ᐱᔪᓐᓇᐅᑎᓕᒃ ᐃᓗᐊᖅᓴᐃᔨ
ᐅᓇ ᐃᖅᑲᓇᐃᔮᒃᓴᖅ ᑭᒃᑯᑐᐃᓐᓇᓄᑦ ᐱᓇᔪᒍᒪᔪᓄᑦ ᒪᑐᐃᖓᔪᖅ.
ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ, ᐃᖅᑲᓇᐃᔭᕐᕕᑦᑎᐊᕙᐅᓛᖑᓂᖓᓄᑦ ᒪᒃᑯᒃᑐᓄᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓵᓚᐅᖅᑐᓄᑦ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᒃᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᑦ ᐆᒻᒪᕆᒃᑐᖅ, ᐱᔪᒪᓂᖃᑦᑎᐊᖅᑐᑦ, ᐊᖏᖅᓯᒪᑦᑎᐊᖅᖢᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ. ᒐᕙᒪᐅᑎᓪᓗᑕ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓂᕐᒧᑦ ᐃᓄᐃᑦ ᐱᖅᑯᓯᖏᓐᓂᒃ, ᓴᖅᑭᔮᖅᑎᑦᑎᓂᕐᒧᑦ ᐃᓄᒃᑐᑦ ᐅᖃᐅᓯᖓᓐᓂᑦ, ᑭᒡᒐᖅᑐᐃᑦᑎᐊᕐᓂᕐᒧᑦ ᒐᕙᒪᒃᑯᓐᓂᑦ ᐃᖅᑲᓇᐃᔭᖅᑎᓂᒃ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᑲᔪᓯᑎᑦᑎᓂᕐᒧᑦ ᐊᖏᖅᓯᒪᓂᕆᔭᖓᓂᑦ ᓄᓇᕗᒻᒧᑦ. ᐃᖅᑲᓇᐃᔮᖅᑖᖅᑐᑦ ᐊᑭᓕᖅᓱᖅᑕᐅᑦᓯᐊᕐᓂᐊᖅᑐᑦ, ᐋᓐᓂᐊᕐᕕᒻᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᓂᑦ, ᓇᓗᓇᐃᔭᖅᑕᐅᓯᒪᔪᓂᑦ ᐃᓐᓇᖅᓯᐅᑎᑦᓴᓄᑦ ᐃᑲᔫᑎᑦᓴᓂᑦ, ᓅᑕᐅᓂᕐᒧᑦ ᐱᔪᓐᓇᐅᑎᓂᑦ ᐃᓕᓐᓂᐊᕈᓐᓇᖅᑎᑕᐅᓗᓂ ᐃᖅᑲᓇᐃᔮᒥᓪᓗ ᖁᕝᕙᖅᐸᓪᓕᐊᓗᓂ.
ᑲᒪᔨᖓᓂ ᐊᑕᐅᓯᙱᑦᑐᒥᑦ ᐱᓕᕆᐊᖑᖃᑦᑕᖅᑐᓂ ᓂᕈᐊᖅᑕᐅᔪᓂᒡᓘᓐᓃᑦ ᑭᐅᖃᑦᑕᖅᐳᖅ ᐃᖅᑲᓇᐃᔮᖓᑦ ᐱᓕᕆᖃᑎᖃᖃᑦᑕᖅᐳᖅ ᓘᒃᑖᒻᒪᕆᖕᓂᑦ ᓄᓇᓕᖕᓂᑦ ᐱᔨᑦᑎᕆᐊᖃᖅᑐᓂ ᐃᓄᖕᓄᑦ ᐃᓱᒪᒥᒍᑦ ᐋᓐᓂᐊᖅᑐᓂ ᐊᒻᒪ/ᐅᕝᕙᓘᓐᓃᑦ ᐃᓗᐊᙱᔾᔪᑎᖃᖅᑐᓂ, ᐊᑕᐅᓯᙱᑦᑐᓂ ᐅᐃᕆᔾᔪᑎᓕᖕᓂᑦ ᐊᒻᒪ ᐃᓅᓯᕐᒥᓂᒃ ᑭᐱᓯᔪᒪᓂᕐᒧᑦ ᐃᓱᒪᖃᑦᑕᖅᑐᓂ/ᐃᓅᓯᕐᒥᓂᒃ ᑭᐱᓯᓇᓱᐊᖃᑦᑕᖅᑐᓄᓪᓗ ᐊᒻᒪ ᑐᓴᕐᕕᐊᖃᑦᑕᕐᓗᓂ ᓘᒃᑖᓂᑦ, ᓄᓇᓕᖕᓂᖔᖅᑐᓂ, ᐅᑭᐅᖅᑕᖅᑐᒥᑦ ᐊᒻᒪ ᓄᓇᕗᒻᒥᑦ ᓯᓚᑖᓂᒃ, ᖃᐅᔨᓴᖅᐸᒃᖢᑎᒃ ᐸᕿᔭᐅᔾᔪᑎᒃᓴᓂ ᑐᓴᕆᐊᖃᓪᓚᕆᒃᑐᓂ.
ᐃᖅᑲᓇᐃᔭᖅᑎ ᓯᕗᓕᖅᑕᐅᓂᐊᖅᑐᖅ ᐊᑐᐃᓐᓇᐅᑎᑦᑎᓂᕐᒧᑦ ᐋᓐᓂᐊᕐᕕᖕᒥ ᑐᑭᒧᐊᑦᑎᑦᑎᓂᕐᒧᑦ ᐅᐸᒃᑕᐅᖃᑦᑕᖅᑐᓄᓪᓗ ᐱᔨᑦᑎᕐᕕᐅᔪᓂᑦ ᓄᓇᓕᖕᓂᑦ. ᐃᓱᒪᓕᕆᔨ ᑲᒪᒋᔭᖃᖃᑦᑕᕐᓂᐊᖅᑐᖅ ᑲᒪᒋᔭᐅᓂᕐᒧᑦ ᐸᕐᓇᐅᑎᓂᑦ ᐱᕙᓪᓕᐊᑎᑦᑎᓂᕐᒧᑦ, ᐱᓕᕆᐊᓄᑦ ᐊᐅᓚᑦᑎᓂᕐᒧᑦ, ᑲᑎᒪᓂᐅᓂᐊᖅᑐᓄᑦ, ᐱᒋᐊᙵᕐᓂ ᖃᐅᔨᓴᖅᑕᐅᖏᓐᓇᖅᑐᓄᑦ, ᐄᔭᒐᕐᓂᑦ ᐊᐅᓚᑦᑎᓂᕐᒧᑦ ᖃᐅᔨᓴᕐᓂᕐᒧᓪᓗ ᑐᐊᕕᕐᓇᖅᑐᓕᕆᔪᓐᓇᕐᓗᓂᓗ ᐊᐅᓚᑦᑎᖃᑦᑕᖅᐳᖅ ᐃᓕᓐᓂᐊᖅᑎᑦᑎᕙᒃᖢᓂᓗ ᐱᓕᕆᖃᑎᒌᒃᑐᓂ.
ᐱᔪᓐᓇᐅᑎᓕᒃ ᐃᓗᐊᖅᓴᐃᔨ ᐸᕐᓇᐃᖃᑦᑕᕐᓂᐊᖅᐳᖅ ᐊᒻᒪᓗ ᐱᓕᕆᕙᒡᓗᓂ ᑲᒪᒋᔭᐅᔪᓂᒃ ᐊᑲᐅᓯᓴᕐᓂᕐᒥᑦ ᐊᒻᒪᓗ ᖃᐅᔨᓇᓱᒃᐸᒡᓗᓂ ᑲᒪᒋᔭᐅᔪᑦ ᖃᓄᐃᓕᖓᓕᖅᐸᓪᓕᐊᔭᖏᓐᓂᒃ ᒪᓕᒋᐊᓖᑦ ᐊᑐᕐᓗᒋᑦ ᐊᑐᓕᖅᑎᑕᐅᔪᓂ ᓄᓇᕗᑦ ᒐᕙᒪᖓᓂ ᐱᓂᐊᕈᒪᔪᓂ ᐱᕈᖅᐸᓪᓕᐊᓂᕐᒧᑦ ᐊᒻᒪᓗ ᑲᔪᓯᑎᑦᑎᓂᕐᒧᑦ ᑲᒪᒋᔭᐅᔪᑦ ᐃᓅᓯᕆᔭᒥ. ᐃᓚᒋᐊᕐᓗᒍ, ᐱᔪᓐᓇᐅᑎᓕᒃ ᐃᓗᐊᖅᓴᐃᔨ ᐅᔾᔨᖅᓱᖅᐸᒃᑐᖅ, ᖃᐅᔨᓇᓱᒃᐸᒃᑐᖅ, ᐊᒻᒪᓗ ᓇᐅᑦᑎᖅᓱᖅᐸᒃᑐᖅ ᑎᑎᕋᖅᑕᐅᕙᒃᑐᓂ ᖃᓄᐃᑉᐸᓪᓕᐊᔪᓂ ᐊᒻᒪᓗ ᑲᒪᒋᔭᖃᕐᐸᒃᖢᓂ ᓄᓇᕗᑦ ᒐᕙᒪᖓᑕ ᑎᑎᖅᑲᓄᑦ ᒪᓕᒋᐊᓕᖕᓂᒃ ᖃᐅᔨᒪᔾᔪᑎᒃᓴᓂᒡᓗ. ᑖᔅᓱᒥᖓ ᐃᖅᑲᓇᐃᔮᓕᒃ ᐃᓗᐊᖅᓴᐃᖃᑦᑕᕐᓂᐊᖅᐳᖅ, ᖃᓄᐃᙱᑦᑎᐊᕐᓇᖅᑐᓂᒃ ᐅᔾᔨᕈᓱᓕᖅᑎᑦᑎᕙᒡᓗᓂ ᐊᒻᒪ ᐱᔭᐅᑦᑕᐃᓕᒋᐊᓕᖕᓂᒃ ᐱᑎᑦᑎᑦᑕᐃᓕᒪᔪᓐᓇᕐᓗᓂ ᐋᓐᓂᐊᕕᓕᐊᖅᓯᒪᔪᓄᑦ. ᐃᓗᐊᖅᓴᐃᔨᑦ ᑲᒪᒋᔭᒃᓴᖃᖅᐸᒃᐳᑦ ᐊᑐᐃᓐᓇᐅᑎᑦᑎᒋᐊᖃᖅᐸᒃᖢᑎᒃ ᐱᐅᑦᑎᐊᖅᑐᓂᒃ ᐃᓗᐊᖅᓴᐃᔾᔪᓯᕐᓂᒃ ᐱᓕᕆᐊᕆᔭᖏᓐᓂᒃ ᓇᓗᓇᐃᖅᑕᐅᓯᒪᔪᑦ ᐱᔪᓐᓇᐅᑎᓕᖕᒥ ᐊᒻᒪ ᓄᓇᕗᑦ ᒐᕙᒪᒃᑯᓐᓂ.
ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ.
ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᔭᕆᐊᓕᒃ ᐃᖅᑲᓇᐃᔮᖅᑖᕋᓱᒃᑐᖅ. ᑐᓐᓂᖅᑯᑎᒋᓗᒍ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᒧᑦ ᓇᓗᓇᐃᒃᑯᑕᐃᑦ ᐃᖅᑲᓇᐃᔮᖅᑖᕋᓱᒍᑎᒋᔭᕐᓄᑦ.
ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑎᑐᑦ (ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐅᐃᕖᑎᑐᓪᓗ. ᑐᓴᐅᒪᑎᑦᑎᔪᓐᓇᖅᐸᑦ ᓄᓇᕗᒻᒥ ᐅᖃᐅᓯᖅᑕᕆᔭᐅᔪᓂᒃ ᐊᑕᐅᓯᐅᙱᑦᑐᒥᑦ ᐃᑲᔫᑎᖃᑦᑎᐊᕋᔭᖅᐳᖅ. ᖃᐅᔨᒪᒃᐸᑦ ᐃᓄᐃᑦ ᐅᖃᐅᓯᖓᓂᒃ, ᓄᓇᓕᖕᓂ, ᐃᓕᖅᑯᓯᖏᓐᓂᒃ, ᓄᓇᒥᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔫᑎᖃᕋᔭᖅᐳᖅ.
ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑎᓕᐅᕆᒃᑲᓐᓂᖅᑐᒍᑦ ᐱᓇᔪᖁᔨᓪᓗᑕ ᐃᓕᖕᓂᑦ ᑕᐃᒪᓐᓇᑎᒋ ᐅᑭᐅᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᒍᕕᑦ ᐃᓕᓐᓂᐊᖅᓯᒪᔭᕆᐊᓕᑦ ᐱᓕᕆᖃᑦᑕᖅᓯᒪᔭᕆᐊᓕᓪᓗ ᐊᔾᔨᖓᓂ ᖁᓛᓂᑦ ᑎᑎᕋᖅᓯᒪᔪᓂᑦ.
ᐃᖅᑲᓇᐃᔭᖅᑎᑖᕆᔭᐅᕙᓪᓕᐊᔪᓄᑦ ᑮᓇᐅᔭᖅᑖᒐᒃᓴᒃᑲᓐᓃᑦ ᐅᓪᓗᓕᒫᕐᒧᑦ ᐃᖅᑲᓇᐃᔭᖅᑎᓄᑦ, ᓚᐃᓴᓐᓯᖃᐃᓐᓇᖅᑐᓄᑦ ᐃᓗᐊᖅᓴᐃᔨᑦ ᑮᓇᐅᔭᖅᑖᒃᑲᓐᓂᓲᖑᓪᓗᑎᒃ ᐅᑯᓂᖓ: $3,000 ᐃᖅᑲᓇᐃᔭᓯᒋᐊᖅᑎᓪᓗᒋᑦ, $3,000 ᑕᖅᑭᓄᑦ ᐊᕐᕕᓂᓕᖕᓄᑦ ᓴᓇᓕᖅᑎᓪᓗᒋᑦ, $5,000 ᐊᕐᕌᒍᓕᒫᖅ ᓴᓈᓪᓚᓚᐅᖅᑎᓪᓗᒋᑦ, ᐊᒻᒪ $7,000 ᐅᑭᐅᖕᓄᑦ ᒪᕐᕉᖕᓄᑦ ᓴᓇᓕᖅᑎᓪᓗᒋᑦ. ᐅᑭᐅᖕᓄᑦ ᒪᕐᕉᖕᓄᑦ ᐅᑎᖅᑐᑦ ᐱᔨᑦᑎᕋᖅᑎᒋᔭᐅᒋᐊᓕᖕᓄᑦ ᑖᒃᑯᓄᖓ ᐃᖅᑲᓇᐃᔭᖅᑎᑖᕆᔭᐅᕙᓪᓕᐊᔪᓄᑦ ᐊᒻᒪ ᐃᖅᑲᓇᐃᔭᐃᓐᓇᖅᑐᓄᑦ ᐊᑭᓕᖅᑕᐅᒃᑲᓐᓂᕈᑏᑦ.
ᐊᔪᙱᑎᑕᐅᔪᓐᓇᕐᓂᕐᒧᑦ ᓇᓗᓇᐃᖅᓯᒪᔪᑦ ᓴᖅᑭᑕᐅᑐᐃᓐᓇᕆᐊᓖᑦ ᐃᓐᓄᒃᓯᒪᙱᑦᑐᑦ ᓯᕗᓂᒃᓴᒥ ᐃᓐᓄᒍᓐᓇᖁᓪᓗᒋᑦ.
ᑕᔅᓱᒥᖓ ᐃᖅᑲᓇᐃᔮᒃᓴᒧᑦ ᐆᒃᑐᕈᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕐᓗᑎᑦ ᐃᖅᑲᓇᐃᔮᒧᑦ ᐱᔪᒥᓴᐅᑎᑦ ᓇᒃᓯᐅᑎᓗᒍ ᐅᑯᓄᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᑎᑎᕋᕐᕕᐅᔪᓐᓇᖅᑐᒥ ᐃᕐᖐᓐᓈᖅᑕᐅᒃᑯᑦ.
- ᓄᓇᕗᑦ ᒐᕙᒪᒃᑯᖏᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᓂᕐᒥᑦ ᐃᖅᑲᓇᐃᔭᖅᑎᓂᒃ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᒻᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᒪᓕᒡᓗᒍ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᐃᑦ.
- ᒐᕙᒃᑯᓐᓂᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᖃᐅᔨᓴᖅᑕᐅᓂᕐᒦᑦᑐᑦ ᐱᔭᕆᐊᖃᖅᑐᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓐᓂᑦ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ.
- ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᑦ ᐊᔪᓕᕈᑕᐅᙱᑐᐃᓐᓇᕆᐊᓕᒃ ᐆᒃᑐᕐᓂᕆᔭᖏᑦ ᐃᓱᒪᒋᔭᐅᓂᖏᓐᓄᑦ. ᖃᐅᔨᓴᖅᑕᐅᓂᖏᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐱᓕᕆᐊᒃᓴᕆᔭᐅᔪᑦ ᐃᖅᑲᓇᐃᔮᒃᓴᒥ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᓈᒻᒪᒋᔭᐅᔪᓂᒃ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᓄᑦ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ.
- ᐃᖅᑲᓇᐃᔭᖅᑖᕋᓱᒃᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ.
- ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
- ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ. ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᓱᐊᕈᑏᑦ ᐋᒡᒑᖅᑕᐅᑐᐃᓐᓇᕆᐊᓕᒃ.