑦ ᖁᑭᐅᓯᕆᔨᒃᑯᑦ ᐊᑦᑕᕐᓇᖅᑎᑦᑎᑦᑕᐃᓕᓂᕐᒧᑦ ᑎᑎᕋᕐᕕᖕᒥᐅᑕᑦ.
ᐃᕐᖐᓈᖅᑕᐅᑦ: @email