ᐃᓐᓇᕈᖅᐸᓪᓕᐊᑦᑎᐊᕐᓂᖅ ᓄᓇᕗᒻᒥ: ᓴᒃᑯ ᐱᕈᖅᓴᐃᓂᖅ ᐊᒻᒪ ᐱᓕᕆᖃᑎᖏᑦ ᐊᐅᓚᑦᑎᓂᐊᕐᓗᑎᒃ ᓄᑖᒥᒃ ᑭᕙᓪᓕᕐᒥ ᑲᒪᒋᔭᐅᖏᓐᓇᖅᑐᒃᑯᕕᖕᒥ

ᑲᖏᖅᖠᓂᖅ, ᓄᓇᕗᑦ (ᐊᐃᕆᓕ 12, 2024) – ᓄᓇᕗᑦ ᒐᕙᒪᒃᑯᑦ ᐊᑎᓕᐅᓚᐅᖅᐳᑦ ᑳᓐᑐᓛᖕᒥᑦ ᓴᒃᑯ ᐱᕈᖅᓴᐃᔩᑦ ᑯᐊᐳᕇᓴᒃᑯᓐᓄᑦ, ᑲᖏᖅᖠᓂᕐᒥ ᑲᒻᐸᓂᒥᒃ, ᐱᓕᕆᖃᑎᒋᔭᖓᓗ Embassy West ᐃᓐᓇᒃᑯᕕᖕᒥ ᐃᓂᖃᖁᓪᓗᒋᑦ ᐊᐅᓚᑦᑎᓂᐊᕐᓗᑎᒃ ᓄᑖᒥᒃ ᑭᕙᓪᓕᕐᒥ ᐊᑯᓂᐅᔪᒃᑯᑦ ᑲᒪᒋᔭᐅᕝᕕᖕᒥ ᑲᖏᖅᖠᓂᕐᒥ.

ᓄᑖᖑᓪᓗᓂ ᐃᒡᓕᖃᖅᑐᖅ 24-ᓂᒃ ᐊᑐᐃᓐᓇᐅᑎᑦᑎᓂᐊᖅᑐᖅ ᖁᑦᑎᖕᓂᓕᒃ 3, 4, 5−ᓗ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᕆᐊᓕᖕᓄᑦ ᐃᓐᓇᕐᓄᑦ ᐅᒃᑯᐃᓛᕋᓱᒋᔭᐅᓪᓗᓂᓗ 2024−ᒥᑦ ᐊᐅᔭᒃᑯᑦ. ᖁᕕᐊᓲᑎᖃᕐᓂᕐᒧᑦ ᐊᑎᓕᐅᕐᓂᖅ ᐊᑐᕐᓂᐊᖅᑐᖅ ᑲᖏᕐᖠᓂᕐᒥ ᐃᓱᓕᑎᓪᓗᒍ ᐊᐃᕆᓕ.

ᐊᒻᒪᓗᑦᑕᐅᖅ ᐊᐅᓚᑦᑎᓂᕐᒥᑦ ᑭᕙᓪᓕᕐᒥᑦ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᖕᓂᒥᑦ, ᓴᒃᑯ ᐱᓕᕆᐊᖃᓪᓚᕆᒍᒪᕗᖅ ᓄᓇᓕᖕᓂᑦ ᐱᓕᕆᔨᒻᒪᕆᐅᓂᕐᒧᓪᓗ ᐱᕙᓪᓕᐊᓂᕐᒥᑦ ᓴᖅᑭᑦᑎᓪᓗᑎᒃ ᓄᑖᓂᑦ ᐊᔾᔨᐅᙱᑦᑐᓂᑦ ᐃᑲᔪᖅᑎᓂᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ. ᑖᓐᓇ ᐱᓕᕆᐊᖑᕙᓪᓕᐊᔪᒪᔪᖅ ᑲᑐᔾᔨᖃᑎᒌᒍᑕᐅᓪᓗᓂ ᐱᓕᕆᐊᖑᕗᖅ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᐅᓄᑦ ᐃᓚᖃᕐᓂᐊᖅᖢᓂᓗ ᐱᕙᓪᓕᐊᑎᑕᐅᔪᓂᒃ ᐃᓕᓐᓂᐊᖅᑕᐅᔪᒃᓴᓂᒃ.

"ᑲᑐᔾᔨᖃᑎᒋᓪᓗᒋᑦ ᓴᒃᑯᒃᑯᑦ, ᐊᓪᓗᕆᐊᕈᑎᖃᒻᒪᕆᒃᐳᒍᑦ ᓄᓇᕗᑦ ᒐᕙᒪᖓᑕ 'ᐃᓐᓇᕈᖅᐸᓪᓕᐊᓂᖓᓄᑦ ᓄᓇᕗᒻᒥ' ᐱᔭᒃᓴᕆᔭᖏᓐᓂᒃ," ᑕᐃᒪᓐᓇ ᒥᓂᔅᑕᕆᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᐅᖃᓚᐅᖅᐳᖅ. "ᐊᐅᓚᑦᑎᓂᕐᒧᑦ ᐃᑲᔪᖅᑐᐃᓂᖏᓐᓄᑦ, ᐱᐅᓯᒋᐊᖅᑎᑦᑎᕗᒍᑦ ᖃᐅᑕᒫᑦ ᐃᓅᓯᕆᕙᒃᑕᑦᑎᓐᓂᒃ, ᐊᖏᒡᓕᒋᐊᖅᑎᑦᑎᕙᓪᓕᐊᓪᓗᑕ ᐃᖅᑲᓇᐃᔭᕐᓂᕐᒥᒃ ᑲᒪᒋᔭᖃᖅᐸᖕᓂᕐᒥᒃ, ᐱᒻᒪᕆᐅᓛᖑᓪᓗᓂᓗ, ᐊᔪᖅᑎᑦᑎᙱᖦᖢᓂ ᓄᓇᕗᒻᒥᐅᓂᒃ ᐃᓐᓇᕐᓂᒡᓗ ᑲᒪᒋᔭᐅᔭᕆᐊᓕᖕᓂᒃ ᐃᓅᓂᐊᕐᓗᑎᒃ ᖃᓂᓐᓂᖅᓴᒥᒃ ᐃᓚᒥᓄᑦ ᓄᓇᓕᖕᒧᓪᓗ.”

"ᓴᒃᑯ ᐅᐱᒍᓱᒃᐳᖅ ᐱᕕᒃᓴᖃᕈᓐᓇᕋᑦᑕ ᑲᑎᑎᑦᑎᔪᓐᓇᖅᖢᑎᒃ ᑲᒪᒋᔭᐅᑦᑎᐊᖅᑐᓂᒃ ᐃᑲᔪᖅᓱᖅᑕᐅᓪᓗᑎᒃ ᐃᓄᐃᑦ ᐃᓐᓇᐃᑦ ᐱᒻᒪᕆᐅᒋᔭᐅᔪᑦ, ᐃᓚᓕᐅᔾᔭᐅᓪᓗᑎᒃ ᓂᕿᓪᓚᑦᑖᑦ, ᐃᓄᒃᑎᑐᑦ ᑐᓴᐅᒪᖃᑎᒌᖕᓂᖅ, ᐃᓄᐃᑦ ᑲᑎᙵᑎᑕᐅᕙᓚᐅᖅᑐᑦ, ᐊᒻᒪ ᑭᖑᓂᖔᑦᑎᓐᓂ ᖁᕕᐊᒋᓛᕆᖃᑦᑕᖅᓯᒪᔭᖏᑦ," ᐅᖃᓚᐅᖅᐳᖅ ᓴᒃᑯᒃᑯᓐᓂ ᐱᕈᖅᓴᐃᔩᑦ ᐊᖓᔪᖅᑳᖓ ᑕᐃᕕᑦ ᖃᑯᖅᑎᓐᓂᖅ. "ᐊᑕᐅᑦᑎᒃᑯᑦ, ᐱᓕᕆᕝᕖᑦ ᐃᖅᑲᓇᐃᔮᒃᓴᑦᑎᐊᕙᖕᓂᒃ ᓴᖅᑭᑎᑦᑎᓂᐊᖅᐳᑦ ᓄᓇᕗᒻᒥᐅᓄᑦ.”

ᓄᓇᕗᑦ ᒐᕙᒪᖓ ᓴᒃᑯᒃᑯᓪᓗ ᓂᕆᐅᒋᔭᖃᖅᐳᑦ ᒪᑐᐃᖅᑕᐅᓛᕐᓂᖓᓂᒃ ᑭᕙᓪᓕᕐᒥ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᐱᓕᕆᖃᑎᒋᓗᒋᓪᓗ ᓄᓇᓕᖕᓂ ᐱᓕᕆᖃᑎᒋᔭᐅᕙᒃᑐᑦ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᐃᓐᓇᐃᑦ ᑲᒪᒋᔭᐅᕙᖕᓂᖏᓐᓄᑦ ᓄᓇᕗᒻᒥ.