ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᔭᓄᐊᕆ 7, 2021

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᔭᓄᐊᕆ 7, 2021

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᐅᓪᓗᒥ, ᓄᑖᒥᒃ ᓄᕙᒡᔪᐊᕐᓇᖅ-19−ᓕᖕᒥᒃ ᐱᑕᖃᙱᓚᖅ ᓄᓇᕗᒻᒥ, ᓱᓕ ᐱᑕᖃᙱᑦᑐᖅ ᐆᒪᔪᒥᒃ ᐱᖃᖅᑐᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 5847−ᖑᓕᖅᑐᑦ. 388 ᐃᓄᐃᑦ ᒫᓐᓇ ᖃᐅᔨᓴᖅᑕᐅᕙᓪᓕᐊᕗᑦ.

ᐃᑉᐸᒃᓴᖅ, ᐃᖃᓗᐃᑦ ᐃᓐᓇᒃᑯᕕᐊᓂ ᑲᐱᓯᑲᑕᒃᐸᓪᓕᐊᓕᓚᐅᖅᐳᒍᑦ. ᐅᓄᖅᑐᒻᒪᕆᐊᓗᖕᓂᒃ ᐃᓄᖕᓂᒃ ᖁᔭᓕᔭᒃᓴᖃᕐᓂᐊᖅᑐᒍᑦ ᑕᖅᑭᓂ ᐊᒡᒋᖅᑐᓂᒃ, ᑭᓯᐊᓂ ᓇᓗᓇᐃᖅᓯᔪᒪᕗᖓ ᐅᑯᓂᖓ ᓲᓯ ᐱᐅᔅ, ᑐᕆᔅᑕ ᐱᐊᓇᑦ, ᐊᐃᓖᑦ ᐋᔅᑐᕆᐊ, ᔭᓂ ᐱᒐᓐ, ᑯᕆᒡᑏᓐ ᕼᐊᑦᑎᓴᓐ, ᓴᐃᓚ ᓇᐅᓪᓚᖅ ᐃᖅᑲᓇᐃᔭᖅᑎᖏᓪᓗ ᐊᖏᖅᓯᒪᑦᑎᐊᓚᐅᕐᒪᑕ, ᑲᒪᑦᑎᐊᖅᖢᑎᒃ ᐊᒻᒪ ᐱᓕᕆᑦᑎᐊᖅᑐᒻᒪᕆᐊᓘᓪᓗᑎᒃ ᐱᒻᒪᕆᐊᓗᖕᒥᒃ ᐱᓕᕆᕙᓪᓕᐊᓕᓵᖅᑎᓪᓗᒋᑦ. ᖁᔭᓐᓇᒦᒃ ᖃᓄᑐᐃᓐᓇᖅ ᐱᓕᕆᓚᐅᕋᔅᓯ.

ᖃᕆᓴᐅᔭᒃᑯᑦ ᐅᓄᖅᑐᑦ ᐅᖃᐅᓯᒃᓴᒥᓂᒃ ᐊᐱᖅᑯᑎᒃᓴᒥᓂᒡᓗ ᑎᑎᕋᑲᑕᓚᐅᖅᐳᑦ ᐅᓪᓗᓂ ᐊᓂᒍᓵᖅᑐᓂᑦ ᑖᔅᓱᒪ ᑲᐴᑎᐅᑉ ᒥᒃᓵᓄᑦ ᐊᒻᒪ ᖃᓄᐃᒻᒪᑦ ᒫᓐᓇ ᑲᐱᔭᐅᔾᔮᙱᒻᒪᖔᑦ. ᑭᐅᔭᕆᐊᒃᓴᖅ ᓇᓗᓇᙱᑦᑐᖅ − ᓱᓕ ᒫᓐᓇ ᑲᐱᔭᐅᔭᕆᐊᖃᙱᓐᓇᒪ. ᐊᒃᑐᖅᑕᐅᓴᕋᐃᑦᑐᑦ ᐊᒻᒪ ᐃᓐᓇᕆᔭᕗᑦ ᑲᐱᔭᐅᖅᑳᖅᑎᑦᑕᕆᐊᖃᕋᑦᑎᒍᑦ. ᐊᑦᑕᕐᓇᖅᑐᒦᙱᑉᐳᖓ, ᐊᓐᓇᐅᒪᔾᔪᑎᖃᑦᑎᐊᖅᖢᖓ ᐊᒻᒪᓗ ᓄᔭᒃᑲ ᖀᖃᐅᕋᓗᐊᖅᖢᑎᒃ, ᓱᓕ ᐃᓐᓇᐅᙱᓐᓇᒪ.

ᑲᐴᑎ ᑕᐃᒎᓯᓕᒃ Moderna ᐊᑦᑕᕐᓇᙱᑉᐳᖅ  ᐊᑑᑎᖃᑦᑎᐊᖅᖢᓂ. ᖃᐅᔨᓴᖅᑕᐅᕐᔪᐊᖅᓯᒪᕗᖅ ᐊᐅᓚᑕᐅᑦᑎᐊᖅᓯᒪᓪᓗᓂᓗ ᓄᓇᕐᔪᐊᓕᒫᑦᑎᐊᖅ. ᑭᒃᑯᑐᐃᓐᓇᑦᑎᐊᑦ ᖃᐅᔨᓇᓱᖁᕙᒃᑲ Moderna ᑲᐴᑎᐅᑉ ᒥᒃᓵᓄᑦ, ᐃᒪᐃᓐᓂᕋᐃᙱᖔᕐᓗᑎᒃ ᐊᒻᒪ ᑲᑉᐱᐊᓵᕆᙱᖔᕐᓗᑎᒃ.

ᐃᖅᑲᓇᐃᔭᖅᑎᒃᑲᓗ ᐅᕙᖓᓗ ᐊᔪᕈᓐᓃᑐᐊᕈᑦᑕ, ᑲᐱᔭᐅᓂᐊᖅᐳᒍᑦ, ᐃᓕᔅᓯᓐᓄᓕᒫᕐᓗ ᑐᓴᖅᑎᑦᑎᓛᖅᐳᖓ ᐊᑐᖅᑕᓐᓂᒃ.

ᑕᐃᒪᐃᙵᑕᒫ, ᐳᐃᒍᖅᑕᐃᓕᒋᔅᓯ ᐋᓐᓂᐊᖅᑐᓕᕆᔨᒃᑯᓐᓂ ᐊᑐᖁᔭᐅᔪᑦ ᓄᖅᑲᖅᑎᑕᐅᔾᔮᙱᒻᒪᑕ ᕿᓚᒻᒥᐅᔪᒃᑯᑦ. ᐊᒡᒐᕗᑦ ᐅᐊᓴᐃᓐᓇᖃᑦᑕᕆᐊᖃᖅᑕᕗᑦ, ᖃᓂᒌᓗᐊᖅᑕᐃᓕᕙᒡᓗᑕ, ᒪᑐᐊᖅᓯᒪᐃᓐᓇᖅᐸᒡᓗᑕ ᐊᒻᒪ ᐅᔾᔨᖅᓱᑦᑎᐊᖏᓐᓇᕐᓗᑕ. ᑖᓐᓇ ᑲᐴᑦ ᓄᕙᒡᔪᐊᕐᓇᖅ-19−ᒥᑦ ᐃᓱᓕᑎᑦᑎᔾᔮᙱᑉᐳᖅ, ᐱᓕᕆᐊᒃᓴᐅᓂᐊᓕᖅᑐᕐᓕ ᓄᖅᑲᖓᑎᑦᑎᓇᓱᒡᓗᑕ ᓄᕙᒡᔪᐊᕐᓇᒥᑦ. ᐃᓅᑦᑎᐊᕆᔅᓯ, ᖃᓄᐃᙱᑦᑎᐊᕐᓗᓯ ᐊᒻᒪ ᐅᔾᔨᖅᑐᑦᑎᐊᖏᓐᓇᕐᓗᓯ ᓄᓇᑦᑎᓐᓂ.

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᒐᒃᓴᖏᑦ ᓄᑖᑦ:

ᐅᓪᓛᒃᑯᑦ,

ᐃᑉᐸᒃᓴᖅ ᓄᓇᕗᒻᒥ ᐊᐅᓚᑦᑎᓚᐅᖅᐳᑦ ᓯᕗᓪᓕᖅᐹᑦᑎᐊᒥ ᑲᐴᕋᐃᓪᓗᑎᒃ. ᐅᖁᒪᐃᓐᓂᕐᓂᐊᕐᕕᖕᒥ ᐃᖢᐊᖅᓴᐃᔩᑦ 21-ᓂᒃ ᐃᓐᓇᒃᑯᕕᖕᒥ ᐊᖏᕐᕋᖃᖅᑐᓂᒃ ᑲᐱᓯᓚᐅᖅᐳᑦ 28-ᖑᓪᓗᑎᒃ ᐊᖏᕐᕋᖃᖅᑐᑦ ᐃᖅᑲᓇᐃᔭᖅᑎᖏᓪᓗ. 8−ᑲᓐᓂᕐᓂᒃ ᑲᐱᓯᓚᐅᖅᐳᑦ ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᐅᑉ ᐃᖅᑲᓇᐃᔭᖅᑎᖏᓐᓂᒃ.  ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᒃᑯᑦ ᐅᖃᓚᐅᖅᐳᑦ ᖃᓄᐃᑦᑐᖃᓚᐅᙱᑦᑐᖅ ᑲᐱᓯᑲᑕᒃᑎᓪᓗᒋᑦ ᐊᒻᒪ ᐊᑲᐅᙱᓕᐅᑐᖃᕐᓂᖓᓂᒃ ᐅᖃᐅᓯᐅᔪᖃᓚᐅᙱᖦᖢᓂ.

ᑕᒪᓐᓇ ᑐᓴᕈᒥᓇᖅᑐᖅ. ᑕᐃᒪᓕ ᐃᓐᓇᒃᑯᕕᖕᒥᐅᑦ ᐃᖃᓗᖕᓂ ᖃᒡᓕᕚᓪᓕᒃᑲᓐᓂᖅᐳᑦ ᓄᕙᒡᔪᐊᕐᓇᖅ-19−ᒧᑦ ᓴᐳᔾᔭᐅᓂᕐᒧᑦ ᐊᒻᒪ ᖃᒡᓕᕚᓪᓕᒃᑲᓐᓂᖅᖢᑎᒃ ᖃᑕᙳᑎᒥᓂᒃ ᐱᖃᓐᓇᕆᔭᖏᓐᓂᒡᓗ ᐳᓛᖅᑕᐅᖃᑦᑕᕈᓐᓇᖅᓯᓛᕐᓂᖏᓐᓂᒃ ᑭᒡᓕᖃᖅᑎᑕᐅᙱᓪᓗᑎᒃ ᐅᕝᕙᓘᓐᓃᑦ ᐃᓱᒫᓗᒋᐊᖃᙱᓪᓗᑎᒃ. 

ᖁᕕᐊᓱᑦᑎᐊᖅᑐᒍᑦ ᐱᕕᖃᖅᑎᑦᑎᒃᑲᓐᓂᕈᓐᓇᕋᑦᑕ ᑲᐱᔭᐅᔪᒪᔪᓂᒃ ᐃᓐᓇᕐᓂᒃ ᐃᒡᓗᓕᖕᒥ, ᐅᖅᓱᖅᑑᕐᒥ, ᐊᕐᕕᐊᓂ ᐊᒻᒪ ᐃᖃᓗᒃᑑᑦᑎᐊᒥ, ᐱᓇᓱᐊᕈᓯᐅᓂᐊᖅᑐᖅ ᐱᒋᐊᕐᓗᓂ.

ᐊᓯᒃᑲᓐᓂᖏᓐᓂᒃ ᐋᓐᓂᐊᕐᕕᖕᒥ ᐋᖅᑭᒃᓯᓛᕐᒥᔪᑦ ᐅᓪᓗᖏᑦ ᐊᒻᒪ ᑲᐴᑎᑦ ᐅᓄᕐᓂᖏᑦ ᐊᐅᓪᓚᖅᑎᑕᐅᓂᐊᖅᑐᑦ ᑭᖑᓪᓕᕐᒥ ᓇᓗᓇᐃᖅᑕᐅᓯᒪᓕᖅᐸᑕ. ᐱᕕᖃᖅᑎᑦᑎᓕᕐᓂᐊᖅᐳᒍᑦ ᓄᓇᕗᒻᒥᐅᓂᒃ ᐅᓪᓗᖏᓐᓂᒃ ᐋᖅᑭᒃᓱᐃᓗᑕ ᐃᓂᒋᓂᐊᖅᑕᖓᓂᒡᓗ ᑭᖑᓪᓕᕐᒥ ᑲᐱᓯᑲᑕᓛᖅᑐᓄᑦ ᐊᒻᒪ ᐸᕐᓇᒃᓯᒪᔭᕗᑦ ᐋᖅᑭᒋᐊᕈᓐᓇᕐᓗᓂ ᑲᐴᑎᑦ ᓂᕆᐅᒋᔭᕗᑦ ᐅᓄᕐᓂᕆᓂᐊᖅᑕᖏᑦ ᐱᔪᓐᓇᙱᒃᑯᑦᑎᒍᑦ.

ᑕᐃᒪᐃᒻᒪᑦ ᑐᕌᒐᖃᕐᓂᐊᖅᐳᒍᑦ ᐃᓄᐃᑦ ᐅᓄᖅᑐᑦ ᑲᐱᔭᐅᖁᓪᓗᒋᑦ ᑲᐴᑎᑦᑎᓐᓄᑦ ᓈᒻᒪᒃᑐᓂᒃ, ᓄᓇᓕᖕᓂ ᐱᒋᐊᕈᑎᖃᕐᓗᑕ ᐅᓗᕆᐊᓇᖅᑐᒦᓐᓂᖅᓴᓂᒃ ᐃᓄᖕᓂᑦ, ᓲᕐᓗ ᐃᓐᓇᒃᑯᕕᖃᖅᑐᓂᒃ, ᓄᓇᓕᖕᓂ ᓄᕙᕐᔪᐊᕐᓇᖅ-19−ᒥᒃ ᓇᓗᓇᐃᖅᑕᐅᑐᐃᓐᓇᕆᐊᖃᕐᓂᖅᓴᓂᒃ ᐊᒻᒪ ᐊᐃᑦᑐᕐᓗᐃᑐᐃᓐᓇᕆᐊᖃᕐᓂᒃᓴᓂᒃ ᑕᒪᐃᓐᓂᒃ ᓄᓇᓕᖕᓂ ᖃᓂᒋᔭᖏᓐᓂᒡᓗ ᓄᓇᓕᖕᓂ. ᐊᑐᓂ ᐋᓐᓂᐊᕐᕖᑦ ᐃᓐᓇᓕᒫᓂᒃ ᐃᖢᐊᖅᓴᐃᔨᓂᒡᓗ ᓄᓇᓕᖕᓂ ᑲᐱᔭᐅᔪᓐᓇᖅᑎᑦᑎᓂᐊᖅᐳᑦ.

ᓄᓇᕗᒻᒥᐅᑦ ᑐᓴᐅᒪᑏᓐᓇᕐᓂᐊᖅᐸᕗᑦ ᑲᐱᔭᐅᕙᓪᓕᐊᓂᐊᖅᑐᑦ ᒥᒃᓵᓄᑦ, ᖃᖓ ᐋᓐᓂᐊᕐᕕᖕᒥ ᑲᐱᓯᑲᑕᖕᓂᐊᕐᒪᖔᑦ ᐊᒻᒪ ᖃᔅᓯᓂᒃ ᑲᐴᑎᓂᒃ ᐊᐅᓚᑦᑎᓯᒪᓕᕐᒪᖔᑦ. ᓄᓇᕗᒻᒥᐅᑦ ᖃᐅᔨᒪᑦᑎᐊᖁᒋᕙᒃᑲ Moderna ᑲᐴᑦ ᐊᑦᑕᕐᓇᙱᒻᒪᑦ. ᖃᐅᔨᒪᔪᖓ ᑕᒪᓐᓇ ᐅᖃᐅᓯᐅᕈᓘᔭᑲᑕᖕᓂᖓᓂᒃ ᓇᓗᓕᐅᒪᔾᔪᑕᐅᓕᖅᖢᓂ, ᑭᓯᐊᓂ ᐅᓇ ᐱᔾᔪᑎᒋᔭᐅᔪᓐᓇᖅᑐᑐᐊᖅ ᑲᐱᔭᐅᔭᕆᐊᖃᙱᑦᑐᓄᑦ ᑲᐴᑎᐅᑉ ᐃᓚᖓᓂᒃ ᓈᒻᒪᒃᓴᙱᑦᑐᑦ. ᐳᕙᒡᓗᓚᐅᖅᓯᒪᒍᕕᑦ, ᐅᕝᕙᓘᓐᓃᑦ ᑳᓐᓱᖃᓚᐅᕈᕕᑦ, ᑲᐴᑦ ᓱᓕ ᐊᑦᑕᕐᓇᙱᑉᐳᖅ ᓈᒻᒪᒃᖢᓂᓗ.

ᖁᔭᓐᓇᒦᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᔪᒪᓪᓗᑎᒃ ᓄᓇᕗᒻᒥᐅᓂᒃ ᓄᕙᒃᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus

ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ: https://www.gov.nu.ca/health/information/nunavuts-path

ᐊᒡᒋᖅᐸᓪᓕᐊᔪᑦ ᓄᓇᓕᖕᓂ ᑲᐱᓯᑲᑕᖕᓂᐊᖅᑐᑦ

ᐃᓐᓇᒃᑯᕕᖕᒦᑦᑐᑦ ᐃᓗᐊᖅᓴᖅᑕᐅᓃᑦ ᓄᓇᓕᖕᓂ ᐱᔾᔪᑎᖃᓪᓗᐊᑕᕐᓂᐊᖅᐳᑦ ᐋᓐᓂᐊᕐᕕᖕᒥ  ᐃᖅᑲᓇᐃᔭᖅᑎᒋᔭᐅᔪᓂᑦ ᑕᐃᑯᙵᖅᑐᓂᒃ ᑲᐴᑎᒥᒃ ᐊᐅᓚᑦᑎᔭᖅᑐᖅᑐᓂᒃ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐃᓐᓇᒃᑯᕕᖕᒧᐊᑲᐅᑎᒋᖃᑦᑕᕐᓂᐊᖅᐳᑦ ᑲᐱᓯᔭᖅᑐᕐᓇᖅᓯᒃᐸᑦ ᐅᓪᓗᖏᓐᓂᒃ.

ᐊᕐᕕᐊᑦ (ᐃᓂᒋᓂᐊᖅᑕᖓ ᐊᓯᔾᔨᖅᑕᐅᔪᖅ)

• ᓇᓂ: ᐱᙳᐊᕐᕕᖕᒥ
• ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔭᓄᐊᕆ 14−ᒥᑦ 18−ᒧᑦ (ᓴᓇᑦᑕᐃᓕ ᑭᑭᑕᐅᓗᓂ). 
• ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 11-15. 
• ᖃᔅᓯᒧᐊᖅᐸᑦ: 8:30 ᐅᓪᓛᒃᑯᑦ – 9 ᐅᓐᓄᒃᑯᑦ
• ᐃᓂᒃᓴᓕᐅᕈᑎ: ᐄ.
• ᐅᖃᓗᒡᕕᒃᓴᖅ 867-857-3100

ᐃᖃᓗᖕᓂ ᐃᓐᓇᒃᑯᕕᒃ

• ᓇᓂ: ᐃᓇᒃᑯᕕᖕᒥ.
• ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔭᓄᐊᕆ 6
• ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 3.

ᐃᒡᓗᓕᖕᒥ ᑭᒃᑯᑐᐃᓐᓇᓂᒃ ᑲᐱᓯᓂᖅ

• ᓇᓂ:  ᐃᒡᓗᓕᖕᒥ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᒃ.
• ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔮᓄᐊᕆ 11 ᐊᒻᒪᓗ 12. 
• ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 8−9. 
• ᖃᔅᓯᒧᐊᖅᐸᑦ: 9:00ᒥᑦ ᐅᓪᓛᒃᑯᑦ 9:00ᒧᑦ ᐅᓐᓄᒃᑯᑦ
• ᐋᓐᓂᐊᕐᕕᒃ ᖃᓄᐃᑦᑑᓂᖓ; ᐋᓐᓂᐊᕕᖕᒧᑦ ᐃᓯᒥᐊᖅᑐᑦ.
• ᐅᖃᓗᒡᓗᑎᑦ 867-934-2100−ᒧᑦ

ᐅᖅᓱᖅᑑᕐᒥ ᑭᒃᑯᑐᐃᓐᓇᓂᒃ ᑲᐱᓯᓂᖅ

• ᓇᓂ: ᕿᕿᖅᑕᖅ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᒃ. 
• ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔮᓄᐊᕆ 11 ᐊᒻᒪᓗ 12.
• ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 8−9.
• ᖃᔅᓯᒧᐊᖅᐸᑦ: 8:30ᒥᑦ ᐅᓪᓛᒃᑯᑦ 9:00ᒧᑦ ᐅᓐᓄᒃᑯᑦ
• ᐋᓐᓂᐊᕐᕕᒃ ᖃᓄᐃᑦᑑᓂᖓ; ᐃᓂᒃᓴᓕᐅᕐᓗᓂ.
• ᐅᖃᓗᒡᓗᑎᑦ 867-360-7441−ᒧᑦ

ᐃᖃᓗᒃᑑᑦᑎᐊᒥ ᑭᒃᑯᑐᐃᓇᓂᒃ ᑲᐱᓯᓂᖅ

• ᓇᓃᓐᓂᖏᑦ ᓇᓗᓇᐃᖅᑕᐅᓇᔭᖅᑐᑦ
• ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔭᓄᐊᕆ 14−ᒥᑦ 16−ᒧᑦ (ᑖᒃᑯᓇᓂ ᐅᓪᓘᖕᓂ)
• ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 11-13.
• ᖃᔅᓯᒧᐊᖅᐸᑦ: 8:30 ᐅᓪᓛᒃᑯᑦ – 9 ᐅᓐᓄᒃᑯᑦ
• ᐋᓐᓂᐊᕐᕕᒃ ᖃᓄᐃᑦᑑᓂᖓ; ᐃᓂᒃᓴᓕᐅᕐᓗᓂ.
• ᐅᖃᓗᒡᕕᒃᓴᖅ 867-983-4500.

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏᑦ:  ᔮᓄᐊᕆ 7

ᓄᕙᕐᔪᐊᕐᓇᖅ-19−ᒧᑦ ᓄᓇᓕᖕᓂ ᐱᓕᖕᓂ ᑭᒡᓕᓯᓂᐊᖅᑕᐅᓯᒪᔪᑦ: ᔮᓄᐊᕆ 7

ᖃᐅᔨᓴᕐᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᒫᓐᓇᒧᑦ ᑎᑭᖦᖢᒍ: ᔮᓄᐊᕆ 7

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᐅᑏᑦ:

ᔮᓄᐊᕆ 7−ᒥ ᐱᒋᐊᖅᖢᓂ, 10757−ᓂᒃ ᑐᒃᓯᕋᖅᑐᖃᓚᐅᖅᐳᖅ, 7231−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.