ᓄᓇᕗᒻᒥᐅᑦ ᑲᑐᔾᔨᖃᑎᒌᒃᐳᑦ ᓄᓇᖅᔪᐊᒥ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐅᓪᓗᖓᓂ
ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ
ᓄᓇᕗᒻᒥᐅᑦ ᑲᑐᔾᔨᖃᑎᒌᒃᐳᑦ ᓄᓇᖅᔪᐊᒥ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐅᓪᓗᖓᓂ
ᐊᑦᑑᕝᕙ 10, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓐᓇᑦᑎᕗᑦ ᓄᓇᕗᒻᒥᐅᓂᒃ ᐃᓚᐅᖁᓪᓗᒋᑦ ᐃᓄᒐᓴᒡᔪᐊᓂ ᓄᓇᕐᔪᐊᕐᒥ ᐃᓕᑕᕆᔭᐅᑎᓪᓗᒍ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐅᓪᓗᖓᓐᓂᒃ.
ᓄᓇᕐᔪᐊᕐᒥ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐅᓪᓗᕆᔭᐅᒻᒪᑦ ᐃᖅᑲᐃᔪᑎ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐃᓘᓐᓇᑎᓐᓂᑦ ᐊᒃᑐᐃᓲᖑᒻᒪᑦ, ᐃᓅᕕᒋᓚᐅᖅᓯᒪᔭᑦᑎᓐᓂᑦ ᓄᓇᖃᕋᓗᐊᕈᑦᑕ, ᐱᐅᓯᖅᐳᑦ ᖃᓄᐃᑦᑑᒐᓗᐊᖅᐸᑦ ᐅᕝᕙᓗᓃᑦ ᐃᓕᖅᑯᓯᖃᑎᒌᖏᒃᑲᓗᐊᕈᑦᑕ. ᓄᓇᕐᔪᐊᕐᒥ
ᐃᓱᒪᒃᑯᑦ ᖃᓄᐃᙱᑦᑎᐊᓂᕐᒧᑦ ᐅᓪᓗᕆᔭᐅᑎᓪᓗᒍ ᐃᖅᑲᐃᓯᔾᔪᑎᑦᑎᐊᕙᐅᕗᖅ ᐅᕙᑦᑎᓐᓄᑦ ᐅᕙᑦᑎᓐᓂ ᑲᒪᒋᑦᑎᐊᕆᐊᖃᕐᓂᑦᑎᓐᓂ ᐃᓅᖃᑎᑦᑎᓐᓂᒡᓗ ᑲᒪᑦᑎᐊᕆᐊᖃᕐᓂᑦᑎᓐᓂ. ᐊᑐᓂᒃ ᐃᓄᐃᑦ ᐊᑲᐅᙱᓕᐅᕈᑎᖃᕈᓐᓇᖅᑐᑦ ᐃᓱᒪᒥᒍᑦ ᖃᓄᐃᒍᑎᖃᕐᓂᕐᒧᑦ ᖃᖓᑐᐃᓐᓇᑦᑎᐊᒃᑯᑦ ᐃᓅᓯᕐᒥᑦ ᐊᑐᖅᑎᓪᓗᒋᑦ ᐊᒻᒪ ᐱᒻᒪᕆᐅᕗᖅ ᖃᐅᔨᒪᓗᒋᑦ ᐃᓄᐃᑦ ᐊᑐᓂᒃ ᐊᔾᔨᒌᙱᑦᑐᑦ ᐊᑐᕐᒪᑕ.
ᓄᕙᕐᔪᐊᕐᓇᖅ-19 ᑭᒃᑯᑐᐃᓐᓇᕐᓄᑦ ᖃᓂᒪᓐᓇᐅᔪᖅ ᐊᑐᖅᑎᓪᓗᒍ, ᑕᖅᑮᑦ ᐊᓂᒍᖅᑐᑦ ᐱᔭᕐᓂᖏᑦᑐᓂᑦ ᐊᔅᓱᕈᕐᓇᖅᑐᓂᑦ ᓴᖅᑭᑦᑎᑦᑎᓯᒪᔪᖅ, ᑕᐃᒫᓪᓗ ᐊᑐᖅᑎᓪᓗᑎᒍ ᐃᓕᓐᓂᐊᖅᑎᑦᑎᔾᔪᑕᐅᓪᓗᓂ ᐅᕙᑦᑎᓐᓄᑦ ᐱᒻᒪᕆᐅᓂᖓᓂᒃ ᑲᓱᖅᓯᒪᓂᖃᕆᐊᖃᕐᓂᑎᓐᓂᑦ.
ᐅᕙᑦᑎᓂᒃ ᑐᕚᕆᖃᑦᑕᐅᑎᓲᖑᒐᑦᑕ ᐃᑲᔪᖅᑎᒋᓐᓂᕐᒧᑦ ᐊᒻᒪ ᓴᙵᑦᑎᒋᐊᒃᑲᓐᓂᕐᒧᑦ ᓄᓇᖅᑲᑎᒌᖑᓪᓗᑕ ᐱᖁᑎᒌᓗᑕ. ᐱᓕᕆᖃᑎᒌᓐᓂᒃᑯᑦ, ᐅᕙᒍᑦ ᐊᑐᓂᒃ ᓴᖅᑭᔮᕆᐊᖅᑎᑦᑎᒃᑲᓐᓂᕈᓐᓇᖅᑐᒍᑦ ᐃᑲᔪᖅᑐᐃᕐᓂᕐᒥᑦ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐊᒻᒪ
ᖃᓄᐃᙱᑦᑎᐊᕋᓱᐊᕐᓂᒨᖓᔪᓂᑦ ᖃᓄᐃᓕᐅᕈᑕᐅᔪᓐᓇᖅᑐᓂᑦ ᒪᑯᓂᖓ ᐃᓚᖃᖅᑐᑎᑦ:
- ᐃᓄᑦᑎᐊᕙᐅᕙᒡᓗᑕ ᐊᓯᑦᑎᓐᓄᑦ ᐊᒻᒪ ᐃᖅᑲᐅᒪᓇᓱᒃᐸᒡᓗᑕ ᐃᓅᖃᑎᕗᑦ ᐊᒃᓱᕈᕐᓇᖅᑐᓂᒃ ᐱᓕᕆᐊᒃᓴᖃᐅᕐᒪᑕᑦᑕᐅᖅ ᖃᐅᔨᒪᖏᑦᑕᑦᑎᓐᓂᑦ.
- ᐊᑐᐃᓐᓇᐅᓗᑕ ᑭᓇᑐᐃᓐᓇᖅ ᐅᖃᐅᓯᖃᕆᐊᖃᓕᕌᖓᑕ ᐱᔾᔪᑎᒋᔭᒥᖕᓂᒃ.
- ᐃᓱᒪᐃᑦ ᐅᒃᑯᐃᖓᑏᓐᓇᕐᓗᒍ ᐅᖃᐅᓯᐅᔪᓄᓪᓗ ᐃᖅᑲᖅᑐᐃᕙᓪᓕᐊᖏᓪᓗᑎᑦ ᐃᑲᔪᖃᑎᒌᑦᑎᓪᓗᑕ.
- ᐃᓂᒃᓴᖃᖅᑎᑦᑎᓗᓂ ᐃᓄᖕᓄᑦ ᐊᑦᑕᕐᓇᙱᑦᑐᒦᓐᓂᐊᕐᒪᑕ, ᐃᒃᐱᒋᔭᐅᑦᑎᐊᕐᓗᑎᒃ, ᑐᓴᖅᑕᐅᓗᑎᒡᓗ.
- ᑲᔪᖏᖅᓴᐃᖃᑎᒌᓪᓗᑕ ᑖᒃᑯᐊ ᐊᔅᓱᕈᓐᓇᖅᑐᒦᑦᑐᑦ ᖃᐅᔨᒋᐊᖅᐸᓪᓗᒋᑦ ᐊᒻᒪ ᐃᖅᑲᐅᒪᓗᑕ ᑲᙳᓇᖅᑑᖏᒻᒪᑦ ᐃᑲᔪᖅᑕᐅᔪᒪᓗᓂ.
ᐃᑲᔪᖅᑕᐅᔭᕆᐊᖃᕈᕕᑦ ᐃᑲᔪᖅᑕᐅᔭᕆᐊᓕᖕᒥᓪᓘᓐᓃᑦ ᖃᐅᔨᒪᒍᕕᑦ, ᐅᖃᓪᓚᖃᑎᖃᕆᑦ ᐱᖃᓐᓇᕆᔭᕐᓄᑦ, ᖃᑕᙳᑎᖕᓄᑦ, ᐃᓕᓴᐃᔨᒧᑦ, ᐃᓅᓯᓕᕆᔨᒧᑦ ᐅᕝᕙᓘᓐᓃᑦ ᐃᓐᓇᕐᒧᑦ. ᐊᑭᖃᙱᑦᑐᖅ, ᑐᓴᖅᑕᐅᔾᔮᙱᑦᑐᓂᑦ ᐃᓱᒪᒧᑦ ᐅᐃᕆᓯᒪᓂᖕᒧᓪᓗ ᐃᑲᔪᖅᑎᖃᖅᐳᑦ ᐋᓐᓂᐊᕕᖕᓂᑦ.
ᑭᓇᐅᓂᕐᓂ ᖃᐅᔨᔭᐅᙱᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖄᓚᓗᑎᑦ:
- ᓄᓇᕗᑦ ᑲᒪᑦᑎᐊᖅᑐᖅ ᐅᖄᓚᐅᑖᓄᑦ ᐅᕗᖓ ᐊᑭᖃᖏᑦᑐᖅ 1-800-265-3333 ᐅᕝᕙᓘᓐᓃᑦ
- 867-979-3333 (ᐊᑐᐃᓐᓇᐅᔪᑦ ᐃᑲᕐᕋᓄᑦ 24−ᓄᑦ).
- ᐊᒃᓱᕈᕐᓇᖅᑐᓄᑦ ᐱᔨᑦᑎᕋᖅᑎᑦ ᑲᓇᑕᒥ – ᖃᕆᓴᐅᔭᒃᑯᑦ ᐅᖃᖃᑎᖃᕆᑦ www.crisisservicescanada.ca, ᐅᖃᓗᒡᓗᑎᑦ, ᐅᕝᕙᓘᓐᓃᑦ ᐅᖃᓘᑎᕋᓛᒃᑯᑦ ᑎᑎᕋᕐᓗᑎᑦ 1-833-456-4566.
- ᓱᕈᓯᕐᓄᑦ ᐅᖄᓚᕕᔅᓴᖅ ᐅᕗᖓ 1-800-668-6868, ᑎᑎᕋᕐᓗᑎᑦ ᐅᖄᓚᐅᑎᕋᓛᒃᑯᑦ 'ᐅᖃᖃᑎᖃᕐᓂᖅ' ᐅᕗᖓ 686868, ᐅᕙᓗ ᑎᑎᕋᖃᑦᑕᐅᑎᓗᓯ ᐃᕐᖐᓐᓇ ᑕᑯᔅᓴᒥᑦ ᐅᕙᓂ www.kidshelpphone.ca.
ᐃᕝᕕᑦ ᖃᐅᔨᒪᔭᕐᓂᓪᓘᓐᓃᑦ ᑐᐊᕕᕐᓇᖅᑐᖃᓕᕐᓂᖅᐸᑦ, ᐸᓖᒃᑯᓐᓄᑦ ᐅᖄᓚᓗᑎᑦ, ᐅᕙᓗ ᑖᓐᓇ ᐃᓄᒃ ᐋᓐᓂᐊᕕᔅᓯᓐᓄᕈᑎᓗᒍ ᐅᕝᕙᓘᓐᓃᑦ ᐋᓐᓂᐊᕕᓕᐊᕈᑎᑲᐅᑎᒋᓗᒍ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
@email