ᓄᓇᕗᒻᒥ ᓇᖕᒥᓂᖅᓱᕐᓂᕐᒧᑦ ᐱᓕᕆᖃᑎᒌᑦ ᓴᖅᑭᑦᑎᕗᑦ ᐃᓄᙳᖅᓴᐃᕕᖕᒥ ᐃᓕᓐᓂᐊᕐᓂᕐᒥᒃ ᓄᓇᓕᖕᓂ

ᐃᖃᓗᐃᑦ, ᓄᓇᕗᑦ (ᕕᕝᕗᐊᕆ 14, 2024) − ᓄᓇᕗᑦ ᒐᕙᒪᖓᑦ, ᓄᓇᕗᑦ ᑐᙵᕕᒃᑯᑦ, ᐊᒻᒪ ᑲᓇᑕᐅᑉ ᒐᕙᒪᒃᑯᖏᑦ ᐅᓪᓗᒥ ᐃᓄᙳᖅᓴᐃᕕᖕᒥ  ᓴᖅᑭᑎᑦᑎᖅᑲᐅᕗᑦ: ᐃᓕᑦᑎᕙᓪᓕᐊᓂᖅ ᐱᔾᔪᑎᖃᕐᓗᓂ.

ᑖᓐᓇ ᓄᑖᖑᓪᓗᓂ ᐃᓕᓐᓂᐊᕐᓂᕐᒥᑦ ᐃᑲᔪᖅᑐᐃᔪᖅ ᐱᓕᕆᐊᖑᕙᓪᓕᐊᔪᖅ ᐃᓄᖕᓂᑦ ᓄᓇᕗᒻᒥ ᐊᔪᕈᓐᓃᖅᓴᕈᑕᐅᓂᐊᖅᐳᖅ ᖃᐅᔨᒪᑦᑎᐊᓕᕐᓗᑎᒡᓗ ᑲᒪᒋᔭᖃᑦᑎᐊᕐᓂᕐᒥᒃ ᐊᐅᓚᑦᑎᓂᕐᒥᒃ ᓄᓇᕗᑦ ᓄᓇᖏᓐᓂᒃ, ᐃᒪᖏᓐᓂᒃ, ᐱᔾᔪᑎᒃᓴᖏᓐᓂᒡᓗ ᐱᓕᕆᐊᒃᓴᖏᑦ ᑲᒪᒋᔭᕆᐊᓕᖏᓪᓗ ᓄᓇᕗᑦ ᒐᕙᒪᖓᓄᑦ ᓅᑎᑕᐅᓯᒪᓕᖅᐸᑕ ᒐᕙᒪᑐᖃᒃᑯᓐᓂ. ᐃᑲᔪᖅᑐᐃᓂᐊᕆᕗᑦ ᑲᑎᑎᑦᑎᓗᓂᓗ ᐅᓄᖅᑐᓂᑦ ᐃᓄᖕᓂᑦ−ᐊᐅᓚᑕᐅᖏᓐᓇᖅᑐᓂᑦ ᓄᓇᓂᑦ ᐱᔾᔪᑎᒃᓴᖏᓐᓂᓪᓗ ᑲᒪᒋᔭᖃᑦᑎᐊᕐᓂᕐᒧᑦ ᐱᓕᕆᐊᖑᕙᓪᓕᐊᔪᓂᒃ ᓄᓇᕗᒻᒥ.

ᐃᓄᙳᖅᓴᐃᕕᒃ ᓄᓇᕗᒻᒥ ᐃᓄᖕᓂᑦ ᐃᑲᔪᕐᓂᐊᖅᐳᖅ ᓇᓗᓇᐃᖅᓯᔪᓐᓇᖅᓯᓗᑎᒃ ᐊᑐᕈᓐᓇᕐᓗᑎᒡᓗ ᐃᓕᓐᓂᐊᕐᓂᕐᒥᒃ, ᐱᓕᒻᒪᒃᓴᕐᓂᕐᒥᒃ, ᐊᒻᒪᓗ ᐃᖅᑲᓇᐃᔭᕆᐅᖅᓴᕆᐊᖃᖅᑕᖏᓐᓂᒃ ᐃᖅᑲᓇᐃᔮᖅᑖᕋᓱᖕᓂᐊᕐᓗᓂ ᓄᓇᒥᑦ ᑲᒪᒋᔭᖃᑦᑎᐊᕐᓂᕐᒥᑦ ᐃᑲᔫᑕᐅᔪᓐᓇᖅᑐᓂᓪᓗ ᐊᐅᓚᑦᑎᓂᕐᒥᒃ.  ᐃᓕᓐᓂᐊᖅᑏᑦ ᐊᑐᕈᓐᓇᕐᓂᐊᕆᕗᑦ ᐃᓕᓐᓂᐊᕐᕕᖕᓂ ᓇᖕᒥᓂᕐᓗ ᐃᑲᔪᖅᑐᐃᔾᔪᑎᓂᒃ ᐊᑐᒐᒃᓴᖃᑦᑎᐊᖁᓪᓗᒋᑦ ᑲᔪᓯᑦᑎᐊᕐᓂᐊᕐᒪᑕ.

ᐃᓄᙳᖅᓴᐃᕕᖕᒥ ᐊᑎᓕᐅᖅᑕᐅᓯᒪᓕᖅᐸᑕ, ᐃᓕᓐᓂᐊᖅᑏᑦ ᑲᑎᑎᑕᐅᓂᐊᖅᐳᑦ ᖃᕆᓴᐅᔭᒃᑯᑦ ᓄᓇᓕᖕᓂ ᑲᑎᙵᔪᓐᓇᖅᓯᓂᐊᕐᒪᑕ ᐱᓕᕆᖃᑕᐅᓕᕐᓗᑎᒡᓗ ᐃᓕᓐᓂᐊᖃᑎᒋᓂᐊᖅᑕᖏᓐᓂᒃ ᐱᓕᕆᐊᖑᑎᑕᐅᔪᓂᒡᓗ ᐊᑐᕈᓐᓇᖅᓯᓗᑎᒃ ᖃᓄᐃᓕᐅᕈᑕᐅᔪᓂᓪᓗ ᐃᓕᓐᓂᐊᖅᐸᓪᓕᐊᓂᐊᖅᑎᓪᓗᒋᑦ. ᐃᓕᓐᓂᐊᖅᓯᒪᓂᖓ ᑭᒡᓕᖃᖅᑎᑕᐅᙱᑦᑐᖅ ᐅᕝᕙᓘᓐᓃᑦ ᐃᖅᑲᓇᐃᔭᖃᑦᑕᖅᓯᒪᔭᕆᐊᖃᙱᑦᑐᖅ ᐱᒋᐊᕐᓂᐊᕐᓗᓂ. ᐊᔾᔨᒌᙱᑦᑐᑦ ᖁᕝᕙᕆᐊᕈᑏᑦ ᐊᒃᑐᐊᓂᓖᓪᓗ ᓴᖅᑭᑕᐅᔪᑦ −ᓯᓚᑦᑐᖅᓴᕐᕕᖕᒥ ᐱᓕᕆᐊᖑᓂᐊᖅᑐᑦ ᓂᕈᐊᖅᑕᐅᓯᒪᓕᖅᐳᑦ ᐃᑲᔪᖅᑐᐃᑦᑎᐊᖅᑐᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐅᑯᓇᓂ ᐱᓕᕆᖃᑕᐅᔪᓂᑦ ᐃᓄᐃᑦ ᓄᓇᖏᓐᓂ.

ᐋᒌᓯ 2019−ᒥ, ᐊᖏᖃᑎᒌᒍᑕᐅᒋᐊᙵᖅᓯᒪᔪᖅ ᐊᑎᓕᐅᖅᑕᐅᓚᐅᖅᐳᖅ ᐱᖓᓱᓂᑦ ᐱᓕᕆᖃᑎᒌᓂᑦ, ᐊᖅᑯᑎᒋᓂᐊᖅᑕᖓᓂᒃ ᐋᖅᑭᒃᓱᐃᓪᓗᑎᒃ ᓇᖕᒥᓂᖅᓱᕐᓂᕐᒧᑦ ᐱᓕᕆᐊᒃᓴᕆᓂᐊᖅᑕᖏᓐᓂᒃ ᑲᒪᒋᔭᖃᑦᑎᐊᕐᓂᕐᒧᑦ ᐊᐅᓚᑦᑎᓂᕐᒧᓪᓗ ᐊᒃᑐᐊᓂᓕᖕᓂᑦ ᓄᓇᕗᒻᒥ ᑭᒃᑯᑐᐃᓐᓇᑦ ᓄᓇᖁᑎᖏᓐᓂᒃ, ᐃᒪᖏᓐᓂᒃ, ᐱᔾᔪᑎᒃᓴᖏᓐᓂᒡᓗ ᓄᓇᕗᒻᒥ ᒐᕙᒪᑐᖃᒃᑯᓐᓂᙶᖅᑐᓂᑦ ᓄᓇᕗᑦ ᒐᕙᒪᖓᓄᐊᖅᑕᐅᔪᓂᑦ.

ᐊᖏᖃᑎᒌᒍᑎ ᐱᕙᓪᓕᐊᔾᔪᑕᐅᓕᓚᐅᖅᐳᖅ ᐊᓯᔾᔨᖅᐸᓪᓕᐊᓂᕐᒧᑦ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐱᕙᓪᓕᐊᑎᑦᑎᓂᕐᒧᑦ ᐸᕐᓇᒍᑕᐅᔪᒥᒃ ᓇᖕᒥᓂᖅᓱᕐᓂᕐᒧᑦ. ᑐᕌᒐᖃᓗᐊᖅᐳᑦ ᐅᓄᖅᓯᒋᐊᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᖅᑎᑦ ᓇᓂᑐᐃᓐᓇᑦᑎᐊᖅ ᐃᖅᑲᓇᐃᔮᒃᓴᓂᑦ ᓴᖅᑭᑎᑕᐅᓛᖅᑐᓂᒃ ᓄᓇᕗᑦ ᒐᕙᒪᖓᓂ ᓇᖕᒥᓂᖅᓱᖅᐸᓪᓕᐊᓂᕐᒧᑦ, ᐃᑲᔪᖅᑐᐃᓗᑎᒡᓗ ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐃᓂᒋᔭᐅᔭᕆᐊᓕᖕᓂᑦ ᐱᓕᕆᐊᒃᓴᕆᓂᐊᖅᑕᖏᑦ ᐱᐊᓂᒃᑕᐅᓇᓱᒡᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐱᔭᐅᔪᑦ.  ᐃᓄᙳᖅᓴᐃᕕᒃ ᓴᖅᑭᑎᑕᐅᓚᐅᖅᐳᖅ ᑐᕌᒐᕆᔭᐅᔪᓂᒃ ᑎᑭᑕᐅᔪᒪᔪᓂᒡᓗ ᑎᑭᐅᑎᖁᓪᓗᒋᑦ ᐸᕐᓇᒍᑎᖓᓂ.

ᑭᖑᓪᓕᖅᐹᒥ ᓄᓇᕗᒻᒥ ᓄᓇᖁᑎᖏᑦ ᐱᔾᔪᑎᒃᓴᖏᓐᓂᓪᓗ ᓇᖕᒥᓂᖅᓱᖅᐸᓪᓕᐊᓂᕐᒧᑦ ᐊᖏᕈᑎ ᖃᖓᑦᑎᐊᖅ ᐊᑎᓕᐅᖅᑕᐅᓚᐅᖅᐳᖅ ᐱᖓᓱᓂᑦ ᐱᓕᕆᖃᑎᒌᓂᑦ ᔮᓄᐊᕆ 18−ᒥ, 2024. ᓇᖕᒥᓂᖅᓱᕐᓂᖅ ᓴᖅᑭᑎᑦᑎᕗᖅ ᐃᑲᔪᖅᑐᐃᓪᓗᓂᓗ ᓯᕗᓪᓕᐅᔾᔭᐅᔪᒪᔪᓂᑦ ᓄᓇᕗᒻᒥ, ᐊᖏᓂᖅᓴᒥᒃ ᐊᐅᓚᑦᑎᔪᓐᓇᖅᓯᓪᓗᑎᒃ ᐃᓱᒪᓕᐊᓄᑦ ᓄᓇᓂᑦ ᐱᔾᔪᑎᒃᓴᓂᓪᓗ, ᐅᒃᑯᐃᖅᓯᓗᑎᒡᓗ ᓄᑖᓂ ᑮᓇᐅᔭᓕᐅᕈᑎᒃᓴᓂᑦ ᐱᕙᓪᓕᐊᔾᔪᑎᒃᓴᓂᓪᓗ ᓄᓇᕗᒻᒥᑦ.

"ᐅᐱᒍᓱᑦᑎᐊᖅᐳᖓ ᐱᓕᕆᖃᑎᒋᒐᑦᑎᒍᑦ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᐃᓄᙳᖅᓴᐃᕕᖕᒥ ᐱᓕᕆᐊᖑᔪᒥᑦ. ᐊᑐᓕᖅᑎᑕᐅᓂᖓ ᓄᓇᕗᒻᒥ ᓄᓇᖏᓐᓂ ᐱᔾᔪᑎᒃᓴᖏᓐᓂᓪᓗ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎ ᐱᒋᐊᕈᑕᐅᕗᖅ ᐃᓄᐃᑦ ᓄᓇᕗᒻᒥᐅᓕᒫᓪᓗ ᐱᕙᒌᔭᖅᓯᒪᑦᑎᐊᖁᓪᓗᒋᑦ ᐃᖅᑲᓇᐃᔮᒃᓴᓄᑦ ᓴᖅᑭᓛᖅᑐᓄᑦ. ᐊᖏᖃᑎᒌᒍᑎ ᐊᑎᓕᐅᖅᑕᐅᑎᓪᓗᒍ ᓇᖕᒥᓂᖅᓱᕐᓂᕐᒧᑦ ᐱᒋᐊᕈᑎᒋᓪᓚᕆᒃᐸᕗᑦ ᒐᕙᒪᓕᕆᓂᕐᒧᑦ ᐱᕙᓪᓕᐊᓂᕐᒥᑦ, ᑭᓯᐊᓂᓕ ᐅᓪᓗᒥ ᓯᕗᓂᒃᓴᑦᑎᓐᓄᑦ ᑕᐅᑐᓪᓚᕆᒃᐳᒍᑦ ᑖᓐᓇ ᐱᓕᕆᐊᒃᓴᖅ ᓴᖅᑭᑎᑕᐅᑎᓪᓗᒍ ᐃᓕᓐᓂᐊᖅᑎᑦ ᐃᖅᑲᓇᐃᔮᒃᓴᖏᓐᓄᑦ ᓄᓇᒥᑦ ᐱᔾᔪᑎᒃᓴᓂᓪᓗ ᐊᐅᓚᑦᑎᓂᕐᒧᑦ ᓄᓇᕗᒻᒥ."

ᒪᓕᒐᓕᐅᖅᑎ ᐲᔾᔭᐃ ᐊᕿᐊᕈᖅ, ᓯᕗᓕᖅᑎ ᓄᓇᕗᒻᒧᑦ

"ᐃᓄᐃᑦ ᑎᓕᐅᖅᐸᒃᑲ ᐊᑐᑦᑎᐊᖁᓪᓗᒋᑦ ᑖᔅᓱᒥᖓ ᐃᑲᔫᑎᒥᒃ ᐃᓄᙳᖅᓴᐃᕕᖕᒧᑦ ᐊᑐᐃᓐᓇᕈᖅᑎᑕᐅᔪᓂᑦ, ᐃᓕᓐᓂᐊᒃᑲᓐᓂᓕᕐᓗᑎᒃ ᕿᓂᕐᓗᑎᒡᓗ ᖁᕕᐊᓇᑦᑎᐊᖅᑐᓂᒃ ᐃᖅᑲᓇᐃᔮᒃᓴᓂᒃ ᓄᓇᒥᑦ ᐱᔾᔪᑎᒃᓴᓂᓪᓗ ᐊᐅᓚᑦᑎᓂᕐᒥᑦ ᐊᑐᐃᓐᓇᐅᓕᕐᓂᐊᖅᑐᓂᑦ ᐊᕐᕌᒍᓂ ᐊᒌᖅᑐᓂᑦ."

ᐊᖓᔪᖅᑳᖅ ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃᑯᓐᓄᑦ

"ᑲᓇᑕᐅᑉ ᒐᕙᒪᒃᑯᖏᑦ ᐅᐱᒍᓱᑦᑎᐊᖅᐳᑦ ᐃᓄᙳᖅᓴᐃᕕᖕᒥᑦ ᐃᑲᔪᖅᑐᐃᖕᒪᑕ ᐃᓄᖕᓄᑦ ᐱᓕᒻᒪᒃᓴᕈᑎᒃᓴᓂᑦ ᐊᑐᐃᓐᓇᐅᑎᑦᑎᑦᑎᐊᖁᓪᓗᒋᑦ ᑭᒡᒐᖅᑐᐃᔪᓐᓇᑦᑎᐊᖅᑐᓂᒃ ᐃᖅᑲᓇᐃᔭᖅᑎᖃᓕᖁᓪᓗᒋᑦ. ᐱᓕᕆᖃᑎᖃᐃᓐᓇᕐᓂᐊᖅᑐᒍᑦ ᐱᓕᕆᖃᑎᒌᓂᑦ ᐊᕐᕌᒍᓂ ᐱᖓᓱᓂᑦ ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᓄᓇᕗᑦ ᒐᕙᒪᖓᓂ ᐊᑐᓕᖅᑎᑦᑎᓂᐊᖅᑎᓪᓗᑕ ᓄᓇᕗᒻᒥ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎᒥᒃ ᐊᓯᔾᔨᖅᐸᓪᓕᐊᑦᑎᐊᖁᓪᓗᒍᓗ. ᐊᑐᖅᑕᐅᓚᐅᖅᓯᒪᙱᑦᑐᖅ ᐊᖏᖃᑎᒌᖕᓂᖅ ᓴᖅᑭᑎᑦᑎᓂᐊᖅᐳᖅ ᐅᑭᐅᖅᑕᖅᑐᒥ−ᐃᖅᑲᓇᐃᔮᓂᑦ, ᐱᓕᕆᐊᒃᓴᓂᑦ, ᑮᓇᐅᔭᓕᐅᕈᑎᒃᓴᓂᑦ, ᐊᓯᒃᑲᓐᓂᖏᓐᓄᓪᓗ ᐊᔪᖅᓴᙱᔾᔪᑎᒃᓴᓂᒃ ᐃᓄᖕᓄᑦ ᓄᓇᕗᒻᒥᐅᓕᒫᓄᓪᓗ, ᑭᖑᕚᒃᓴᖏᓐᓄᓪᓗ."

ᒪᓕᒐᓕᐅᖅᑎ ᑖᓐ ᕚᓐᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ

ᐃᓄᐃᑦ ᐱᓕᒻᒪᒃᓴᕈᒪᔪᑦ ᐃᖅᑲᓇᐃᔮᒃᓴᓄᑦ ᓄᓇᓂᑦ ᐱᔾᔪᑎᒃᓴᓂᓪᓗ ᐊᐅᓚᑦᑎᓂᕐᒧᑦ ᐃᕐᙲᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᑦ ᐅᕗᖓ @email. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᕆᓴᐅᔭᒃᑯᓪᓗ ᐃᓚᐅᔪᒪᒍᕕᑦ ᑎᑎᕋᕆᐊᓕᖕᒥᒃ ᐊᒻᒪ ᐃᓄᙳᖅᓴᐃᕕᒃ 2023-24−ᒥ ᐃᓕᓐᓂᐊᕐᓂᕐᒧᑦ ᐊᔪᕆᖅᓲᔾᔨᓯᒪᔪᖅ ᐃᑲᔫᑎᒃᓴᖅ, ᑕᑯᒋᐊᕐᓗᒍ.